Lotú—ko ha Fekau mo ha Tāpuaki

Ko ha fekau ia mei he ʻEikí ke tau fekumi maʻu pē kiate ia ʻi he lotu fakatōkilalo. Ko e taimi naʻe fakataha ai e Fakamoʻuí mo ʻene kau ākongá naʻá ne akoʻi kinautolu ke lotu mo tā sīpinga ʻi honau ʻaó ʻi he lotu maʻu pē ki heʻene Tamaí. Te tau lava ʻo fakapapauʻi, he ko ha fekau ia mei he ʻEikí, ko ha ngāue māʻoniʻoni ʻa e lotú, pea ko e taimi ʻoku tau fekumi ai ki he ʻEikí ʻoku totonu ke fai ia ʻi he laumālie ʻo e loto fakatōkilalo mo e ʻapasia. …

… Ko e fatongia ia ʻo e mātuʻá ke akoʻi ʻenau fānaú ke lotu ʻi he kamata pē ke nau maʻu ha mahinó. ʻAi ke nau angaʻaki ʻa e fakataufolofola ki heʻenau Tamai ʻi he langí, mo mahino ʻa e ʻuhinga ke lotu aí. Kapau ʻoku kamata ʻa e ʻulungāngá ni ʻi he kei īkí, ʻe lava ʻo kei maʻu pē ʻi he ngaahi taʻu matuʻotuʻá, pea ko e tangata pe fefine ne feinga fakamātoato ke fekumi ki he ʻEikí mo fakafetaʻi kiate ia ʻi he ngaahi tāpuakí, te ne lava ʻo ʻamanaki he ʻikai liʻaki kinautolu ʻe he ʻEikí ʻi he houa ʻo e fiemaʻú.⁶

ʻĪmisi

A mother kneeling by her young son as he prays.

ʻOku ou fifili pe kuo faifaiangé pea tau kiʻi tuʻu ʻo fakakaukau ki he ʻuhinga kuo kole mai ai ʻa e ʻEikí ke tau lotú. Naʻe kole mai ke tau lotú koeʻuhí he ʻokú ne fie maʻu ke tau punou mo hū kiate ia? Ko e tefitoʻi ʻuhingá ia? ʻOku ʻikai keu tui ko ia. Ko ʻetau Tamai Hēvaní ia, pea kuo fekau ke tau hū kiate ia mo lotu kiate ia ʻi he huafa ʻo hono ʻAlo ʻOfaʻanga ko Sīsū Kalaisí. Ka ʻe lava pē ʻo kei lelei ʻa e ʻEikí ia taʻe kau ai ʻetau ngaahi lotú. He kei hoko tatau atu pē ʻene ngāué, tatau ai pē pe ʻoku tau lotu pe ʻikai. … Ko e lotú ko ha faʻahinga meʻa ʻoku tau fie maʻu, ʻoku ʻikai fie maʻu ia ʻe he ʻEikí. ʻOkú ne ʻafioʻi e founga ke fakahoko ai ʻene ngaahi ngāué mo e founga ke tokangaʻi aí ʻo ʻikai ha tokoni meiate kitautolu. ʻOku ʻikai taumuʻa ʻetau ngaahi lotú ke fakahā kiate ia ʻa e founga ke fai ʻaki ʻene ngāué. Kapau ʻoku tau maʻu ha fakakaukau hangē ko iá, ʻoku moʻoni ʻoku tau maʻu ha fakakaukau hala. ʻOku fakahoko ʻetau ngaahi lotú ʻo meimei maʻatautolu pē, ke langaki hake kitautolu mo foaki mai ha ivi mo ha lotolahi, pea mo fakalahi ʻetau tui kiate iá.

