Usiusitai: “Pe a Poloaiina ai e le Alii, ia Faia Loa”

“Ola i le usiusitai atoatoa i poloaiga a le Atua, ma savali ai ma le lotomaualalo i Ona luma”

Mai le Soifuaga o Iosefa Samita

Mai ia Tesema 1827 e oo atu ia Aokuso 1830, sa nonofo ai Iosefa ma Ema Samita i Heremoni, Penisilevania, ae malaga atu le Perofeta mai lea taimi i lea taimi i Niu Ioka e auai i pisinisi faale-Ekalesia. Ia Setema 1830, sa siitia atu ai Iosefa ma Ema i Faiete, Niu Ioka, e auai faatasi ma le Au Paia sa nonofo i Niu Ioka i sisifo. O le masina o Tesema na sosoo ai, na maua ai e le Perofeta le faaaliga e manaomia ai tagata o le Ekalesia i Niu Ioka latou te faia ni osigataulaga tele. Ia latou tuua o latou aiga, faatoaga, ma pisinisi ae faapotopoto i Katelani, Ohio (tagai MFF 37). O iina latou te faatasi ai ma e ua liliu mai o loo nonofo i lena vaega ma atiina ae ai le Ekalesia ma, e pei ona folafola mai e le Alii, “o le a faaeeina ai outou i le mana mai luga” (MFF 38:32). O Iosefa ma Ema Samita sa i ai i le uluai vaega sa usitaia le poloaiga a le Alii, ma tuua ai Niu Ioka i le faaiuga o Ianuari 1831. Sa malaga atu e sili atu ma le 250 maila i Katelani i taavale faasee i luga o le aisa, i le ogatotonu o se taumalulu tele, ao ono masina le maitaga o Ema i se masaga.

O Newel K. Whitney o le e nofo ai i Katelani o se tasi o uluai tagata na faafeiloaia le Perofeta, e pei ona faamatalaina e le atalii o lona atalii o Orson F. Whitney: “E tusa o le aso muamua o Fepuari, 1831, o se taavale faasee i luga o le aisa o loo i ai ni tagata se toafa sa oo mai i totonu o le aai o Katelani ma tu i luma o le faitotoa o le faleoloa o Gilbert ma Whitney. … O se tasi o alii, e talavou ma tulaga maualuga, sa oso ese mai le taavale, ma tamoe atu i luga o sitepu, ma savali atu i totonu o le faleoloa i le mea o loo tu mai ai le e pule lua i le pisinisi.

“ ‘Newel K Whitney! O oe lava o le tagata lea!’ sa ia faapea mai ai, ma tuu atu lona lima ma le fiafia, e pei o se tasi ua leva ona masani.

“‘O loo sili le mea lena e te iloa i lo o au,’ o le tali mai lea a le [faatauoloa], ao ia faafeiloai atu i le aao o loo tuu mai—ma foliga e afa-fiafia, afa le mautonu ua faaalia i ona foliga—‘Ua le mafai ona ou ta’ua lou igoa, e pei ona e ta’uina mai lo’u igoa.’

“ ‘O au o Iosefa, le Perofeta,’ sa faapea mai ai le tagata ese ma le ataata. ‘Ua ou oo mai iinei ona o a outou tatalo; o lea la, o le a le mea tou te mananao ai ia te au?’

“Sa maofa le Susuga a Whitney, ae ua le faaitiitia ai le fiafia, ma ina ua tea atu lona ofo, sa ia aveina atu le au malaga … i le isi itu o le auala i lona fale o loo i le tulimanu, ma faailoa atu i latou i lona toalua [Elisapeta Ana]. Sa faapea foi ona ofo o ia ma le fiafia. Sa faapea mai Iosefa e uiga i lenei mea: ‘Sa talia ma le agalelei ma faafeiloai i matou i totonu o le fale o Uso N. K. Whitney. Sa ma nonofo ai ma lou toalua i le aiga o Uso Whitney mo ni vaiaso, ma mauaina le agalelei uma ma le tausiga sa manaomia.’ [See History of the Church, 1:145–46.]”¹

