Faaora i roto i te tahoê

Pinepine tatou i te faaroo i te peresideni Thomas S. Monson ia parau e, « A haere e faaora ».¹ Te haamanaʻo nei au i te hoê aamu i roto i te Faufaa Apî. Ua riro te reira ei faahohoʻaraa maitai roa no te huru e ti‘a i te mau melo e te mau misionare ia rave amui i te ohipa ma te tahoê, na roto i te mau apooraa paroisa, no te haere e faaora. E itehia te reira aamu i roto i te Mareko 2:1–5. Te mana‘o nei au e, te mau iteraa ta Iesu i faaohipa no te haapii ia tatou i te tahi mau haapiiraa tumu e aore râ, i te tahi mau parau tumu, e mea faaûru mau ïa e te ohie ia maramarama.

Te hoê o te mau taata i roto i teie aamu, e taata hapepa ïa, e taata teie eita e nehenehe e haere ma te tauturu-ore-hia. Ta’na noa e nehenehe e rave maori râ, te faaearaa i te fare e te tia‘iraa ia tauturuhia mai.

E nehenehe atoa te reira e tupu i to tatou nei anotau. E maha taata e rave ra i te hoê ohipa i faauehia mai e to ratou episekopo ia hahaere i to’na fare, i te hoê taata tei roohia i te hapepa. Fatata roa e nehenehe ta’u e feruri e, hoê o ratou no roto mai i te Sotaiete Tauturu, hoê no roto mai i te pupu peresibutero, hoê no roto mai i te Autahuʻaraa a Aarona, e, te maha, eiaha râ te hopea, hoê misionare rave tamau. I roto i te apooraa paroisa hopea i tupu aʻenei, ia hope te tauʻaraa parau no te niʻa i te mau fifi i roto i te paroisa, ua horoʻa aʻera te episekopo i te ohipa haere « faaora ». Teie na taata e maha, ua faauehia ratou ia tauturu i te taata tei roohia i te hapepa. Eita ta ratou e nehenehe e tiaʻi ia haere mai oia i te pureraa na roto ia’na iho. Titauhia ia ratou ia haere i to’na fare no te hahaere ia’na. Titauhia ia ratou ia haere e imi ia’na, e no reira ua haere ratou. E hopoihia mai te reira taata ia Iesu ra.

« E te hopoi maira e toomaha pue taata i te hoê hapepa » (Mareko 2:3).

Area râ, ua î roa te piha i te taata. Eita ta ratou e nehenehe e tomo i roto na te uputa. Ua papû ia’u e, ua tamata noa ratou te mau rave‘a atoa, aita râ ratou i ô. Aita i tupu maite te ohipa mai tei manaʻohia. Ua tupu te tahi mau fifi i roto i ta ratou ohipa « faaoraraa ». Aita râ ratou i faaruʻe. Aita ratou i faaruʻe i te taata hapepa i te pae uputa. Ua paraparau aʻera ratou e nahea râ―nahea e tiʻa ai ia ratou ia hopoi i teie taata ia Iesu Mesia ra no te faaora. No ratou nei, e ere roa’tu i te ohipa teimaha te tautururaa ia Iesu Mesia i roto i te faaoraraa i te varua. Ua faaoti aʻera ratou i te hoê faanahoraa―e ere i te faanahoraa ohie, noa’tu râ, ua faaohipa ratou i te reira.

« E aore aʻera ratou i fatata mai i pihaʻi iho ia’na i te rahi o te taata, ua iriti aʻera ratou i te tapoʻi i te vahi tei reira Iesu, e oti aʻera i te iritihia, tuu atura i taua hapepa ra i raro ma te roi atoa ta’na e taoto ra » (Mareko 2:4).

Ua hopoi atura ratou ia’na i niʻa i te tapoʻi fare. I to’u mana‘o, aita paha e eʻa na rapae no ratou no te taʻuma, e no reira e taime roa roa ïa no te faataʻumaraa i te taata tataʻitahi i niʻa i te tapoʻi fare. Ia’u i manaʻo, teie paha te ohipa i tupu : ua taʻuma na mua te taureʻareʻa no roto mai i ta’na paroisa. No to’na apî e te puai atoa, e nehenehe e parau e, e ere i te mea fifi no’na. Na to’na hoa hahaere no roto mai i te pupu peresibutero e te misionare rave tamau, rahi maitai e te pautuutu maitai, i faaitoito ia paʻepaʻe ia’na na raro aʻe mai. Na te tuahine ïa no te Sotaiere Tauturu e faahaamanaʻo ia ratou ia haapaʻo maitai e e faaitoito ia ratou. Ei reira te mau tane e tatara ai i te tapoʻi fare a faaitoito noa ai te tuahine i teie taata maʻi e a tiaʻi noa ai oia ia faaorahia oia―ia nehenehe ia’na ia haere faahou e ia tiʻamâ.

