Te oroʻa moʻa―e faaapîraa no te varua
Na Cheryl A. Esplin
Tauturu piti i roto i te peresideniraa rahi o te Paraimere
E faaora e e faaapî te Varua i to tatou varua. Teie te haamaitairaa tei parau-fafau-hia mai i roto i te oroʻa moʻa, oia hoʻi, « ia vai noa to’na varua i roto ia [tatou]. »
Ua ani mai te hoê pupu feia apî tamahine ia’u i te hoê taime, « E aha te mea ua hinaaro oe ia ite i to oe apîraa mai ia matou » Mai te mea e pahono atu vau i teie nei, e tuu vau i teie manaʻo : « Ahani e mea apî au mai ia outou, e hinaaro vau ia ite papû roa i te auraa o te oroʻa moʻa, hau atu i ta’u i ite na. E hinaaro vau ia ite papû roa mai te huru ta Elder Jeffrey R. Holland i faaʻite. Ua parau oia, « Te hoê o te aniraa manihini taamuhia i te oroʻa moʻa, o te faariroraa ïa i te reira ei hoê ohipa pae varua mau, ei hoê hoêraa moʻa, ei hoê faaapîraa no te varua ».1
Nahea te oroʻa moʻa e riro ai ei « hoê ohipa pae varua mau, ei hoê hoêraa moʻa, ei hoê faaapîraa no te varua » i te mau hepetoma atoa ?
E riro mai te oroʻa ei ohipa haapuai i te pae varua ia faaroo anaʻe tatou i te mau pure no te oroʻa moʻa e ia fafau faahou tatou i ta tatou mau fafauraa. No te raveraa i te reira, e mea titauhia ia tatou ia rave i te iʻoa o Iesu Mesia i niʻa ia tatou.2 No niʻa i te reira euheraa, ua haapii mai te peresideni Henry B. Eyring : « Te auraa ra, e feruri tatou mai te mea No’na tatou. E horoʻa tatou ia’na i te tuhaa matamua no to tatou oraraa. E hinaaro tatou i te mau mea ta’na i hinaaro aita râ i te mau mea ta tatou i hinaaro aore râ ta te ao e aʻo nei ia tatou ia hinaaro ».3
Ia rave anaʻe tatou i te oroʻa moʻa, e fafau atoʻa tatou ia « haamanaʻo â [ia Iesu Mesia] e a muri noa’tu ».4 I te ruʻi na mua i to’na faasatauroraahia, ua haaputuputu te Mesia i ta’na mau aposetolo i pihaʻi iho ia’na e ua haamau i te oroʻa moʻa. Ua vavahi ihora i te pane, e ua haamaitai ihora, na ô aʻera, « a rave, a amu ; o ta’u tino teie e horoʻahia na outou nei e na reira outou ei haamanaʻoraa ia’u ».5 E oti aʻera te reira, rave ihora Oia i te auʻa uaina, haamaitai ihora, e horoʻa’tura i Ta’na ra mau aposetolo ia inu ratou ra, e na ô atu ra, « Ei haamanaʻoraa teie i to’u toto… i haamaniihia no te taata e rave rahi tei tiʻaturi i to’u nei iʻoa ».6
I rotopu i te mau ati Nephi, e faahou â i te Faahoʻi-faahou-raa-hia mai ta’na Ekalesia i te mau mahana hopeʻa nei, ua parau faahou Oia ia amu tatou i te oroʻa moʻa ei haamanaʻoraa Ia’na.7
A rave ai tatou i te oroʻa moʻa, te faa‘ite papû nei tatou i mua i te Atua e, e haamanaʻo noa tatou i Ta’na Tamati e a muri noa’tu, eiaha noa i te taime poto no te oroʻa mo‘a. Te auraa ra, e maʻimi tamau noa tatou i te hiʻoraa o te Faaora e Ta’na mau haapiiraa no te arataʻi i to tatou mau manaʻo, ta tatou mau maʻitiraa e mau ohipa.8
Te faahaamanaʻo atoʻa nei te pure o te oroʻa moʻa ia tatou ia « haapao maitai i ta’na mau faaue ».9
Ua parau Iesu, « Ua hinaaro outou ia’u ra, e haapaʻo i ta’u parau ».10 E horoʻa te oroʻa moʻa ia tatou i te rave‘a no te hiʻopoʻaraa i to tatou iho huru e i te rave‘a no te faafariu i to tatou aau e hinaaro i te Atua. E faatae mai te haapaʻoraa i te mau faaueraa i te mana o te evanelia i roto i to tatou oraraa e te hau rahi aʻe e te varua rahi a‘e.