Sa faapea mai Orson F. Whitney: “O le a le mana sa iloa ai e lenei tagata maoae o Iosefa Samita se tasi e na te lei vaai lava i ai muamua i la le tino? Aisea na le iloa ai o ia e Newel K. Whitney? Ua mafua ona o Iosefa Samita o le tagatavaai, o se tagatavaai filifilia, sa ia vaai tino ia Newel K. Whitney i ona tulivae, i le selau o maila a o tatalo mo lona oo mai i Katelani. E ofoofogia—ae moni!”²

E oo mai ia Me ua toeitiiti 200 ua faaopoopo ai le Au Paia mai Niu Ioka ua malaga atu i Katelani – o nisi sa malaga atu i taavale faasee i aisa po o ni taavale toso e solofanua, ae o le toatele sa malaga atu i se vaa pailate i le Kanala i Erie ma o atu ai i se vaa afi po o se vaa faila i le vaitafe o le Erie. I lenei malaga atu i Katelani, e pei foi o le tele o isi luitau o lona olaga, sa taitaiina atu e Iosefa Samita le Au Paia i le mulimuli ai i le poloaiga a le Atua e tusa lava po o le a le faigata o le galuega.

I le fa tausaga mulimuli ane, i le ogatotonu o le tele o mea o loo fetaomi mai i le taitaiina o le Ekalesia ua faatupulaia i Katelani, sa faaalia e le Perofeta le talitonuga e faamatalaina ai lona olaga: “E leai se masina e maua ai au i le pisi tele i lo o Novema; ae talu ai o lou olaga e aofia ai gaoioiga ma uunaiga e le i faatulagaina, sa ou faia ai lenei ma au tulafono: Pe a faatonuina ai e le Alii, ia faia loa.”³

Aoaoga a Iosefa Samita

Pe a tatou sailia ia iloa le finagalo o le Alii ma faia mea uma ua Ia poloaiina ai i tatou e fai, o le a i o tatou luga faamanuiaga o le lagi.

“Mo le mauaina o le faaolataga e tatau ona le na o le faia o ni mea, ae o mea uma ua poloaiina ai i tatou e le Atua. E mafai e tagata ona folafola ma faataitai mea uma sei vagana ai mea ua poloaiina ai i tatou e le Atua tatou te faia ma e faasalaina ai i tatou i le iuga. Atonu tatou te avatu mea e sefuluai le mili ma le pekano, ma laau uma e afu, ae le usitaia lava poloaiga a le Atua [tagai Luka 11:42]. O le faamoemoe ia te au o le usitai ma aoao isi ia usiusitai i le Atua ia tau lava o mea ua Ia tauina mai ia i tatou e faia. E le afaina po o le mataupu faavae e fiafia i ai le toatele pe leai foi, ae o le a ou faatumauina pea se mataupu faavae moni, e tusa lava pe ou te tu toatasi i ai na o au.”⁴

“I le avea o se Ekalesia ma ni tagata e manaomia lo tatou atamamai, ma sailia ia iloa le finagalo o le Atua, ma ia naunau ia faia; aua ‘e manuia o e faalogo i le afioga a le Atua, ma tausi i ai,’ o loo faapea mai ai Tusitusiga Paia. ‘Ia outou mataala ai ma tatalo e le aunoa,’ ua fetalai mai ai le Faaola, ‘ina ia tauaogaina outou e sao mai ia mea uma ua tāil oo mai, ma ia tutu i luma o le Atalii o le tagata.’ [tagai Luka 11:28; 21:36.] Afai o Enoka, Aperaamo, Mose, ma le fanauga a Isaraelu ma tagata uma o le Atua na faasaoina e ala i le tausia o poloaiga a le Atua, o i tatou foi, pe afai e faasaoina, o le a faasaoina i luga o ia lava mataupu faavae. E pei ona pulea e le Atua o Aperaamo, Isaako ma Iakopo o ni aiga, ma le fanauga a Isaraelu o se malo; o lea, o i tatou, o se Ekalesia, e tatau ona i lalo o Lana taitaiga pe afai tatou te ola pea, faasaoina ma lagolagoina. E na o le Atua lava e mafai ona tatou talitonuina; e na o Ia e maua mai ai lo tatou atamai; ma ua na o Ia foi e tatau ona avea ma o tatou puipuiga ma le saogalemu faaleagaga ma le faaletino, a leai ua tatou pauu.

