Moruul a Melemalt, Bol Soam a Chubechub, e Morael Loba Ngariou el Reng lobengkel a Dios

Kid loltirakl er a Jesus Kristo, e Uriul-klebesei el Santo, a melasm—e melemolem el melasm—el mo meruula ungil e mo ungil chad.¹ Kom locha mla melchedech, el uai ngak el kmo, “Ng klebech a kuruul?” “Ngera ngodech el kirek el meruul er ngii?” Me a “Ak mekerang, ngak el diak ngerang, e sebechek el mo ‘kiei lobengkel a Dios er a diak a ulebengelel deureng’?”²

A profet Micah er a Chuodel Renged a uleker ngii el ker er tiakid el teletael: “Ak mekerang e mo mesa Rubak, e osus er medal a Dios?”³ A Micah a ko er a uaia lulmededenger el kmo a uldersel ng klebech el mo ngubet a kengtil, el melekoi el kmo: “A Rubak ng mo ungil a rengul er a ikal telael el charm, a lechub a teruich el [telael] … el omuchael er a cheluch? a lechub ak locha odersii a ketengek el kirel … a kengtik?”⁴

A nger a diak. A di ungil lomeruul a diak el klebech. A mo suobel a diak locheraol.⁵ Luldimukl er a ikel kmal betok luldars eng di Micah mle medengei el kmo ng diak el sebechel suldii a chimol kekerei el klengit. A bol uaisei el di mo kid, e sel luldasou er a lmuut el mo er a rengedel a Dios a locha mo diak el sebechel.⁶

A Lak a klengeltengat er a Chedam er a Babeluades me a Jesus Kristo, eng diak el sebeched el di kid losebelid. A ungil chais a kmo, ng uaisei, lokiu a Jesus Kristo e kid a mo sebeched el mo cherrungel e mo suobel.⁷ A rokui el chad a mo suobel er a kodall er a tech lultuil a krazia er a Dios, lokiu a kodellel me a Okiis er a kodall er a Jesus Kristo.⁸ E a debult a rengud el mo er a Dios, e a osobeled er a klengit a mo sebechel mo er a rokui el chad “lokiu a Tngakireng er a [Jesus] Kristo … lultuil er a otirekled er a llach me a chedaol ruoll er a Ebangkelio.”⁹ Ng sebeched el mo suobel er a klengit e mo dechor el beches e klikiid er medal a Dios. Ng uaia Micah el silodii el kmo, “[A Dios] a mla chotii er ngak, Ngak el chad, sel ungil; e ngerang mengerchir ngii a Rubak er ngak, ng mengerchir er a llemalt lomeruul, beltikereng, me a ngariou el reng lobengkel a Dios?”¹⁰

A tekingel a Micah el kmo ng kired el mult a rengud el mo er a Dios me sel luchul e kede mo suobel a ngarngii a kldei kabekbuk losisechakl er a chelsel. A meruul a llemalt a belkul a kmo ng bleketakl omerelled el mo er a Dios me a rebebil er a rechad. Ng bleketakl omerelled el mo er a Dios sel doba ngariou el reng e Lobengkel. E bleketakl omerelled el mo er a rebebil loeak a chubechub. A leuaisei e a bleketakl lomerelled a mocholt lokiu otirekled er sel kot me a ongeeru llach, el mo “oubeltikereng el mo er a Rubak el Dios loba rokir el rengud, me a rokir el bedenged, me a uldesued el rokir … [e mo] oubeltikereng el mo er a rodam er kid.”¹¹

A bleketakl lomerelled me a oba ngariou el reng e merael lobengkel a Dios a belkul a kmo ked emo cheroid er a mekngit, e oltirakl a Teletelel, e bleketakl omerelled.¹² A melemalt el chad a odngeklii a mekngit e obult el bedul a Dios, e soiseb er a telbiil Lobengkel, e oltirakl aika el telbiil. A melemalt el chad a melilt loltirakl a llechul a Dios, ouchel a rengul er a kngtil, e melemolem el melasm.

A mla mekiis er a kodall el Kristo er a bo el dum er a re Nephites, e Ngii a silodii el kmo a llechul a Moses a mla mutechei er a ngarbab el llach. Ng dilu er tir meng mo diak “lolenget … e mo cheuarm e … a uldars” e bai, mo “odersii a ngariou el reng me a medemdemk el reng.” Ngii a dirrek el mle yaksok el kmo, “Le ngike el mei er ngak loba ngariou me a ouchel el reng, a ngii a mo nguu a techolbechelid er a ngau me a Chedaol Reng.”¹³ Sel denguu e dousbech er a sengk er a Chedaol Reng ruriul er a techolbechelid, eng sebeched el melemolem el melchesuar a Chedaol Reng e mosisechakl er a rokui el tekoi el kired el meruul,¹⁴ luldimukl er a kmo ng mekera doba ngarou el reng lobengkel a Dios.

