O Le Tali Atu i Sauaga e ala i le Faatuatua ma le Lototele

“Aua le matata’u, ae ia outou lototetele i le Alii ma le malosi o lona mana.”

Mai le Soifuaga o Iosefa Samita

I le taumalulu o le 1838–39, na faatonuina ai fitafita a le Setete o Misuri e le kovana e tutuliese le Au Paia o Aso e Gata Ai mai le Setete, ma faafalepuipuiina le Perofeta o Iosefa Samita i le Falepuipui i Liperate. I le taumalulu lena ma le tautotogo na sosoo ai, na tupu mai ai se mafatiaga sili ona matautia, ina ua faamalosia le afe ma afe o le Au Paia e sosola mai o latou fale i Misuri. I le tuua ai o le tele o a latou meatotino, na amata ai ona latou malaga atu i le 200 maila i sasae i Ilinoi sisifo, i lalo o le taitaiga a Polika Iaga ma isi taitai o le Ekalesia. E toalaiti nisi o le Au Paia na i ai taavale solofanua ma solofanua lelei, ae toatele na momoe i le timu ma le kiona e aunoa ma se puipuiga. O nisi o e na leai ni seevae na saisai o latou vae i ieie a o latou savavali atu i luga o le kiona.

Ia Fepuari 1839, na fesoasoani ai se tuaoi agalelei ia Ema Samita e tuuina lana fanau e toafa ma nai ana meatotino i se taavale solofanua na fola i vao mamago. Ina ua taunuu mai le latou vaega i le Vaitafe aisa o Misisipi, na savavali ai Ema ma lana fanau i luga o le aisa, o loo ia tauaveina ai tusitusiga a le Perofeta o ana faaliliuga o le Tusi Paia na nonoa i ni ato ie se lua i lona manava i lalo o lona sakete. Na sulufai atu o ia ma isi o le Au Paia mafatia i le nuu o Quincy, Ilinoi, lea na faaauau ai pea ona pagatia i le fia aai, malulu, ma faama’i, e ui ina sa faamamaina nei mafatiaga i le tele o le agalelei mai i se nuu alolofa.

E ui lava na naunautai le Perofeta o Iosefa e fesoasoani i le Au Paia, e laitiiti lava se mea e mafai ona ia faia ua na o le tatalo ma tuuina atu taitaiga e ala i tusi ia Polika Iaga ma isi uso o e na taitaiina le Au Paia i lona toesea. I nei tulaga matua atuatuvale, na ia tusia ai upu faamalosiau ma le filemu i tagata o le Ekalesia: “Uso pele, sei tatou faia ma le fiafia mea uma o loo i ai i lo tatou mana; ona mafai ai lea i tatou ona tumau lava ma le mautinoa mausali, e vaavaai atu i le faaolataga a le Atua, ma le faaalia o lona aao” (MFF123:17).

I le aso 6 o Aperila, 1839, na siitia ai le Perofeta ma ona uso a pagota ona o le suia o le nofoaga mai le Falepuipui i Liperate agai atu i Gallatin, Daviess County, Misuri. Ina ua maea ona auai atu i se faamasinoga iina, na toe auina atu foi le usoga ina ua toe suia le nofoaga mai Gallatin e agai atu i Columbia, Boone County, Misuri. Ae i le ogatotonu o Aperila, a o auina atu le Perofeta ma isi pagota agai i Columbia, na faatagaina ai i latou e leoleo e sosola. I totonu o le tasi le vaiaso, sa toe faatasi atu le au uso ma le vaega tele o le Au Paia i Quincy, Ilinoi. Na tusia e Elder Uilifoti Uitilafi i lana tusi faamaumau e uiga i lana feiloaiga ma le Perofeta: “Na matou… toe maua foi le avanoa fiafia e uuina ai le lima o Uso Iosefa. … Na ia faafeiloai i matou ma le olioli tele. Faatoa maua e ia le laveaiga mai le falepuipui ma mai lima o ona fili ma toe foi mai ai i le li’o o lona aiga ma uo. … Na faamaoni, sa’o, ma masani Iosefa e pei lava ona masani ai. Na matua fiafia tele Tuafafine Ema.”¹

