Na tusia e Ioane le Soo Pele ia aoaoga faavae taua e fesootai ma le matafaioi a Iesu Keriso i le muai olaga. Na tuuina mai foi e Ioane le Papatiso le molimau ia Iesu Keriso ma sa papatisoina o Ia. Na valaaulia e Iesu Keriso isi e aoao e uiga ia te Ia.
Ua molimau mai Ioane e uiga ia Iesu Keriso o le Alo o le Atua
Ata
O Le Alii o Iesu Keriso
Vaevae tamaiti aoga i ni paga. Faaali atu se ata o Iesu Keriso i luga o le laupapa. Fai i tamaiti aoga e mafaufau faapea, o loo latou talanoa ma se tasi e iloa sina mea itiiti e uiga ia Iesu Keriso. Valaaulia se tamaitiiti aoga e toatasi mai paga taitasi e faaaoga se minute se tasi e aoao atu ai le isi tamaitiiti aoga e uiga ia Iesu faapei e itiiti lava se iloa o lena tagata e uiga ia te Ia. A uma le gaoioiga lea, valaaulia ni nai tamaiti aoga sa aoao atu e uiga ia Iesu Keriso e faasoa mai i le vasega mea sa latou aoao atu i a latou paga.
Folasia puupuu atu le tusi a Ioane e ala i le faamatala atu faapea, sa tusia e le Aposetolo o Ioane le mea sa ia manao i le Au Paia e iloa e uiga ia Iesu Keriso. O Ioane o se molimau na vaaitino i le tele o tala na ia tusia. O le tele o anomea i le Evagelia a Ioane e le o maua i Evagelia a Mataio, Mareko, ma Luka, ia na tusia e fesoasoani ai i tagata Iutaia ma Nuuese e talitonu o Iesu o le Mesia ma le Faaola o tagata. E ese mai ai, sa tusi faapitoa e Ioane ia i latou o e ua talitonu o Iesu o le Keriso.
A o suesue e tamaiti aoga le Ioane 1, valaaulia i latou e vaavaai mo upumoni e uiga i le Faaola ia e mafai ona faamalolosia ai lo latou faatuatua ma molimau ia Iesu Keriso.
Fai i tamaiti aoga e faitau leotele le Faaliliuga a Iosefa Samita, Ioane 1:1–2 (i le faaopoopoga i le Tusi Paia). Fai atu i tamaiti aoga e mulimuli i le faitauga. Fai i ai e vaavaai mo upumoni na aoao mai e Ioane e uiga ia Iesu Keriso.
O a ni upumoni ua tatou aoao ai e uiga ia Iesu Keriso i nei fuaiupu? (O le upumoni e tasi e tatau ona faailoa mai e tamaiti aoga e faapea Sa i ai Iesu Keriso faatasi ma le Atua i le amataga. Tusi le upumoni lea i le laupapa i autafa o le ata o le Faaola.)
O le a le uiga o le faapea na i ai Iesu Keriso faatasi ma le Atua i le amataga? (Faamatala atu, o le fasifuaitau ”i le amataga” e faasino i le muai olaga. O Iesu Keriso o le Ulumatua na Fanaua a le Tama i le agaga [tagai MF&F 93:21], Sa pei o Ia o le Atua i agaga na faapotopoto “a o le’i i ai le lalolagi” [Aperaamo 3:22–24], ma sa filifilia o Ia e le Tama mai le amataga [tagai Mose 4:2].)
Valaaulia se tamaitiiti aoga e faitau leotele le Faaliliuga a Iosefa Samita, Ioane 1:3 (i le faaopoopoga o le Tusi Paia), ma fai i le vasega e vaavaai mo se upumoni faaopoopo na aoao mai e Ioane e uiga ia Iesu Keriso.