A tnagkireng er a Jesus Kristo el kirel a klengit me a osebeled er a kodall a mo er tirkel rokui el tir oba ngariou el reng me a delemdemk el reng.¹⁵ A ngariou reng me a delmedemk el reng a odbechid el mo ouchel a rengud er a bek el sils e melasm el merael mo uaia Chedam er a Babeluades me a Jesus Kristo. Sel bo deuaisei, e kid a nguu sel lomekbeches, omekungil, e melisiich el klisichel Osobel. Ng diak di bo lemelemalt omerelled e doba ngariou el reng er medal a Dios, kede dirrek el mo chubechub er sel teletael el Chedam er a Babeluades me a Jesus Kristo obang.

A Dios oldeu er a chubechub e diak lechitechetur a usbechellel. A tekingel a Micah kmo, “Ng techa mo uaia Dios er ngak, lousubes a mekngit, … e oba chubechub el kired,” e mo “ngmai a rokui … el klengit el chemoit er a daob.”¹⁶ A mo oba chubechub el uaia Dios a kabekbuk el tekoi ngii me a melemalt lomeruul el mo er a rebebil e diak el mekngit a blekerdeled el mo er tir.

A klou el ultutelel a diak lemekngit omerelled el mo er a rebebil a beleketakl lokesiul a Hillel el Elder, e mellomes a rengul chad er a Jew el kiliei ruchei er a taem er a Kristo. A tal ngalek er a skuul lullisechakl er ngii a Hillel a mlo seselk a rengul el kmal meringel a losuub er a Torah—aikel kleim el hong er a Moses me a ika lelomel el dart me a tacher me a kldei llach lobengkel me a omeluches er a rabbi. Ngika el ngalek er a skuul a millasm er a Hillel me lesodii lousbech er sel klungel a taem el Hillel a sebechel dechor er a di bita lochil. A Hillel a locha mle meringel er ngii el dechor er a di bita lochil eng di ngkilengei. Ng dillii a bades el mla er a Leviticus, el kmo, “Ng diak bo molemall, a lechub e bol kesib a rengum er a ngii di el chad, ke bai mo oubeltikereng el mo er a odam er kau.”¹⁷ A Hillel a di mle mereched el dmu el kmo: “Sel ngii a klengit er kau, lak moruul er ngii el mo er a odam er kau. Tiaikid osischeklel a Torah; a ikel medechel a di omesodel. Momakes el bedul uchei e mosuub.”¹⁸

A bleketakl lomeruul el mo er a rebebil a tebechedel a chubechub. Momtab er a cheldecheduch el meketeketa er a krengesii er a chelsel a emergency rum er a Johns Hopkins Hospital er a Baltimore, Maryland, er a Beluu er a Merikel. A smecher, el Mr. Jackson, el melemalt, e ungil a blekerdelel chad e mle betok a remedengelii el chad er a ospitar. Ng mla mo betok el be le nuiing er a ospitar el kirel a secherel omelim el rrom. Tiaikid el taem, e a Mr. Jackson a liluut el mei er a osbitar el blo el betik er ngii el mla mo oburk a chii er ngii lomelim el rrom a uchul.

Uchei er a bo el merek loureor er tial sils, e a Dr. Cohen, el blak a rengul e betok a rechemat er ngii el toktang, a ulemes er a Mr. Jackson e dilu er ngii el kmo ng kirel mo niuiing. A Dr. Cohen a ulderchii a Dr. Jones, tara toktang el kuk mei oureor, me le niuiing er a Mr. Jackson e lesa teletelel a ukeruul er ngii.

A Dr. Jones a mla tuobed er a chetengakl el skuul er a kltoktang e dirk ulemuchel er a tara omesuub er a daingak. Tial tara omesuub a omerritel el kirel a mekngit el cheliuel a chad, meng uaia ble luchul a mekngit lomelkiel a Dr. Jones. A bocha lodengei el kmo ngmo niuiing er a ongeim el chad er tial kesus, e a Dr. Jones a mle klou a ngerel loumondai el mo er a Dr. Cohen. Ng millekoi el kmo chelecha eng kuk choitii a klou el temel lomes er a Mr. Jackson, el secherel a kmal, di mle ngii.

A Dr. Cohen a kmal milkekokil mengelulau el melekoi er ngii. Ng dilu el k mo, “Dr. Jones, kau a mlo toktang el mo omkar er a rechad e oureor lomekungil er tir. Ng dimlak bom toktang el mo merritel er tir. Alsekum eng diak modengelii a klekarerous er a ikang, eng diak el sebechem el ngara tial lureor.” Uriul er tiang, e a Dr. Jones a kmal mlo ungil lomes er a Mr. Jackson er a taem le niuiing.

