O Le Tusi ia Wentworth

“Na ou fanau i le aai o Sarona, i le Itumalo o Uinesora, Veremona, i le aso 23 o Tesema, t.l.m. 1805. Ina ua sefulu [o’u] tausaga, na malaga atu o’u matua i Palamaira, Niu Ioka, lea na matou nonofo ai mo le tusa ma le fa tausaga, ma mai iina na matou o atu ai i le aai o Maniseta. O lo’u tama o se faifaatoaga ma na aoao maia ia te au le tomai o le tausi manu. Ina ua tusa ua sefulufa o’u tausaga, na amata ona ou tomanatu i le taua o le saunia mo se tulaga i le lumanai, ma ina ua ou fesili [e uiga] i le ata o le faaolataga, na ou iloa ai na i ai se feeseeseaiga tele i manatu faalelotu; afai ou te alu i le tasi sosaiete latou te faasino maia ia te a’u se tasi fuafuaga, ma se isi sosaiete i se isi fuafuaga; ma o ia [fuafuaga] taitasi e faasino i lona lava talitonuga o le auala silisili lea o le atoatoaga. Faatasi ai ma le manatu e le tatau ona sa’o uma, ma o le Atua e le o se mataisau o le faasoesa, na ou matua naunau ai e suesue i le atoatoa le mataupu, ma le talitonuga faapea ana i ai se Ekalesia a le Atua o le a le vaevaeina i vaega, ma afai Na te aoaoina le tasi sosaiete e tapuai i se tasi auala, ma faatinoina se tasi vaega o sauniga, o le a Ia le aoaoina i se isi [sosaiete], aoaoga faavae ia e matua feteenai lava ma ia na ia aoaoina i le isi.

“Ma lo’u talitonu i le afioga a le Atua, na ou talitonuina le tautinoga a Iakopo—‘A e afai ua leai se poto i so outou, ina ole atu ia i le Atua, o lē foai tele mai i tagata uma ma le le toe ta’uta’ua: ona foaiina mai ai lea ia te ia.’ [Iakopo 1:5.] Na ou alu atu ai i se nofoaga tuufua i le vao, ma amata ona ou tatalo i le Alii; a o aioi atu ma le faatauanau, na aveesea lo’u mafaufau mai mea na siomia ai a’u, ae na ufitia a’u i se faaaliga vaaia faalelagi, ma ou vaai ai i ni peresona mamalu se toalua, o e na foliga tutusa lelei lava i o la fofoga ma faatusa, e siomia i se malamalama pupula lea na sili atu lona malamalama nai lo le la i le aoauli. Na la ta’u mai ia te a’u o faapotopotoga faalelotu uma lava na talitonu i aoaoga faavae e le sa’o, ma e leai se tasi o i latou e finagalo le Atua e ta’ua o Lana Ekalesia ma Lona malo: ma na poloaiina manino mai ai lava ‘aua ou te mulimuli ia i latou,’ ma i le taimi lava lea na maua ai se folafolaga o le a faaalia mai ia te a’u i se taimi o i luma le atoatoaga o le Talalelei.

“I le afiafi o le aso 21 o Setema, t.l.m. 1823, a o ou tatalo i le Atua, ma taumafai e faaaoga le faatuatua i folafolaga taua o Tusitusiga Paia, na faafuasei ona oo mai se malamalama e pei o le ao, ae o se faaaliga ma se malamalama e matua silisili lona mama ma silisili ona mamalu, na oo faafuase’i mai ma faatumulia ai le potu; e moni o le uluai vaaiga na pei e faatumulia le fale i le afi mumu; o le faaaliga na oo mai ai se lagona faate’ia na aafia ai le tino atoa; ma i sina taimi ae tulai mai se peresona i o’u luma e siomia i le mamalu e sili atu nai lo le malamalama lea na uluai siomia ai a’u. O lenei avefeau na folafola mai o ia o se agelu a le Atua, na auina mai e aumaia le talalelei o le olioli o le feagaiga na faia e le Atua ma Isaraelu anamua ua latalata mai ona faataunuuina, o le galuega sauniuni mo le toe afio mai o le Mesia ua vave lava ona amataina, ma ua latalata mai le taimi e talaiina ai i le mana, i atunuu uma ina ia saunia le nuu mo le nofotupu faa-Meleniuma. Na tauina mai ia te a’u na filifilia a’u e avea ma meafaigaluega i aao o le Atua e aumaia nisi o Ana fuafuaga i lenei augatupulaga mamalu.