O a nisi mea na aoao mai e Ioane e uiga ia Iesu Keriso? (E tatau ona faailoa mai e tamaiti se aoaoga faavae talitutusa e pei o lenei: Na faia e Iesu Keriso mea uma. Tusi le upumoni lenei i autafa o le ata o le Faaola i le laupapa.)
Faamatala atu, na faia e Iesu Keriso le lagi ma le lalolagi i lalo o le taitaiga a le Tama ma na foafoaina e Iesu Keriso ia lalolagi e le mafaitaulia (tagai Mose 1:33). Peitai, sa faapolopolo e le Tama Faalelagi ”fatufoafoaga e lua” ia te Ia lava; o le foafoaga o agaga uma (e aofia ai Iesu Keriso) ma le foafoaga o tino faitino o Atamu ma Eva (Bruce R. McConkie, A New Witness for the Articles of Faith [1985], 63; tagai foi Mose 2:27).
Valaaulia se tamaitiiti aoga e faitau leotele le Faaliliuga a iosefa Samita, Ioane 1:4–5 (i le faaopoopoga i le Tusi Paia). Fai i le vasega e vaavaai pe na faapefea ona faamatala e Ioane ia Iesu ma Lana talalelei.
Na faapefea ona faamatala e Ioane ia Iesu ma Lana talalelei?
O le a le uiga o le ”sa ia te ia le talalelei”? (O Iesu Keriso o le tala lelei, o le tino mai o le talalelei.)
O le a sou manatu o le a le uiga o le ”e susulu atu le malamalama i le lalolagi, ae le iloaina ai e le lalolagi”? (Faaliliuga a Iosefa Samita, Ioane 1:5).
Faamatala atu, na sosoo ai ona aoao mai le Aposetolo o Ioane e ugia ia Ioane le Papatiso. Valaaulia se tamaitiiti aoga e faitau leotele le Faaliliuga a Iosefa Samita, Ioane 1:6–10 (i le faaopoopoga o le Tusi Paia). Fai i le vasega e vaavaai mo mea na tautino mai e Ioane le Papatiso e uiga ia Iesu Keriso. Valaaulia tamaiti aoga e lipoti mai mea ua latou mauaina.
I le fuaiupu 9–10, o le a le aoaoga faavae na aoao mai e le Aposetolo o Ioane e uiga ia Iesu? (E tatau ona faailoa mai e tamaiti se aoaoga faavae talitutusa e pei o lenei: O Iesu Keriso o le Malamalama o le Lalolagi. Tusi le upumoni lea i autafa o le ata o le Faaola o i le laupapa.)
O a ni auala ua avea ai Iesu Keriso ma Malamalama o le Lalolagi? (Tagai i le MF&F 88:5–13.)
Otooto le Faaliliuga a Iosefa Samita, Ioane1:11–18 (i le faaopoopoga i le Tusi Paia) i le faamatala atu faapea, na molimau mai Ioane le Papatiso faapea o i latou uma o e talitonu ia Iesu Keriso o le a maua le tino ola pea ma le ola e faavavau.
Ta’u i ai tatou te faaaogaina upu e faamatala atu ai ma faailoa atu ai o tatou mafaufauga, lagona, ma manatu i isi.
O a ni auala e talafeagai ai le ”o le Upu” o se faalaniga o Iesu Keriso?
Faamatala atu foi ana leai le Faaliliuga a Iosefa Samita, semanu e malamalama sese foi i le Ioane 1:18 faapea e leai se tagata ua vaai i le Atua le Tama. Valaaulia se tamaitiiti aoga e faitau leotele le Faaliliuga a Iosefa Samita, Ioane 1:19 (i le faaopoopoga i le Tusi Paia).
Vaevae tamaiti aoga i paga lava ia na i ai i le gaoioiga i le amataga o le lesona. Fai i se tamaitiiti aoga e toatasi o paga taitasi e faaaoga se minute se tasi e aoao atu ai i lana paga e uiga ia Iesu Keriso e faaaoga ai aoaoga faavae na faailoa mai e le vasega i le Faaliliuga a Iosefa Samita, Ioane 1:1–19 (i le faaopoopoga i le Tusi Paia). A ua lava se taimi, fesili atu:
Aisea e taua ai mo se tasi ona iloa nei aoaoga faavae e uiga ia Iesu Keriso?