A Mr.Jackson a meketeketa er a bol secher. E a Cr. Jones me a Dr. Cohen a kmal semmong er a urerir. Chelsel a meriked el taem er a omesubel, e a Dr. Jones a mle kirel muklatk el mo melemalt omerellel, oba chubechub, e omekerreu er a Mr. Jackson e diak lorritel er ngii.¹⁹

Aika el mereko el rak, e ak mla muklatk er ngii el teletael. A oba chubechub a belkul a kmo ng diak di el soad chubechub el Dios odersii er kid; ng dirrek lungil a rengud el Dios odersii osisiu el chubechub el mo er a rebebil. E kid oltirakl Okesiul. “A rokui el chad a diosisiu er medal a Dios,”²⁰ e kid el rokui lousbech er sel chedaol lomekungil el mo ngosukid. A Rubak a mla kmo, “Ng diak momdasou er a tara chad el ngarbab er a tang, a lechub a chad a diak bo lomdasou el kmo ngii a kuk ngarbab er a tang.”²¹

A Jesus a ulechotii a belkul a llemalt lomeruul me a oba chubechub. Ng mle mimokl el teloi er a remui er a klengit el chad, el mle ungil a blekerdelel e mlengull er tir. Ngii a ulisechakl el kriel a deureng sel doltirakl a llechul a Dios e ulsiik rolel mesebechakl e diak loltuub er tirkel mlara ringel. Ngii a ulengeroel er tirkel lulkebai er Ngii el diak loldingel er a rechad el mle mui er a klengit.²² Tiaikid el reng er a oleko te kmal klikiid a tilmelii a Rengul e melemolem el uaisei.²³

A mo uaia blekerdelel a Kristo, eng kirel a chad el melemalt omerelled, el mengull er a Dios me a rebebil er a rechad. A melemalt el chad a ungil omelkingel me a omerellel e mtebengar el kmo a klekakerous er kid me a klechelid er kid a diak el terbengii a bklekokeuii me a ungil klausechelei er kid. A rechad el tir a melemalt omerellir “a diak er a uldesuir el mo tomelii a rengul a tara chad, te bai omudech”²⁴ er a ta me a tang.

A mo uaia blekerdelel a Kristo, eng kirel a chad el mo oba chubechub. A rechad el chubechub a diak lorritel; te bai ochotii a blekokeuii el mo er a rebebil, tokuni tirkel kuk olngesonges; te chubechub, e bekokeuii, e chetengakl el chad. Tirkaikid el chad a rousii a beltikerneg el mo er a rokui el chad, el diak el iior er a kmo te techang, sechal a lechub eng redil, klechelid lengarngii, teletael er a deleuill, deruchellel a chad er a buai, kleblillel, blai, a lechub e te chad er a kakerous el beluu. Tirka ulsemuul er a beltikereng er a Kristo.

A mo olab a blekerdelel a Kristo, e a chad a melilt er Dios,²⁵ e oba ngariou el reng e merael Lobengkel, e osiik er a Soal, e oltirakl a telbiil Lobengkel. A rechad el tir a merael lobengkel a Dios a melbedebek aikel bla ruul a Chedam er a Babeluades me a Jesus Kristo el kirir.

Ngak ng klebech a kuruul tekoi? Ngera dirrek el sebechek el remuul? A omerelled el ngii a mo nger kid er a ikal ker a klou a ultutelel kirel a deureng er chelechal klengar me a diak a ulebengelel. A Osobel a diak el soal a le ko er a ouralmesils a rengud el kirel osobeled. Uldimukl ruriul er a desiseb er a ikal chedaol telbiil, e ngarngii a techall el “derebet e mo cheroid er a ngar el Dios.” A leuaisei, eng kired el “orrenges e blechoel meluluuch” meng diak “derebet er a ongetikaik.”²⁶

Eng di a osisiu el taem, e a Chedam er a Babelaudes e a Jesus Kristo a diak el sorir a bo lemechesang a uldesued er a diak dodengei el tekoi er tial klengar, el rrau a rengud el kmo kede locha mla remuul aikel rokui el kirel osebeled. Tir a kmal diak el sorir a bo dengara ringel el kirel a klengit el kid a mla ouchel a rengud er ngii, e domdasou el kmo ng telemall el diak bo lungil,²⁷ mecha lechub e desal bo bekikl el kmo kede mo lmuut el ruebet.

Ng sebeched el di kid el merritel er a omerolled. Ng sebeched el mo medengei el kmo “a rael el [dengarngii] a oltirakl er a soal a Dios”²⁸ sel sekum eng melemalt omerelled, e oba chubechub, e oba ngariou el reng lobengkel a Dios. Kede omekesiu a blekerdelel a Chedam er a Babeluades me a Jesus Kristo, e betik a rengud er a ta me a tang.

Sel moruul aikaikid el tekoi, e ko mo ngara rolel a telbiil e mo sebechiu el mo “kiei lobengkel a Dios er sel diak a ulebengelel deureng.”²⁹ A rengmiu a mo mui er a klebkellel a Dios me a llomes er a diak a ulebengelel klengar.³⁰ Ko mo mui er a diak a smodii el deureng.³¹ Ak sioning el kmo a Dios a ngar e kmo a Jesus a Kristo, Osobeled e Osobel, e Ngii a oubeltik el reng e dmeu a rengul e lomerek er a chubechub Ngii el mo er a rokui. Ng diak el soam? El ngara a ngklel a Jesus Kristo, amen.