“Na tau mai foi ia te a’u e faatatau i tagatanuu o lenei atunuu ma faaali mai po o ai i latou, ma po o fea foi na o mai ai i latou; o se tala otooto o lo latou faavae, alualu i luma, aganuu, tulafono, malo, o lo latou amiotonu ma agasala, ma ina ua iu lava ina aveeseina faamanuiaga a le Atua mai ia i latou o se nuu, na faaalia mai ia te a’u; na tau mai foi ia te a’u le nofoaga na teu ai ni papatusi ia na togitogia ai se tuufaatasiga o faamaumauga a Perofeta anamua o e na ola i lenei konetineta. Na faaali mai faatolu le agelu ia te a’u i le po lava e tasi ma faailoa mai ia te a’u ia mea lava e tasi. Ina ua maea le tele o asiasiga mai agelu a le Atua ma faailoa mai ai le silisiliese ma le mamalu o mea o le a tutupu i aso e gata ai, i le taeao o le aso 22 o Setema, T.A. 1827, na tuuina mai e le agelu a le Alii faamaumauga i o’u lima.

“O nei faamaumauga na togitogia i luga o papatusi ia na foliga mai o auro; o lau taitasi e ono inisi le lautele ae valu inisi le umi, ma e le matua mafiafia e pei o le apa taatele. Na faatumulia i latou i togitogiga, i mataitusi faa-Aikupito, ma sa fusifusia faatasi i se voluma e pei o ni lau o se tusi, faatasi ai ma mama e tolu e nonoa faatasi ai le mea atoa. O le voluma na i se mea o le ono inisi le mafiafia, ma na faamaufaailogaina se vaega. O mataitusi i le vaega e lei faamaufaailogaina e ninii, ma matagofie le togitogiga. Na faaalia mai e le tusi atoa faailoga o lona tulaga anamuā i lona fausaga, ma le tele o le tomai i le faatufugaga o le togitogi. Faatasi ai ma faamaumauga na maua ai se mea faigaluega uiga ese, lea na taua anamua o le ‘Urima ma le Tumema,’ lea e i ai maa malamalama e lua e faatuina i totonu o le faavaa o se tioata e faamau i se ufi fatafata. E ala i le faaaogaina o le Urima ma le Tumema na ou faaliliuina ai le faamaumauga e ala i le mea foaifua ma le mana o le Atua.

“… O lenei tusi … ua tau maia ia i tatou na faatino e le Faaola Lona faailoa atu i lenei konetineta ina ua mavae Lona toetu; na Ia totoina ai le Talalelei iinei i lona atoatoa, ma le tamaoaiga, ma le mana, ma faamanuiaga; na ia i latou foi Aposetolo, Perofeta, Faifeau, Aoao, ma Fai Evagelia, le faatulagaga e tasi, le perisitua e tasi, o sauniga e tasi, meaalofa, mana, ma faamanuiaga, e pei ona faafiafiaina ai le konetineta i sasae; o tagata na vavaeeseina o le taunuuga lea o a latou agasala; o le na mulimuli o o latou perofeta o le na i ai faatasi ma i latou na poloaiina e tusia se otootoga o a latou valoaga, talaaga, ma isi, ma teuina i le eleele, ma e tatau ona oo mai ma tuufaatasia ma le Tusi Paia mo le faataunuuina o fuafuaga a le Atua i aso gataaga. Mo se tala sili ona auiliili ou te faasino i le Tusi a Mamona, lea e mafai ona faatauina i Navu, pe mai soo se isi lava o o tatou Toeaina Femalagaa’i.

“Na faailoa atu loa le tala fou o le mauaina o [nei papatusi], na felelei solo lipoti sese, faauigaga sese o le taufaaleaga, e pei e lelea i apaau o le matagi, i itu uma lava; na tele ina lamatia le fale e tagata leaga ma tagata taupulepule leaga. E tele taimi sa fanaina ai a’u, ma toetoe lava a ou lavea ai, ma sa faaaogaina ituaiga o auala uma e aveese ai papatusi mai ia te a’u; ae sa ia te au le mana ma faamanuiaga a le Atua, ma sa amata ona talitonu ni nai tagata ia te a’u.