“Sa a’oa’ia i tatou e le aao o le Atua i taimi ua tuanai i lo tatou le usiusitai i Ana poloaiga, e ui lava tatou te lei solia se tulafono a tagata, pe solia foi ni mataupu faaletagata soifua; ae peitai ua tatou manatu faatauvaa i Ana poloaiga, ma o ese ai mai Ana sauniga, ma o le Alii ua ia a’oa’iina i tatou ma le toasa, ma ua tatou lagonaina lona mana, ma talia le aoaiga ma le lotomaualalo, o lea ia tatou atamamai i taimi o le a oo mai ma ia manatua pea o le ‘faalogo e sili lea i le taulaga, ma le usiusitai e sili lea i le gao o le mamoe poa.’ [1 Samuelu 15:22.]”⁵

“Pe a faatonuina, e tatau ona tatou usitai i lena leo, tausia poloaiga o le malo o le Atua, ina ia oo mai ai faamanuiaga o le lagi i o tatou luga. O tagata uma e tatau ona galulue faatasi, a leai e leai se mea e mafai ona faia, ma faatinoina e tusa ai ma le Perisitua anamua; o le mea lea o le Au Paia ua tatau ona avea o ni tagata filifilia, e ese mai i leaga uma o le lalolagi—filifiliga, mama, ma le paia. O le Alii [o le] a ia faia le Ekalesia a Iesu Keriso o le malo o Ositaulaga, o ni tagata paia, o le tupulaga filifilia [tagai i le Esoto 19:6; 1 Peteru 2:9], e pei o aso o Enoka, ua i ai meaalofa uma e pei ona faia i le Ekalesia i le tusi ma aoaoga a Paulo i le ekalesia i ona aso.”⁶

“O soo se tagata e mafai ona talitonu o Iesu Keriso o le Alo o le Atua, ma fiafia i lena talitonuga, ae peitai ua le tausia ana poloaiga, ma i le iuga o le a faasalaina ona o le le usiusitai i mea tonu e manaomia e le Alii.”⁷

“Ia paia ma mama; ia avea o ni tagata faamaoni ma le moni; tausi poloaiga a le Atua; ona mafai lea ona e malamalama atili atoatoa i le eseesega i le va o le sao ma le sese—i le va o mea a le Atua ma mea a tagata; ma o ou ala ua tusa ia ma ala o e amiotonu, e susulu pea lava pea lona malamalama e oo i le tu totonu o le la [tagai Faataoto 4:18].”⁸

O Elder Uilifoti Uitilafi, ao auauna ai o se tasi o le Korama a le Toasefululua sa lipotia mai: “O Persitene Iosefa. … sa faitau i le faataoto i le vine ma ona lala [tagai Ioane 15:1–8], ma faamatala, ma faapea mai, ‘Afai tatou te tausia poloaiga a le Atua, e tatau ona tatou aumaia fua o laau aina ma avea ai ma uo a le Atua, ma iloa po o a mea sa faia e lo tatou Alii.’ ”⁹

Ua tuuina mai e le Atua tulafono e saunia ai i tatou mo le malologa selesitila pe a tatou usiusitai i ai.

“O le Atua e na te le poloai i se mea, e aunoa ma le suia faapitoa o sea poloaiga, ina ia alualu i luma le tulaga o tagata taitoatasi i lalo o le a lava le tulaga ua oo i ai o ia, e le afaina po o le a le malo po o le atunuu.”¹⁰

