Bom Kerekikl, e Blechoel Meluluuch

Rodam me a rodos er ngak, sera bocha lulebongel er a Urerel, e a Jesus a ulisechakl er a Rulbengkel el mo “kerekikl, e blechoel meluluuch,me bol sebecherir el klikiid el ngoriakl er a rokui el tekoi el mo duubech, e bol dechor medal a Ngelekel a chad.”¹

Bebil er a “tekoi el ngii a mo duubech” ruchei er a Ongeru Lemei a “mekemad me a chisel a mekemad [,] … bosech, me a secher, me a desiu, er a kakerous el beluu.”²

Chelsel a Doctrine and Covenants e a Osobel a millekoi el kmo, ngmo klou a nglemuu er a rokui el tekoi; … e a rechad el rokui a mo ngara dakt.”³

Ng klemerang, el dekiei er a taem el klou a uldikel. Betok el chad a bekikl el kirel a ngara medad el taem, e betok a mla mo cheroid er a klaumera er tir ra Dios me a Ngelekel, Jesus Kristo.

A tekoi er a nius a mui er a chisel a mekngit lodechelakl. A mekngit lomeruul a mla morngii er a online. A olekull, ikelesia, blil a nglunguuch, blil omengull, me a blil a klechelid a di mla metemall.

A omekodall secher a di mla mekelkelii a beluulechad el rokir el million el chad a mla mo smecher ngii; e a betok er a remillion a mla mad. A omelilt er a skuul, omengull er a ikelesia, chebechiil, urerel a klemisionari, me a lmuut el bebil er a meklou a belkul tekoi a di mla meterob. Osisiu, e te betok el chad a cheloit lileakl el chelsimer.

A tekoi er a kerruul er a beluu a kmal mla mo meringel er a rebetok el chad, tokuni tirkel kmal chebuul el ngelekel a Demad er a Babeluades.

Kede mla mesterir a rungil chad loba budech e omtok er a kabelment, e dirrek el mla mesterir a tirkel loba ngasechereng e melemall.

Osisiu el taem, e kede melemolem lomes a uldikel el meliuekl er a beluulechad el rokir.

Ak blechoel lomdasou el kirir tirkel ngara ringel, sebekereng, dakt, a lechub e te omelchesiu el sabisi. Ak dmu er a derta er kemiu el kmo a Rubak a medengelkemiu, e Ngii a medengei a sebekereng me a ringel el mngarngii, e Ngii a betik a rengul er kemiu—dersta er kemiu, el dmolech, e diak a ulebengelel.

Bek el kesus el sel kululuuch, e a kulengit er a Rubak me lomekngeltengat er tirkel chellungel a berredel a chelebuul, ringel, klsabisi, me a klengitelreng. Ak medengei el kmo a remengeteklel a Ikelesia melekoi er a osisiu nglunguuch. A rengmam, derta el chad me a chelechad, a melatk el kiriu e a nglungucham a mo er a Dios el kiriu.

Tial mlomerek el rak eng mle tela el klebesei el kngara dims er a Beluu er a Merikel loldingel aikel basio er a reksi er a Ikelesia, e ngara miting lobengterir a remisionari me a rechad er a ikelesia, e oldingel er a kabelment me a roungerachel a siobai.

Sel Sandei, el October 20, e ak milngedecheduch er a klou el seked el kmeed er a Boston, Massachusetts. Sera kungedecheduch, e ak mlo omelchesiu el dmu el kmo, “A kulengit er kemiu … memoluluuch el kirel tial beluu, kirir a remerredel er kid, kirir a rechad, me a telungalek el kiei er a lourot el beluu el mlokdubech er a Dios.”⁴

Ak dirrek el dilu el kmo a Beluu er a Merikel me a bebil er a beluu er a beluulechad, e uai ikel mla momerek el taem, a kuk mocha dechor er a tara metengal a rael e ousbech a nglunguchiu.⁵

A ongtik a dimlak luldimukl er a bla kedmeklii el cheldechedechak. Aika el tekoi a mlei er ngak er a kumelchesiu er a odbechel Chedaol Reng el siotai er tirkal chad el mo meluluuch el kirel a belurir me a rmengeteklir.

Chelechal sils e ak dochelii okedongek el kirel a nglunguuch er a rokui el chad er a bek el beluu er a beluulechad. Ng diak el iior er a kmo ng mekera omoluluuch a lechub eng techa omoluluuch el mo er ngii, a kulengit bo multuil er a klaumera er kemiu—ngii di el klechelid el mngarngii—e moluluuch el kirel a beluam me a remerredel er a beluu. Ng uaikel kdilung er ak ngara Massachusetts er a tial mlomerek el Ongeteruich el Buil, kede dechor er a klou el metengal a rael el mocha er a reksi, e a beluu er a beluulechad a kmal ngara chelebuul e ousbech chedaol ulekrael. Tia diak el tekoi er a balatiks a lechub e le llach. Tia kirel a budech me a omekungil el mei er a rengrir a rechad me a dirrek el beluu, basio, mekekerei el basio, me a hang—lokiu a Prince er a Budech e uchul a rokui lomekungil, el Rubak el Jesus Kristo.

