Kede Mengedecheduch er a Kristo
El beluulechad a diak el sal mengedecheduch el kirel a Jesus Kristo, mei e dongedecheduch el Kirel.
Ak olecholt er a beltkil a renguk leko er kemiu, el betik er a rengmam el sechelimam me a dedak el oumerang. Ak mla chemat er a klaumerang me a duchelreng er kemiu er a ika el mla mo merek el buil, er tia el klou el rakt er a beluulechad a mla melodech a klengar er kid e mla ngoititerir a remeang el chedal a telungalek me a resechelid.
Chelsel aika el taem er a rrau el reng, ak mla melechesuar er a kmal ngodech el omereng el saul el kirel a ulterekokl e ultebechel el klaumedengei el kmo Jesus ngii a Kristo. Ke mla melechesuar el uaisei? Ng betok a ringel el dechellungel, e ng di blechoel el ngar er medad ngike el Ngii oba klengariou el reng e melekoi, “Ngak a rael, e klemerang, e klengar.”1 Me chelechal taelm el dongeroid er kid er a rechad, eng dirkak a tang el ngarngii a temel dongeroid er kid er Ngii el Ngii a melemolem, lomerk a chimal, el bedul kid “Mei er ngak.”2
Ngii a di uaia omekrael el bduch er a eanged, a Jesus Kristo a omekllomes er a roled. Ng mlei er a beluulechad er a chelsel a kekerei el ongolel a charm. Ng mle kiei loba cherrungel el klengar. Ng ulemekungil er a resmecher e ulekiis er a remla mad el chad er a kodall. Ng mle sechelirir tirke el mla obesong el chad. Ng ulsisechakl er kid el mo meruul a ungil, mo olengesenges, e oubeltik el reng el mo er a tang. Ng mlad er a kerus, e ongasireng el milkiis er a kodall ruriul er a edei el klebesei, el rullid me a tirke el tir a betik a rengud er tir el mo kiei ruriul er a demelakl. El oba diak a mo uaingii el chubechub me a kerasia, Ngii a mlo chemol a kengtid me a ringeled, el oba klausubes sel douuchel a rengud er a kengtid me a budech er a ses el eolt er a klengar. Ng betik a rengud er Ngii. Kede oldanges er Ngii. Kede oltirakl er Ngii. Ngii a otil a rengud.
Ng ua lomosiroi, el tia mesisiich el reng er a klaumerang er kid a menglou, ngar er ngii a rebebil el ngar tia el beluulechad el diak el sa el medengelii a Jesus Kristo, me a, bebil er a beluu el Ngklel a mla muchais er a betok el rak er a mla memong, a klaumerang er a Jesus Kristo a di merael mo kekerei. A remesisiich el chad er a klaumerang er a Sebangiol a mla mesa klaumerang el merael el mo kekerei er aika el mla mo merek el rak.2 Klengit el reng, el chelsel a Beluu er a Merikel, a klaumerang meng di meral mo kekerei. A dirk mlo merek el omesuub a ulechotii el kmo a chelsel a mla mo merek el teruich el rak e a okedei el miliol el rechad er a Merikel a mla mo cheroid er a chedaol el Jesus Kristo.3 Domes er a bleluulechad, a ta er a omesuub a omlaoch el kmo a meral mei el betok el rak e ng muut el mo betok el rechad el merael mo diak el Kristiano er tirke el tir a oldeu a rengrir el kirel.4
Kid, a uaisei, mengull er a lemeltel a tang el melilt, e uaisei el Chedam er a Babeluades a mla mui el melekoi, “Ngika Di Ta el Ngelekek: mrengesii.”5 Ak olecholt er a klaumerang er ngak el kmo ng mei a taem el bek el uach a mo outubaruach me a bek el ngor a mo kombesar el kmo a Jesus ngii a Kristo.7
Kede mekera a doruul a tekoi el kirel a mengodech el beluulechad er kid? El bebil a olechib er tir er a klaumerang er tir, a rebebil a osiik a klemerang. Kede ngiluu el mora kid a ngkel a Osobel. Me ngerang a lemuut el sebeched el remuul?