“O le tulafono a le lagi ua tuuina atu i le tagata, ma i lea tulaga ua mautinoa ai o tagata uma e usiusitai i ai o le a i ai se taui e sili atu i soo se mea lava faalelalolagi; e ui lava e le o folafola mai o e talitonu i vaega o tausaga eseese o le a le aafia mai aafiaga ma faafitauli e aliali mai i vaega eseese talu ai amioga a tagata leaga i le fogaeleele. Ae i le ogatotonu o nei aafiaga ma faafitauli uma o loo i ai se folafolaga o loo faavaeina i luga o le mea moni o le tulafono a le lagi, e sili atu i lo o le tulafono a le tagata, e pei lava ona sili atu le olaga faaleagaga i lo o le olaga faaletino; e pei o faamanuiaga e mafai ona tuuina mai e le Atua, e sili atu i lo o faamanuiaga e mafai ona tuuina mai e tagata. O lea, e mautinoa lava, afai o le tulafono a le tagata e noatia i luga o le tagata pe a faailoa mai, o le a le sili atu ea le tulafono a le lagi e tatau ona i ai! Ma i le sili ai ona atoatoa o le tulafono a le lagi i lo o le tulafono a le tagata, o le a faapea foi ona sili tele atu le taui pe a usitaia. … O le tulafono a le Atua o loo folafola mai o le olaga lea e faavavau, e oo lava i le mauaina o le tofi i le itu taumatau o le Atua, e puipuia mai le malosi uma i lo o leaga. …

“. … O le Atua i le taimi o loo taofia, po o le vaitaimi faatulagaina i Lona lava finagalo o le a ia aumai ai i latou uma o ana fanau, o e ua usiusitai i Lona siufofoga ma tausia ana poloaiga, i Lona malologa selesitila. O lenei malologa o se atoatoaga ma le mamalu, e manaomia e le tagata mo le saunia ao le i mafai, e tusa ai ma tulafono o lena malo, ona oo atu i ai ma fiafia ai i ona faamanuiaga. Ona o lenei mea e moni, o le Atua ua ia tuuina mai ni tulafono patino i le fanau a tagata, lea afai e tausia, ua lava lea e saunia ai i latou ia maua le malologa. O lenei la, tatou te faaiuina, o le faamoemoega o le Atua i le tuuina mai o ana tulafono ia i tatou. … O poloaiga uma o loo i ai i tulafono a le Alii, o loo i ai le folafolaga mautinoa o loo i ai ma le taui ia i latou uma e usiusitai, e faavae i luga o le mea moni o ni folafolaga moni lava a Se ua le pepelo, o se Tasi e mautinoa e mafai ona Ia faataunuuina mataitusi uma o ana upu.”¹¹

Sa aoao atu e Iosefa Samita mea nei ia Aperila 1834, mulimuli ane ua tusi faamauina i le Mataupu Faavae ma Feagaiga 130:20–21: “O loo i ai le tulafono, na faavaeina e le matatalaina i le lagi ao lei faavaeina lenei lalolagi, e autu ai faamanuiaga uma lava—Pe a tatou maua foi soo se faamanuiaga mai le Atua, e maua ai i le usiusitai i le tulafono lea e autu ai.”¹²

“O faamanuiaga uma sa faauuina mo le tagata e le Au Fono a le Lagi sa i ai ma ni tuutuuga o le usiusitai i tulafono o loo i ai.”¹³

O i latou e faatuatua e oo i le iuga o le a maua le pale o le amiotonu.

“Ia ola i le usiusitai atoa i poloaiga a le Atua, ma savali ma le loto maualalo i Ona luma, ona Ia faaeaina lea o oe i Lona lava taimi e tatau ai.”¹⁴

“E faapefea le faautauta o tagata e tatau ona i ai i le mea e tatau ona latou faia i aso gataaga, ina nei faapuupuuina o latou manaoga, ma o i latou o e manatu latou te tutu e tatau ona pauu, ona latou te le i tausia poloaiga a le Alii; ae o oe, o loo faia le finagalo o le Alii ma tausia Ana tulafono, ua manaomia le fiafia ma le olioli le ma faamatalaina, o i latou ia e faaeaina maualuga, ma e siitia ae i luga ma le manumalo i malo uma o lenei lalolagi.”¹⁵