Aika el mereko el telal buil e ak mla mo omdasou el kmo sel kot el bedochel ngesou el kirel a teletael er chelechang a kirir a rokui el chad el kmal mo ultuil er a Dios e mult a rengrir el mo er Ngii lokiu a meral ngara reng el nglunguuch. A denguu a rengud el meriou e dosiik a ulekrael er babeluades e dotekangel a chelbengeled er chelechang a ngii a kot el bedochel el rael e kede ansing er kid e omakes el bedul uchei er chelechal dengara meringel taem.

A chedaol llechukl a meketakl a nglunguuch ledilung a Jesus me a dirrek el Osischeklel kirel a nglunguuch er a lengara beluulechad. Kom dobedebekii a nglunguchel a Rubak:

“Demmam el ngara babeluades, Bol Modanges a ngklem.

“Me a rengedem. Sel soam er a chetemem, bol mekedmokl er a eanged.

“E beskemam a kelel chelechal sils.

“E mousubes kengtemam, sel ki mousubes er a rebebil.

“E mongeroid er kemam er a ongetikaik, e msebecheklemam er a mekngit: Le kau olab a rokui el dereder, me a klisiich, me a klebkall, el mo cherechar. Bo le uaisei.”⁶

Tia el klebokel nglunguuch, lodengelii a rebetok el Kristiano, a meketeklii el kmo ngungil a debleketakl lolengit er a “Demad el ngara babeluades” el kirel a nger er a ikel lomekringel er kid. A leuaisei, e bo doluluuch el kirel chedaol ulekrael.

Ak siotai er kemiu el mo blechoel meluluuch.⁷ Moluluuch el kirel a telungalek. Moluluuch el kirir a remengeteklel a beluu. Moluluuch el kirir a rmeduch a rengrir el chad er a ukeruul sel kirel a secher er a beluu, basio, tekoi er a balatiks, me a ngii di el ngerang el subechii er a rechad er a beluulechad el rokir: a remeteet me a remechebuul, a rengeasek me a remeklou.

A Osobel a ulsischeklid el diak doleakl er tirkel doluluuch el kirir. Ngii a dilu el kmo, “Moubeltikereng er a recherreuem, momekngeltengat er tirkel melemall er kau, e moruul a ungil el mo er tirkel louketui er kau, e moluluuch el kirir tirkel lousibai er kau, e oldechelakl er kau.”⁸

Sera lengara kerus er a Kolkata, el Jesus a mlad el kirel a kngtid, e Ngii a miruul er sel Ngii a ulisechakl er ngii er a Loluluuch, “Chedam, mousubes er tir; le ng diak lodengei a loruul.”⁹

A lemeral ngarngii er a rengud e meluluuch el kirir tirkel uaia lechereued a ochotii a klaumerang er kid el kmo a Dios a sebechel ngmodech a rengud me a rengrir a rebebil. Aikaikid el nglunguuch a kirel smisichid el mo ngmodech a ngii di el ngerang er a klengar kid, telungalek, me a beluu.

Ng diak el iior er a omkiei er ngii, tekoi el molekoi, ongarm el mchelebangel, le Dios a remenges e onger kau er sel ngii a Teletelel me a sel ngii a Temel. Kid el Ngelekel a uchul, eng sebeched el mo er Ngii losiik a ngesou, selbechakl, me a blakereng el mo uchul a klungiaol er a beluulechad.

A di meluluuch el kirel a llemalt, budech, remechebuul, me a rsmecher a diak el klebech. Uriul er a bo demerek elmeluluuch, eng kired el mekiis e mo meruul aikel sebeched lolngeseu— el kired me a dirrek el kirir a rebebil.¹⁰

A chedaol llechukl a mui er a okesiu er a rechad el mesisiich a klaumera er tir el mle ultuil er a nglunguuch me a omeruul eng klou a riruul er a klengar tir me a klengar er a rebebil. Chelsel a Babier er a Mormon, a okesiu, e kede menguiu el kirel a Enos. Ng mla mo bleketakl el kmo “eru er a edei el tiud er sel kedeb el hong er ngii a mesaod er a nglunguuch a lechub eng beldukl el nglunguuch, e ouchais el kmo ng milkerang er a ikel nger lengilai.”¹¹

Kede olab a kmal betok lokesiu er a reksi er a Ikelesa el kmo ng mekera nglunguuch e klou a bla relii, lomuchel er sel kot el nglunguchel a Joseph Smith er a chereomel er bita er a blil er sera spring 1820. Ngulsiik a klausubes me a chedaol ulekrael, e a nglunguchel a Joseph a milkengii babeluades. Chelechal sils e kid ousbech aikel riruul a Joseph el Profet me a rebebil er a mle mesisiich a klaumera er tir el Uriul-klebesei el Santo el resechal me a redil el tir a miluluuch e milngedmokl er a teketekel a Ikelesia er a Jesus Kristo er a Uriul-klebesei el Santo.