A kutmeklel a President Russell M. Nelson
A tebechedel a nger er kid a locha mei sel domes el kmo ng milkera a Rubak a lolisechakl er a President Russell M. Nelson er a ikel sesel buil ruchei er a okedongel el mo Merredel er a Ikelesia. Milngedecheduch tal el rak ruchei er a okedongel, President Nelson a mle siotai er kid el mo dmolech el mesuub er a aike el eru el telael me a eru el dart a idisel el ngklel a Jesus Kristo el beldukl er a Topical Guide.8
Uriul er a edei el buil er a klou el ongdibel er a Ongeua el Buil, e ng milngedecheduch el kmo ng mekerang, el dirrek el cherengel a taem er a blakerreng el chad el oltirakl, tia el dmolech el omesubel a Jesus Kristo a kmal klou a le rirellii el mo er ngii. A Sister Wendy Nelson a uleker er a ngerang rirelii el mo er ngii. Ng ulenger el kmo, “Ak mla mo ngodech el chad!” Ng mle ngodech el chad? El oketiu me a edei a rekim, e ke mla mengodech el chad? A President Nelson a silodii:
“Se el dechoit a temed el mesuub el kirel a Osobel me a sel Tngakireng er Ngii, kid a mo kmeed er … [Ngii]. …
“… A moktek er kid [a mo] bereked er a Osobel me a ebangkelio er Ngii.”7
A Osobel a milekoi, “Momes er ngak er a rokui el uldasu.”9
Chelsel a beluulechad er a ureor, sebekreng, me a klikiid el omerael, kede osirs a rengud, bdelud, me a uldesued er Ngii el ngii e a reng er a oureng er kid e mo olsobel el kid.
Alsekum e a beches el omesubel a Osobel a ulngeseu el mengedmokl er a President Nelson, ng diak el dirrek el bol ngosukid el mo kldmokl el dirrek?
El melisiich er a ngklel a Ikelesia, President Nelson a ulsisechakl: “Alsekum kid … a ngar er ngii a techelled er a klisichel a Tngakireng er a Jesus Kristo—el mo omekbeches e omekungil er kid, melisiich e omekeroul er kid, e muut el tang mo olsobel er kid—ng kired el kongei er Ngii el kmo Ngii a uchul sel klisiich.”8 Ng ulemelekl el olisechakl er kid el ousbech er a melemalt el ngklel a Ikelesia, el tekoi el ualsa el kmal kekerei, a diak el kekerei, ngii a mo ngar er ngii a bol relii el kirel a ngar medad el taem.
A Yaksok er a Bom Keltokl
Ak yaksok er kau el kmo sel dongedmokl er kid, el uaia President Nelson, kid a dirrek el mo mengodech, mo blechoel el melebedebek er a Osobel, e mo blechoel mengedecheduch el Kirel e diak dou mededenger. Sel bo dodengelii e de dmolech el oubeltik el reng el mo er Ngii, a omelekinged a mo beot, el ua sel dongedecheduch er a ta er a rengeleked me a dirrek el sechelid. Tirekel orenges er a kau a mo diak el sal sorir oumodai malechub te oumechad er a kau e bai mo mesuub er a kau.
Kid el rokui a melekoi el kirel a Jesus Kristo, e ng di ng sebeched el kmal muut el mo ungil. Alsekum a beluulechad a mo diak el sal mesaod er Ngii, ng techang a mo mesisiich el mesaod er Ngii? Ng kid! El obengterir a rebebil er kid el Kristiano!
Mengedecheduch el kirel a Kristo er a Blid
Ngar er ngii a siasing er a Osobel er a rekeblid? Kid kede blechoel el mengedecheduch a ollachitnger er a Jesus el mo er a rengeleked? “Aike el cheldecheduch er a Jesus [a] di uaia mesisiich el eolt el melokou a ngeuil a bas er a klaumerang er a rengrir a rengeleked.”10 Sel rengelekiu a oker er kemiu a ker, e molisechakl aike el ngii a bla lolisechakl a Osobel. Ua tia el okesiu, alsekum a ngelekem a oker, “Chedam, ngera uchul e kede meluluuch?” Ke locha onger, “Tilcha kmal ungil ker. Ke medengei sera Jesus er a loluluuch? Me de kadecheduch el kirel a kmo ngera a uchul e ng Milluluuch e milkera er a Loluluuch.”
