Na aumai e Mataio le gafa o Iesu Keriso, ma sa tautino mai e se agelu le tulaga paia faamatua o Iosefa. Sa faimalaga mai le au makoi mai Sasae e saili ma ifo atu i le tamameamea o Iesu. Sa ta’u atu ia Iosefa i se miti e ave lona aiga i Aikupito ia aloese ai mai le fasiotiga e Herota o tamaiti i Peteleema.
Faaali se ata o ou matua, ma fesili i le vasega pe mafai ona latou ta’u maia ni uiga e te maua mai ia i la’ua. E mafai foi ona e valaaulia ni nai tagata e aumai ni ata o o latou matua ma fai i le vasega e mate mai po o matua o ai. Fai i le vasega e talanoaina e le tasi ma le isi ni uiga latou te maua mai o latou matua (e pei o lanu o mata, lanu o le lauulu, po o le umi).
Valaaulia le vasega ao latou suesue i le Mataio 1–2}e vaavaai mo upumoni e uiga i matua o le Faaola ma uiga sa Ia maua mai ia i la’ua. O lea gaoioiga e tatau ona saunia ai le vasega ia malamalama i upumoni o Iesu Keriso o le Alo paia o le Tama Faalelagi ma Maria, ma o le Toatasi na Fanaua e le Tama i le tino.
Faamatala o le Mataio 1:1–17o lo o lisi mai ai tuaa o le Faaola. Ta’u i ai o le fuaiupu 1o loo ta’u mai ai o Iesu Keriso e tupuga mai ia Tavita ma e o Aperaamo foi.
Faamatala o valoaga i le Feagaiga Tuai o loo tautino mai ai o le Mesia o le a tupuga mai ia Tavita (tagai 2 Samuelu 7:12–13; Isaia 9:6–7; Ieremia 23:5–6) ma o se fanau a Aperaamo o le a manuia ai atunuu uma o le lalolagi” (Kenese 22:18; tagai foi Aperaamo 2:11). Na manao Mataio ia iloa e le aufaitau o Iesu na faataunuu ai valoaga a le Feagaiga Tuai e faatatau i le Mesia (tagai Mataio 1:22–23; 2:5, 15, 23; 26:55–56). O le gafa o loo tuuina mai i le Mataio 1:1–17ua faaalia ai o Iesu o le Mesia na folafolaina mai ma o le suli moni i le nofoalii o Tavita.
Valaaulia se tamaitiiti aoga e faitau leotele le Mataio 1:16. Fai i le vasega e mulimuli ai ma vaavaai mo se faalaniga ua tuu atu ia Iesu ma lipoti mai mea latou te maua.
Faamatala o le upuKeriso o le ituaiga faa-Eleni o le upu Aramaika Mesia, o lona uiga “o le ua faauuina.”
I le muai olaga, o le a le mea na faauuina Iesu Keriso e filifili e fai? (Na faauuina o ia e le Tama Faalelagi e avea ma o tatou “Perofeta, Faitaulaga, Tupu, ma le Laveai” [Taiala i Tusitusiga Paia, “Mesia,” scriptures.lds.org; tagai foi Bible Dictionary, “Anointed One”].)
Ua tautino mai e se agelu le tulaga paia faamatua o Iosefa
Ta’u i ai o leMataio 1:16o loo ta’ua ai foi o Maria o le ava a Iosefa. E tusa ai ma leMataio 1:18, sa faufautaneMaria ia Iosefa. O lona uiga sa fefaamalamalama ai i la’ua, pe faamau, ma sa fusia faaletulafono i laua a o lei nonofo faatasi o se tane ma se ava. Peitai, a o lei faaipoipo, sa iloa e Iosefa ua to Maria. Valaaulia se tamaitiiti aoga e faitau leotele le Mataio 1:19. Fai atu i le vasega e mulimuli i le faitauga, ma vaavaai po o le a le mea na fuafua Iosefa e fai.
