Omekungil Klisichel a Jesus Kristo

Sera uchelel chelechal rak, e kede siliseb er a betok el omeruul el di mle keberuul el mo er ngii. Kodall me a kerrekerngir a rechad a mlo nguemed e le tial klou el kerreor er a beluulechad el ngii a mla tomall a beluu ma keruul.

Desiu, ngau, me a ieleb er a kakerous el merekelel a beluulechad, me a dirrek el muut el bebil er a tellemall le ngedechel cheltel a eanged a uchul, ng mla rulterir a rechad me tedi cheloit te kung, dikeal sebecherir, chelemuul a rengrir, lomdasu el kirel a klengar er tir el kmong locha lmuuch er a smechel.

Me kuuchais er kemiu a cheldechedechak el kirel a chelemuul el klengar.

A rengelekam er a le mekekerei, eng mle sorir el mo mesuub lou piano. Ngak me a bechik ra Rudy, e mle somam tial techall lebora rengelekam, engdi dimak a piano er kemam. Ng di mlak el sebechemam el mecherar a beches el piano, me a Rudy a mlo osiik er a piano el bla tal lousbech er ngii a rechad.

A Kurismas er tial osisiu el rak, eng chilas a rengmam el rokiu ra lenguu a piano el mei, a omerolel a taem ea rengelekam a mlo meduch lousekool.

A rengelekam er a bol meklou me lorael, e tial mechut el piano el di melai a hokori a ki multerur. Ng mlo chouib a sesel rak, me a ki mla chemudel a sesel ududam. A tara klebesei ea Rudy a uase, “A kumdasu eng mla mo taem el denguu a beches el piano.”

Ak uleker, “Ngera belkul e kede melai ra beches el piano, sel lak a tarkid el meduch lousekool?”

Ng dilu el kmo, “Ou, ng sebeched el nguu a piano el di ngii lousekool! Ke ousbech er a iPad, eng sebechem el rulii tial piano el mo ousekool a betok er a 4,000 el chelitakl, uldimukl a chelitakl er a ikelesia, Tabernacle Choir, Primary, ma lmuul el betok.”

A Rudy kmal meduch, er a oterulel a klalou.

Aki milcherar a klebokel e beches el piano, me a sesel sils ruriul, ea reteru, el mesisiich el chad a mle olekeerd er ngii ra blai.

Ak mle oisechii sel lebo er ngii e milrael meng diak kulenget.

Tia meral mle ulis el oberaod, me te ngilubet a ochil, mel sebechel soiseb ra tuangel me tial piano kora tkois el ngar bebul a mengider a klalou lulebail mei.

A blimam a ngara telkib el kongesachel, e mekngit le sel tutau eng mle snow, me tia mle dekdekimes e mengelengelt. Ng sebechiu el mesa el kmo tiang merael bedul ker?

Me sera loba tial piano el olengasek, eng ultitenganged, me ak rirengesii a klou, el merrumk. Tial piano a rirebet el me mekedemuu ra chutem meng di mlo er ngii a ultil ra chutem.

Me ak uasei “Ou, a chedil. Ko miltemall?

Mle ungil e le ngdi mlak el metemall el terung.

Te mlo kasoues e mlo meklou a chelsul a mederir, e okor e ulemes er ngak a dilu el kmo, “Aki meral mlo mekngit. A ki lmuut el nguu el mora stouang ea merredelam a mo omekedong er kau.”

Di mle mereched ea merredelir a milngedecheduch er a Rudy el kirel a ngeiul a beches el piano. A Rudy a bokokouii e mereched lousubes meng dilu er a merredel el kmo ng kmal di ungil a dil relii sel miltemall e lluut el nguu el mei tial osisiu el piano, engdi a merredel a mle soal a ki bom nguu a beches.

A Rudy a ulenger, “Tia kuk diak el sal mlo meringel el metemall. Di mrelii e mluut el nguu el mei.”

Ng kal merredel a dilu el kmo, “Tial kerrekerul a mla bached, e sel tal lobached a kerrekerul, eng dikeal sebechel mo uaisel ngerel er a ngaramong. Ko mo nguu a beches el piano.”

Rodam me a rodos, kid ng diak deua tia el piano, el chelam a telkib, blached, e telemall, e omelchesiu el diak de luut el mo uaikid ra ngara mong? Engdi, sel de bora Jesus Kristo e oureor lokiu a klaumerang er kid er Ngii, ouchel a rengud, e meruul e oltirakl a telbiil, ea telemelled—el dilubech er a ngiidi el ngerang—a sebechel mukar. Tial teletael, el ngii a oleker er a omekungil klisichel Osobel el me er a klengar er kid, a diak el di lomekungil a meltemall ng bai rullid el imong el lungil er sera uchelel. Ak medengei el kmo ngokiu a Osobel, el Jesus Kristo, eng sebeched el le muut el moungil, mecherrungel, el otaut a moktek er kid, el di uaisel beches-el klebokel a ngerel el piano.