E horoʻa te oroʻa moʻa i te hoê taime ia ora i te mau mea pae varua a feruri ai tatou i te mana faaora e te mana faati‘a a te Faaora na roto i to’na Taraehara. Aita i maoro roa aʻenei ua haapii te hoê faatere no te feia apî tamahine no ni‘a i te puai ta tatou e faarii a faaitoito ai tatou i te raveraa i te oroʻa moʻa ma te feruri hohonu i ni‘a i te reira. No te rave-faaoti-raa i te hoê titauraa i roto i te buka Faahaereraa Ia’u i mua, ua faaoti oia i te opuaraa ia faatumu i niʻa i te mau taʻo o te mau himene e te mau pure o te oroʻa moʻa.
I te mau hepetoma atoʻa, e hiʻopoʻa oia ia’na iho i te taime o te oroʻa moʻa. Ua haamanaʻo oia i te mau hapehape ta’na i rave, e ua fafau oia ia haamaitai faahou â ia’na i te hepetoma i muri mai. Ua mauruuru oia i te mea e, ua nehenehe ia’na ia faatitiaifaro i teie mau mea e ia vai mâ noa. A haamanaʻo ai oia i teie mau mea i orahia mai nei e ana, ua parau oia, « Te rohi ra vau i niʻa i te tuhaa tatarahaparaa o te Taraehara ».
I te hoê sabati, i muri iho to’na hiʻopoʻaraa ia’na iho, ua haamata oia i te peʻapea e te faarumaruma i to’na feruriraa. Ua ite oia e, te rave na niʻa iho noa nei oia i taua mau hapehape iti nei, te hepetoma i muri i te tahi. I reira ua tae mai ia’na i te manaʻo e, ua faaatea oia i te hoê tuhaa rahi o te Taraehara―Te mana faati‘a o Iesu. Ua haamoʻe oia i te mau taime atoʻa to te Faaora tautururaa ia’na ia riro mai te au ta’na e ti‘a ia riro e ia tavini hou atu i to’na puai
Ua mau te reira i roto i to’na manaʻo, e ua feruri faahou oia i te hepetoma i maʻiri. Ua parau oia : « Ua mapiha te manaʻo oaoa na roto i to’u mihi i to’u iteraa e, ua horoʻa mai Oia ia’u e rave rahi mau rave‘a e mau aravihi. Ua ite au ma te mauruuru i to’u aravihi ia taa i te hinaaro o ta’u tamarii i te taime e ere i te mea ohie ia taa maitai mai. Te haamanaʻo nei au i te hoê mahana ua mana‘o vau eita ta’u e nehenehe e rave faahou i te tahi atu ohipa e ua roaa râ ia’u ia tauturu i te hoê hoa na roto i te tahi mau parau faaitoito. Ua faaʻite au i te faaoromaʻi i roto i te hoê ohipa e haamahiti i te tahi pae o to’u huru ».
Ua puohu oia ma te parau e : « A haamauruuru ai au i te Atua no te mana faatiʻa a te Faaora i roto i to’u oraraa, ua ite mai au i te manaʻo anaanatae rahi atu no te ohipa tatarahaparaa o ta’u i rave noa na e ua hiʻo vau i te hepetoma no muri iho ma te tiʻaturi tei faaapîhia ».