O le a le mea na fuafua Iosefa e fai ina ua ia iloa ua to Maria? (Faamatala “o le faatea lemu ia te ia” o lona uiga sa fuafua Iosefa e faaleaogaina lemu le faamau e aunoa ma le uunaia o Maria e fetaiai ma le faamasiasiga lauaitele po o le faasalaga e ono fai i ai o le fetogia i maa.)
O le a se mea o aoao mai e lenei fuaiupu e uiga i uiga o Iosefa?
Valaaulia se tamaitiiti aoga e faitau leotele le Mataio 1:20. Fai i le vasega e mulimuli ai, ma vaavaai po o le a le mea na tupu ia Iosefa a o ia mafaufau e faamuta le faamau ia Maria.
Aisea na ta’u atu ai e le agelu ia Iosefa e aua le fefe e faaauau ona faaipoipo atu ia Maria?
Ina ia fesoasoani i tagata o le vasega ia malamalama i le fuaitau “i le Agaga paia” (Mataio 1:18, 20), valaaulia se tagata o le vasega e faitau leotele le saunoaga lenei a Elder Bruce R. McConkie o le Korama a Aposetolo e Toasefululua:
Ata
Elder Bruce R. McConkie
“E faapei ona avea Iesu ma Alo totino o Maria, e faapena foi ona avea o ia ma atalii totino o le Atua le Tama e Faavavau. … O le faaupuga a Mataio, ‘ua to o ia i le Agaga Paia,’ a faaliliuina lelei e tatau ona faapea, ‘ua iloa ua to o ia i le mana o le Agaga Paia’ (Mata. 1:18.) … Ua faamatalaina tonu e Alema le afuafuaina ma le fanau mai o le Alii i le valoia mai: O Keriso ‘fanaua o ia e Maria, … o ia foi o le taupou, o le ipu filifilia ma le taua, e faamamaluina ma to o ia i le mana o le Agaga Paia, e fanau mai foi le tama tane, ioe, o le Alo o le Atua.’ (Alema 7:10.)” (Doctrinal New Testament Commentary, 3 vols. [1965–73], 1:82).
O a mea ua tatou aoao e uiga i matua o Iesu mai nei aoaoga? (E ono faaaoga e le vasega ni upu eseese ae e tatau ona faailoa mai le aoaoga faavae lenei: O Iesu Keriso o le Alo paia o le Tama Faalelagi ma Maria. Atonu e te manao e fautua atu i tagata o le vasega e tusi le faauigaga lenei i le laina o a latou tusitusiga paia i talane o le Mataio 1:18–25.)
Faasino i le ata o ou matua ma toe faamatala ni nai uiga e te maua mai ia i la’ua. Valaaulia se tagata aoga e faitau leotele le saunoaga lenei a Elder James E. Talmage o le Korama a Aposetolo e Toasefululua: Fesili i le vasega e faalogologo pe aisea e taua ai ona malamalama o Iesu o le Alo paia o le Tama Faalelagi ma Maria.
Ata
Elder James E. Talmage
“O lena Tamaitiiti e fanau mai ia Maria o le alo pele o Elohima, le Tama e Faavavau. … I Lona natura o le a tuufaatasia ai mana o le Aiga Atua ma le mana ma avanoa o le olaga nei. … O le Tamaitiiti o Iesu sa tatau ona mauaina uiga faaletino, faalemafaufau, ma faaleagaga, manaoga, ma mana na e iloa ai Ona matua—o le tasi e faavavau ma faamamaluina—le Atua, o le isi o le tagata—le fafine” (Jesus the Christ, 3rd ed. [1916], 81).
O uiga na maua mai e Iesu Keriso i Lona Tama? O a uiga na Ia maua mai Lona tina?
Faamatala talu ai o Iesu o le Alo o se Tama tino ola pea, ma se tina ile tino faaletino, ua ia te ia le mana e soifua ai e faavavau pe afai Na te filifili ai, faapea foi le tulaga e mafai ai ona oti. O lenei natura paia ua agavaa tulagaese ai o ia e mafai ona puapuagatia mo a tatou agasala, maliu i luga o le satauro, ma toetu mai.
