Faaaliga 12–22 (Iunite 32)

Anomea o Sauniuniga mo le Faiaoga o Suesuega i le Aiga

Aotelega o Lesona Suesueina i le Aiga i Aso Taitasi

O aotelega o loo i lalo o aoaoga faavae ma mataupu faavae ua aoaoina e tamaiti aoga ao latou suesue i le Faaaliga 12–22 (iunite 32) e lei fuafuaina o se vaega e aoao atu o lau lesona. O le lesona e te aoao atu e taulai atu i na o ni nai vaega o nei aoaoga faavae ma mataupu faavae. Mulimuli i uunaiga a le Agaga Paia a o e mafaufau i manaoga o au tagata aoao.

Aso 1 (Faaaliga 12–13)

A o suesueina e tamaiti aoga le faaaliga a Ioane e uiga i le tarako ma le fafine ma le tama, na latou iloa ai o Satani, na faatusaina i le tarako, e saili e faatamaia le Ekalesia ma le malo o le Tama Faalelagi ma Iesu Keriso. O lenei taua na amatalia i le muai olaga. Na aoaoina e tamaiti aoga e mafai ona tatou manumalo i aafiaga a Satani e ala i le Togiola a Iesu Keriso ma e ala i le tumau faamaoni i a tatou molimau o le talalelei.

Aso 2 (Faaaliga 14–16)

Mai le faaaliga vaaia a Ioane o le vaaia o se agelu ua toe foi mai i le lalolagi i aso e gata ai, na aoaoina ai e tamaiti aoga o se tasi o mafuaaga na toefuatai mai ai e le Atua le talalelei a Iesu Keriso ina ia saunia ai tagata o nofoia le lalolagi mo le Afio Mai Faalua o Iesu Keriso. Na latou aoaoina foi le mea lenei: Afai tatou te ola amiotonu, o le a faamanuiaina i tatou ona o a tatou galuega ma le malologa mai a tatou galuega pe a tatou oti. Afai tatou te mataala ma saunia faaleagaga, o le a tatou saunia mo le Afio Mai Faalua o Iesu Keriso.

Aso 3 (Faaaliga 17–19)

Na aoaoina e tagata aoga, o aso e gata ai, o le a faatoilalo ai e Iesu Keriso le amioleaga o le lalolagi. Na latou aoaoina foi, o le vavae ese mai o i tatou lava mai le amioleaga o le lalolagi, e mafai ona fesoasoani tatou te aloese ai mai le agasala ma faamasinoga o le a oo mai i luga o e amioleaga i aso e gata ai. A o faatusaina e tamaiti aoga le faaipoipoga i le Afio Mai Faalua, na latou aoaoina ai, afai tatou te mama ma amiotonu, o le a tatou saunia mo le afio mai o le Alii o Iesu Keriso.

Aso 4 (Faaaliga 20–22)

Mai mataupu faaiu o le faaaliga vaaia a Ioane, na aoao ai e tamaiti aoga ia upumoni nei: O le a faamasino i tatou e le Atua mai i tusi na tusia e tusa ai ma a tatou galuega. O le a mafuta ma faamafanafana e le Atua Lona nuu, ma o le a latou le toe oo i le oti, faanoanoa po o le tiga. Afai tatou te tausia poloaiga a le Alii, o le a mafai ona tatou maua uma faamanuiaga o le Togiola a Iesu Keriso ma ulu atu i le malo o selesitila.

Folasaga

Na vaai le Aposetolo o Ioane i se faaaliga vaaia o mea o le a tutupu i le taimi tonu a o lumanai ma i le taimi o le nofotupu faameleniuma o Iesu Keriso. Na ia molimauina foi le taua mulimuli i le va o Satani ma au a le Atua i le faaiuga o le Meleniuma, ma vaaia le Faamasinoga Mulimuli, lea o le a faamasino ai e le Atua tagata uma mai i tusi na tusia.

Fautuaga mo le Aoaoina Atu

Faaaliga 20:1–6

Ua vaai Ioane i se faaaliga vaaia i le mea o le a tupu i le taimi tonu a o lumanai ma le i le taimi o le nofotupu faameleniuma o Iesu Keriso

Fai atu i tamaiti aoga e mafaufau i se tausinioga po o se tauvaga (e pei o se tusigaata, po o se tauvaga afeleti) na latou auai ai e ui na latou talitonu o le a latou faiaina. Ona fai atu lea i ai e mafaufau i se taimi na latou auai ai se tausinioga po o se tauvaga na latou talitonu o le a manumalo ai.