“I le aso 6 o Aperila, 1830, na uluai faatulagaina ai le ‘Ekalesia a Iesu Keriso o le Au Paia o Aso e Gata Ai’ i le aai o Faiete, Itumalo o Seneca, i le setete o Niu Ioka. E toaitiiti na valaauina ma faauuina i le Agaga o faaaliga ma valoaga, ma sa amata ona talai atu a o tuuina atu e le Agaga ia te i latou upu e tautala ai, ma e ui ina vaivai, ae na faamalolosia i latou i le mana o le Atua, ma e toatele na aumaia i le salamo, ma faatofuina i le vai, ma na faatumuina i le Agaga Paia e ala i le faaee atu o lima. Na vaai i latou i faaaliga ma vavalo atu, na tutuli ese temoni, ma faamaloloina mai i le faaee atu o lima. Mai lena taimi na taavale atu i luma le galuega i se vave ofoofogia, ma na vave ona faatuina lotu i setete o Niu Ioka, Penisilevania, Ohio, Initiana, Ilinoi, ma Misuri; i le setete ua mulimuli ona taua na faatuina ai se nofoaga tele lava i le itumalo o Jackson: e toatele na liliu mai i le Ekalesia ma na vave ona faatoateleina i matou; na matou faatauina ni fanua tetele, na faatumuina i fua o a matou faatoaga, ma faafiafiaina la matou faapotopotoga o fale ma aiga i le filemu ma le fiafia, faapea foi ma o matou tuaoi uma; ae talu ai e le i mafai ona matou fegalegaleai ma o matou tuaoi (o e, o le toatele o i latou, o ni tagata tulaga sili ona maualalo o tagata, ma na latou sosola mai sosaiete faatulagaina, agai mai i le faatausiusiuga o le atunuu e alo ese mai ai le faamasinoga tonu,) i a latou fiafiaga i le leva o le po, lo latou le faamamaluina o le Sapati, tuuga solofanua ma le pele tupe; na amata e i latou ona muamua faitio, ona faasaua lea, ae mulimuli ai ua i ai se vaega leaga maopoopo na faapotopoto ma susunuina o matou fale, faatā i matou ma faapipii i ai fulumanu ma sasaina le toatele o o matou uso, ma faaiu ai, i le faatuiese i le tulafono, le faamasinoga tonu ma tulaga faaletagata, i le tutulieseina o i latou mai o latou nofoaga; o e, ua leai ni fale ma leai ni aiga, na savavali solo ai ma le faanoanoa i le togavao malulu seia tafe le toto o a latou fanau i luga o le ala. Na tupu lea mea i le masina o Novema, ma na leai se isi lava faamalumaluga ua na o le faapaologa o le lagi, i lenei tau leaga o le tausaga; o lenei faiga na le amanaiaina e le malo, ma e ui lava na i ai pepa faamaonia e leai ni aitalafu o o matou fanua, ma e matou te lei solia ni tulafono, ae e lei mafai lava ona matou maua se tali mo se vaifofo.

“Na toatele e na mama’i, o e na tutulieseina i ni auala mataga mai o latou fale, ma na latou onosaia ai nei faiga saua uma ma tau saili ni fale po o fea lava le mea e maua ai. O le taunuuga, o le matua toatele o i latou na faaogea i le tele o tulaga lelei o le olaga, ma auaunaga manaomia, na oti; e toatele fanau na tuua ua matua oti, o ava [na tuua] e leai ni tane, ma tane, e leai ni ava; o a matou faatoaga na aveina e tagata leaga, o le afe ma afe o povi, mamoe, solofanua, meaituaolō na aveesea, o a matou meaafale, o oloa o faleoloa, ma le ofisa ma masini lomitusi na gaui, aveesea, pe faaleagaina.

“O le toatele o o matou uso na masii atu i le itumalo o Clay, lea na latou nonofo ai seia oo i le 1836, mo le tolu tausaga; na leai ni faiga saua na oo mai, ae na i ai foufouga o faiga saua. Ae i le taumafanafana o le 1836 na faasolo ina foliga faigata mai nei faiga fouvale, mai faiga taufaafefe, na valaauina ai fonotaga faalauaitele, na pasia ai ni faaiuga, na lu’iina ai faiga faatauimasui ma faataumaoi, ma na toe faaauau lava faiga faamata’u; o le itumalo o Jackson o se tulaga talafeagai, ma ona o le leai o se faalavelave o pulega i lena itumalo na latou [o pulega o le itumalo o Clay] tala faaalialia vale ai o le a latou [le faalavelave ] i le mea lea; lea ina ua matou talosagaina le pulega na matou iloa ai le le moni, ma ina ua mavae le tele o le faaleagaina ma le aveesea o a matou meatotino, na toe tulieseina foi i matou mai o matou aiga ma fale.