“Ke de mengedecheduch ra Kristo, e ngara deureng ra Kristo, … me a rengeleked bo lodengei el kmo ng techang ngkel lomes er ngii el kirel a ngebetel a kengterir.”11
Mengedecheduch el kirel a Kristo er a Ikelesia
Tial osisiu el bades a dochelir el kmo “aki olisechakl er a Kristo.”12 Chelsel a temed el oldanges, mei ma osenged lultab er a Osobel el Jesus Kristo me a sengk er a Tngkireng er ngii. Tia diak el belkul a kmo ng diak el sebeched el ouchais a tekoi el mla duubech el merkid me a lechub e louchais a kuk uldesuir a rebebil. A tekoi el dosaod a locha mesaod el kirel a telungalek me a lechub e ng omesiou me a lechub e ng templo me a dirrek el dirk mlo merek el omesiou el misionari, a rokuil el telengtengil sel doldanges a kirel melutk el bedul a Rubak el Jesus Kristo.
Okedei el rak er a mla memong, a President Dallin H. Oaks a milngedecheduch el kirel a tengami el ngii a ngiluu “er a ta el rubak el ngii a melekoi el kmo ng mla ngara [sakrament] miting e ulerrenges a teruich me a teuid el olechotel a klaumerang e dimlak a ta mel rengesii a ngklel a Osobel.”15 A President Oaks a mocha melekoi,“Alta tia el omelekoi a kora kmal olsiich [e ng di] ak melekoi er ngii le ng uleklatk el me er kid er rokui.”13 Me ngii a mlo olengit er kid el mo mesisiich el mesaod el kirel a Jesus Kristo er a cheldechedechad me a suobel dolsisechakl. Ak mla omtab el kmo kid a mla mo blechoel el uldalem el kirel a Kristo er a chelsel a ongdibel er kid er a Ikelesia. Mei mebo de kerekikl er aika el kmal ungil el omelasem.
Mengedecheduch el kirel a Kristo el mora Rebebil
El obengterir tirke el meliuekl er kid, mei mede bleketakl, el meral soad el mengedecheduch el kirel a Kristo. A President Nelson a milekoi, “A remeral el oltirakl er a Jesus Kristo a kongei el ngodech, diak el medakt el mengedecheduch, e ngodech er a rechad er a beluulechad.”14
Bebil er a taem e kede omdasu el kmo a dongedecheduch ra chad eng kirir el mo uchul e temei er a ikelesia me a lechub e te mo omes er a remisionari. Becherei a Rubak me lomekrael er tir el tir a kongei, e kid bai domdasu el kirel a ngercheled el mo Ngerel, el blechoel el medengei e blok a chimad el kirel a klaumerang. Elder Dieter F. Uchtdorf a mla olisechakl er kid el kmo sel sekum e a tang a oker er kid el kirel a ulebengelel a sandei er kid, e kid a kired el ouklidm e melekoi el kmo ng mle dmeu a rengud el orrenges er a rengalek er a Primaru el mengitakl er a “I’m trying to be like Jesus.”15 Bol sebeched el melekoi a klemerang el kirel a klaumerang er kid er a Kristo. Alsekum e a tang a mesaod el kirel a ringel el ngii a chelbangel er a chelsel a klengar er ngii, e kede sebeched el melekoi el kmo, “John, Mary, ke medengei el kmo ngak a oumerang er a Jesus Kristo. Ak mla melebedebek er a tekoi el Ngii a dilii el locha sebechel el ngosukau.”
Bol sebechem el melekoi el kirel a klaumerang er kau er a Kristo er a social media. Ng betok a re mo mengull er a klechelid er kau, e ng di alsekum e a tang a mo omtok sel mongedecheduch el kirel a Osobel, e mnguu a omelisiich el reng er a yaksok er Ngii: “Ke ngeltengat, el rechad a mo oltuub er kau …el kirek. … E leng klou a bo moritm er ngii er a babeluades.”16 Kede klou el omekerreu el kirel a oltirakl er Ngii er a bai de doltirakl er a sorir a roltirakl er kid. A Petrus a mle mellach, “Bo blechoel el di kldmokl el smodii [a] urunguliu el ngara rengmiu.”17 Mei medongedecheduch el kirel a Kristo.