Ua haapii Elder Melvin J. Ballard nahea te oroʻa moʻa e nehenehe ai e riro ei mea faaora e te tamâ. Ua parau oia :
« O vai i rotopu ia tatou o tei ore i haapêpê i to’na varua na roto i te hoê parau, te hoê manaʻo e te hoê ohipa mai te hoê sabati tae atu i te tahi sabati. Te rave nei tatou i te mau ohipa o ta tatou e tatarahapa nei e o ta tatou e hinaaro nei ia faaorehia mai… Te raveʻa no te faaoreraa i te hapa… o te tatarahaparaa ïa i ta tatou mau hara, ma te haere e farerei i te mau taata o ta tatou i faatupu i te hara aore râ te ofatiraa te ture, ia roaa mai ta ratou faaoreraa hapa, ei reira e haere atu ai i te iri amuraa no te oroʻa, e mai te mea ua tatarahapa tiʻa tatou e ua tuu tatou ia tatou i roto i te vairaa tano, e faaorehia ïa ta tatou hara e e tae mai te faaoraraa pae varua i to tatou varua…
« Te faaʻite papû nei au e », ua parau o Elder Ballard, « te vai nei te hoê varua i roto i te faatereraa o te oroʻa moʻa o te haamahanahana i te varua mai te upoo e tae roa’tu i te avae ; e ite outou i te pêpê o te varua i te faaorahia, e tei teimaha i te haamâmâhia. E tae mai te tamahanahana e te oaoa i roto i te varua parau tiʻa e te varua tei hinaaro mau ia amu i teie maa varua ».11
E nehenehe to tatou varua pêpê e faaorahia e e faaapîhia eiaha noa no te mea te faahaamanaʻo nei te pane e te pape i te faatusiaraa o te Faaora i To’na tino e toto, no te mea atoa râ, te faahaamanaʻo nei teie mau tapaʻo ia tatou e, e riro a muri noa’tu Oia ei « pane ora »12 e ei « pape ora »13 no tatou.
I muri iho i to’na faatereraa i te oroʻa moʻa i te mau ati Nephi, ua parau Iesu :
« O te amu i teie nei pane, ua amu ïa ta’u tino no to’na varua, e o te inu i teie nei uaina, ua inu ïa i to’u ra toto na to’na varua, e e ore roa to’na varua e poia e e poihâ, e vai paʻia noa râ ïa.
« E faaoti aʻera te tiaa ra i te amu e te inu hoi, inaha, ua î aʻera ratou I te Varua ».14
Na roto i teie mau parau, te haapii nei Iesu e, e faaora e e faaapî te Varua i to tatou varua. Teie te haamaitairaa tei parau-fafau-hia mai i roto i te oroʻa moʻa, oia hoʻi, « ia vai noa to’na varua i roto ia [tatou] ».15
Ia rave anaʻe au i te oroʻa moʻa, e feruri au i te tahi mau taime i te hoê hoho‘a peni no te Faaora tei tiʻa faahou mai e To’na na rima toro, mai te mea ra e, ua ineine Oia ia farii ia tatou i roto i To’na here tauahi. Ua here au i te reira peni. Ia feruri anaʻe au i te reira i te taime no te opereraa oroʻa, e mâmâ to’u varua e mai te huru ra te faaroo ra vau i te mau parau a te Faaora : « Inaha, ua faatorohia’tu to’u rima aroha ia outou, e o te haere mai nei, o ta’u ïa e ite mai ; e maitai to te haere mai ia’u ra ».16
Te ti‘a nei te Autahuʻaraa a Aarona ei mono no te Fatu a faaineine ai, a haamaitai ai e a opere ai ratou i te oroʻa moʻa. Ia faatoro mai te tiʻa no te autahuʻaraa i to’na rima no te opere i te mau tapaʻo moʻa, mai te huru ra e, o te Faaora Iho e faatoro mai nei i To’na rima aroha, ma te ani manihi ia tatou tata‘itahi ia rave i teie mau ô tao‘a rahi no te here tei roaa mai na roto i Ta’na tusia taraehara―te mau ô no te tatarahapa, te faaoreraa hara, te tamahanaharaa e te tiʻaturiraa.17
Rahi noa’tu to tatou feruri-hohonu-raa i te auraa o te oroʻa moʻa, rahi noa’toa’tu to’na riroraa ei mea mo‘a e te auraa rahi no tatou. Teie ta te hoê metua tane ruhiruhia 96 matahiti i faahiti i ta’na tamaiti aniraa mai, « papa, no te aha oe e haere ai i te pureraa ? Aita oe e ite nei, aita oe e faaroo nei, e mea fifi no oe ia haere. No te aha oe e haere ai i te pureraa ? » Ua pahono teie metua tane, « No te oroʻa moʻa. Te haere nei au no te rave i te oroʻa moʻa ».
Ia haere mai tatou tata‘itahi i te pureraa oroʻa ma te faaineine ia tatou no te farii i te « hoê ohipa pae varua mau, [te] hoê hoêraa moʻa, [te] hoê faaapîraa no te varua ».18
Ua ite au te ora nei to tatou Metua i te Ao ra e to tatou Faaora. Ua mauruuru vau no te rave‘a ta te oroʻa moʻa e horoʻa mai nei no te putapu i to Raua here e no te farii i te Varua. I te iʻoa o Iesu Mesia, amene.