Anomea o Sauniuniga mo le Faiaoga o Suesuega i le Aiga
Aotelega o Lesona o Suesuega e Fai i le Aiga i Aso Taitasi
O otootoga o aoaoga faavae ma mataupu faavae nei sa aoaoina e tamaiti aoga ao latou suesueina le 2 Timoteo 1–Eperu 4 (iunite 27) e le o faamoemoeina e aoao atu o se vaega o lau lesona. O le lesona e te aoao atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tamaiti aoga.
I le tusi lenei a Paulo ia Timoteo, na aoao ai e tamaiti aoga ia upumoni nei: A’o tatou saili ma le faamaoni ia maua le Agaga e faatasi ma i tatou, e mafai ona tatou faatoilaloina le fefe ma ia le ma i la tatou molimau ia Iesu Keriso. A’o tatou onosaia faigata ma tumau faamaoni i le Alii, e mafai ona tatou fesoasoani ia i tatou lava ma isi ia maua le faaolataga e ala mai ia Iesu Keriso. Afai tatou te aveesea i tatou lava mai agasala, e mafai ona sili atu le lelei ona tatou auauna i le Alii. Afai e tumau lo tatou faamaoni i mea uma e finagalo ai le Alii ia i tatou, o le a tatou maua le pale o le amiotonu. Sa aoao foi tamaiti aoga e uiga i faigata o o tatou aso ma le taua o tusitusiga paia.
A’o suesue e tamaiti aoga le tusi a Paulo ia Tito, se taitai o le Ekalesia i Kereta, sa latou iloa ai, a tatou uumau i le afioga a le Atua, o le a mafai ona tatou faaaogaina aoaoga faavae moni e uunaia ai isi ia ola i le talalelei a Iesu Keriso ma faamaonia le sese o i latou e tetee i ai. Sa uunaia e Paulo soo o Iesu Keriso ia fai ma faataitaiga lelei i isi. Sa ia molimau mai foi sa tuuina mai e Iesu Keriso o Ia lava mo i tatou ina ia mafai ona Ia togiola ma faamama i tatou.
I le suesueina o le augani a Paulo ia Filemoni e manatu i se pologa faatoa liliu mai na sola ese mai, o se uso i le talalelei, na aoaoina e tamaiti aoga o i tatou o uso ma tuafafine i le talalelei. Sa latou aoaoina foi, o soo o Iesu Keriso e faasafua atu le alofa tunoa ma le faamagalo atu i isi.
A’o suesue e tamaiti aoga le tusi a Paulo ia Eperu, sa latou aoao ai i se vaega o aoaoga faavae e uiga i le Faaola, e aofia ai Lana matafaioi o le Foafoa ma Lona foliga i le Tama Faalelagi. O nei aoaoga faavae na taitai atu ai tamaiti aoga e faailoa mai le upumoni e faapea, o Iesu Keriso o le Kapeteni o lo tatou faaolataga. Sa latou aoaoina foi, ona sa puapuagatia Iesu Keriso ma sa faaosoosoina i mea uma, ua Ia malamalama lelei ai ia i tatou ma e mafai ona fesoasoani ia i tatou i taimi o faigata.
Folasaga
O lenei lesona e vailiili ai valoaga a Paulo e uiga i faigata e maua i aso amuli faapea foi ma ona lava aso. Sa faatonuina e Paulo ia Timoteo ma le au faitau i le lumanai ia tumau le faamaoni, e ui lava i nei faigata, i upumoni ua latou aoaoina, ma ia faaaoga tusitusiga paia o se punavai o le malamalama, faasa’oga, ma aoaoga.
A’o le’i amata le vasega, fai atu i ni tamaiti aoga se toalua pe toatolu e taunuu mai, e taitasi ona tusia se ata i luga o le laupapa o se mea matautia po o se tulaga e ono lamatia ai. A amata loa le vasega, fesili atu i le vasega ia fesili nei:
O a ni upu e te faaaogaina e faamatala ai tulaga ua tusia ata i luga o le laupapa?
Faamalamalama atu, o se vaega o lana Tusi Lona Lua ia Timoteo, sa vavalo ai Paulo i tulaga o ona aso ma o tatou aso. Valaaulia se tamaitiiti aoga e faitau leotele le 2 Timoteo 3:1. Fai atu i le vasega e mulimuli i le faitauga, ma vaavaai mo le ala na faamatala ai e Paulo ia taimi o loo tatou ola ai.