Ua molimau mai Ioane le Papatiso e uiga ia Iesu Keriso ma ua papatisoina o Ia
Otooto le Faaliliuga a Iosefa Samita, Ioane 1:20–28 (i le faaopoopoga i le Tusi Paia) i le faamatala atu faapea, na auina atu e Iutaia ni faitaulaga ia Ioane le Papatiso e fesili pe o ia o le Mesia. Na faamatala atu e Ioane o lana matafaioi o le tuu atu o le molimau i le Mesia, o le e papatiso atu i le afi ma le Agaga Paia. O le aso na sosoo ai, na vaai ai Ioane le Papatiso ia Iesu, lea na ia papatisoina talu ai.
Valaaulia se tamaitiiti aoga e tu ma faitau leotele, e faapei o ia o Ioane le Papatiso, ia upu a Ioane le Papatiso i le Faaliliuga a Iosefa Samita, Ioane 1:29–33 (i le faaopoopoga o le Tusi Paia). Valaaulia le vasega e mulimuli ai ma vaavaai mo mea na manao Ioane le Papatiso i tagata e iloa e uiga ia Iesu Keriso.
Faasino i le ata o Iesu Keriso ma upumoni o loo tusia i le laupapa ma fesili:
O a isi upumoni po o faamatalaga e uiga ia Iesu Keriso e mafai ona tatou faaopoopo mai le Faaliliuga a Iosefa Samita, Ioane 1:29–33? (Lisi tali a tamaiti aoga i luga o le laupapa.)
Aisea e te manatu ai na faatatau Ioane le Papatiso ia Iesu ”o le Tamai Mamoe a le Atua”?
Ua valaaulia e Iesu Ona soo e aoao atili e uiga ia te Ia
Fai i tamaiti aoga e mafaufau faapea, e i ai se talavou na auai atu i le sauniga molimau ua faalogo i le toatele o uo o tuu atu a latou molimau faapea latou te iloa o Iesu Keriso o lo latou Faaola. Ua taumanatunatu le talavou pe na faapefea e na uo ona ”iloa” na mea.
E faapefea ona e tali atu i lea fesili?
A o suesue e le vasega le Ioane 1:35–51, valaaulia tamaiti aoga e vaavaai mo mea e mafai ona tatou faia ia maua ai (pe faamalolosia ai) a tatou lava molimau ia Iesu Keriso o le Faaola.
Valaaulia se tamaitiiti aoga e faitau leotele le Ioane 1:35–37, ma fai i le vasega e vaavaai po o a mea na fai e Ioane le Papatiso i le aso na sosoo ma le papatisoga o Iesu.
O le a le mea na faia e Ioane ina ua ia vaai ia Iesu?
Valaaulia se tamaitiiti aoga e faitau leotele le Ioane 1:38–39. Fai atu i le vasega e mulimuli i le faitauga, ma vaavaai po o le a le fetalaiga a Iesu i soo e toalua.
O le a le mea na fesili atu ai Iesu i soo e toalua?
O le a la la’ua tali?
O le a le mea na valaaulia e Iesu ia soo e toalua e fai?
Valaaulia se tamaitiiti aoga e faitau leotele le Ioane 1:40–42 ma fai i le vasega e vaavaai mo mea na aoaoina e Aneterea ina ua ia taliaina le valaaulia a le Faaola e ”sau ma vaai.”