Faaali meaalofa ua uma ona afifi e tolu i luma o le vasega pe tusi se ata o meaalofa e tolu i luga o le laupapa.
O ai na aumaia meaalofa i le Faaola ina ua fanau mai?
Faamatala o le Evagelia a Mataio e na o le pau lea o le Evagelia ua faaaofia ai se tala i le Au Makoi. Tufatufa le suega puupuu lea o se tufaaga pe tusi ia fesuli i luga o le laupapa a o lei amataina le vasega. Tuu atu i le vasega ni nai minute e faitau ai fesili ma tusi a latou tali.
A uma ua lava se taimi, valaaulia le vasega e faitau lemu le Mataio 2:1–12, ma vaavaai mo tali i fesili o le suega puupuu.
Valaaulia ni nai tagata e fasoa mai se mea fou sa latou aoaoina e uiga i le Au Makoi. O faamatalaga i lefuaiupu 11 ma le 16ua ta’u mai ai atonu pe o le umi o le lua tausaga ina ua mavae le fanau mai o Iesu, na taitai atu ai le Au Makoi i le aiga paia (na maua e le Au Makoi ia Iesu i se fale, ae le o se moega pepe, ma o Ia o se “tama itiiti,” e le o se pepe). Ta’u i ai o le mafuaaga na manao ai Herota i le Au Makoi e lipoti atu le mea na latou maua ai le Mesia, ina ia na fasiotia ai o Ia e ia (tagai Mataio 2:13).
Na faapefea na iloa e le Au Makoi le mea e maua ai le Mesia?
O a ni mea e mafai ona tatou aoaoina mai i faataitaiga a le Au Makoi i le sailia o le Faaola? (O tali a le vasega e ono eseese, ae fesoasoani ia latou faailoa maia le mataupu faavae lenei: Afai tatou te saili ma le lotofaamaoni ma le maelega le Faaola, o le a taialaina i tatou ia te Ia.
E mafai faapefea ona tatou sailia ma le maelega le Faaola?
O le a le mea na fai e le Au Makoi ina ua latou maua le Faaola? Aisea? (O se tasi faamoemoega o le tuuina atu o meaalofa i le Faaola o le ifo atu lea ia te Ia.)
O le a se mea e mafai ona tatou aoao mai i le faataitaiga a le Au Makoi i le ofoina atu o meaalofa i le Faaola? (E ono faaaoga e le vasega ni upu eseese ae e tatau ona faailoa mai le upumoni lenei: E mafai ona tatou ifo atu i le Alii e ala i le ofoina atu o meaalofa anoa ia te ia.
Ina ia fesoasoani i tagata aoga ia malamalama i le auala e mafai ai ona tatou ofo atu meaalofa anoa i le Faaola, valaaulia se tagata aoga e faitau leotele le saunoaga lenei a Elder D. Todd Christofferson o le Korama a Aposetolo e Toasefululua:
Ata
Elder D. Todd Christofferson
“I aso anamua, pe a mananao tagata e tapuai i le Alii ma saili Ana faamanuiaga, e masani ona latou aumaia se meaalofa. …
“Pe o i ai ea se mea i lou olaga e le o mama, pe le o agavaa? Pe a mafai ona e lafoa’ia, o se meaalofa lena i le Faaola. Pe o i ai ea se mausa lelei po o se uiga tausaafia e le o maua i lou olaga? A e taliaina ma avea o se vaega o lou tagata, ua e tuuina atu se meaalofa i le Alii. O nisi taimi e faigata ona faia, ae pe o au meaalofa ea o le salamo ma le usiusitai o ni meaalofa aoga pe a fai e leai se mea e te totogia?” (“Pe a Liua Mai Oe,,” Ensign po o le Liahona, May 2004, 12).
