Ɔfã 43
Nyikyerɛ a wɔnam Joseph Smith Nkɔnhyɛnyi no do dze mae, wɔ Kirtland, Ohio, Kwakwar, 1831. Aber yi no nna osian ator a nkorɔfo binom ridzi dɛ wɔyɛ nyikyerɛfo ntsi, Asɔrmba no mu binom retseetsee. Nkɔnhyɛnyi no bɔɔ mpaa bisaa Ewuradze na onyaa dɛm mbuae yi a wɔdze maa Asɔr no mu elderfo no. Dza odzi kan no fa Asɔr no n’amambu ho; dza odzi ewiei no yɛ kɔkɔbɔ a ɔwɔ dɛ elderfo no dze bɔ aman a wɔwɔ asaase do.
1–7, Nyikyerɛ na mbrasɛm fi nyimpa kortonoo a woeyi no esi hɔ mu ba; 8–14, Wɔtsew Ahotseweefo ho wɔ ber a woridzi dwuma wɔ krɔnkrɔnyɛ mu wɔ Ewuradze n’enyim no; 15–22, Wɔsoma elderfo dɛ wɔnkɛkã nnuho ho asɛm na wonsiesie adasa mfa mma Ewuradze Ne da kɛse no; 23–28, Ewuradze dua nankasa Ne ndze na abɔdze no tum do frɛ nyimpa; 29–35, Mfe Apem no na Satan ne nkyekyeree no bɛba.
1 O Hom ntsie, hom elderfo a hom wɔ m’asɔr mu, na hom nyɛ aso mma nsɛm a merebɛkã akyerɛ hom yi.
2 Na hwɛ, nokwar, nokwar, mese hom dɛ, hom nsa akã mbrasɛm a ɔyɛ m’asɔr ne mbra no, medze duaa nyia meyi no esi hɔ ama hom dɛ ɔngye mbrasɛm nye nyikyerɛ mfi me nsamu no do.
3 Na iyi na hom bohu dɛ ɔyɛ nokwar—dɛ obiara nnyi hɔ bio a woeyi no esi hɔ ama hom dɛ ɔngye mbrasɛm nye nyikyerɛ mfa mma hom kodu dɛ wɔbɛfa no, sɛ ɔtsena mo mu a.
4 Na nokwar, nokwar, mese hom dɛ obiara nnyi hɔ bio a wobeyi no esi hɔ dze ama dɛm akyɛdze yi gyedɛ wɔdze dua ɔno nko do; na sɛ wɔgye fi ne nsamu a orinnya tum bio gyedɛ woyi obi fofor si n’ananmu.
5 Na iyi bɛyɛ mbra ama hom, dɛ mma hom nngye nkyerɛkyerɛ biara mmfi obiara a ɔbɛba hom enyim abɛkã dɛ onya nyikyerɛ anaa mbrasɛm hɔ;
6 Na medze iyi ma hom amma wɔaanndaadaa hom na mbom hom eehu dɛ ommfi mo hɔ.
7 Na nokwar, mese hom dɛ, nyia mahyɛ no sɔfo no wɔ dɛ odua abow no mu ba na wɔhyɛ no sɔfo dɛ mbrɛ makã akyerɛ hom dada no, ama ɔaakyerɛkyerɛ dɛm nyikyerɛ a hom nsa akã nye dza hom nsa bɛkã efi nyia meyi no esi hɔ no hɔ.
8 Na afei, hwɛ, mbrasɛm a medze ma hom nye dɛ, sɛ hom hyia a, hom nkyerɛkyerɛ homho na hom ntotow homho do ama hom eetum ehu dza ɔwɔ dɛ hom yɛ, na hom akyerɛ m’asɔr no kwan, mbrɛ obesi edzi me mbra nye me mbrasɛm a medze ama no do.
9 Na dɛm kwan yi na hom mfa do nya nkyerɛkyerɛ wɔ m’asɔr ne mbra ho na hom mma dza hom nsa akã no ntsew homho, na hom bɛhyɛ bɔw abɔ bra wɔ krɔnkrɔnyɛ wɔ m’enyim—
10 Na mber dodowara a hom bɛyɛ dɛm no, wɔdze enyimnyam bɛkã ahenman a hom nsa akã no ho. Na mber dodowara a hom nnkɛyɛ no, wɔbɛgye dza hom nsa akã no mpo.
11 Hom ntow emumuyɛ a ɔwɔ hom mu no ngu; hom ntsew homho wɔ m’enyim;
12 Na sɛ hom pɛ ahenman no mu enyimnyam a, hom nyi m’akowaa Joseph Smith, Kakraba, na hom mpegya no wɔ m’enyim wɔ mpaabɔ a gyedzi wɔ mu.
13 Na bio, mese hom dɛ, sɛ hom pɛ ahenman mu esumasɛm ehu a, hom mma no edziban na ntar, nye dza ohia biara a ɔdze bɛyɛ edwuma a mahyɛ no dɛ ɔnyɛ no;
14 Na sɛ hom annyɛ a, ɔbɔkɔ do ayɛ hɔn a wɔagye no edzi no nko dze, ama maakora nkorɔfo a hɔnho tsew do wɔ m’enyim.
15 Bio, mese dɛ, hom ntsie hɔn a wɔyɛ m’asɔr mu elderfo a meyi hɔn esi hɔ no: Wɔannsoma hom dɛ hom nkɔ na wɔnkyerɛkyerɛ hom, na mbom dɛ hom nkɛkyerɛkyerɛ adasamba ndzɛmba a menam mo Sunsum no tum do dze ahyɛ hom nsamu no;
16 Na wofi sor bɛkyerɛkyerɛ hom. Hom ntsew homho na wɔdze adom akyɛdze tum bɛhyɛ hom mã, ama hom dze dza makã no mpo ama.