Mata e suia faapefea e ou faamoemoega e uiga i le faaiuga o se tausinioga po o se tauvaga le ala e te faatinoina ai?
Aisea atonu e faamaamulu ai tagata pe a latou mafaufau o le a latou faiaina? O le a se taimi na e manatu ai o le a e faiaina ae iu ane na e manumalo?

Faamalamalama atu i tamaiti aoga, a o latou suesue i le Faaaliga 20 o le a latou aoao atili ai e uiga i le taua i le va o le lelei ma leaga ma le iuga mulimuli o le taua. Valaaulia i latou e vaavaai mo ni upumoni a o latou suesue i le Faaaliga 20 e mafai ona faaosofia ai i latou e tumau faamaoni i le Alii i le taimi o lenei taua

Valaaulia se tamaitiiti aoga e faitau leotele le Faaaliga 20:1–3. Fai atu i le vasega e mulimuli i le faitauga, ma vaavaai mo mea o le a tupu ia Satani i le taimi o le Meleniuma.

O le a le mea o le a tupu ia Satani i le taimi o le Meleniuma?
E tusa ai ma le fuaiupu 3, o le a le mea o le a le mafai ona fai e Satani ona ua saisaitia o ia?

Valaaulia se tamaitiiti aoga e faitau leotele le Faaaliga 20:4–6. Fai atu i le vasega e mulimuli i le faitauga, ma vaavaai po o ai na vaai Ioane o faamasinoina.

E tusa ai ma le fuaiupu 4, o ai na vaai Ioane o faamasinoina?
O le a le taui na maua e nei tagata ona o lo latou faamaoni?
O le a le mea o le a avea ai i latou ma se vaega i le taimi o le Meleniuma? (O le Uluai Toetutu.)
O le a le mataupu faavae e mafai ona tatou aoao mai i le Faaaliga 20:4–6 e uiga i faamanuiaga e mafai ona tatou maua pe afai tatou te faamaoni ia Iesu Keriso? (Atonu e faaaoga e tamaiti aoga ni upu eseese, ae e tatau ona faailoa mai se mataupu faavae e talitutusa ma lenei: Afai tatou te faamaoni ia Iesu Keriso, o le a tatou maua se vaega i le Uluai Toetutu ma nofotupu faatasi ma Keriso i le taimi o le Meleniuma.)

Faamalamalama atu o le Uluai Toetutu na amataina i le Toetu o Iesu Keriso ae e aofia ai tagata amiotonu o e na maliliu a o le’i Toetu Keriso (tagai Mosaea 15:21–25; Alema 40:16–20). O le toatele o e amiotonu na maliliu i le mavae ai o le Toetu o Keriso o le a toetutu e fetaui ma le Afio Mai Faalua o Iesu Keriso (tagai Bruce R. McConkie, Mormon Doctrine, 2nd ed. [1966], 639; James E. Talmage, The Articles of Faith, 12th ed. [1924], 385). O i latou o e o le a tulai mai i le Uluai Toetutu e aofia ai “o perofeta uma, ma i latou uma o e na talitonu ia latou upu” (Mosaea 15:22), o i latou o e na maliliu i le le malamalama e aunoa ma le “folafola atu ia te i latou le olataga” (Mosaea 15:24; tagai foi MF&F 45:54), ma tamaiti laiti o e na maliliu a o le’i oo i le matutua e mafai ona faamasinoina ai (tagai Mosaea 15:25; Moronae 8:4–24). O e amioleaga ma le salamo o le a le toetutu seia oo i le Toetutu Lona Lua, lea o le a tupu i le faaiuga o le Meleniuma (tagai MF&F 76:85).

E mafai faapefea e le iloa e mafai ona e maua se vaega i le Uluai Toetutu ma nofotupu faatasi ma Iesu Keriso i le taimi o le Meleniuma, ona fesoasoani ia e faamaoni ai i le taimi nei i le taua e faasaga i le leaga?

Molimau atu o i latou o e tumau le faamaoni o le a avea ma se vaega o le Uluai Toetutu ma nofotupu faatasi ma le Faaola i le taimi o le Meleniuma.

Faaaliga 20:7–11

Ua vaai Ioane i le taua mulimuli i le va o Satani ma au a le Atua i le faaiuga o le Meleniuma

Tusi le faamatalaga le uma lenei i luga o le laupapa: I le faaiuga o le Meleniuma …

Valaaulia se tamaitiiti aoga e faitau leotele le Faaaliga 20:7–10. Fai atu i le vasega e mulimuli i le faitauga, ma vaavaai mo mea e tutupu na faamatalaina e Ioane o le a tutupu i le faaiuga o le Meleniuma.