“Na sosoo ma lo matou faamautu i itumalo o Caldwell ma Davies, lea na matou faamautuina ai ni nofoaga matua tetele lava, ma le manatu e faasaolotoina ai i matou lava mai le malosi o faiga saua, e ala i le faamautuina i itumalo fou, lea e matua toalaiti lava ni tagata na nonofo ai; ae peitai e lei mafai foi ona matou nonofo i le filemu iinei, ae i le 1838 na toe osofaia foi i matou e tagata leaga, na tuuina mai e Kovana Boggs se faatonuga e faaumatia [i matou], ma i lalo o le faatagaga a le tulafono, na i ai se vaega leaga sa feoai solo i totonu o lea vaega o le nuu, na faoa a matou povi, mamoe, puaa, ma isi mea, o le toatele o o matou tagata na fasiotia i le faamasaaina o le toto, na faia faatautala le ola mama o o matou tamaitai, ma na faamalosia i matou e saini ese atu a matou meatotino e ala i le mata o le pelu; ma ina ua maea ona matou onosaia mea leaga uma na faaputu mai i o matou luga e se vaega faomea amioleaga le alolofa ma leai se amioatua, mai le sefululua i le sefululima afe tagata, alii, tamaitai, ma tamaiti, na tutulieseina mai o latou lava fale, ma mai fanua ia na i ai pepa faamaonia, ua leai ni o latou fale, leai ni uo, ma leai ni faamalumaluga (i le loloto o le taumalulu) e feoai solo ai i le lalolagi o ni tagata ua faaaunuua, pe tau saili foi se sulufaiga i se nofoaga lelei, ma i se mea o i ai ni tagata e le amioleaga. E toatele na mama’i ma oti ai o se taunuuga lea o le malulu ma faigata na latou onosaia; e toatele ni ava na oti a latou tane, ma tamaiti [na tuua] ua matuaoti, ma faaogea. E tele atu le taimi nai lo le avanoa ua tuuina mai ia te a’u e faamatala atu ai le amioletonu, mea leaga, o le fasioti tagata, o le faamasaa toto, faomea, faanoanoa ma le lotomomomo ua mafua i faiga saua faatufanua, le alofa, ma le faatulafonoina a le setete o Misuri.

“I le tulaga na ta’ua muamua, na matou taunuu ai i le setete o Ilinoi i le 1839, lea na matou maua ai se nuu o tagata alolofa ma se nofoaga fiafia: o ni tagata o e na naunau e pulea i aoaoga faavae o le tulafono ma le faaletagata. Ua amata ona fausia se aai e taua o ‘Navu,’ i le itumalo o Hancock. E toa ono i le valu afe i matou iinei, e ese mai i fuainumera tetele o lo o i isi vaega o le itumalo, toeitiiti lava foi faapena itumalo uma o le setete. Ua tuuina mai ia i matou le faatagaga aloaia e faatuina ai se aai, ma se faatagaga aloaia mo se Au Fitafita, se vaega lea ua 1,500 le aofai. Ua ia i matou foi se faatagaga aloaia mo se Iunivesite, mo se Sosaiete Faifaatoaga ma Gaosimea, e fai ai a matou lava tulafono ma pulega, ma i ai ia i matou avanoa manaomia uma o loo sapi ai isi tagatanuu o loo saoloto ma faamalamalamaina.

“E le i taofia e sauaga le alualu i luma o le upu moni, ae ua na ona faaopoopo i le mumu, ua salalau atu ma le televave ua faateleina. I le mitamita ai i le tuutuuga fuafuaina ua latou talisapaia, ma talitonu ai i lo matou tulaga mama, ma le moni o la latou fuafuaga, i le totonugalemu o le taufaaleaga ma faitioga, ua agai atu ai i luma Toeaina o lenei Ekalesia, ma totoina le Talalelei toetoe lava i setete uma taitasi i le Iunaite setete o Amerika; ua ulufia ai o matou aai, ua salalau atu ai i o matou nuu, ma ua faatupuina le usitai o le afe ma afe o o matou tagatanuu atamamai, mamalu, ma lotonuu e usiusitai i ana taitaiga paia, ma ia pulea e ona upu moni paia. Ua salalau atu i Egelani, Aialani, Sikotilani, ma Uelese, ia sa na o ni nai faifeautalai toalaiti na auina atu i ai i le 1840, ma e sili atu i le lima afe na taliaina le Tulaga o le Upu Moni; e toatele ni tagata o e ua auai i le taimi lenei i nuu uma.