Na mulimuli ane viia e le Perofeta ona uso a Au Paia, o e i le faatasi ai ma ia, na loto totoa e tumau aua lo latou faatuatua i le talalelei toefuataiina a Iesu Keriso: O uiga faaalia o le Au Paia, i le taimi o le tele o mea sese [e faia ia i latou] ma mafatiaga, ua matua viia; o lo latou lototetele i le puipuia o o latou uso mai faiga matautia a tagata leaga; o lo latou tutumau i le fuafuaga faatuina o le upu moni, i le taimi o laasaga silisili ona tofotofoina ma faigata e ono mafai e tagata ona onosaia; o lo latou alofa o le tasi i le isi; o lo latou saunia e tuuina mai fesoasoaniga ia i matou ma o’u uso ia na matou noanoatia faatasi i se potu palapala pogisa; o a latou taulaga i le tuua o Misuri, ma fesoasoaniga i tina ua oti a latou tane ma fanau matua oti, ma faamautuina o ni fale mo i latou i se nofoaga sili atu lona tali malo; e galulue faatasi uma e tausia i latou i le agaga o tagata lelei ma mama, ma ua faamautuina mo i latou le alofa ma le viiga o Ieova, ma se igoa e tumau e pei o le faavavau.”²

Aoaoga a Iosefa Samita

O le fili o le upu moni e tetee i auauna a le Alii, ae maise lava pe a latou latalata atu i le Alii.

“O sauaga ua faasagatonu mai ia i tatou mai lea taimi i lea taimi, … e pei o le pa leotele mai faalausosoo o faititili, ona o la tatou ekalesia.”³

“O a tatou mataupu faavae faale-ekalesia ua i luma o le lalolagi ma ua saunia mo le suesuega a tagata uma, ae ua tatou iloa o sauaga uma e faasaga ia tatou uo ua tulai mai o se taunuuga o [moliaga sese] ma faaliliuga sese e leai ni faavae i le upu moni ma amiotonu. Ua tatou manumalo i le onosaia o nei faiga e pei lava o isi foi faapotopotoga faale-ekalesia ina o tau amata foi i latou.”⁴

“Aua la tou te ofo pe afai ua sauaina outou; ae manatua afioga a le Faaola: ‘E le sili le auauna i lona alii; afai ua latou faasaua mai ia te au, e faasaua foi ia te outou’ [tagai Ioane 15:20]; ma o faigata uma ia e tatau ona ui atu ai le Au Paia, o le faataunuuina ia o upu na tautalagia e Perofeta talu mai le amataga o le lalolagi.”⁵

“Pe a ou faia le mea sili ou te mafaia—pe a ou faataunuuina le lelei silisili, ona sili atu lea ona tele mea leaga ma fuafuaga leaga e tulai mai e tetee mai ia te a’u. … O le a le mafai lava ona faavaivai fili o lenei nuu i a latou sauaga tetee i le Ekalesia, seiloga ua latou faatoilaloina. Ou te iloa o le a latou faatulaga mea uma i lo latou mana e pule ai, ma e tatau ona faia ai se taua umi ma le maoae. O lē tau i le taua moni faaKerisiano e tetee atu i mea leaga uma o nei aso e gata ai o le a i ai tagata leaga ma agelu a le tiapolo, ma mana faaseoli uma o le pouliuli e faaauau pea ona faatu mai e tetee ia te ia. A tetee mai tagata leaga ma amioleaga, o se tulaga e tatau ona faamasinoina po o tauina e se tagata le taua faaKerisiano. Amuia outou pe a upu leagaina sese outou e tagata, ma isi. [tagai Mataio 5:11]. E tatau ea ona manatu e leaga se tagata pe a upu leagaina o ia e tagata? E leai. Afai e tulai se tagata ma tetee atu i agasala a le lalolagi, e tatau ona ia iloa o le a tulai uma agaga leaga ma amioleaga e tetee mai ia te ia.