Ko e lotú ko ha faʻahinga meʻa ʻokú ne fakavaivaiʻi ʻa e laumālié. ʻOkú ne fakalahi ʻetau mahinó; ʻokú ne fakamaama ʻetau fakakaukaú. ʻOkú ne tohoakiʻi ke tau ofi ange ki he Tamai ʻi he langí. ʻOku tau fie maʻu ʻene tokoní; ʻoku ʻikai toe fehuʻia e meʻa ko iá. ʻOku tau fie maʻu e fakahinohino ʻa e Laumālie Māʻoniʻoní. ʻOku fie maʻu ke tau ʻilo pe ko e ngaahi tefitoʻi moʻoni fē kuo foaki mai ʻa ia te tau lava ai ʻo foki ki hono ʻaó. ʻOku fie maʻu ke fakamāmaʻi hotau ʻatamaí ʻe he fakahinohino fakalaumālie ʻoku maʻu meiate iá; pea ʻoku tau lotu leva ʻi he ngaahi ʻuhinga ko iá kiate ia, ke ne tokoniʻi kitautolu ke tau moʻui taau ke ʻilo ʻene moʻoní pea mo lava ʻo ʻaʻeva ʻi hono māmá, koeʻuhí ke tau lava ʻo toe foki ki hono ʻaó, tuʻunga ʻi heʻetau faivelenga mo talangofuá.⁷

ʻOku ʻi ai ha ngaahi meʻa siʻi ʻi he moʻuí ʻe mahuʻinga tatau mo e fetuʻutaki mo e ʻOtuá ʻi he lotú. Kuo ʻai ʻe he ʻEikí ke ngalo ʻiate kitautolu ia pea mo ʻetau feohi mo ia ko e kau mēmipa ʻo hono fāmilí ʻi he moʻui ki muʻa ʻi he māmaní. Ko e lotú ko e founga fetuʻutaki ia kuó ne foaki ke tau toe fengāueʻaki ai mo iá. ʻI heʻene peheé, ko e taha ʻo e ngaahi tefitoʻi taumuʻa ʻo ʻetau ʻi he moʻui fakataimi fakamatelié ke vakaiʻi pe te tau lava ʻo ako ʻi hotau lotó maʻu pē ʻa e laumālie ʻo e lotú pea ko e taimi ʻoku fili ai ʻe he ʻEikí ke folofolá, te tau ongoʻi hono leʻó ʻi hotau laumālié.⁸

“Pea ʻoku ou fai ʻa e fekau kiate kinautolu (ʻa ia, ko e ngaahi mātuʻa ʻi Saioné), ko ia ia ʻoku ʻikai te ne fai ʻene ngaahi lotú ʻi he ʻao ʻo e ʻEikí ʻi hono taimi totonú, tuku ke manatuʻi ia ʻi he ʻao ʻo e fakamaau hoku kakaí.” [T&F 68:33.]

ʻOku ʻikai ke u tui kuo fuʻu lahi haʻatau lau ʻa e veesi ʻi he vahe ko ʻení, pea ʻoku ou fifili ai he taimi ʻe niʻihi pe ʻoku tau fakatokangaʻi hono mahuʻinga moʻoni ʻo e fekau ko ʻení. He ʻikai ke lava ha taha ʻo pukepuke ʻa e Laumālie ʻo e ʻEikí, tukukehe ka lotu. He ʻikai ke lava ha taha ʻo maʻu e fakahinohino ʻa e Laumālie Māʻoniʻoní, tukukehe ka nofo hono lotó ʻi he laumālie ko ʻeni ʻo e lotú. …

ʻOku ou fie lea he taimí ni ʻi he fakamatala ko ʻení, ʻi ha kiʻi mōmēniti ʻe taha pe ua. … Ko e hā ʻa e taimi lelei ki he lotú?