“I le mataupu e 22 o le tusi a [Mataio] i le talaaga o le Mesia, ua tatou iloa ai o le malo o le lagi ua faatusaina i le tupu ua faia se faaipoipoga mo lona atalii [tagai Mataio 22:2–14]. Ma o lenei atalii o le Mesia e le finauina, ona o le malo o le lagi ua faaalia i le faataoto; ma o le Au Paia, po o i latou ua faatuatua i le Alii, o i latou ua agavaa e maua se nofoaga i le tausamaaga o le faaipoipoga, ua manino mai i le faamatalaga a Ioane i le Faaaliga lea na ia faatusa ai i le leo mai le lagi ua peiseai ‘o le leo o le motu o tagata e toatele,’ po o le faapei ‘o le taalili foi o faititili tetele, ua faapea atu, “aua ua fai ma tupu le Alii le Atua, e ona le malosi uma lava”. Ia tatou fiafia ma olioli, ma tuu atu le viiga ia te ia; aua ua oo mai le tausamaaga o le Tamai mamoe, o lona faletua foi ua saunia o ia e ia. Ua tuuina atu foi ia te ia ina ia ofu o ia i le ie vavae mama ma le pupula: aua o le ie vavae o le amiotonu lea a le Au Paia’ [Faaaliga 19:6–8].

“O i latou o e tausia poloaiga a le Alii ma savavali i Ona ala i le iuga, ua na o i latou ia ua faatagaina e nonofo i lena tausamaaga mamalu, ma ua iloa manino mai i mea ia ua tusia i le tusi a Paulo ia Timoteo, lea sa tusia ae lei maliu o ia—sa ia faapea mai: ‘Ua ou tau le taua lelei, ua iu ia te au le tausinioga, ua ou taofi i le upu o le faatuatua. O lenei, ua teuina mo au le pale o le amiotonu, e foaiina mai ia te au i lea lava aso o le Alii le faamasino amiotonu; e le gata foi ia te au, a o i latou uma lava o e fiafia i lona faaali mai.’ [2 Timoteo 4:7–8.] E leai se tasi e talitonu i lenei tala, e na te le talitonuina mo se minute lenei faamaoniga a Paulo ua faia, aua ua ia iloa, ao lei tuua e ia lenei lalolagi. E ui ina sa ia faia, e tusa ai ma lana lava tala, sa saua i le Ekalesia a le Atua ma faataugā i ai, ae ina ua ia mauaina le faatuatua, o ana galuega ua le taofiofia le faasalalau atu o le tala fiafia: ma ua pei o se fitafita faatuatua, pe a valaauina e tuuina atu lona ola mo le galuega ua ia fiafia i ai, ua ia tuuina i lalo, e pei ona ia fai mai ai, ma le mautinoa o se pale e faavavau.

“A e mulimuli i galuega a lenei Aposetolo mai le taimi o lona liliu seia oo i le taimi o lona maliu, o le a e maua sina malamalama o le toaga ma le onosai i le aoaoina atu o le Talalelei a Keriso. I le amusia, sasaina, ma fetogiina i maa, o le taimi lava na ia sola ese mai ai i lima o ona fili sa ia folafola atu ai ma le vilivilitai sauniga mo le Faaola. Ma sa ia iloaina atoa e na te lei opoina le faatuatua mo ni viiga i lenei lalolagi, po o le maua ai o ni oa o le lalolagi. O le a la se mea e ono tosina ai o ia ina ia faia uma nei galuega faigata? O le mafuaaga, e pei ona ia fai mai ai, ina ia maua e ia le pale o le amiotonu mai le aao o le Atua. E leai se tasi, matou te talitonu, e na te le talitonuina le faatuatua o Paulo seia oo i le gataaga. E leai se tasi e faapea mai e na te lei tausia le faatuatua, e na te lei tau i le taua lelei, e na te lei talaiina ma faatauanau seia oo i le iuga. Ma o le a le mea sa tatau ona ia mauaina? O le palealii o le amiotonu.