A President Russell M. Nelson a ulsisechakl: “Sel le merkid a klou el ringel, e ngii a taem el bo dolisiich er a klaumera er kid er a Dios, e blak a rengud loureor, e mesiou er a rebebil. E seikid e Ngii a mo omekungil a chelam el rengud. E mo meskid a budech me a beot el klengar. Aikal meringel chad el sengk a diak bol ngemed, ngii mesel omad.” ¹

A Jesus a millekoi:

“Mer ngak, kemiu el rokui el oureor el chorma e oberedang er a chelungel, e ak mo meskemiu a ulengull.

“Mnguu a chelngelek, e mosuub er ngak; le ngak a medemdemk e ngariou a renguk: me ko mo metik a ulengull er a rengmiu.

“A chelngelek a beot, me a kungarm er ngii a kebekakl” (Mateus 11:28–30).

Sel mo omekungil a chelemuulreng me debor Ngii, eng kired el mong lobang a klaumera er a Jesus Kristo. “A obang a klaumerang er a Jesus Kristo a belkul a mo ultuil er Ngii er a rokui el tekoi—e oumerang er a diak a ulebengelel el Klisichel … me a beltkil a rengul. Tia uldimukl oumerang er a Osisecheklel. Tia belkul a kmo meng uaisei el diak dodengei a belkul a rokuil el tekoi, Ngii a medengei. E le Ngii el mla chouarm a rokui el ringel mlerkid, ongarm, me a chelitechetud, Ngii a meduch el ngoikid el morbab er a bek el chetituokel el de ngarngii er a bek el sils.” ²

Se el de mei er Ngii, “eng sebeched el mo mui er a deureng, budech, me a ongelaod. A ikel rokui el ngii a [meringel e metacher besul] er a klengar a sebechel mukrael el mo tabesul lokiu a Tngakireng er a Jesus Kristo.” ³ Ng mla mellach er kid el kmo: Bo momes el bedul ngak lokiu a bek el uldasuiu; e lak mo mededenger, e lako medakt (Doctrine and Covenants 6:36).

Ngara Babier er a Mormon e a Alma me a rechedal a kileed e te motilech er a berraod el mlo er tir, me te lilangel mel mengubet er ngii. A Rubak a dimlak longeroid a berraod el mla er tir; Ng bai mle yaksok er tir:

“E Ngii a dirrek el mo ngosur a berraod el ngar ongelngelir, meng mo diak lomelchesiu le nga er a ulekir, me tia chelechal nga er a kelebus; tia bol relii el me te mo sioning er Ngii er uriul, te dirrek el meral mo medengei el kmo Ngii, el Rubak el Dios, a me er a loldingel er a rechedal sel le nga er a chelsel a ringel.

“Ma ikel berraod lultekau a Alma me a rodam er ngii a mlo kebekakl; oi, a Rubak a milisiich er tir meng mlo sebechir el beot er tir el chemol a berraod el ngar tir, me tultekau e ungil a rengrir loba kllou el reng er a ikel rokui el urungulel a Rubak” (Mosiah 24:14–15).

Me a Osobel el sebechel lomekungil e ngosonges a berraod, ea Elder Tad R. Callister a ulsisechakl:

“A tara klengeltengat er a Tngakireng a mo sebeched el nguu a ngesou el klisichel Osobel. A Isaiah a mle blechoel el melekoi el kirel a omekungil, mengellakl el ongetikaik ra Rubak. Ng uluuchais el kmo a Osobel ‘a klisiich el mora rengesool sel ngara chelsel ongarm, e blirir er a seseleolt, e omderngir er a kleald.’ (Isaia 25:4). E tirkel ngara klengitelreng, ea Isaia a millekoi el kmo a Osobel a oba klisiich el mo ‘mengelaod er a remengeiung’ (Isaia 61:2), e ‘smuld chiuosech er a rokui el mad’ (Isaia 25:8; mesa el dirrek Ocholt 7:17); ‘lmuut lokiis rengrir a rengariou a rengring’ (Isaia 57:15); e ‘omkar a chelemuulreng’ (Isaia 61:1; dirrek el mesa Lukas 4:18; Psalm 147:3). Ng klou lomerk tial klisichel a ngelsouil meng sebechel mtechir a ‘a mengeiung loba deurreng ma blekebek el mad el dikea le klou el klengiteterreng, chelitakl er a odanges el diak el klengiterreng’ (Isaia 61:3).

“Ng, meral klou a urunguled er a ikal telbiil! … A reng er Ngii a omekungil; ngomiich; ng mengelaod; ng outeliil a beches el klengar el mora remerto rengrir. Ngoba klisiich el melodech a rokui el ngii a mekikongel ma odechelakl ma klebelug er a chelsel a klengar el mo kmo ngerang el ngii a ngarbab e ulis er a klebokel. Ngoba klisiich el mo omult a chebechab er a klengar el mo klebokel er a diak a ulebengelel.” ⁴

A kuuchais el kmo a Jesus Kristo ngii a ungil Osobel, el Osobeled, el Mastang er a Omekungil, e blak a rengul el sechelid. Alsekum me ke dobult el mo er Ngii, e Ngii a mo omekungil er kid e rullid el le muut el mo cherrungel. Ak kuuchais el kmo tiang a Ikelesia er Ngii e Ngii a mengedmokl lemuut el mei el mo mengedereder loba klisiich me a klebkall el ngar tial beluulechad. El ngara a ngklel a Jesus Kristo, bol uaisei.