ʻOku fakakaukau hatau niʻihi ko e taimi ki he lotú ʻa e taimi ʻoku tau ʻā hake ai ʻi he pongipongí, pea mo e taimi ʻoku tau ʻamanaki mohe ai ʻi he poʻulí ʻi he ʻosi ʻetau ngāué, pea ʻoku ʻikai ha toe taimi kehe ia ke lotu ai. Ka ʻoku ou pehē kiate kimoutolu, pea ʻoku ou maʻu ha poupou lelei ki ai, ko e taimi ki he lotú ʻa e taimi kotoa pē. Tuku ke u lau atu ia kiate kimoutolu. ʻOku mou meaʻi pē ʻoku ou saiʻia ke fakamoʻoniʻi ʻa e meʻa ʻoku ou leaʻakí; ʻOku ou fie ʻomi ha fakamoʻoni ke ne fakamoʻoniʻi e meʻa ʻoku ou fakamatalaʻí, pea ʻoku ʻikai ke u kole au ki he kakaí ke nau tali ʻa e meʻa ʻoku ou leaʻakí tukukehe kapau ʻoku fenāpasi mo e meʻa ʻoku folofola fakahangatonu ʻaki ʻe he ʻEikí pe fakafou ʻi heʻene kau palōfitá. ʻOku tau lau ʻi he Tohi ʻa Molomoná ʻa e lea ʻa [ʻAmuleki] ki he kakai Sōlami masiva naʻe mavahe mei he moʻoní, pea kapusi mei honau ngaahi falelotú, koeʻuhí ko ʻenau masivá, ʻo nau ongoʻi te nau toki lava pē ke lotu tahataha ʻi ha taimi te nau kaka hake ai ʻi he lameiumitomí, ʻo hangē ko hono uí [vakai, ʻAlamā 31:12–23], naʻe ʻikai ke nau ʻiloʻi ʻa e meʻa ʻoku nau faí. Naʻe akoʻi kinautolu ʻe [ʻAmuleki] ʻo peheni:

“ʻIo, tangi kiate ia ke maʻu ʻa e ʻaloʻofá, he ʻoku māfimafi ia ke fakamoʻui; ʻio, fakavaivaiʻi ʻa kimoutolu, ʻo fai atu ʻi he lotu kiate ia; tangi kiate ia ʻi hoʻomou ngaahi ngoué, ʻio, koeʻuhí ko hoʻomou ngaahi tākanga monumanu iiki kotoa pē; tangi kiate ia ʻi homou ngaahi falé, ʻio, koeʻuhí ko homou falé kotoa pē, ʻi he pongipongí, hoʻataá, mo e efiafí; ʻio, tangi kiate ia ke taʻofi ʻa e mālohi ʻo homou ngaahi filí; ʻio, tangi kiate ia koeʻuhí ko e tēvoló, ʻa ia ko e fili ki he māʻoniʻoni kotoa peé. Tangi kiate ia koeʻuhí ko e fua kotoa pē ʻo hoʻomou ngaahi ngoué, koeʻuhí ke mou tuʻumālie ai; tangi koeʻuhí ko e ngaahi tākanga monumanu iiki ʻi hoʻomou ngaahi ngoué, ke nau tupu ʻo tokolahi. Ka ʻoku ʻikai ko ia pē; ka ʻoku totonu ke mou fakahā hake homou laumālié ʻi homou ngaahi loki liló, mo homou ngaahi potu liló, pea ʻi homou feituʻu maʻomaʻonganoá; ʻio, pea ʻo ka ʻikai te mou tangi ki he ʻEikí, tuku ke fonu homou lotó, ʻo ʻunuʻunu atu maʻu ai pē kiate ia ʻi he lotu, koeʻuhí ko hoʻomou leleí, pea mo e lelei foki ʻanautolu ʻoku ʻiate kimoutolú. Pea ko ʻeni, vakai, ʻe hoku kāinga ʻofeina, ʻoku ou pehē kiate kimoutolu, ʻoua naʻa mou mahalo ko hono ngataʻangá ʻeni, he ka ʻosi hoʻomou fai ʻa e ngaahi meʻá ni kotoa pē, kapau te mou tekeʻi ʻa e masivá mo e tēlefuá, ʻo ʻikai ʻaʻahi ki he mahakí mo e faingataʻaʻiá, pea foaki mei hoʻomou koloá ʻo kapau ʻoku mou maʻu, kiate kinautolu ʻoku masivá; ʻoku ou pehē kiate kimoutolu, kapau ʻoku ʻikai te mou fai ha meʻa ʻe taha ʻi he ngaahi meʻá ni, vakai, ʻoku iku taʻe-ʻaonga ʻa hoʻomou lotú, pea ʻoku ʻikai hano ʻaonga kiate kimoutolu, pea ʻoku mou hangē ko e kau mālualoi ʻa ia ʻoku nau fakaʻikaiʻi ʻa e tuí.” [ʻAlamā 34:18–28.]