Valaaulia ni nai tamaiti aoga e o mai i le laupapa e tusi ai mea na latou mauaina. Ona fai atu lea o fesili nei:

O a mea e tutupu na faamatala e Ioane? (Faamalamalama atu, o igoa Koku ma Makoku i le fuaiupu e 8 e faatatau i au o le a faaaoga e Satani i le faaiuga o le Meleniuma e tau ai mo le taimi mulimuli e faasaga i tagata o le Alii [tagai MF&F 88:110–114].)
A uma lenei taua, o le a le mea o le a tupu i le tiapolo ma ona soo? (A uma ona tali mai tamaiti aoga, faauma le faamatalaga o loo i le laupapa ina ia faitauina faapenei: I le faaiuga o le Meleniuma, o le a faatoilalo ai e au a le Atua ia Satani ma ona soo.)
Aisea e taua ai ona tatou malamalama i le taunuuga faaiu o le taua i le va o le Atua ma Satani?

Faaaliga 20:12–15

Ua vaai Ioane i le Faamasinoga Mulimuli

Faamatala atu, i le avea ai ma vaega o le fuafuaga o le faaolataga a le Tama Faalelagi, o tagata uma lava na ola i lenei lalolagi o le a tutu i luma o le Atua ina ia faamasinoina. Fai atu i tamaiti aoga e vaai faalemafaufau pe latou te manatu pe mata o le a faapei i le Faamasinoga Mulimuli.

O le a se mea e te faamoemoe e te mafaufau i ai ma lagona pe a e tu i luma o le Atua ia faamasinoina?

Valaaulia se tamaitiiti aoga e faitau leotele le Faaaliga 20:12–13. Fai atu i le vasega e mulimuli i le faitauga, ma vaavaai mo le auala o le a faamasinoina ai i tatou e le Atua.

O le a se upumoni e mafai ona tatou aoao mai i le fuaiupu e 12 e uiga i le auala o le a faamasinoina ai i tatou? (Atonu e faaaoga e tamaiti aoga ni upu seese, ae e tatau ona faailoa mai le upumoni lenei: O le a faamasino i tatou e le Atua mai tusi na tusia e tusa ma a tatou galuega.)
O a tusi na vaai i ai Ioane? (O tusitusiga paia, faamaumauga a le Ekalesia e faamaumau ai sauniga faaola ma atonu foi ma isi faatinoga, ma le tusi o le ola [tagai 2 Nifae 29:10–11; MF&F 128:6–7; Taiala i Tusitusiga Paia, “Tusi o le Ola”].)
O a nisi mea ua e aoaoina e uiga i le Faamasinoga Mulimuli? (Manatua: I le Iunite 32: Aso 4, galuega faatino 3, na maua ai e tamaiti aoga ia mau faaopoopo na aoao mai e uiga i le Faamasinoga Mulimuli.)

Faailoa atu, na faaali mai e le Alii i le Perofeta o Iosefa Samita e faapea, e faaopoopo atu i a tatou galuega, o le a faamasinoina i tatou e tusa ai ma manaoga o o tatou loto (tagai MF&F 137:9; tagai foi Alema 41:3–5).

E faapefea e le iloa o le a faamasinoina i tatou e tusa ai ma manaoga o o tatou loto ona aafia ai mea e te manao e fai?

Molimau atu e uiga i lenei aoaoga faavae ma le ala e aafia ai a tatou filifiliga.

Valaaulia se tamaitiiti aoga e faitau leotele le Faaaliga 20:14. Fai atu i le vasega e mulimuli i le faitauga, ma manatua le mataupu faavae na latou aoaoina mai lenei fuaiupu i la latou suesuega i le aiga.

O le a se mataupu faavae sa e aoaoina mai i lenei fuaiupu? (Afai tatou te tausia poloaiga a le Alii, o le a mafai ona tatou maua faamanuiaga uma o le Togiola a Iesu Keriso ma ulu atu i le malo selesitila. Tusi le mataupu faavae lenei i le laupapa.)
Aisea ua fetaui lelei ai lenei upumoni ma le faaiuga o le tatou suesuega o le Feagaiga Fou?

Mafaufau e valaaulia tamaiti aoga e faasoa mai nisi o upumoni na faia se aafiaga ia i latou i le taimi o le latou suesuega o le Feagaiga Fou i lenei tausaga. Valaaulia soo se tasi e manao e faasoa mai a latou molimau e uiga i nei upumoni ma e uiga i le paia o le Alii o Iesu Keriso.

Ia fautuaina tamaiti aoga e faaauau pea ona suesue i tusitusiga paia i aso taitasi. Afai o le a latou auai i le seminare i le tausaga e sosoo ai, pe afai foi o loo latou sauni mo se misiona, valaaulia i latou e amata ona faitau i le aso i le Tusi a Mamona.