Metik er a Deureng er a Kristo

A Rubak a diak lolengit er a rengeasek el Aaronic Priesthood el mo meruul a rokui, eng di sel Ngii a olengit er ngii sel ungil-omekellomes.

A sesel rak ra mla memong, e a kekerei el telungalek er kemam a siliseb er a betok el telungalek a mla obangel er tial beluulechad. A kot el kekerei el ngelekam el sechal, el Tanner Christian Lund, a mlo kasinoma. Ng meral mle smiich el ngalek, el uaia rebek letiu a rekrir el ngalek. Ngii mle otobedechur a omerolel e, osisiu el taem, kmal limis el medengelii a chedaol. Diablong ma anghel, dengerenger me a kedung. Sera le kekerei mel bek el sils longibitiekl er kemam lolecholt a duch er ngii me a telkengelel, e ng di mle rengmam sel bol klou eng locha mo profet malechub eng mo merechorch a bank. Diak el ior, e ngii a kora mlo rulii a relii er a beluulechad.

E ngii a di mlo mereched el mo iimis el smecher. Aikel edei el rak ruriul, e a kar er chelechal taem a ngar ngii a rirelii, el uldimukel er a teblo el chiuesel a bedengel, el mlo uchul a secherel numonia, meng mlo ousbech a mesil teruich sandei el diak lodengelii a rengul. Mengasireng, ng di mle kedeb el taem eng mlo ungil, eng di a kasinoma er ngii a luetang.

A uchei ra le bol secher, e tial secherel a Tanner a ngilasech er a chiuesel, e dirrekl lobengkel a mesisiich el kar, ngii a dirk ngara ringel. Ng diak el sal sebechel mekiis er a dukkelllel. Tiakid el tutau er a Sandei, ea delal, el Kalleen, a mlei ra delmerab er ngii el me mes er ngii ruchei er a telungalek lorael el mo er a ikelesia. Ng mlo mechas a rengul er a lesal di milkerang e mla milii e dengchokl ra tkul a bet er ngii, e meringel lomrodech ra bilel. A Kalleen a mlo dengchokl er bita er ngii. “Tanner,” ng millekoi, “ke meral mesisiich el sebechem el mo er a ikelesia? Ng bai locha ungil a di mngara blai e molengull.”

Ngulemes er a ulaol. Ng kang a mle deacon. Ng mla ra chelechad. E mla er ngii a ngerchelel.

“Ng kirek el mo merous a chedaol belsoil er chelechang.”

“Eng di, Ak medengei el uase ng sebechel a kmo techang el mo meruul er ngii el kirem.”

“Chochoi,” ngii a dilung, “eng di … Ak mes aikel osinger a reched el mer ngak el kurous a sakrament. A kumdasu eng ngosuterir.”

A Kalleen a mocha ngosouir el mredechii a chelchedal a bilel e lolia tai er ngii, e te merola el mora ikelesia. Bleketakl, ngar ngii a klou a ututelel a mochu omuchel.

Ak mlei el mlara miting e mlo mechas a renguk er a kisa Tanner el dengchokl er a lengarngii a re deacon. A Kalleen a milkekokil louchais er ngak el kmo ngera uchul meng ngarsei me a tekingel el dilu el kmo: “A kumdasu eng ngosuterir a rechad.”

Eak mecha omes er tirkal deacon el merael bedul tial tebel ra sakrament. Ng mlo ultuil er a tara deacon e a re prist a oldars a trei el mo er tir. E a Tanner a milkokil el mo er sel kirel ngarngii e ulrekedii a kingall el me bol dechor lungil er a lomsa chedaol belsoil ngkel mla er medal.

Ng mederir a rebek el chad a uaia lulemes er ngii, el ulmechesiu er ngii lorreked er a rengul er a ringel er a loruul er a ngerchelel. Ngkal Tanner uaia le mekekokil di lmuk el merael er a delongelel a kingall-tial hange el ptelul dekimes er a kelsib- el omtechei er a Osobel el uai aikel loruul ar deacon. Tial mle tal le mesisiich el bedengel el elechang deuall e mla metemall, engdi ng blak a rengul el mo mesiou loba bedengel a Kristo ma Tngakireng er Ngii el me er a klengar kid.

Sel ki momes er ngii el omdasu el mo deacon a rirellemam el kuk mo ngodch a uldesuam- el kirel a sakrament, kirel a Osobel, me a kirirar deacon me a re sensei me a re priests.

Ak melbedebek er a diak a smodii longasireng el rirelii el mo blekebek el mo otireklii okedong el mo mesiou, kekerei el okedong el mo mesiou, me a sel klisichir me a techellir ar ngeasek el ngeleked sele modurch el mo oltirakl er a okedongel a profet el mo chedal a klsoldau er a Dios el kirir a ureor lolsobel me a diak a ulebengelel klengar.

Bek el taem el deacon orkedii a blil a sakrament, e ng uleklatk el merkid er a chedaol cheldechedechal sel Ulebongel el Belsoil, me a Gethsemane, me a Calvary, me a debull. A Osobel er sera lolekoi el mora re Apostol er Ngii, “Moruul er tiang me bo molatk er ngak,” ¹ Ng dirrek el millekoi el mora rokui el taem el me er kid er chelechang. Ng millekoi er a ongasireng el Ngii a mo nguu el mesterir a re deacons er a ngarmedad el taem, resensei, me a baderei el mo merous a chedaol Bedengel me a Resechel e omekedong er a Rengelekel el mo nguu a sengk er a tengetengel el Tngakireng.