Te u pehē ko ha tokāteline lelei ʻaupito ia, pea ʻoku ou lau iá ke fakamamafaʻi ki homou ʻatamaí ʻa e taimi ʻo e lotú. Ko e taimi ʻo e lotú ʻi he pongipongí ki muʻa pea mātuku ʻa e fāmilí. Ko ha taimi lelei ki he lotú ko e taimi ʻoku mou fakataha ai ʻi he tēpilé ki muʻa pea maʻu hoʻomou meʻatokoni pongipongí, pea tuku ke fetongitongi ʻa e kau mēmipa ʻo e fāmilí ʻi he lotú. Ko e taimi ia ʻo e lotú. Ko e taimi ʻo e lotu ki he taha fefakatauʻakí ʻoku ʻi he pongipongí ʻi he taimi ʻoku ʻalu ai ki he feituʻu ʻo ʻene pisinisí pea ki muʻa pea kamata ʻene ngāue he ʻahó, ʻo lotua ʻene koloá. Ko e taimi ʻo e lotu ʻa e tauhisipí, ko e taimi ʻoku mavahe ai mo ʻene tākangá ʻo tokangaʻi kinautolú. Ko e taimi ki he taha ngoué ke lotu aí ko e taimi ʻoku ʻalu ai mo ʻene palaú ki he ngoueʻangá, ko e taimi ʻoku ʻalu ai ke tūtuuʻi ʻa e kēlení, pea mo e taimi ʻoku ʻalu ai ke tānaki ʻene ututaʻú. Pea kapau ʻe lotu ha taha ʻo hangē ko hono fekauʻi ke ne fai ʻi he fakamatala folofola ko ʻeni ne u toki lau atú, pea ta ʻoku ngalingali ʻe maʻu ia ʻi he meʻa kotoa pē ʻokú ne tauhi ʻi he māʻoniʻoni ʻa e ngaahi fekau ʻa e ʻEikí.⁹

ʻĪmisi

Alma and Amulek in prison, with several men around them, look up as the roof is caving in.

ʻOku ʻikai totonu ke tau lotu ʻaki pē hotau loungutú; ka ʻi he tōʻonga kotoa pē, ʻi heʻetau pōtalanoá, pea ʻi he meʻa kotoa pē ʻoku tau feinga ke fakahokó, ʻoku totonu ke tau feinga ke fakahoko ʻa e meʻa ʻoku tau leaʻaki ʻi heʻetau ngaahi lotú, pea ke fenāpasi ia mo e ngaahi fakakaukau ʻoku tau fakahā ki he ʻEikí ʻi heʻetau ngaahi kole fakaʻahó.¹⁰

ʻOku tau maʻu nai ʻa e laumālie ʻo e lotú? Kuo tau ʻosi ʻai nai ke hoko ia ko ha konga ʻo ʻetau moʻuí kakato? ʻOku tau fetuʻutaki nai mo e Tamai fakalangí ʻi he Laumālie Māʻoniʻoní, pe ʻoku ʻikai?¹¹

Hono ʻikai totonu ke tau tanumaki fakalelei ʻi he founga ʻo e moʻui faʻalotú, ha loto houngaʻia. ʻOku ou tui ko e taha ʻo e ngaahi angahala lalahi taha ʻoku halaia ai ʻa e kakai ʻo māmaní he ʻahó ni ko e angahala ʻo e taʻe-fakahoungaʻí, ʻa e ʻikai ke nau fakamoʻoniʻi, ʻi heʻenau tafaʻakí, ʻa e ʻEikí mo ʻene totonu ke tuʻutuʻuni mo pulé.¹²

ʻOku totonu ke lilingi atu hotau lotó ʻi heʻetau ngaahi lotú ʻi he fakafetaʻi ki he moʻuí mo kitautolu, ki he feilaulau huhuʻi ʻa e ʻAlo ʻo e ʻOtuá, ki he ongoongolelei ʻo e fakamoʻuí, kia Siosefa Sāmita pea mo e ngāue kāfakafa ʻo e fakafoki mai ʻo e ongoongoleleí ne fakahoko ʻiate iá. ʻOku totonu ke tau fakamoʻoniʻi e kau ʻa e toʻukupu ʻo e ʻEikí ʻi he ngaahi meʻa kotoa peé mo fakafetaʻi kiate ia ʻi he ngaahi meʻa kotoa pē fakaetuʻasino mo fakalaumālie fakatouʻosi.¹³

