Sel Klechad er a Kristo

Ng meral ungil tial beluulechad el kid a kiei er ngii, el betok a bekbedengir a rechad, tekoi, siukang, reksi—el ngara betok el dart el beluu me a dertelael el cheldebechel, el meteet er a klechad. A rechad a kmal ngara ngii a betok el tir a kirir ungil a rengrir e oldeu el kirel. Ele ikel teletael el bla desuub—el teletael el bla bo dodengei lokiu a klechad el demukeroul er ngii—a sebechel smisichii a klengar er kid, e dirrek el sebechel, el bebil er a taem, eng mo meklou el olibesongel.

Ng locha kora bekord el kmo a klechad a kmal delalm er a uldesued me a teleteled meng diak el sebechel mo mengodech. Ng tiaikid e a ikel kid a melchesuar a olechoted e olechotel a olengcheled. Ng sebechel el kmal mo mesisiich el teletael meng diak deues a ikel klechitechetul a chad malechub eng chelbirukel er a chelsel a klechad er kid, meng meringel er kid a mo chemoit a bebil er a uldelid el teletelir a demad. Ng telcherakl a rengul el kirel klechad er a olengchelem a locha mo uchul oltngakl a ikel ungil—el uai a kledios er a—uldasu, blekeradel, me a teletael.

Ngara ngii a kmal ungil chad el kudengelii el diak el betok el rak er a memong el ulngeseu el smodii tial osisechakl el kirel a klechad er a ues. Aki mle kot el kebetech er a Singapore serak bok metutk el mo oldingel e olisechakl er a telulangek er ngii. Ng merael a chisel sensei er a Sanskrit me a Tamil, e chad er a dimes er a India. A klebokel el bechil me a terung el ngelekel sechal a chedal a Ikelesia, eng di ngii a dimlak el chad ra Ikelesia malechub el soal lorrenges a osisecheklel a ebangkelio. Ng mle ungil a rengul el kirel a bechil me a rengelekel sechal e mle mui el olngeseu er tir er a ngerchelir er a Ikelesia.

Sera kulengit el mo olsisechak er ngii era osisecheklel a ebangkelio e ouchais a klaumerang er kemam el mo er ngii, eng mle omai er a rengul. Chelsel a telkib el taem e ak mlo medengei el kmo ngera uchul: ngii a ulmedasu el kmo sel sekum eng mo orrenges e eng uai a lebo el mekngit el chad el kirel a mla memong el teletelel, rechedal, me a reksi er ngii! Meng sel teletelel a uldesuel, eng uai a lebo el kotouar a rokui el kirel, rokui el tekoi el telungalek er ngii a mla osisecheklii, me sel dikesel el chad er a India. Chelsel a ikal meral mei el buil, eng mlo sebechemam el mesaod el kirel ikal tekoi. Ng mlo meang renguk (ngdi dimlak el mechas a renguk!) el kmo ng mekerang a ebangkelio er a Jesus Kristo a rirellii el mo medengei a belkul a klekakerous el uldasu.

Chelsel a betok el klechad milruul er a rechad, a de betik a ungil me a mekngit, teletael el ngusukau me a teletael el tomelau.

Betok er a ikal mondelengel a beluulechad a ngara ngii eleng a klekakerous el uldasu me a siukang el dubech er chelsel a klechad er tir. Ele rokuiel mondai me a rau el reng a sebechel mereched el mo diak a lskekum a beluulechad a kmal di kongei er sel kot el klechad, el kid rokui a mla er ngii el dimlak el sal cheroid el taem. Tial klechad a ulemuchel sel uchei er tial klengar. Ng mle klechad er a Adam me a Henok. Ng klechad el mlo er ngii lokiu a osisecheklel a Osobel er a uchelel a taem, el ngar ngii el mo er a rokui el redil me a resechal er tial uriul el klebesei. Ng ngodech. Ng kot lungil er a ikel rokui el klechad e mlengai er sel klou luldasu er a kirel a deuel reng, el Dios a rirellii ea Kristo a milsebechakl er ngii. Ng oldak e bai diak el lomii. Ng omekungil e bai diak el ongarm.