I roto i teie ohipa faaoraraa, ua titauhia i te taata tataʻitahi ia rave amui i te ohipa. I te taime hopea mau, e titauhia ia faaau maite i te ohipa no te tuu mai i te taata hapepa na niʻa mai i te tapoʻi fare. Titauhia i na taata e maha rave i te ohipa ma te tahoê e te au maite. Eiaha te amahamaharaa ia tupu i rotopu i na taata e maha. Titauhia ia ratou ia tuu i teie taata i raro i te hoê â taime. Mai te mea e, e tuu vitiviti a‘e te hoê taata i te taura i na taata ê atu e toru, e marua ïa te taata maʻi i rapae i to’na roʻi. Eita ta’na e nehenehe e tapeʻa ia’na iho no to’na paruparu.

No te tauturu i te Faaora, titauhia ia tatou ia rave amui i te ohipa ma te tahoê e te au maite. E mea faufaa te mau taata atoa, te mau tiʻaraa e te mau piiraa atoa. E mea tiʻa ia tatou ia tahoê i roto i to tatou Fatu ia Iesu Mesia.

I te pae hopea, ua tuuhia maira te taata hapepa i mua ia Iesu. « E ite atura Iesu i to ratou faaroo, ua parau atura i taua hapepa ra, e tau tamaiti, ua faaorehia ta oe hara » (Mareko 2:5). Ua faa‘ite Iesu i te aau aroha ia’na e ua faaora ia’na―eiaha i te tino noa i te varua atoa râ : « E tau tamaiti, ua faaorehia ta oe hara ». E ere anei te reira i te mea nehenehe ? Aita anei tatou e hinaaro ia tupu atoa te reira i niʻa ia tatou paatoa ? Papû roa e, e hinaaro vau.

Ua ite anei tatou i te hoê taata i roto i to tatou oraraa ua roohia i te hapepa i te pae varua, hoê taata eita e nehenehe e hoʻi mai i te pureraa na roto noa ia’na iho ? Hoê anei o ta tatou mau tamarii, hoê anei o to tatou na metua, hoê hoa faaipoipo, e aore râ, hoê hoa.

Na roto i te rahiraa misionare rave tamau i teie nei e vai ra i roto i te mau paroisa tataʻitahi, e riro ïa ei faaotiraa paari ia faaohipa maitai aʻe te mau episekopo e te mau peresideni amaa i ta ratou mau apooraa paroisa e apooraa amaa. E nehenehe te episekopo ia ani i te melo tataʻitahi o te apooraa paoisa ia haere mai e te hoê tapura iʻoa no te mau taata e tiʻa ia tauturuhia. E faaroo maite te episekopo i te mau manaʻo e i reira e horoʻa ai i te faaueraa.

Ua riro te mau misionare rave tamau ei raveʻa tauturu rahi no te mau paroisa i roto i teie ohipa faaoraraa. E mea apî ratou e te î hoʻi i te puai. E mea au na ratou te tapura iʻoa taata no te rave i te ohipa i pihaʻi iho ia ratou. E mea au na ratou ia rave i te ohipa i pihaʻi iho i te mau melo o te paroisa. Ua ite ratou e, e mau raveʻa maitai roa te reira no ta ratou ohipa imiraa. E hinaaro rahi to ratou ia patu i te basileia o te Fatu. Ua ite papû ratou e, e riro mai ratou mai te Mesia te huru a rave ai ratou i teie mau ohipa faaoraraa.

Ei opaniraa, te hinaaro nei au e faa‘ite atu ia outou i te tahi â faufaa moʻe tei itehia i roto i teie aamu no te papaʻiraa moʻa. Tei roto i te irava 5: « E ite atura Iesu i to ratou faaroo » (reta tei faahuru-ê-hia). Aita vau i haru i te reira na mua aʻenei―to ratou faaroo. E nehenehe atoa to tatou faaroo amui e tauturu i te ora maitai o vetahi ê.

O vai teie mau taata ta Iesu e parau nei ? E nehenehe e parau e, o na taata ïa e maha tei amo i te taata hapepa, te taata hapepa iho, te mau taata tei pure no’na e te mau taata atoa tei tae mai i reira no te faaroo i te pororaa a Iesu ma te anaanatae marû noa i roto i to ratou aau ia tupu te semeio. E nehenehe atoa e parau e, o te hoê hoa faaipoipo, hoê metua, hoê tamaiti e aore râ, hoê tamahine, hoê misionare, hoê peresideni pupu autahuʻaraa, hoê peresideni Sotaiete Tauturu, hoê episekopo, e hoê hoa i te atea ê roa. E nehenehe tatou paatoa e tauturu i te tahi e te tahi. E mea tiʻa ia tatou ia rave itoito i te faaoraraa i te feia i roto i te fifi.

Te faaʻite papû nei au e, e Atua no te mau semeio Iesu Mesia. Ua here Iesu Mesia ia tatou paatoa e e mana To’na no te faaora e no te rapaau i te tino e te varua. Mai te mea e, e tauturu tatou Ia’na i roto i Ta’na ohipa faaoraraa i te varua, e faaora-atoa-hia tatou na roto i taua ohipa ra. Te faaʻite papû nei au i te reira na roto i To’na iʻoa moʻa, o Iesu Mesia, amene.