ʻOku totonu ke tau kole ki he [Tamai Hēvaní] ke maʻu ha tui mo faivelenga pea ki he ngaahi ʻulungaanga fakaʻotua kotoa pē, ke ikuna pea mo ola lelei ʻa ʻene ngāué, ke maʻu e tataki hono Laumālie Māʻoniʻoní, pea mo e fakamoʻui ʻi hono puleʻangá. ʻOku totonu ke tau lotua hotau ngaahi fāmilí, ʻa hotau ngaahi uaifí mo e fānaú, ki ha meʻakai mo ha fale pea mo ha vala, ki he ngaahi meʻa fakapisinisi ʻoku tau tokanga ki aí, pea mo hono kotoa ʻo ʻetau ngaahi fakaʻānaua māʻoniʻoní.¹⁴

ʻOku ou lotua ke ʻiate kitautolu pea mo e kakai kotoa pē ʻa e ngaahi tāpuaki ʻo e langí.

Pehē ange mai ʻe lilingi hifo ʻe he ngaahi langí ʻa e māʻoniʻoní mo e moʻoní ki he kotoa ʻo e māmaní!

Pehē ange mai ke maʻu ʻe he taha kotoa pē ha telinga fanongo, pea ke nau talangofua ki he ngaahi lea ʻo e moʻoní mo e māmá ʻoku tō mei he kau tamaioʻeiki ʻa e ʻEikí!

Pehē ange mai ke fakahoko vave ʻa e ngaahi taumuʻa ʻa e ʻEikí ʻi he lotolotonga ʻo e kakai kotoa pē ʻi he puleʻanga kotoa!

ʻOku ou lotua ʻa e kāingalotu ʻo e Siasí, ʻa ia ko e kau māʻoniʻoni ʻo e Fungani Māʻolungá, ke lava ʻo fakamālohia kinautolu ʻi heʻenau tuí, pea ke fakautuutu ʻenau holi ki he māʻoniʻoní ʻi honau lotó, pea ke nau lava ʻo ngāueʻi honau fakamoʻuí ʻi he manavahē mo e tetetete ʻi he ʻao ʻo e ʻEikí [vakai, Filipai 2:12; Molomona 9:27].

ʻOku ou lotua e lelei mo e tuʻuʻaliʻaliaki ʻi he lotolotonga ʻo e kakai kotoa pē, ke lava ʻo taki ke nau fekumi ki he moʻoní, ke poupouʻi ʻa e tefitoʻi moʻoni kotoa pē ʻo e moʻoní, pea ke paotoloaki ʻa e ngāue ʻo e tauʻatāiná mo e fakamaau totonú.

ʻI he ngaahi taimi palopalema mo faingataʻa ko ʻení, ʻoku ou fakatauange ʻe tataki ʻa e taha kotoa pē ʻe he maama ʻokú ne fakamaama ʻa e tokotaha kotoa ʻoku haʻu ki he māmaní [vakai, Sione 1:9; T&F 93:2], pea ke nau lava ʻo maʻu ai ʻa e poto ke solova ʻa e ngaahi palopalema ʻokú ne uesia ʻa e faʻahinga ʻo e tangatá.

ʻOku ou kolea e ʻaloʻofa ʻa e Tamaí ke lilingi mai ʻene ngaahi tāpuakí ki he kakai kotoa pē, ki he talavoú mo e matuʻotuʻá, kiate kinautolu ʻoku ʻi ai ha ʻuhinga ke nau tangi ai, ki he fiekaiá mo e masivá, kiate kinautolu kuo tofanga ʻi ha ngaahi tūkunga fakamamahi mo e ngaahi ʻātakai taʻe-feʻungá, pea kiate kinautolu kotoa pē ʻoku fie maʻu tokoní, pea ke tokoni, mo fakafiemālieʻi, fakataha mo ha poto, pea mo e ngaahi meʻa lelei mo maʻongoʻonga kotoa, ko ia tokotaha pē ʻokú ne lava ʻo foakí.