O le a le mea na aoao e Aneterea ina ua taliaina le valaaulia a le Faaola e ”sau ma vaai”? (O Iesu o le Mesia, po o le Keriso. Atonu foi e te manao e ta’u i ai ua tatou aoao mai i le Faaliliuga a Iosefa Samita o le Ioane 1:42 o le a faaigoa Peteru o “Kefa, o lona uiga, pe a faamatalaina, o se tagatavaai, po o se maa” [i le vaefaamatalaga a], e ta’u mai ai o Peteru o le a avea ma tagatavaai i le Ekalesia.)
Valaaulia se tamaitiiti aoga e faitau leotele le Ioane 1:43–46, ma fai i le vasega e vaavaai mo mea na valaaulia e le Faaola ia Filipo e fai. Fai i tamaiti aoga e faasoa mai mea sa latou maua.
O le fea upu i le fuaiupu 45 ua ta’u mai ai na maua e Filipo se molimau ia Iesu Keriso ina ua uma ona ia taliaina le valaaulia a le Faaola e mulimuli atu ia te Ia?
O le a le valaaulia na avatu e Filipo ia Natanielu?
Valaaulia ni tamaiti aoga se toatolu e faitau leotele le Ioane 1:47–51. Tofi se toatasi e fai ma tagata faamatala, o le isi e faitauina upu a Iesu, ma le tasi e faitauina upu a Natanielu. Valaaulia le vasega e faalogologo po o le a le mea na tupu ina ua talia e Natanielu le valaaulia e aoao e uiga ia Iesu.
O le a le mea na tupu ina ua uma ona talia e Natanielu le valaaulia e aoao ia Iesu?
O le a le mataupu faavae e mafai ona tatou aoaoina mai i nei tala? (E tatau ona faailoa mai e tamaiti se mataupu faavae talitutusa e pei o lenei: A o tatou taliaina le valaaulia ia aoao ma mulimuli ia Iesu Keriso, o le a tatou mauaina la tatou lava molimau ia te Ia.
Valaaulia se tamaitiiti aoga e faitau leotele le saunoaga lenei a Elder Jeffrey R. Holland o le Korama a Aposetolo e Toasefululua.
Ata
Elder Jeffrey R. Holland
“E foliga mai o le autu moni o le tatou malaga faaletino ma tali i fesili taua o le olaga ua matua faailoaina mai e ni elemene se lua o vaaiga amata o le misiona faaletino a le Faaola. O se tasi o elemene o le fesili na tuuina mai ia i tatou uma o i luga o le laueleele: ‘O le a le mea ua e sailia? O le a le mea tou te mananao ai?’ Lona lua o lana talifuaitau mai i la tatou tali, Po o le a lava lena tali. O ai lava i tatou ma o le a foi le tatou tali atu, O lana tali mai i taimi uma e tutusa lava: ‘Sau,’ na Ia fetalai mai ai ma le alofa. ‘Sau, mulimuli mai ia te au.’ O fea lava e te alu i ai, sau muamua ma vaai po o le a la’u mea o fai, vaai po o fea ma faafefea ona ou faaaluina lo’u taimi. Aoao mai ia te au, savali faatasi ma au, talanoa faatasi ma au, talitonu. Faalogo mai ia te a’u o tatalo. O le a oo ina e maua tali o au oe lava tatalo. E aumaia e le Atua le malologa i o outou agaga” (“O Ia na te faatumuina le fiataumafa i mea lelei,” Ensign, Nov. 1997, 65).
Valaaulia tamaiti aoga e mafauafu loloto ia latou lava taumafaiga e aoao ia Iesu Keriso ma mulimuli ia te Ia.
O a ni auala ua faateleina ai lau molimau ia Iesu Keriso a’o e aoao ma mulimuli ia te Ia?
Valaaulia tamaiti aoga e tusi i a latou api po o api talaaga mo le suesueina o tusitusiga paia ni nai fuaiupu e uiga i mea o le a latou faia e talia atili atoatoa ai le valaaulia a le Faaola e ”o mai ma vaai” ma aoao ai ma mulimuli ia te Ia.