“Sei toe tau tomanatu mo sina minute, uso e, ma fesili po o ua e iloilo ia te oe lava pe ua agavaa [mo] se nofoaga i le tausamaaga o le faaipoipoga ma Paulo ma isi foi e pei o ia, pe ana fai e te le o faatuatua? Pe afai e te lei tauina ea se taua lelei, ma tausia le faatuatua, e te fuafuaina e te mauaina? Pe ua i ai ea sau folafolaga o le mauaina o le palealii o le amiotonu mai le aao o le Alii, faatasi ai ma le Ekalesia a le Ulumatua? O i lea ua tatou malamalama ai sa faalagolago le faamoemoe o Paulo ia Keriso, ona sa ia tausia le faatuatua, ma ia fiafia i lona faaali mai ma e mai Lona aao ua ia folafola mai ai le mauaina o se palealii o le amiotonu. …

“… O i latou anamua, e ui ina sa faitioina ma sauaina e tagata, sa maua mai i le Atua folafolaga o ia tulaga taua ma le mamalu, ua faapea ona faatumuina soo ai o tatou loto ma le agaga faafetai ma ua oo ai lava ina faatagaina i tatou e aoao i o latou soifuaga ao tatou mafaufau loloto e leai se faailoga tagata i Ona luma, ma i malo uma, o e matatau i le Atua ma galulue i le amiotonu, ua talia i latou e Ia [tagai Galuega 10:34–35]. …

“E mafai ona tatou faia le faaiuga e tatau ona i ai se aso e faamasinoina ai tagata uma ia latou galuega, ma tauia e tusa ai ma a latou galuega; ma o i latou o e sa tausia le faatuatua o le a faapaleina i le palealii o le amiotonu; faaofuina i ofu papae sisina; e faatagaina i le tausamaaga o le faaipoipoga, e saoloto mai mafatiaga uma, ma nofotupu ma Keriso i le lalolagi, o lea, e tusa ai ma folafolaga a perofeta anamua, o le a latou taumamafa ai i fua o le vine e fou i le malo mamalu faatasi ma Ia; o le mea sili ua tatou iloa o ia folafolaga sa faia i e anamua, ma e le o ni a tatou mea, talu ai ona sa faia i le Au Paia anamua, ae peitai afai o i tatou o fanau a Le Paia i Luga, ma ua valaauina i le valaauga tutusa lava lea sa valaauina ai i latou, ma mauaina lenei lava feagaiga ua latou mauaina, ma ua faatuatua i le molimau i lo tatou Faaola e pei o i latou, e mafai ona tatou faalatalata atu i le Tama i le suafa o Keriso ao agai atu ia te Ia, ma e mo i tatou lava ia maua ia lava faamanuiaga.

“O nei folafolaga, pe a maua, e i tatou lava, e le ona o Peteru, Ioane ma isi Aposetolo … sa savavali ma le matatau i le Atua ma sa i ai le mana ma le faatuatua e manumalo ai ma mauaina ia mea; ae ua maua ona o i tatou lava, ua i ai le faatuatua ma faalatalata atu i le Atua i le suafa o Lona Alo o Iesu Keriso, e pei lava ona sa latou faia; ma pe a maua ia folafolaga, o ni folafolaga patino mo i tatou, a leai ua le aoga lea mo i tatou. O le a faailoaina mo lo tatou lelei, o a tatou lava mea totino (e ala i le meaalofa a le Atua), ua mauaina i lo tatou lava naunautai i le tausia o ana poloaiga, ma savavali ai ma le amio sao i Ona luma.”¹⁶

“Matou te faamanatu atu ia te outou, uso e, le vaivai ona o galuega, tofotofoga, le le lava o le tausiga, ma sauaga, sa feagai ma le au paia anamua mo le faamoemoe e tasi o le faatauanauina lea o tagata i le maualuga ma le saolele o le faatuatua o Keriso, o se tulaga moomia e tusa ai ma so matou manatu, pe o le a avea o se auala e faaosofia ai oe e galue i le tovine a le Alii ma se naunautaiga sili atu. Ae ua i ai foi se mafuaaga matou te talitonu ai (afai e avea Tusitusiga Paia ma se vaega taua o au suesuega), ma o lo latou tutumau ua e iloaina uma; ma faapea foi ona o latou naunau e ositaulaga i le tuueseina lea o viiga ma mea fiafia o lenei lalolagi o i ai, ina ia latou maua se faamautinoaga o se palealii o le ola mai le aao o lo tatou Alii; ma o a latou faataitaiga lelei i galuega, ua faaalia mai ai ia i tatou lo latou naunau i le galuega o loo latou faia, o loo e taumafai e mulimulitai i ai i aso taitasi. Ua le na o nei faataitaiga a le Au Paia, ae o poloaiga a lo tatou Alii, tatou te faamoemoe o loo tupu pea i totonu o o tatou loto, ma aoaoina oe, e le gata i Lona finagalo ia folafolaina Lana Talalelei, ae o lona agamalu ma lana amio atoatoa i o tatou luma, e oo lava i taimi o le malolosi o tuuaiga ma sauaga sa faateleina i ona luga mai se tupulaga leaga ma le mulilulua.