“Ae o le a na o sina taimi, ma o le a tuueseina atu nei puapuaga ma i tatou, pe afai tatou te faamaoni, ma le faatoilaloina i tatou e nei mea leaga. I lo tatou iloa atu o faamanuiaga o le faaeaga o taavale atu pea, ma o loo faateleina pea le malo ma salalau atu mai lea sami i lea sami, o le a tatou olioli ona e lei faatoilaloina i tatou e nei mea valea.”⁶

“O loo ua manatu nisi o le a faamalieina o tatou fili i lo’u faaumatiaga; ae ou te fai atu ia te outou o le taimi lava latou te faamasaaina ai lo’u toto o le a latou galala foi mo le toto o tagata uma lava taitoatasi o e oi o latou loto sina mumu o le agaga o le atoaga o le Talalelei. O le faatuiese o nei tagata o loo uunaiina e le agaga o le fili o le amiotonu uma. E le tau ina faaumatiaina a’u, ae o alii ma tamaitai uma taitoatasi o e ua talitonu i mataupu faavae ua musuia a’u e aoao atu i lenei tupulaga.”⁷

“Ua ou aoaoina mai e ala i mea na tutupu, e le moe le fili o le upu moni, pe taofia foi ana uunaiga e faasese ai mafaufau o tagata e tetee atu i auauna a le Alii, e ala i le faatupuina o le ita valea o tagata i mataupu taua pe manatu i ai.”⁸

O i latou o e e alolofa i le Atua o le a tauaveina sauaga ma le lototetele ma le faatuatua.

“Le Au Paia uma e! ia outou manuia e ala i lenei Ki taua—i o outou tofotofoga, faaosoosoga, mafatiaga, saisaitiaga, noanoataga ma le oti, ia outou faamautinoaina, tou te le faalataina le lagi; tou te le faalataina Iesu Keriso; tou te le faalataina o outou uso; tou te le faalataina faaaliga a le Atua, pe o i le Tusi Paia, Tusi a Mamona, po o le Mataupu Faavae ma Feagaiga, po o soo se isi na tuuina mai pe o le a tuuina mai ma faaalia mai i tagata o le lalolagi lenei pe o le lalolagi o le a sau. Ioe, i a outou taumafaiga e tetee atu ma tauiviga, ia mautinoa tou te le faia lenei mea, ina nei iloa i o outou lava pito ofu le toto o le ola o e matitiva e le sala, ma o le a outou o atu ai i seoli.”⁹

I le tautotogo o le 1830 na sauaina ai le Au Paia o se taunuuga o le lomiaina o le Tusi a Mamona: “O le Tusi a Mamona (o le laau a Iosefa ai lima o Efaraima,) ua umi sina taimi talu ona lomiaina, ma e pei ona valoia mai e le perofeta anamua, ‘a ua ta’ua ia mea o mea ese.’ [Tagai i le Hosea 8:12.] E matautia se vevesiga na tupu ai i lona aliali mai. E matautia le tetee ma sauaga na mulimulita’i i e na talitonu i ai i lona faamaoni. Ae ua oo ina tupu a’e le faamaoni ai le lalolagi; ae vaavaai ifo foi le amiotonu mai le lagi [tagai i le Salamo 85:11, Mose 7:62], ma na tatou le matatau i o tatou fili, ma le iloa o loo ia i tatou uma le upu moni ma le amiotonu i la tatou itu, na ia i tatou uma le Tama ma le Alo, aua na ia i tatou mataupu faavae a Keriso, ma tatou tumau ia i la’ua; ma o le mea lea na tatou faaauau ai ona talai atu ma tuuina atu faamatalaga ia i latou uma o e na naunau e faalogo.”¹⁰

Ia Iulai 1839, na faamaumauina e Uilifoti Uitilafi: “Na laugaina i matou e Iosefa i nai upu iti ma faapea mai, ‘Ia manatua, uso e, afai ua faafalepuipui outou, na muamua faafalepuipui Uso Iosefa ia te outou. Afai e tuuina outou i se mea e na o na mafai ai ona outou iloa atu o outou uso i pa uamea o se faamalama a o noanoatia i filifili uamea ona o le talalelei a Iesu Keriso, ia manatua na faapena foi tulaga na i ai Uso Iosefa.’ ”¹¹