Na faapefea ona faamatala e Paulo taimi o loo tatou ola ai? (Afai e manaomia, faamatala atu o le upu faigata o lona uiga o le atoatoa o le matautia po o le lamatia.)
O a ni faigata po o mea matautia faaleolaga nei pe faaleagaga ua e vaaia i o tatou aso?
Vaevae tamaiti aoga i ni paga. Tuu atu i paga taitasi se kopi o le siata lea. Valaaulia paga taitasi e faitau le 2 Timoteo 3:2–7 ma tali fesili o loo i le siata. Faatonu i latou e faaaoga ia vaefaamatalaga e fesoasoani ai i upu faigata.
A ua lava loa le taimi, valaaulia tamaiti aoga e lipoti mai i le vasega pe na faapefea ona latou taliina fesili i le siata, e aofia ai pe aisea e matuai matautia ai nei tulaga.
Fai atu i tamaiti aoga e mafaufau loloto pe i ai lava se taimi latou te popole ai ina nei o latou aafia i nisi o mea matautia ia na ta’ua e Paulo i fuaiupu na latou suesueina.
E tusa ai ma le faaiuga o le 2 Timoteo 3:5, o le a le mea na uunaia e Paulo ia Timoteo e fai, lea e mafai foi ona fesoasoani ia i tatou i o tatou aso? (E tatau ona tatou liliu ese mai le amioleaga.)
Faamalamalama atu, e ui lava i le ogaoga o nei tulaga faapopoleina, ae e mafai ona tatou maua le fesoasoani ma le puipuiga. Valaaulia se tamaitiiti aoga e faitau leotele le 2 Timoteo 3:14–15. Fai atu i le vasega e mulimuli i le faitauga, ma vaavaai mo le mea na aoao mai Paulo e mafai ona fesoasoani ia i tatou e liliu ese ai mai nei mea faigata.
O le a le mea na aoao mai e Paulo e uiga i le teenaina o mea faigata na ia faamatalaina?
O le a lou manatu o le uiga o le fuaiupu 14 ia “ia e tumau i mea ua aoaoina ai oe, ma ua mautinoa ia te oe”?
Valaaulia tamaiti aoga e faailoa mai se mataupu faavae mai le 2 Timoteo 3:14–15 e uiga i auala e faatoilalo ai mea faigata faaleaga o aso amuli. (A uma ona tali mai tamaiti aoga, tusi le mea lenei i luga o le laupapa: Afai tatou te faaauau i upumoni ua tatou aoaoina mai punavai faatuatuaina ma i tusitusiga paia, e mafai ona tatou manumalo i mea faigata faaleagaga o aso amuli.)
E mafai faapefea e le faalagolago i tusitusiga paia ma i upumoni ua tatou aoaoina, ona fesoasoani ia tatou manumalo i faigata o o tatou aso?
O anafea na e filifili ai e faalagolago i upumoni ua e aoaoina? Na faapefea ona faamanuiaina oe ona o le faia o lena mea? (E mafai ona e tuu atu i tamaiti aoga e tali i nei fesili muamua i totonu o a latou api talaaga mo le suesueina o tusitusiga paia po o api o le vasega, ona valaaulia lea o ni nai tamaiti aoga e faasoa mai i le vasega ni mea na latou tusia.)
Faamanatu atu i tamaiti aoga o le 2 Timoteo 3:15–17 o se fuaitau o le mau tauloto. Valaaulia se tamaitiiti aoga e faitau leotele le 2 Timoteo 3:15–17ma fai i ai e vaavaai mo mea na aoao mai e Paulo e uiga i tusitusiga paia. Atonu e te manao e fautua atu i tamaiti aoga e faailoga mea latou te maua.
O le a le mea na aoao mai e Paulo e uiga i le suesue i tusitusiga paia e mafai ona fesoasoani ia i tatou i o tatou aso? (Fesoasoani i le vasega e faailoa mai le mataupu faavae lenei: A’o tatou suesue i tusitusiga paia, e mafai ona tatou iloa aoaoga faavae ma maua faasa’oga ma aoaoga o le a fesoasoani tatou te tuputupu ae ai agai atu i le atoatoaga. Tusi lenei mataupu faavae i le laupapa.)