Faaiu i le faasoa atu o lau molimau e uiga i mataupu faavae na faailoa mai i le vasega i le aso.
Tala ma Faamatalaga o Talaaga
Ioane 1:9. ”O le malamalama moni, lea e faamalamalamaina ai tagata uma lea e o mai i le lalolagi”
Ua i ai i tusiga a Ioane na o le pau ia o aoaoga o le Feagaiga Fou e uiga i le Malamalama o Keriso. Ua faamatala mai e le Lomifefiloi o le Tusi Paia:
”O le malamalama o Keriso o le mea tonu lava lea o loo ta’u mai i upu: o le malamalamaaga, atamai, o se faatosinga faagaeetia, faaeaea, faapalepale lea e oo mai i le tagata ona o Iesu Keriso. Mo se faataitaiga, o Keriso o le ’malamalama moni e faamalamalamaina ai tagata uma o e o mai i le lalolagi” (MF&F 93:2; tagai Ioane 1:9). O le malamalama o Keriso e tumu ai le ’atulaulau atoa’ ma o le ala lea e mafai ai e Keriso ona i ai ’i mea uma, ma e ala i mea uma, ma taamilo i mea uma.’ E ’aumaia ai le ola i mea uma’ ma ’le tulafono e pulea ai mea uma.’ O ’le malamalama foi e segia ai le malamalama o le tagata (tagai MF&F 88:6–13, 41). I le itu lea, o le malamalama o Keriso e faia ma le lotofuatiaifo o le tagata ma e ta’u atu ai ia te ia le sa’o mai le sese (Moro. 7:12–19).
”O le malamalama o Keriso e le tatau ona faaluafesasia ma le peresona o le Agaga Paia, aua o le malamalama o Keriso e le o se peresona. O lona faatosinaga e mua’i ma e saunia ai se tagata ia maua le Agaga Paia” (Bible Dictionary, “Light of Christ”).
Na saunoa Elder Richard G. Scott o le Korama a Aposetolo e Toasefululua i nei mea e uiga i le Malamalama o Keriso:
“O Le Malamalama o Keriso o le mana paia lena po o uunaiga e afua mai i le Atua e ala mai ia Iesu Keriso. Na te aumaia le malamalama ma le ola i mea uma.” Na te uunaia tagata magafagafa uma i le lalolagi uma e iloa le mea moni mai le mea sese, sa’o mai le sese. Na te faamatua’ia lou lotofuatiaifo” Richard G. Scott, (“Filemu o le Lotofuatiaifo ma le Filemu o le Mafaufau,” Ensign po o leLiahona, Nov. 2004, 15).
Ioane 1:14, 29. O faalaniga ma suafa o Iesu Keriso e pei o ”le Upu” ma le ”Tamai Mamoe a le Atua”
Na ta’ua e le Aposetolo o Ioane e faapea o lona faamoemoega mo le tusia o lenei tusi o le faatauanauina lea o isi ia talitonu ia Iesu Keriso. I lana Evagelia atoa, sa faaaoga ai e Ioane ni suafa po o faalaniga e fesoasoani ai i le aufaitau ia malamalama ma faailoa ia Iesu Keriso o le Alo paia o le Atua. Mo se faataitaiga, i le Ioane 1, o loo faatatau ai ia Iesu o ”le Upu” ma le ”Tamai Mamoe a le Atua.”
O Iesu o le Upu a le Atua aua o Ia o le faaaliga mai po o le sui o le Tama i le lalolagi; Na te tautino maia upu a le Tama; o Ia o le avefeau o le faaolataga [tagai MF&F 93:8]; o Ia o le faataitaiga atoatoa o le ala e ola ai i le upu a le Atua; Na te aumaia upu o le ola e faavavau; ma o Ana upu e aumai ai le ola.