“Ia manatua, uso e, o loo Ia valaau ia te oe i le paia; ma e le tatau ea lo tatou faapea atu, ia pei o Ia i le mama? O lona uiga, e maeu se atamai, se paia, se legavia, ma se mama atoatoa, e tatau ona outou amioa’i i Lana silafaga; ma ia manatua foi, o ona fofoga e i ai pea i o outou luga. I le iloa ai o ia mea moni i se malamalama tatau, e le mafai ona e le iloaina, afai e leai se tausiga ma le faamaoni o Ana faatulagaga paia uma, e ono mafai, i lena taimi le vaivai o le amiotonu, ma afai o lea, o le a e faaalia mai o lou taunuuga o le a faafoliga tutusa lava ma le auauna le aoga. O lea, matou te aioi atu ai ia te outou, uso e, ia faaleleia mea uma ua tuuina atu i lau tausiga, ina ia aua nei leiloa lou taui.”¹⁷

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai itulau vii–xii.

Faitau le parakalafa mulimuli i le itulau e 170, o loo taulai i le taiala sa faatuina e Iosefa Samita mo lona olaga. Mafaufau i ni poloaiga patino ua e mauaina i se taimi lata mai, e ala mai saunoaga a perofeta soifua po o musumusuga a le Agaga Paia. Ua faapefea ona faamanuiaina oe i lou usitaia o nei poloaiga e aunoa ma se faatali?
Toe iloilo le parakalafa muamua i le itulau e 171. Aisea i nisi taimi tatou te “tu toatasi ai” ina ia “faatumauina se mataupu faavae moni”? O a ni auala tatou te le tutoatasi ai i ia taimi? (Mo ni faataitaiga, tagai i itulau 171.) E faapefea ona tatou fesoasoani i tamaiti ma talavou ia tumau i mataupu faavae o le talalelei e tusa lava pe o se tulaga e le tautaua ai i latou?
Suesue le vaega o loo amata i le itulau 173. O a ni mafuaaga ua tuuina mai ai e le Atua ia i tatou poloaiga? Aisea e tatau ai ona tatou usiusitai i ana poloaiga?
Toe iloilo aoaoga a Iosefa Samita e uiga i le Mataio 22:2–14 ma le 2 Timoteo 4:7–8 (itulau 175–78). Mafaufau loloto pe faapefea ni ou lagona pe a faatagaina oe i le tausamaaga o le faaipoipoga? O le a le ituaiga o tagata e tatau ona tatou i ai ina ia agavaa e faatagaina? O le a sou manatu i le uiga o le tau le taua lelei ma tausia le faatuatua? Mafaufau i se tasi e te iloa sa tauina se taua lelei ma tausia le faatuatua. O le a se mea e mafai ona e aoaoina mai lena tagata?
O le Perofeta o Iosefa sa faamalosiau mai ia i tatou ia manatua o le Alii sa “valaauina [tatou] i le paia” (itulau 178). O le a le uiga ia te oe o le valaauina i le paia? E faapefea ona avea lo tatou manatuaina o lenei “valaauga” e faia ai se suiga i o tatou olaga? i olaga o tagata o o tatou aiga ma uo?

Mau E Faatatau I Ai: Esoto 20:1–17; Ioane 7:17; 1 Nifae 3:7; MFF58:26–29; Aperaamo 3:25