A ebangkelio er a Jesus Kristo a osisecheklid el kmo ngara ngii a moktek er a klengar. Tial temed el ngar tiang a diak el uchul a chelebirukel! Ngara ngii a belkul e kede ngar tiang.

Tial klechad a urrekodel er a klaumerang el kmo a ngara ngii a Demad er a Babeluades, e Ngii a merang e betik a rengul er a ta me ta er kid. Kid a Urerel e Klebkellel. ¹ Tial klechad a melisiich er sel uldasu el di osisiu belkul. Ng diak a ulekdid malechub a ngarbab me a ngariou el chad. Kid el, rokui, a rodam e rodos, e delbengel a rengelekel a Demad me a Delad er a Babeluades— e meral uaisei. Ng diak a klautok malechub eng “kid lomtok er tir” el uldasu er a chelsel tial kot lungil er a ikel rokui el klechad. Kede rokui el mo “kid.” Kede rokui el mo “tir” Kede oumerang el kmo ngercheled el omtebechel er kid, me a rebebil, ma Ikelesia, me a beluulechad er kid. A ngerachel a klou a ultutelel er a ulkuruled.

Bliochel el beltik el reng, omekereu el uai a Kristo, a dodai er tial klechad. Kede simbai el kirel a ulkereuil a rebebil er a rechad, er a tekoi er a tech me a chedaol tekoi, e mo meruul aikel domelchesiu. Tiang a torbengii a klautok me a ouketui.

Kede ouldeu a rengud er a klechad er a ocholt, el chedul a tekingel a Dios el mo er a reprofet (e mo er a dersta er kid lokiu a Chedaol Reng). A rokui el chad a sebecherir el mo medengelii a moktek me a uldesuel a Dios.

Tia el klechad a smisichii sel osisecheklel a mimokl el melilt. Sel klisiched el mo melilt a kmal imis el klou a ultutelel er a ulkuruled me a diul a rengud. Ungil melilt a klou a ultutelel.

Ng klechad er a omesuub. Kede osiik a klemedengei me a llomeselreng me a ikel kot el ungil er a chelsel a rokui el tekoi.

Ng klechad er a klaumerang me a keldung el oltirakl. A klaumerang er a Jesus Kristo a kot el osisecheklel tial klechad er kid, el mo kedung el oltirakl a Osisecheklel me a llechul eleng klaumerang er kid. A ikang a uchul e kede ngoriakl.

Ng klechad er a nglunguuch. Kede oumerang el kmo a Dios a diak el di lorrenges a nglunguched ng dirrek el ngosukid.

Ng klechad er a telbiil me a chedaol ruoll, e oba ngarbab el teletael, omelenget, klausubes e ouchel a rengud er a kengtid, e mengedmokl a templo el bedenged. Aikang el rokui a sioning er a blak el reng er kid el mo er a Dios.

Ng klechad el mengedereder lokiu a priesthood, sel klisiich el mo oureor loba ngklel a Dios, e klisichel a Dios el mo omekngeltengat er a Rengelekel. Ngoldak e rurterir a mimokl el chad el mo ungil chad, remerreder, rechedil, rechedam, e chelmengel— e mo mengikiid er a blim.

A klemerang el ongasireng a ngar tiang, el ngii a kot el chuodel er a rokui el klechad, el mlo er ngii lokiu a klaumerang er a Jesus Kristo, klisichel a priesthood, nglunguuch, ulekeruil a chad, klemerang el bult, me a klausubes.

Ng klechad er a urerel a misionari. A rechad a meklou a ultutelir el mo er a Dios.

Chelsel a klechad er a Kristo, ea redil a mo ngoriakl el mo er sel meral ngii a diak a ulebengelel el deruchelir. A redil a diak el mekekerei a belkrir er a resechal, el diuai a betok el klechad er a beluulechad er a chelechal taem, engdi te bai osisiu el kaukledm er tiang ma sei el beluulechad el mei.

