A Kllouelreng Bo Loureor, me Bom Ngara Deureng!

Erul rak ra memong, ea ochellek, er a Chad, a mlo smecher. Tial omerollel mo er sel bital beluu a mle uchul a klengitelreng el mo er a bechil er a Stephanie; tirkal terul mekekerei el ngelekir, er a Brayden me a Bella; me a tial rokir telungalek er kemam. Aki miltik ongelaod er a tekingel a Elder Neil L. Anderson er a klou el ongdibel er a tal sandei ruchei er a bol secher a Chad: “Aikel kmal meringel longarm er a chutem, el klou a rengum el merael bedul uchei, e a omekungil klisichel Osobel a mo meskau a llomes, klemedengei, budech, me a ongillem” (“Wounded,,” Liahona, Nov. 2018, 85).

siasing/Llecheklel

Chad Jaggi me a telungelek er ngii

Ngarngii a klaumerang er kemam er a Jesus Kristo; aki medengei el kmo ki lmuut el mobengkel a Chad, engdi ng meringel sel dibus er bitar kemam! Betok a mla mad a rebetik er a rengrir. Ng meringel sel dongiil er sel taem el de luut el mo tmak lobengterir.

Tal rak ruriul ra bol secher, eng kora mlar ngii a mekngit el meliuekl er kemam. Aki ulsiik a budech er a omesubel chedaol llechukl, mlo mesisiich el meluluuch, e omais el mora templo. A bades er tiakid el chelitakl a ngilsukemam er tiaikid el taem:“The day dawn is breaking, the world is awaking, the clouds of night’s darkness are fleeing away” (“The Day Dawn Is Breaking,” Chelitakl, no. 52).

Kemam el ongalek a rirelii er a rengmam el kmo 2020 mo ungil el rak! Aki mesuub er a Mei, Moltirakl er Ngak er a Beches el Renged er a hong er a Jakobus er sera November 2019 e a ocholt a mlei er kemam. A Jakobus er a kot el bliongel er a ongeru el bades a kmo, “Rodam, momes er ngii el deureng sel msiseb er a betok longarm” (Joseph Smith Translation, James 1:2 [in Jakobus1:2, footnote a]). A blakereng er kemam lomuchel er a beches el rak, beches el klechad, loba deureng, e a ki tilbir el kmo a 2020 a mo “mucherangel el deureng.” Ng kmal mle mesisiich a rengmam el kirel me tial mlo merek el Kurismas e a ki mle kauberesent a chelchedal a bail llechukl el kmo, “Mocherengar el Deureng el Rokir.” A rak er a 2020 a meral mo rak er a deureng me a klungiaol.

Eng di, kid itiang el—2020 a milskid a COVID-19 el secher, chelebuul er a beluu, telemellel a beluu, me a mekngit el kerruul. A Demad er a Babeluades a locha omeskid a taem el melbedebek e melatk aikel dodengei er a klloulereng me sel omeletked el melilt er a deureng.

A hong er a Jakobus a meral mla mo ngodech a belkul el mei er kemam. A kot el bliongel, er a Jakobus, er a ongedei me a ongeua el bades a melemolem el kmo:

“Bo modengei, el kmo a skeng er a klaumera er kau a mekdebechii a kllouelreng.

“A kllouelreng bo loureor er kemiu, me bom cherrungel, el diak a ngodech el somiu.”

A blakelreng er kid losiik er a deureng er a chelsel ongarm, e kid a mla obes el uase a klouelreng a ngii a dousbech er ngii me a ikal ongarm a mo klungioled.

A King Benjamin a ulisechakl el kmo ke nguu a rengum el mecherei e mo “santo lokiu a tekangireng er a Rubak el Kristo, e [mo ua] ngalek, bekongesenges, medemdemek el reng, ngariou el reng, mui er a beltik el reng, kengei el mo bekongesenges er a rokui el tekoi. (Mosiah 3:19

Elolem el bliongel er a Preach My Gospel a olisechakl a ikel blekerdelel a Kristo el kid a sebeched el oltirakl: “Kllouelreng a sebechel meketeket el mengiil er a eoud, mondai, ultok, me a lechub a ongarm e diak el kesib a rengud, checherd a rengud, e bekikl. Ng duch er a chad el meruul a soal a Dios e kongei er a Temel. Sel le kllou a rengum, em ngara ringel eng mo sebechem el chemau a ringel el chelellakl e ngara omelatk” (Preach My Gospel: A Guide to Missionary Service, rev. ed. [2019], 126).