I le 1841 na tusia ai e Iosefa Samita ma ona fesoasoani i le Au Peresitene sili faapea: “O le upu moni, e pei o le aoa mautu ma le malosi, na tu pea e le i afaina i le ogatotonu o elemene o le fefinaua’i, ia na sasa i ai ma le malosi matautia. Ua tatafe mai vaitafe, fafati mai lea galu ma lea galu, i se faagasologa vave, ae e le i foloina o ia. Ua latou sii ae o latou leo, ‘Ieova e, ua taalili mai vaitafe, o vaitafe ua taalili ae o latou leo; o vaitafe ua taalili ae o latou gogolo. O Ieova o i le mea maualuga, e sili ona malosi o ia i le taalili o vai e tele, o peau malolosi o le sami’ [tagai i le Salamo 93:3–4]; e lei mafaia foi e afi mumu o sauaga, faatasi ai ma uunaiga uma a tagata leaga, ona mafai ona faaumatiaina o ia; ae faapei o le laau a Mose, na tu ai e le faaumatiaina, ma i lenei lava taimi ua faaalia mai o se mataaga taua i tagata ma agelu.

“O fea e mafai ona liliu atu i ai o tatou mata e vaai ai i se isi mea faapea? Tatou te mafaufau i se faatulagaga o se ekalesia, e itagia, ma o le usitaia ua aumaia ai ia i latou sauaga faifaipea. O se nuu o lē, ona o lo latou alofa i le Atua, ma le tumau ai i Ana fuafuaga faatuina, ua latou mafatia ai i le fiaai, le lavalava, mea faigata, ma toeitiiti lava o ituaiga o faigata uma. O se nuu o lē, mo le lelei o la latou ekalesia, na latou faavauvau ai i le vave ona oti o matua, tane, ava, ma fanau. O se nuu o le ua sili ia i latou le oti nai lo le nofopologa ma le pepelo, ma ua faatumauina i le mamalu o latou tagata, ma tutumau ma le le gaee, i taimi ua tofotofoina ai agaga o tagata.”¹²

E lagolagoina e le mana malosi o le Atua i latou o e sauaina mo le amiotonu.

A o falepuipui o ia i le Falepuipui i Liperate, na tusi Iosefa i le Au Paia: “Aua nei tou manatu e faavaivai o tatou loto, e peiseai o se mea fou ua oo ia i tatou [tagai 1 Peteru 4:12], aua na muamua tatou vaai ma mautinoa e uiga i nei mea uma lava, ma ua mautinoa o i ai se faamoemoega sili atu nai lo le faamoemoega o o tatou tagata saua. O le mea lea ua faamalolosia ai e le Atua o tatou tauau mo le avega. Tatou te manumalo i o tatou faigata, aua tatou te iloa o loo i ai le Atua ma i tatou, o Ia o la tatou uo, ma o le a Ia faasaoina o tatou ola. Tatou te le popole ia i latou o e e mafai ona fasiotia le tino; e le mafai ona latou faaleagaina le agaga [tagai i le Mataio 10:28]. Tatou te le tagi atu mo se mea ai lima o tagata leaga, po o le lalolagi, po o le tiapolo, po o ona sui o e na liliuese, ma i latou o e alolofa i le, ma faia le, ma tauto i le pepelo, e aveesea o tatou ola. Tatou te le i nanaina lava o tatou talitonuga, pe tatou te faia lava mo le lelei o o tatou ola. … Tatou te iloa o loo tatou taumafai pea ma o tatou mafaufau, loto, ma le malosi, e faia le finagalo o le Atua, ma mea uma lava po o le a lava le mea ua Ia poloaiina ai i tatou. …

“… Na fetalai mai le Faaola, ‘E oo mai lava mea e tausuai ai e ao ai; a e ui lava i lea, oi talofa i lea tagata e oo mai ai le mea e tausuai ai.’ [Tagai i le Mataio 18:7.] Ma toe faapea mai foi, ‘Amuia outou pe a latou upu leaga, ma faasaua ia te outou, ma latou tuuaiina pepelo outou i mea leaga uma ona o a’u; Ia outou olioli ma fiafia lava; aua oi le lagi lo outou taui e tele, aua na faapea ona latou faasaua i perofeta e na muamua ia te outou.’ [Mataio 5:11–12.]