17 Hom ntsie, osiandɛ, hwɛ, Ewuradze ne da kɛse no abɛn.
18 Na da no bɛba a Ewuradze dze ne ndze bɛkasa efi sor, na ɔsorsor bɔwosow na asaase apopo, na Nyame no totorobɛnto bɛtsẽa mu kɛse akyɛr, na ɔase aman a wɔadeda no dɛ: Hom ahotseweefo, hom nsoɛr na hom ntsena ase; hom ndzebɔnyɛfo, hom ntweɔn na hom nda kesi dɛ mebɛfrɛ bio.
19 Dɛm ntsi, hom mbɔ hom asen do amma woeennhu hom wɔ emumuyɛfo mu.
20 Hom mma hom ndze do na mma hom nngyaa. Hom nse aman dɛ wonnu hɔnho, mpanyimfo nye mbofra, ndɔmmumfo nye fahodzifo, hom nse dɛ: Hom nsiesie homho mma Ewuradze ne da kɛse no;
21 Na sɛ emi a meyɛ nyimpa, mema me ndze do na mese hom dɛ hom nnu homho, na sɛ hom tan me a, sɛ da no ba na wimu paapaa mu fi asaase ne mfɛndzanan nyina, kasa gu atseasefo nyina asowa mu, se dɛ—Hom nnu homho; na hom nsiesie homho mma Ewuradze ne da kɛse no a, hom bɛse dɛn?
22 Nyew, na bio, sɛ enyinam tsew fi boka afamu dze kɔ anee dze ndze tsẽa mu kyerɛ atseasefo nyinara, na ɔma hɔn a wɔbɛtse nyinara hɔn asowa mu yɛ hɔn heii, na ɔse dɛ—Hom nnu homho, na Ewuradze ne da kɛse no aba so ɛ?
23 Na bio, Ewuradze bɛma ne ndze do fi sor ase dɛ: Hom nyɛ aso, O hom aman a hom wɔ asaase do, na hom ntsie dɛm Nyankopɔn no a ɔbɔɔ hom no ne nsɛm.
24 O, hom aman a hom wɔ asaase do, mpɛn ahen na matase hom aboa ano dɛ mbrɛ akokɔ baatan boaboa ne mba dze hyɛ ne ntsaban ase, na mbom hom mma ho kwan!
25 Mpɛn ahen na medua mo nkowaa ano do afrɛ hom, na menam abɔfo hɔn som do, na wɔ mankasa me ndze do, na wɔ sor mpaapaamu ndze do, nye enyinam ndze do, nye ehum ndze do, nye asaasewosow ndze do, nye mframa dzendzen, nye ɔkɔm na ɔyardɔm ahorow ndze do, nye totorobɛnto ndze kɛse do, nye atsɛmbu ndze do, nye da nyina mu mbɔbɔrhu ndze do, nye enyimnyam na emudzi ndze do, nye onnyiewiei nkwa mu ahonya do, na medze nkwagye a ɔwɔ hɔ daapem agye hom nkwa, na mbom hom mma ho kwan!
26 Hwɛ, da no aba, na m’ebufuhyew kɔɔpow no ayɛ mã.
27 Hwɛ, nokwar, mese hom dɛ, iyi nye Ewuradze hom Nyankopɔn ne nsɛm.
28 Dɛm ntsi, hom nyɛ edwuma, hom nyɛ edwuma wɔ mo wenyin ture mu wɔ aber a odzi ekyir yi mu—ber a odzi ekyir a wɔdze refrɛ hɔn a wɔtse asaase do.
29 Na mebɛba asaase do mankasa me ber ano ebobu atsɛn, na wɔbɔpon mo nkorɔfo na wɔnye me edzi hen wɔ asaase do.
30 Na Mfe Apem kɛse no a medua mo nkowaa ano akã no, bɛba.
31 Na wɔbɛkyekyer Satan, na sɛ wɔsan no bio a, obedzi hen mber tsiabaa mu, na afei asaase bɛba ewiei.
32 Na wɔbɛsakyer nyia ɔtsenaa ase wɔ tseneneeyɛ mu no ntsɛmara, na asaase botwa mu akɔ tse dɛ mbrɛ wɔdze ogya ahyew.
33 Na emumuyɛfo bɔkɔ ogya a onndum da mu, na hɔn ewiei dze, ɔdasanyi biara nnyim, anaadɛ orunnhu, kesi dɛ wɔbɛba m’enyim wɔ atsɛmbu mu.
34 Hom ntsie dɛm nsɛm yi. Hwɛ, emi nye Jesus Christ, wiadze Agyenkwa no. Hom nkora ndzɛmba yinom do wɔ hom akoma mu, na hom mma mbersantsen ne duryɛ no ho adwendwen nda hom adwen mu.
35 Hom nyɛ botoo. Hom ndzi me mbrasɛm nyinara do. Ɔnyɛ hɔ dɛm. Amen.