A cherrungel lurerel a kllouelreng a dirrek el sebechel mocholt er a klengar er a tara roltirakl er a Kristo, el Simon el Canaanite. A re Zealots a chelechad er a Jew el kmal lulemtok a llecherir a rechad er a Rom. A Zealots a oldubech er a ultok el mora rechad e ra Rom, el tir a chad er a Jew, me a re Sadducees el merechorech a kall ma klaloue meruul a betok el tekoi el mo olngeseu er tial moktek er tir (mesa Encyclopedia Britannica, “Zealot,” britannica.com). A Simon el Canaanite a dirrek el mle Zealot (mesa Lukas 6:15 A Simon ng locha sebechel melasm el melekoi er a Osobel el mo oldechelakl, e loungerachel er a resoldau, el mo uchul a uldikel er a Jerusalem. A Jesus a ulsisechakl:

“Ngeltengat a remedemdemk a rengir: le te mo nguu a dikesir er tial beluulechad. …

“Ngeltengat a rechubechub: le te monguu a klechubechub. …

“Ngeltengat a rechad er a budech: le te mo mugakl el ngelekel a Dios” (Mateus 5:5, 7, 9).

A Simon a locha mle mesisiich el oldubech a loumerang el tekoi el mle blak a rengul, eng di chedaol llechukl ouchais el kmo ngokiu okesiul a Osobel, eng mlengodech. A otireklek er a Kristo a mlo moktek er a klengar ngii me a blakereng er ngii.

Sel doruul e doltirakl a telbiil lobengkel a Dios, e a Osobel a sebechel ngosukid el “mechell el beches; oi, mechell el ngara Dios, el mengodech [er] tial mekngit el kelngar kid, el mo er sel melemalt el klengar, el mla mosobel er a Dios, el mo ngelekel sechal me a redil” (Mosiah 27:25).

A rokui el tekoi er a beluu, klechelid, me a balatiks el ngarngii er chelechal taem, e a otirekled er a Jesus Kristo bol kot el ngaruchei el moktek el dengarngii. “Le sel ngarngii a mekreos el klokliu er ngii, a le le borngii a rengmiu el dirrek” (Mateus 6:21). Dirrek el diak dobes, uriul er tirkel mesisiich er a klaumerang a “lotireklii a soal a Dios,” ng di “[kirir] lultuil er a klouelreng” (Hebru 10:36).

Ng diuaia omelsemai er a klaumerang lultuil er a kllouelreng, sel dultuil er a kllouelreng, e a kalumera er kid a mo mesisiich. E sel bol klou a klaumera er kid, me a deureng er kid meng mo klou.

Tial mlo merek longedei el buil, e a ongeru el ngelekam el redil, er a Emma, el uaia bek el misionari er a Ikelesia, a mlorrimel el mo chelsimer lileakl. Betok el misionari a mle remei. E betok el misionari mlengiil el mo er a kuk tara basio. Betok a dimlak el ngai a klengeltengat er a templo e merolang el mo er a mision. Ko mesulang, e rodam me a re rodos. Ng betik a rengmam er kemiu.

A Emma m e a kldemel el ngara Netherlands a kmal mle meringel er tir er a ikel kot el telal sandei—el blol kaidelengelangel er ngii. Ng kmal di telkib el taem le kaseues el teloi er a rechad e diak el sal mo tuobed er a rikl, e a ultilel a Emma er a Dios a mlo chachisois. Aki miluluuch lobengkel er a online e oker el uase ng mekera ki molngeseu. Ngulengit me ki mongedecheduch er tirkel sechelil lullisechakl er tir er a online.