“O lenei, uso pele e, afai e i ai i ni tagata se mafuaaga e aia i lenei folafolaga, o i tatou lava o ia tagata; aua ua tatou iloa e le gata ina itagia i tatou e le lalolagi, ae latou te tautala i mea leaga uma ma tuuaiina pepelo i tatou, e le mo se isi lava mafuaaga nai lo le tatou aoao atu o le atoaga o le Talalelei a Iesu Keriso. …

“Ma lenei, uso pele e ma alofagia tele—ma a matou faapea atu uso, o lona uiga o i latou o e tumau pea i le faamaoni ia Keriso, alii, tamaitai ma fanau—matou te lagona e apoapoai atu ia te outou i le suafa o le Alii o Iesu, ina ia faamalolosi i le faatuatua i le feagaiga fou ma le faavavau, ma lē fefe lava i o outou fili. … Tumau ai seia oo lava i le oti; aua ‘ai se fia faasaogalemuina lona ola, e maumau ai ia te ia; a o le faamaumau lona ola ona o a’u ma le Talalelei, e faasaoina o ia, na fetalai mai ai Iesu Keriso [tagai i le Mareko 8:35].”¹³

Na tusi foi le Perofeta ma ona fesoasoani i le Au Peresitene Sili mai le Falepuipui o Liperate i taitai o le Ekalesia: “Uso e, aua tou te matatau, a ia faamalolosi i le Alii ma le malosi o lona mana. O ai le tagata e tatau ai i le auauna a le Atua ona matau ia te ia, po o le atalii o le tagata e tatau ai ona gatete ia te ia? Aua foi nei manatu o se mea fou nei faamasinoga aasa ia e faamasinoina ai i matou, e peiseai o se mea fou ua oo ia i matou. Manatua ua tofusia uma lava ona tofo i ia ituaiga o puapuaga. [Tagai i le 1 Peteru 4:12–13.] O le mea lea, olioli i o tatou puapuaga, lea e ala ai ona mafai ona faaatoatoaina outou ma o le ala foi lea na faaatoatoaina ai le kapeteni o lo tatou faaolataga. [Tagai i le Eperu 2:10.] Ia faamafanafanaina o outou loto ma loto o le Au Paia uma faatasi ma outou; ma tuu latou ia matua olioli ai, aua oi le lagi lo outou taui tele; aua na faapea ona latou faasaua i perofeta e na muamua ia i tatou [tagai i le Mataio 5:11–12].”¹⁴

Fautuaga mo Suesuega ma le Aoaoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau vii–xii.

Toe iloilo le tala i itulau 395–97. O a ni mea e uunaiina loloto oe e faatatau i le ala na tali atu ai Iosefa Samita ma ona uso o le Au Paia i sauaga? Aisea e te manatu ai na naunau i latou e onosaia sauaga?
Faitau itulau 398–99, lea e aoao mai ai e le Perofeta o Iosefa faapea o tagata amiotonu o le a masani ona feagai ma sauaga. Aisea e te manatu ai e moni lea tulaga? E faapefea e sauaga o aso nei ona pei o sauaga i aso o Iosefa Samita? E faapefea ona ese aso nei?
I le itulau 399, na faasoa mai e Iosefa Samita se ki e fesoasoani i le Au Paia. O a ni aafiaga ua faaali mai ai ia te oe le taua o lenei ki? O a nisi fautuaga e mafai ona e tuuina atu i se tasi o feagai ma sauaga ona o lona faatuatua? (Mo ni faataitaiga, tagai i itulau 399–401).
Toe iloilo itulau 401–03, lea e faamautinoaina ai e Iosefa Samita ia i tatou o le a lagolago i tatou e le Alii pe a tatou tali atu i sauaga i le faatuatua ma le lototele. O le a sou manatu o le a le uiga pe a faapea o le Atua ua “faalauteleina o tatou tauau mo le avega”? E faapefea ona tatou “manumalo i o tatou faigata”? O a ni auala e te manatu e mafai ona fesoasoani ai o tatou mafatiaga e faaatoatoaina i tatou?

Mau E Faatatau I Ai: Mataio 5:43–44; Roma 8:35–39; 2 Nifae 26:8; Mosaea 24:8–16; 3 Nifae 6:13