Fai atu i tamaiti aoga e mafaufau i se taimi na fesoasoani ai ia i latou ia tusitusiga paia—atonu o se mau na latou suesueina i le Feagaiga Fou—i se tasi o auala nei:
Ia malamalama i se aoaoga faavae o le talalelei
E ala i le tuuina atu o se aoaiga po o se faasaoga e uiga i se mea i o latou manatu, filifiliga, po o amioga na le sa’o
E ala i le tuuina atu o se tali i se tatalo po o le tuuina atu o se faatonuga i se auala e foia ai se faafitauli
Tuu atu i tamaiti aoga se taimi e mafaufau ai i aafiaga, ona valaaulia lea o ni nai tamaiti aoga e faasoa mai i le vasega mea na latou mafaufau i ai.
I le mafaufau atu i mea ua tatou aoaoina e uiga i le taua o tusitusiga paia, aisea e te manatu ua uunaia ai i tatou e suesue i ai i aso uma?
Tuu atu i tamaiti aoga se kopi o le saunoaga lenei a Elder Richard G. Scott o le Korama a Aposetolo e Toasefululua. Valaaulia se tamaitiiti aoga e faitau leotele, ma fai atu i le vasega e vaavaai mo le fautuaga ma le folafolaga a Elder Scott e faatatau i le suesuega o tusitusiga paia.
Ata
Elder Richard G. Scott
“Aua nei gauai atu i pepelo a Satani faapea e leai sou taimi e suesue ai i tusitusiga paia. Filifili e faaalu se taimi e suesue ai. O le taumamafa i afioga a le Atua i aso taitasi e sili atu le taua nai lo le moe, a’oga, faigaluega, ata o le tv, taaloga vitio, po o faasalalauga faaagafesootai. Atonu e manaomia ona e toe faatulagaina au mea e faamuamua ia maua ai se taimi mo le suesueina o le afioga a le Atua. Afai o le tulaga lea, ia fai loa!
Molimau atu i le saogalemu ma le filemu lea e oo mai ia i latou o e tumau pea i upumoni o loo maua i tusitusiga paia.
Valaaulia tamaiti aoga e gaugau se fasipepa i ni vaega se tolu, e fatu ai ni koluma se tolu. Fai atu ia i latou e tatala le pepa ma tusi le [upu] Aoaoga Faavae i le pito i luga o le koluma muamua, Aoaiga ma le faasa’oga i le pito i luga o le koluma lona lua, ma le Aoaoga i le amiotonu i le pito i luga o le koluma lona tolu.
Valaaulia tamaiti aoga e faaaoga le pepa lenei e fai ma se faailoga tusi i a latou tusitusiga paia mo le vaiaso e tasi, ia tusi ai i vaega talafeagai i taimi uma latou te faitau ai se mau e faataunuu ai se tasi o faamoemoega nei. Mo se faataitaiga, i lalo o le autu “Aoaoga Faavae,” e mafai ona tusi e tamaiti aoga se tusi o se mau ma le aoaoga faavae po o le mataupu faavae latou te aoaoina mai lena mau. I lalo o le autu “Aoaiga ma le faasa’oga,” e mafai ona latou tusia le tusi o le mau ma le ala ua faasa’o ai e le fuaitau ia manatu sese. I lalo o le “Aoaoga i le amiotonu,” e mafai ona latou tusia fuaitau e tuuina atu ia i latou le iloatino o galuega lelei e mafai ona latou faia.
Uunaia tamaiti aoga e aumai a latou pepa i le vasega i totonu o se vaiaso se tasi e lipoti mai ai o latou aafiaga. Atonu e te manao e tuu se faamanatu i au tusitusiga paia po o le tusi lesona, e fai se talanoaga puupuu e faamanatu ai auala na latou faaaogaina ai lenei fuaitau o le mau tauloto.
Uunaia tamaiti aoga e sue tali i fesili nei ao latou suesue i le iunite e sosoo ai: E faapefea ona valaauina alii talavou i le perisitua? O ai o loo taua i le Eperu ose [tagata] ua mauaina le faatuatua sili? O e maitauina se tasi o alii ma tamaitai o e aoaoina e uiga i lenei iunite? O le a le fuaitau o le tusi paia sa faitau i ai Iosefa Samita, na taitai atu ai o Ia e “ole atu i le Atua,” o se tali ile Uluai Faaaliga? O le a le amioatua e sili ona lelei?