Merael Bedul Uchei

Betik er a renguk el rodam me a rodos er ngak, ng deureng el kubengkemiu e lomuchel a mong meng 190th el eru er a ta el rak el Klou el Ongdibel er a Ikelesia er a Jesus Kristo er a Uriul-klebesei el Santo. Ng kot el soak el obengkemiu er a rekeblimiu me a ngidi el basio el omngar er ngii el dmak lorrenges a klemchir a reprofet, chad er a ulaoch, me a ocholt me a bebil er a remerredel er a Ikelesia.

Kede mereng a rengud el kirel a technology el ngii a uchul e ng sebeched el dmak el klou el kldibel er a beluulechad el meliuekl el oltirakl er a Jesus Kristo. A Klou el Ongdibel er tial dirk mlo merek el Ongeua el Buil a mlocholt er a muut el betok el chad er aika el mla mo merek el uleak uchei er ngii, e kemam a ngar er ngii er a rengmam a kmo ng muut el mo mekedmokl.

Aika el mla mo merek el buil, e a kdekudel el rakt el meliuekl er a beluulechad, meklou el seseb, me a di bebil er a meklou chelebuul a mla meltii a beluulechad er kid. Ak oumekikngitelreng el obengterir a dersta er kemiu el mla mo dibus a moubeltikelreng el mo er tir er a chelsel aika el taem. E ngak a meluluuch el kirir tirkel rokui el ngara ringel er a chelechal taem.

El uaisei, a urerel a Rubak a dirk mesisiich el merael bedul uchei. Chelsel a chomengeroid er a delongelir a tang, dekedekel a medad, me a miting lokiu a Zoom, kede mla smuub el meruul a bebil er a tekoi lokiu a ngodech el teletael me a dirrek el bebil a kmal kiter. A ngodech el taem a sebechel uchul a ngodech el nguked.

A misionari er kid me a remerredel er a misionari a kmal ulsemuul, meduch a rengrir, e meral ungil. El uaisei el betok er a remisionari a mocha kirir el osiik a beches, el cheldechulel el meruul a urerir, ng betok er a mision a uluuchais el kmo te milruul a muut el betokel osisechakl er aika el mla mo merek.

Ng mlo kiram el mengesimer a templo el telkib el taem, me a bebil er a okedecheruul el ureor a mlo er a ulengull, e ng di chelechang e ng mla melemolem el bedul uchei. Chelsel a kalengder er a rak er a 2020, e kid a mla mesib a chetemel a mo er ngii el lluich el templo!

Ureor el kirel a reksi er a telungalek a mla menglou. Betok a beches el ward me a stake el mla mo er ngii. E kemam a dmeu a rengmam el ouchais el kmo a Ikelesia a mla kudmokl a ngesou el kirel tia el meringel el rakt el mo er a eai el dart me a oketiu me a eim el ureor er a chelsel a dart me a okeim el beluu.

Omenglou el omesubel a ebangkelio er a betok el obliil a uchul a klaumerang me a deliongel er a telungalek. A ta er a chedil a milluches: “Aki omelechesiu el kmal kmeed er a rengelekam me a rengelekir a rengelekam er chelechang el kim dak el rokui er a Zoom er a bek el Sandei. El derta er tir a kaiuchit el ouchais a uldesuir el kirel a Come, Follow Me. Nglunguuch el mo er a rechedal a telungalek er kemam a mla mengodech le aiki ungil medengei aike el ousbech.”

Ak meluluuch me kid el chad a ousbech er tia el kmal ngodech el taem el mo mukeroul er a tekoi er a reng. Kid a ngar er tia el beluulechad el mo melasem, el mo mesang a lsekum e kid a mo melilt el mo oltirakl er a Jesus Kristo, mo blechoel el ouuchel er a kngtid, e mesuub, e mukeroul. A reng er kid a mo mukeroul. E kid a kmal ungil rullii se el de mesisiich e l ngar sel el rael er a telbiil.

Okiu ngii el rokui, a Demad er Babeluades me a Ngelekel, Jesus Kristo, a betik a rengrir er kid! Te omekerreu er kid! Tir me a rechedaol el re anghel er Tir a mengkar er kid. ¹ Ak medengei el kmo ng klemerang.

El de chelludel el mo orrenges a tekoi el Rubak a mla omekllomes er a Remesiungel el mo mengedecheduch el kirel, ak siotai er kau el mo omtab a yaksok el Rubak a mla rullii. Ng mla ouchais el kmo “ngidi el chad el ngiia mel ngmai a tekingel a Dios, el ngii a mereched e mesisiich, el ngii a mo omii a rokui el ngii a omecheracheb … me a otuub er a diabelong, e mo omekrael er a [roltirakl] er a Kristo er a melemalt e blutek el rael.” ²

Ak meluluuch me ke mo melilt el mo mesisiich el olab a tekingel a Dios el ngii a mo mechais er tia el klou el ongdibel. E ngak a meluluuch me bo molchesuar er a cherrungel el beltkil a rengul a Rubak el mo er kemiu, ³ el ngara ngklel a Jesus Kristo, boluaisei.