A telungalek er kemam a mocha online, loudersta er kemam, er tirkel sechelil a Emma el ngara Netherlands. Aki mle siotai er tir el mo teloi er kemam el, online er a bek el sandei, e mesuub er a Mei, Moltirakl er Ngak el suobel. Floor, Laura, Renske, Freek, Benjamin, Stal me a Muhammad a mla mo sechelimam. A bebil er a sechelimam er a Netherlands a mla soiseb er a “melemalt el rael” (3 Nephi 14:13). A rebebil a mla mocholt el mo er tir tial “melemalt el rael, me a chuibutek el rael, el sebechir el soiseb er ngii” (2 Nephi 31:9). Te odam e odos er kid er a Kristo. Bek el sandei e a ki “mecherengar el deureng” sel ki mdak loureor el ngara rolel a telbiil.

Kede “nguu a kllouelreng meng meruul a cherrungel lurerel” (Jakobus 1:4) er chelechal taem el meringel a dekaseues el telungalek er a ward el telkib el taem. Eng di kede mesa deureng el klaumera er a telungalek’ a mechisois lokiu a beches el technology lomak me a Mei, Moltirakl er Ngak el omesubel a Babier er a Mormon.

A President Russell M. Nelson a mla yaksok, “A di blechoel blakelreng er kau er tial ureaor—ngii me a ikel taem el kau a omelchesiu el diak loureor—a mo ngodechii a klengar er kau, me a telungalek er kau, me a beluulechad” (“Go Morael moruchei loba a Klaumerang,” Liahona, May 2020, 114).

Sel doruul a chedaol ruoll lobengkel a Dios—el templo—a chelsimer el telkib el taem. Sel doltirakl a telbiled lobengkel a Dios—blai— a blok a chesmerel! Ngarngii a techelled er a blai el mesuub e melbedebk a klebekelel a telbiil er a templo. Me a lak el sebeched el mo soiseb er tial chedaol basio, a rengud a mo ngara deureng er a ikel klengeltengat el mo mochubel kired (Doctrine me a Covenants 110:9).

Betok a mla mo diak a urerir; e betok a mla metom a techall. Eng di kede, ngara deureng, lobengkel a President Nelson, el dirk millekoi el kmo: “A uldars er a sengerenger er a rechedal a iekelsia a mla mo obdois, me a dirrek el ikel ngesou el mo er a beluu. … A dedak e kede moselbechakl er tial meringel el taem. A Rubak a mo omekngeltengat er kemiu sel molemolem lomekngeltengat er a rebebil” (Russell M. Nelson’s Facebook page, post from Aug. 16, 2020, facebook.com/russell.m.nelson).

“Bom ngara deureng” a llach el mlara Rubak, ng diak el mngara dakt (Mateus 14:27).

Beil er a taem eng mo seselk a rengud sel domdasou e kede “meruul a rokui el tekoi el tabesul” e dirkak dengai a klengeltengat el soad. A Enoch a mirrael lobengkel a Dios el edei el dart me a okolem me a eim el rak ruchei er a lmengai ngi me a rechedal mo er bab. Edei el dart me a okolem me a eim el rak lolasm el meruul a rokui el tekoi el ngara llemalt, eng ngii a dilubech! Mesa Doctrine and Covenants 107:49

A kodellel ochellek er a Chad a dilubech er a sesei el buil ruriul er a bok merek loungerachel er a Utah Ogden Mission. Ng mengasireng le sera kim kiei er a Southern Carolina, e a ikel rokui el 417 el mision eng mle sebecham el mo er a tara ngii er sera 2015, eng di aki mlora dims er a Utah. A blai er a mision a okedei el bung el domekall el mo er a blil a Chad. A kasinoma le biltik er ngii er a Chad ruriul er a ki mnguu okedong el mo er a mision. Uldimukl aikel kot el meringel el taem, kid a medengei el uase a Demad er a Babeluades a melatk el kired e olngeseu er kid el metik er a deureng.

Ak mla sioning er sel lolsobel, mengikiid, ngariou el reng, e deureng el klisichel a Osobel el Jesus Kristo. Ak sioning el kmo sel doluluuch el mo er a Chedam er a Babeluades el ngara ngklel a Jesus, e Ngii a mo onger kid. Ak sioning el kmo sel dorrenges, e doltirakl, e dolngesenges er a ngerel a Rubak me a ngar el profet, el President Russell M. Nelson, eng sebechel a “kllouelreng el mo oureor” e mo “mucherangel el deureng er kid.” Loba ngklel a Jesus Kristo, amen.