A Babier er a Mormon a mesisiich el sioning er a Jesus Kristo. Osenged er a bek el llel a sioning er a Osobel me a chedaol urerel.18 El klaumedengei er a Tngakireng me a kerasia a llechukl er a chelsel. El kldemel a Beches el Renged, a Babier er a Mormon a ngosukid el mo beot el medengei el kmo ngera a uchul me a Osobel a mlei el olsobel er kid e mekera demeral mo er Ngii.
A a robengked el Kristiano a, le bebil er a taem, a oumededenger el kirel a klaumerang er kid e suebek a rengrir el kirel a moktek er kid. Mei mekid de meral ngara deureng el obengterir el dedak e oumerang er a Jesus KrIsto me a chedaol llechukl er a Beches el Renged el kid er rokui a kmal soad. Aike el ngar er medad el klebesei, e tirke el oumerang er a Jesus Kristo a mo ousbech a ungil deliongel el olengeseu er a tang me a tang.20
El beluulechad a diak el sal mengedecheduch el kirel a Jesus Kristo, mei e dongedecheduch el Kirel. El meral chiro er kid el oltirakl er Ngii a me chemolt, betok el meliuekl er kid a mo kldmokl el mo orrenges. El domerek er a llomes el kid a mla nguu er Ngii, a Llemesel me a ngar er bab el olsobel el Klisichel a mo omekllomes er tirke el tir a blok a rengrir. A Jesus a melekoi, “Ngak … a mei [el] llemesel a beluulechad.”19
Melisiich a Rengud el mo Mengedecheduch el kirel a Osobel
Ng diak a ngodech el mo melekau er klemeriar el reng er ngak el mengedecheduch el kirel a Kristo el muut el klou er sel kumes er a Luut er Ngii. Kid a diak dodengei el kmo ng oingerang ea Osobel a lmuut el mei, engdi ngbai tiakid a dodengelii el kmo ng kmal mo mengasireng! Ngii a mei el ngara eabed er a babeluades el olab a klisiich me a klebkall el obengterir a rechedaol el anghel er Ngii. Ng diak el dil lemekesai el anghel, ng bai rokui el chedaol el anghel er Ngii. A ikang a diak el bekekerkard el otengel a cherubim el louzunga a Raphael, el debetik er a card er a Valentine. Tirka re anghel er a betok el rak er a mla memong, el anghel el omutk a ngerel a raichong,20 el ngmai a chesmerel a kelebus,21 el mo ouchais el kirel a klou el omengiil el cherellel,22 el mo mengedlim er ngii er a Gethsemane,23 el omeketakl er a roltiral er Ngii el kirel ngii el modars el mo er Babeluades,24 e mo ngii a chesmerel a klebokel el oltel a ebangkelio.25
Ng sebechem el mesekau el mengai el mo er Ngii, el ngar tial bitang malechub e sel bitang el belurir a rdeleb?28 Tiaikid a yaksok er ngii el mora remelemalt. Tial omeruul a mo locha olangch er a rengud el mo cherechar.
Kede kmal merang a saul el kirel a betik er a rengud el profet er kid, President Russell M. Nelson, el ngii a mla odars a klemeriar el reng er kid el mo oubeltik el reng el mo er a Osobel e mo ouchais el kirel a Chedolel. Ngak a sioning er a chimal a Rubak el mo er ngii me a sengk er a ocholt el ngii a omekrael er ngii. President Nelson, aki mad el dmuil el kirel a omellach er kau.
Resechelik el meliuekl er a beluulechad, mei me dosaod er a Kristo, e mad el tmuil el mengiil er sel klebokel yaksok er a Osobel: “Ngiidi el chad … el lochotak er mederir a rebebil ra rechad, ngii a bo kuchotii… er medal a Demak.”29 Ak medengei el kmo Ngii a Ngelekel a Dios. El ngara a ngklel a Jesus Kristo, bol uaisei.