Luka
O lē na tusia le Evagelia a Luka ma le tusi o Galuega i le Feagaiga Fou ma se soa faifeautalai a Paulo. Na fanau mai o ia i ni mātua Eleni ma sa avea o ia o se fomai (Kolo. 4:14). Sa aoaoina lelei Luka. Sa ia taʼua o ia lava o se soa talai i le Aposetolo o Paulo ina ua faatasi o ia ma Paulo i Teroa (Galu. 16:10–11). Sa faatasi foi Luka ma Paulo i Filipi i le malaga mulimuli a Paulo i Ierusalema (Galu. 20:6), ma sa faatasi pea i laua seia taunuu atu i Roma. Sa faatasi foi Luka ma Paulo i le taimi o lona faapagotaina faalua i Roma (2 Timo. 4:11). Ua fai mai talatuu na maliu o ia o se maturo.
O le Evagelia a Luka
O se tala lea na tusia e Luka e uiga ia Iesu Keriso ma lana misiona faaletino. O le tusi o Galuega a le Au Aposetolo o le faaauauga lea o le Evagelia a Luka. Sa tuua e Luka se tala tusia lelei e uiga i le misiona po o le galuega a Iesu, ua faaali atu ai Iesu o le Faaola o tagata Iutaia ma tagata o Nuuese. E tele mea na ia tusia e uiga i aoaoga a Iesu ma ana mea na fai. I le Luka, ona pau lea o le tala ua tatou maua ai asiasiga a Kaperielu ia Sakaria ma Maria (Luka 1); le asiasiga a le au leoleo mamoe i le pepe o Iesu (Luka 2:8–18); Iesu i le malumalu i le sefululua o ona tausaga (Luka 2:41–52); le faatonuina ma le auina atu o fitugafulu (Luka 10:1–24); le afu toto o Iesu (Luka 22:44); talanoaga a Iesu ma le pagota i luga o le satauro (Luka 23:39–43); ma le taumafaina e Iesu o le iʼa ma le meli ina ua mavae lona toetu mai (Luka 24:42–43).
Mo se otootoga o mataupu, tagai i “Evagelia (Tusi).”