“O a tatou faifeautalai o loo o atu i atunuu eseese, ma i Siamani, Palesitina, Niu Holani [Ausetalia], o Indies i Sasae, ma isi nofoaga, ua faatuina ai le Tulaga o le Upu Moni; e leai se lima e le paia e mafai ona taofia le galuega mai le alualu i luma; atonu e vevesi mai sauaga, tuufaatasia vaega a tagata leaga, faapotopoto vaegaau, faatoilalo mai le taufaaleaga, ae o le upu moni a le Atua o le a agai atu i luma ma le malosi, mamalu, ma tutoatasi, seia ulufia konetineta uma, asia nuu uma, ufitia ai atunuu uma, ma lagonaina i taliga uma, seia faataunuuina uma fuafuaga a le Atua, ma o le a fetalai mai Ieova Silisili ua maea le galuega.

“Matou te talitonu i le Atua le Tama faavavau, ma Lona Alo o Iesu Keriso, ma le Agaga Paia.

“Matou te talitonu e faasalaina tagata ona o a latou lava agasala, ae le o le agasala a Atamu.

“Matou te talitonu e faaolaina tagata uma lava i le togiola a Keriso pe a tausia poloaiga ma sauniga o le Talalelei.

“Matou te talitonu o muai mataupu faavae ma sauniga o le Talalelei e faapea: muamua, o le Faatuatua i le Alii o Iesu Keriso; lona lua, o le Salamo; lona tolu o le Papatisoina i le faatofuina mo le faamagaloina o agasala, lona fa, o le faaee atu o lima e maua ai le mea foaifua o le Agaga Paia.

“Matou te talitonu e ao ina valaauina le tagata e le Atua, i le valoaga, ma le faaee atu o lima, o e o i ai le pule, e talai atu ai le talalelei ma faia sauniga o i ai.

“Matou te talitonu i le faatulagaga sa i ai i le Ekalesia anamua, e i ai aposetolo, perofeta, epikopo, aoao, peteriaka, ma isi tofiga faapena.

“Matou te talitonu i mea foaifua e pei o le tautala i gagana, valoaga, faaaliga, faaaliga vaaia, faamaloloina o mai, faamatalaga o gagana ma isi mea faapena.

“Matou te talitonu o le Tusi Paia o le afioga a le Atua i mea uma ua tonu ona faaliliuina; matou te talitonu foi o le Tusi a Mamona o le Afioga ia a le Atua.

“Matou te talitonu i mea uma lava ua faaalia mai e le Atua, ma mea uma o loo ia faaalia mai nei, ma matou te talitonu o le a ia faaalia mai le tele o mea silisili ma le taua tau le Malo o le Atua.

“Matou te talitonu i le matua faapotopotoina o Isaraelu ma le toe foi mai o Ituaiga e Sefulu; ma o le a faatuina Siona i lenei konetineta (o Amerika); ma o le a nofo tupu lava Keriso i le lalolagi; ma o le a faafouina le lalolagi ma maua lona mamalu faa-Parataiso.

“Matou te tautino atu e a matou le aia tatau matou te tapuai atu ai i le Atua mamana e tusa ai ma o matou lava loto fuatiaifo, ma matou te tuuina atu foi lea lava aia tatau i tagata uma lava e faitalia i latou, pe faapefea, po o fea, po o le a foi latou te tapuai atu i ai.

“Matou te talitonu i le usiusitai i tupu, ma peresitene, ma faipule, ma faamasino, i le usiusitai ma faamamalu ma lagolagoina le tulafono.

“Matou te talitonu ia faamaoni, amiotonu, nofo mama, agalelei, amio mama, ma le faia o mea lelei i tagata uma; e moni, matou te faapea atu matou te tausisi i le apoapoaiga a Paulo, Matou te talitonu i mea uma, matou te faamoemoe i mea uma, ua uma ona matou onosai i mea e tele, ma matou te faamoemoe o le a mafai ona matou onosai i mea uma. Afai o i ai nisi mea mama, matagofie, logoleleia, ma tauleleia, matou te saili ia mea uma. [Tagai Mataupu Faavae o le Faatuatua 1:1–13.]

“Ma le Faaaloalo lava, ma isi mea faapena,

“IOSEFA SAMITA.”⁴