O Iesu o le Tamai Mamoe a le Atua aua e faapei ona laveaiina e le toto o tamai mamoe o le Paseka ia Isaraelu mai le oti ma laveai mai ai i le nofo pologa i Aikupito, o le faalaniga ”Tamai Mamoe a le Atua” e ta’u ma ai o le a faamaligiina e Iesu Lona toto e faasao ai Lona nuu ma laveai ai i latou mai le agasala. (Tagai foi Topical Guide, “Jesus Christ, Lamb of God.”)
O le Evagelia a Ioane o loo tusia ai suafa eseese po o faalaniga e mafai ona fesoasoani e malamalama ai le au faitau i le paia o Iesu Keriso. O nisi o faalaniga e faaataata mai a o isi ua soona faailoa mai faapea “O au o le …” O nisi faataitaiga e aofia ai le faailoa mai o Iesu o Le Foai mai le Vai Ola (tagai Ioane 4:10–14) ma le fetalai mai o Iesu “O A’u o le areto o le ola” (Ioane 6:35); “O A’u o le malamalama o le lalolagi” (Ioane 8:12); “O Au o le Leoleo Mamoe Lelei” (Ioane 10:11); “O A’u o le toetu ma le ola” (Ioane 11:25); “O A’u nei le ala, ma le upumoni, ma le ola” (Ioane 14:6); ma le “O A’u nei o le vine moni” (Ioane 15:1).
”O taitai Iutaia na fesili ia Ioane pe o ia o ’Elaia’ (o le igoa Eleni mo le faa-Eperu o ’Elia’), o le na valoia e i ai se aso e toe foi mai ai (tagai Malaki 4:5–6). I le Faaliliuga a Iosefa Samita, na faaalia mai ai e le Alii se tala atoa o le tali a Ioane i taitai Iutaia, lea na faaalia ai le malamalama o Ioane i lana lava misiona o se na sau e saunia le ala mo le Mesia. I a latou fesili, sa ’ta’u atu ai e Ioane, ma na te lei faafitia o ia o Elaia; ae na ta’u atu i le, faapea atu; e le o au o le Keriso’ (Faaliliuga a Iosefa Samita, Ioane 1:21 [i le faaopoopoga i le Tusi Paia]).
”Sa malamalama Ioane, ae e lei malamalama le au faitaulaga ma sa Levi, e i ai uiga eseese mo le faalaniga--o igoa Elaia (tagai Bible Dictionary, ‘Elias’; Taiala i Tusitusiga Paia, ‘Elias’; scriptures.lds.org). O Ioane o se Elaia, o lona uiga o se teuteuala o le Mesia, ae le o ia o le Elaia, o Iesu Keriso lea, o le Mesia. O Ioane e le o Elia foi le perofeta, o lona igoa i le faa-Eleni o Elias. …
”Ina ua faafitia e Ioane o ia o Elia, sa fesili atu taitai Iutaia ia te ia, ”O le perofeta ea oe?’ (Ioane 1:21). Masalo o la latou fesili na i ai se fesootaiga i le valoaga a Mose i le Teuteronome 18:15: ‘E faatuina e Ieova lou Atua mai ia te oe, o so lou au uso, se perofeta mo oe e pei o a’u nei; tou te faalogo ia te ia.’ Peitai, o le fesili atu ia Ioane pe o ia o ’lena perofeta’ ina ua uma ona teena e Ioane ia o le Keriso, sa faaali atu e nei tagata Iutaia sa latou le malamalama i le natura faalemesia o le valoaga a Mose. O le toatele o Iutaia i ona po o Iesu sa faamoemoe i le afio mai o se perofeta o le a pei o Mose ae e le o le Mesia. Ua faamoania ai ina ua folafola atu mulimuli ane e le toatele i Ierusalema o Iesu Keriso ’o le Perofeta,’ a e tautino atu e isi o ia ’o le Keriso’ (Ioane 7:40–41; tagai foi 6:14)” (Tusitaiala a le Tagata Aoao o le Feagaiga Fou [Church Educational System manual, 2014], 201–2).