Ak blechoel lomdasu el kirir a remesisiich a kalumera er tir redil el uaia Mary Fielding Smith el, lokiu a ngesou er a Dios, e ngiluu a telungalek er ngii el chemiis er a odechelakl er a Illinois el mo er a selbechakl el basio me tial telungalek er ngii a mlukeroul er a chedaol tekoi me a klechad. Uriul er a lsal blak a rengul meluluuch, eng mlo blak a rengul loureor el kirel a klengeltengat el mo er a telungalek er ngii.

A nglunguuch a mo sobecheklid e ngoikid el mo dmak el dersta el chad, retelungalek, Ikelesia, me a beluulechad. A nglunguuch a mo mekrolterir a re scientists er a skel a yobo me a kerul tial omekodall el rakt. A nglunguuch a mo mengelaod er tirkel mla mo smecher a rebetik er a rengrir. Ng mo omekrael er kid er a ikel kired el meruul el mo omecheliu er kid.

Rodam me a rodos, ak mengelechel er kemiu el mo choisisii a blak el reng er kemiu er a nglunguuch. Ak mengelechel er kemiu el mo meluluuch, er a bek el sils sel omorael, me a omngara rekeblimiu, ward er kemiu, e dirrek el blechoel ngara rengmiu.¹²

A kumtechei er a remengeteklel a Ikelesia er a Jesus Kristo er a Uriul-klebesei el Santo, e kmal mereng a suliu er a nglunguchiu el kiram. Ak mengelechel er kemiu el mo melemolem el meluluuch me bo dengai a ulekrael me a chedaol ocholt el mo omekrael er a Ikelesai er a chelsel aikal meringel el taem.

A nglunguuch a sebechel ngmodech a klengar kid. Sel bo dultuil er a nglunguuch, eng sebeched el mo ungil e ngosuterir a rebebil mo meruul osisiu.

Ak medengelii a klisichel a nglunguuch lokiu aikel mla duubech el mei er ngak. Ng dirk tekoi eng di mle ngak el tang er a obis er ngak. Ak dirk mlomerek er a ukeruul er a bital chimak. Ng mle oumellemau, oburk, e kmal meringel. Sera kdengchokl er a kingellek, eng mlo diak el sebechek lungil lomdasou a meklou a belkul tekoi le ak mlara ringel.

A mlo out aria has e meluluch e olengit er a Rubak mel sebecheklak mel sebechek el remuul a urerek. Ak mlo dechor e ulebult el bedul aikal chachisois el babier bebul a tebel. Ng di mle mereched, a bleketakl luldasou el soiseb er a uldesuek, meng mlo sebechek el kudmeklii a tekoi el mle kirek el meruul er ngii.

A uldikel er a beluulechad er chelechal taem a sebechel mektektid sel dolatk el kirel a kmal betok el mondai me a ongarm. Eng di ng mesisiich a klaumera er ngak el omko kede meluluuch lolengit er a Chedam er a Babeluades aikel klengeltengat el dousbech me a ulekrael, e kid a mo medengei el kmo ng mekera domekngeltengat a telungalek er kid, tonari, beluu, me a dirrek el beluu el kid a kiei er ngii.

A Osobel a miluluuch e sola mirrael “meruul a ungil”¹³ lomeka er a remechebuul, e millisiich e olngeseu er a rengesool, loba beltikereng, klausubes, budech, me a ulengull el mo er tirkel mo er Ngii. E Ngii a melemolem lolngeseu er kid.

Ak siotai er a rokui el rechad er a Ikelesia, me a retonari me a resechelid er a kuk bebil er a klechelid er a beluulechad el rokir, el mo meruul a uaikel tekingel Osobel el mo er a Rulbengkel: “Bom kerekikl, e blechoel meluluuch”¹⁴ el kirel a budech, kirel ongelaod, kirel a selbechakl, me a kirel a techall el mo mesiou er a ta me a tang.

Ng meral mesisiich a klisichel a nglunguuch e meral ulsbechall a nglunguched lultuil er a klaumerang er a Dios me a Betik er a Rengul Ngelekel er tial beluulechad er chelechang! Bo dolatk e doureng a saul el kirel a klisichel a nglunguuch. El ngara a ngklel a Jesus Kristo, bol uaisei.