ʻOku ou maʻu ha ʻofa mo ha tokanga pea mo ha manavaʻofa ki he fānau ʻa ʻetau Tamaí ʻi he funga kotoa ʻo māmaní, fakataha mo kimoutolu, mo lotua ke lava ʻo lelei ange honau ngaahi tūkungá ʻi he fakatuʻasinó mo e fakalaumālié fakatouʻosi; ʻOku ou fakatauange ke nau omi kia Kalaisi, ʻo ako ʻiate ia, mo toʻo kiate kinautolu ʻene haʻamongá, koeuhí ke nau maʻu ha fiemālie ki honau laumālié, he ʻoku faingofua pē ʻene haʻamongá mo maʻamaʻa ʻene kavengá [vakai, Mātiu 11:29–30].

ʻOku ou fakatauange ko e Kau Māʻoniʻoni kotoa pē ʻi he Ngaahi ʻAho Kimui Ní pea mo kinautolu ʻoku kau fakataha mo kinautolu ʻi he tauhi e ngaahi fekau ʻa e Tamai ʻatautolú kotoa, te nau moʻui ʻi ha founga te nau lava ai ʻo maʻu ha nonga ʻi he moʻui ko ʻení pea mo e moʻui taʻengata ʻi he maama ka haʻú [vakai, T&F 59:23]—ʻoku ou kolea ʻa e ngaahi meʻá ni kotoa ʻi he loto fakatōkilalo pea ʻi he fakafetaʻi, ʻi he huafa ʻo e ʻEiki ko Sīsū Kalaisí, ʻĒmeni.¹⁵

• ʻOku ʻi he “Mei he Moʻui ʻa Siosefa Filitingi Sāmitá” ha sīpinga ʻe fā ʻo e ngaahi lotu naʻe fai ʻe Palesiteni Sāmita.Ko e hā te tau lava ʻo ako mei he ngaahi sīpingá ni takitaha?

• Fakakaukau ki hoʻo founga fakafoʻituitui ki he lotú. Ko e hā te tau lava ʻo fai koeʻuhí ke tokoni ʻetau lotú ke tau ʻunuʻunu “ofi ange ai ki heʻetau Tamai ʻi he langí”? (Vakai, konga 1.)

• Naʻe akoʻi ʻe Palesiteni Sāmita, “Ko e taimi ki he lotú ʻa e taimi kotoa pē” (konga 2). Ko e hā ha ngaahi founga te tau lava ai ʻo muimui he faleʻi ke tau lotu maʻu ai peé?

• Ko e hā ʻene ʻuhinga kiate koe ke “fakahoko ʻa e meʻa ʻoku tau leaʻaki ʻi heʻetau ngaahi lotú”? (Vakai, konga 3.) Fakakaukau ki ha meʻa te ke lava ʻo fai ke ke lelei ange ai he tafaʻaki ko ʻení.

• ʻOku liliu fēfē hotau lotó ʻi he taimi ʻoku tau “lilingi atu hotau lotó ʻi heʻetau ngaahi lotú ʻi he fakafetaʻi” ki heʻetau Tamai Hēvaní? (Vakai, konga 4.)

• Fakakaukauʻi hoʻomou ngaahi lotú ʻi hoʻomou ako ʻa e lotu ʻa Palesiteni Sāmita ʻi he konga 5. Fakakaukauʻi fakalongolongo ʻa e fehuʻi ko ʻení: Ko hai ha kakai mo ha ngaahi meʻa ʻoku totonu ke ke toutou fakakau lahi ange ʻi hoʻo ngaahi lotú?

Mātiu 7:7–8; Filipai 4:6; 1 Tesalonaika 5:17–18; Sēmisi 1:5–6; 2 Nīfai 32:8–9; ʻAlamā 34:38–39; 3 Nīfai 18:18–21; T&F 10:5

“Ke poupouʻi ʻa e fealēleaʻakí, fakaʻaongaʻi e ngaahi fehuʻi ʻi he fakaʻosinga ʻo e vahe takitaha. ʻE lava ke ke faʻu pē ʻe koe haʻo ngaahi fehuʻi, ʻo fakafeʻunga ki he niʻihi ʻokú ke akoʻí.” (mei he peesi vii ʻi he tohi ko ʻení).