Tial klechad a kongei er sel chedolel a telungalek. A telungak a telengtengil a diak a ulebengelel klengar. A cherrungel el telungalek uchul a ngidil omelenget eleng, uaisei mla mosisechakl, ng diak a ngidil chetengakl el sebechel sumechokl a klechitechuter a blai.” ² A blai sel basio el ikel kot el ungil urered a meketmokel me a sel basio el klou el deureng a denguu.

Chelsel a klechad er a Kristo, eng ngara ngii a blechebechel a tekoi—me a diak a ulebengelel moktek me a ulekrael. Tial klechad a oureor lobengkel a ikel tekoi el meketetekt a temel! Ng mlei el mlara ebangkelio er a Jesus Kristo, el diak a ulebengelel, e smodii sel ngera uchul, e ngerang e ngarker el kirel a klengar er kid. (Ngoldak a rokui, e diak longoit.) E le tia el klechad a uchul a ikel osisecheklel a Osobeled, eng olngeseu el omekungil ele tial beluulechad a kmal ousbech er ngii.

Ng meral klengeltengat el de bo detebedechel tial klou e ngarbab el teletael er a klengar. Me sel bo detebedechel tiang, el kot el ungil er a rokui el klechad, eng kired el mo mengodech. A reprofet a ulsisechakl el kmo ng kired el mo chemoit a ikel klechad el ngii a diak el osisiu ngii ma klechad er a Kristo. Eng di tiang a diak el belkul a kmo kede mo chemoit a rokui el tekoi. A reprofet a dirrek el mla smisichii a omelekoi el kmo kid a mla siotai, el mora rokui, el ouchais a klaumerang me a kldachelbai me a klemedengei—el kirel a rokui el ungil er a chelsel a klengar kid me a klechad er kid—el dolabe becherei a Ikelesia “mel dechelii” lokiu a klemechel a ebangkelio. ³

A Ikelesia er a Jesus Kristo er a Urirul-klebesei el Santo a diak el ikelesia er a rechad er Ngebard. Tiang a ikelsia el meliuekl er a beluulechad, el ngii a di mle blechoel el uaisei. Tiang a chedaol. A rebeches el rechedal a ikelesia el meliuekl er a beluulechad a ocholt a iteet, bekbedengel omeruul, me a deureng el mer a mukeroul el telungalek er kid. A Uriul-klebesi el Santo er a bek el basio a oldeu a rengrir e mengull a dikesir, engdi elechang e te tebedechel a kmal klou el tekoi. A Klechad e ra Kristo a ngosukid el mo ungil mesekid, me sel desang el mo er a diak a ulebengelel, el obang a llemalt, eng mo menglou a klisiched e mo oltaut er sel klou luldasu el kirel a deuel reng.

Meng ngara dilubech el mo er a sechelik? Ma leuaisei, eng mlosisechakl e mlo chad er a Ikelesia. A telungalek er ngii a mla merenged el mo er a diak a ulebengelel el taem er a chelsel a Templo er a Sydney Australia. Ng chiloit a sesei—e mlo klou a techellem ngmai el rokui. Ng mlo medengei el kmo ng sebechel el oldeu a reksi er ngii, e chemat er a uldelid er ngii, chelitakl me a ngloik me a cheldecheduch, kelel, belual me a rechedal. Ng miltik el kmo kmal diak a mondai sel loldak a ikel ungil teletael er a klechad el kiei er ngii ma sel kot lungil er a ikel rokui el Klechad. Ng mlo medengei el kmo a ikel klemerang me a llemalt er a klengar er ngii ruchei el ngmai mer tial beches el klengar er ngii a bai olngeseu el mo melisiich a deluill er ngii ma re Santo e mo olngeseu el mo chimong er a chelsel a Beluu er a Babeluades.

Ng sebeched, e kired, el chemat ikel kot el ungil el klechad er kid er tial beluulechad e sebeched el ngarsel chuodel el klechad er a ikel rokui—sel kot, sel klou a ultutelel, sel diak a ulebengelel el klechad el mei el mla er a ebangkelio er a Jesus Kristo. Tiang a meral ungil dikesel el kid a rokui a obang. Loba ngklel a Jesus Kristo, amen.