O le a se mea e mafai ona tatou ofo atu o ni meaalofa anoa i le Faaola?
Valaaulia le vasega e mafaufau i le saunoaga a Elder Christofferson ma mafaufau pe o a meaalofa latou te manatu e tatau ona latou ofo atu i le Faaola. Avatu ni fasipepa ia i latou e tusia ai o latou manatu. Valaaulia i latou e fuafua pe faapefea noa latou tuuina atu nei meaalofa ia Iesu Keriso.
Faamatala e tusa ai ma le 89}Mataio 2:13–23, na oo ina ita Herota i le Au Makoi” ina ua o atu i latou i lo latou lava nuu” (Mataio 2:12) e aunoa ma le ta’uina atu ia te ia le mea o i ai le Mesia. O le faamoemoe ia fasiotia le Mesia, na ia poloaina ai ia fasiotia tamaiti uma e tai lua tausaga le matutua ma laiti ifo i Peteleema ma eria taulalata ane.
Faitau leotele le Mataio 2:13–14 Fai i le vasega e mulimuli ai, ma vaavaai pe na faapefea ona iloa e Iosefa le mea e fai e tausia ai le saogalemu o lona aiga. Valaaulia tagata aoga e lipoti mai mea ua latou mauaina.
O fea na ave i ai e Iosefa ia Maria ma Iesu?
Otooto le Mataio 2:15–23 i le faamatala atu na nonofo ia Iosefa, Maria, ma Iesu i Aikupito seia oo ina ua maliu Herota. Sa faatonuina e le Atua ia Iosefa e ala i miti e toe ave lona aiga i Isaraelu, ona latou nonofo ai lea i le aai o Nasareta.
Na faapefea e le nofouta o Iosefa i mea faaleagaga ona faamanuiaina ai olaga o isi?
O le a se mataupu faavae e mafai ona tatou aoaoina mai ia Iosefa? (E ono faaaoga e le vasega ni upu eseese ae e tatau ona faailoa mai le mataupu faavae lenei: Afai tatou te nofouta pe mataalia i le Agaga, e mafai ona tatou maua faaaliga ma le taitaiga.
Valaaulia le vasega e mafaufau pe o a mea e mafai ona latou faia ia nofouta atili ai i le Agaga. Fautuaina i latou e faatu se sini e faatino soo se uunaiga latou te maua.
“O Iesu e le o se atalii o Iosefa, ae o le gafa o Iosefa o le gafa foi lea o Maria, aua e tausoga i la’ua; Na maua mai e Iesu mai lona tina, o Maria, le toto o Tavita ma o lea la ua ia te ia le aia tatau i le nofoalii o Tavita. Na fanau mai Iesu i le aigatupu, ma e pei ona sa faamatala mai e Elder James E. Talmage, ‘Pe ana faapea o Iuta o se nuu saoloto ma le tutoatasi, e pulea e ona lava tupu, semanu o Iosefa le Kamuta o lona tupu faapaleina lea; ma o le e soloa’i atu i le nofoalii e suitulaga ia te ia o Iesu le Nasareta, o le Tupu o Iutaia’ [Jesus the Christ, 3rd ed. (1916), 87; see also Jesus the Christ, 83–86, 89–90; Bruce R. McConkie, Doctrinal New Testament Commentary, 3 vols. (1965–73), 1:94–95]” (The Life and Teachings of Jesus and His Apostles, 2nd ed. [Church Educational System manual, 1979], 22).
I Isaraelu anamua, o se faaipoipoga i le va o se alii talavou ma se tamaitai talavou sa faatulaga ma malilie i ai ulu o aiga —e masani lava o tama. O le taimi lava e iloa ai e le tama o le faatoafaiava po o le ulu o le aiga se ava ua tatau ai, ona amata loa lea o feutagaiga. Latou te taulai atu, ae e le gata ai iina, i le tele o le ‘tau o le faatoanofotane,’se ituaiga o faaoloaga i se isi itu, e totogi e le tama o le faatoafaiava po o le ulu o le aiga i le aiga o le faatoanofotane. A malilie loa i le faaipoipoga, e lua vaega o le faaipoipoga: tusiga (ua faaigoaina foi o le faufautane; tagai Mataio 1:18) ma le sauniga o le faaipoipoga.
O le faamau ia faaipoipo sa sili atu ona taua i le tulaga faaletulafono ma faalelotu nai lo le sauniga o le faaipoipoga lea e mulimuli mai, a maea ona amata ai lea ona nonofo faatasi le ulugalii. O le faamau sa manatu i ai o le vaega faaiu lea o se feagaiga paia. Na te tauaveina le malosiaga o se feagaiga ina ia faamamaluina i le va o tagata e matatau i le Atua (tagai Kenese 2:24; Esekielu 16:8; Efeso 5:21–33). E ui o ulugalii ua faamau ina ia faaipoipo ua tusa lava lea o se tane ma se ava ua aloaia faaletulafono (tagai Teuteronome 22:23–24), o le va o le taimi o le faamau ma le sauniga o le faaipoipoga, e faamalosia ai lava le tulafono o le ola mama (tagai Mataio 1:18, 25).
“Ina ua iloa ua to Maria, sa i ai ni itu e filifili ai Iosefa, i le iloa ai e le o ia o le tama. Muamua, sa mafai ona ia tuuina atu Maria i se teteaga lautele ma pe fasiotia foi, aua e ono faapea tagata ua ta’usalaina Maria i le mulilua—o se solitulafono e faasalaina i le oti i lalo o le tulafono a Mose (tagai Levitiko 20:10; Ioane 8:5). Lona lua, semanu e mafai lava e Iosefa ona faaleaogaina faalilolilo le faamau i luma o ni molimau se toalua. O se filifiliga lona tolu o le faaauau pea lea o le faaipoipoga. Sa faamoemoe Iosefa e faaalia le alofa mutimutivale ia Maria i lona faaleaogaina faalilolilo lea o le la ioega e faamau (tagai Mataio 1:19). Peitai, ina ua faamautinoa atu i ai e se agelu e faapea o le tama a Maria o le Alo o le Atua, sa filifili Iosefa e faaipoipo atu ia te ia, e ui o le faia o lena mea e faalumaina ai o ia ma ulagia e tagata (tagai Mataio 1:20–25; Luka 3:23; Ioane 8:41).
Sa talanoaina e Gerald N. Lund,o le na avea mulimuli ane ma Fitugafulu, le vaaiga mamao ma le nofouta faaleagaga o Iosefa: “Ua ta’u mai e Mataio e faapea o [Iosefa] e mai le gafa o le Tupu o Tavita, o ia o se alii faamaoni ma le magafagafa, ma na ta’u atu ia te ia e se agelu le matafaioi a Iesu, sa usitai o ia, ma sa ia tuu atu ia Iesu lona igoa, o lona faauigaina o le faaola. (Tagai Mata. 1 Ua tatou iloa na ia aveina Maria i Peteleema, lea na fanau mai ai Iesu. (Tagai Luka 2:4–6.) E lei atoa se lua tausaga mulimuli ane, ae ave e Iosefa lona aiga i Aikupito e sosola ese ai mai ia Herota, ina ua lapataia o ia i se miti. I Aikupito, sa toe ta’u atu foi ia te ia i se miti le taimi e toe foi ai, ma i se isi foi miti na ta’u atu ai ia te ia e o i Kalilaia. (Tagai Mata. 2:13–15, 19–22.) E Fa miti mai le Atua! Atonu o Iosefa o se tagata sa tulagaese le vaai mamao ma nofouta faaleagaga’ (Jesus Christ, Key to the Plan of Salvation [1991], 51–52)” (Tusi lesona a le Tagata Aoga o le Feagaiga Fou [Church Educational System manual, 2014], 13–14).