A rokui el olangch er sel chedaol belsoil a melutk er kid el mor sel sengk. Ke de omdasu er sel blauang el Ngii e mle tal taem lomached er ngii—me a ikal blauang el tirka el priest el ngar medad, me a chelechang, e ng dirk omached. Ke de omdasu ra belkul sel ralm el mlechedaol, seikid el sils me chelechang el taem, me aikal tekoi ngara chelsel a nglunguuch er a chedaol belsoil loba omengull el metuobed ra ngerir a rengeasek el baderei el mera rengud e mora babeluades, lomekbeches a telbiil el ngii a omak er kid el mor sel klisichel a olsobel el ngara Kristo. Ng sebeched lomdasu ra belkul sel sekum a deacon loba tial chedaol bedengel ma rsechel el merkid, el dechor er sel ngii a le dechor er ngii a Jesus omko Ngii a ngarisei, el mesebechakl e mengebekakl a ringel.

Ngungil, ele rengeasek a diak a belkul bol secher el bochul betik er tial deureng me a moktek er kid el mesiou er a Osobel.

A Elder David A. Bednar millekoi el kmo a bo demisionari eng, kired el meruul aikel kirir a remisionari el meruul, el, “telkib er tiang me a telkib er sei me a dersta tiang me a dersta er sei, … [eng] sebeched el mekekokid el merael mo misionari … el Osobel a mengerchir ngii.” ²

Alskeum eng kmal soad el “uaia Jesus,” ³ eng kired el meruul a loruul a Jesus, e a tara mechas a rengud er ngii el tekoi, a Rubak a smodii el kmo ngera ikel Ngii a meruul: Ngii a dilu el kmo, “Tiang a urerek e klebkellek—el mo mesterir a diak luut el kodall me a diak a ulebengelel klengar a rechad.” ⁴

A urerel a Osobel a dimla tiakid e melemolem el mo cherechar el ngii a mo mesiou er a Demal el olsobel er a Rengelekel.

E sel kmal ngii a rael el mo metik a deureng er tial klengar a mo teloil el longkel a Kristo el olngeseu er a rebebil.

Tiaikid a beot el klemerang el mengetikaik er a prokuram er a Rengalek me a Rengeasek.

A rokui lomeruul me a omilil er a Rengalek me a Rengeasek me a osisechakl a di olngeseu er a rengasek el mo uaia Jesus el mo Obengkel er a Urerel lolsobel e uchul a diak a ulebengelel klengar.

Rengalek me a Rengeasek a dongu el mo olngeseu er a rebek el ngalek er a Primary me a rengeasek el mo duubech el mo ua kristo e mo ngmai a ues er a mui-el klaumerang el ng kmo a deureng ng ua ngerang. Ng sebechir el mo semeriar e oureng aikel olangch lokiu a rolel a telbiil, sel tir a mo metecholeb e nguu a sengk er a Chedaol Reng e di kmedung e te mo chedal aikal quorums me a class er a Young Women, e dirrek el mo melchesuar a deureng sel dolengeseu er a rebebil lokiu a teletelel a Kristo er a omeruul er a omesiou. Te mo kudmokl a moktek er tir, meklou me a mekekerei, el ngii a mesterir a tabesul klengar e ngosuterir el merael el mo uaia Osobel. A ongdibel er a Klisichir a Rengeasek me a magazine, Friend, me a Gospel Living app a mo ngosuterir el meral mo metik er a deureng el ngara Kristo. Te olsingch el kirel a kelngeltengat el bo loba sel di kedeb a klsel babier er a mo er a templo, e betok a mo melchesuar chedaol reng er a Elijah lokiu odbechel Chedaol Reng sel loruul a ureor er a templo me a reksi er a telungalek. Te mo mukrael lokiu a klengeltengat er a patriarch. Chelsel a taem, e tir mo mesterir el merael mora templo el mo melai a sengk me a klisiich e mo metik a deureng er sel bol moak el mo cherechar, mei a kmong ngerang, lobengterir a telungalek er tir.

Ng mlocholt er a taem el tial bekoiuiuul rakt, el mlo uchul a mui el yaksok er sel beches el prokuram er a Rengalek me a re Ngeasek a dirk merael a urerel—e kmal orechudel. A rengeasek er kid a diak el sebecherir el mengiil er a beluulechad el mo soiseb ra llemalt ruchei er a lorael mo medengelii a Osobel. A rebebil a ngara omelilt er chelechang el kmo ng locha mo diak el sebechrir omko ng dimlak lodengelii sel meral teletelir—e Ngii el dirrek.

Me a orechudel lokedong er a Dios el mo er a roderchelel a kmo “Rokui el Chim loureor!”

Chedil me a Chedam, a rengelekiu el sechal ousbech er kemiu el mo olngeseu er tir er chelechang el mesisiich el uaia ngara mong er sera loruul a diak el sal meklou a ultutelel tekoi. Chedil me a Chedam, priesthood me a roungerachel er a re Ngeasek el Redil, alsekum a rengeasek er kemiu a diak el mesisiich, e a Rengalek me a re Ngeasek a mo ngosuterir el ngoititerir el mora Osobel, ea Osobel a momesterir a budech. ⁵

Quorum me a re president er a klass, bekiis el ngmai a meral blingeliu er a urerel a Rubak.

Bishop, mdibuk a kisiu me a president er a quorum, me a quorum er kemiu—e a ward er kemiu—a dimerko mengodech el mo er medad.

E mo er kemiu el telcheroll er chelechal taem, a Kuuchais, er kemiu le ak medengei, el kmo kemiu a loubeltikereng er kemiu el ngelekel a Dios el sechal me a redil e Ngii a ngarngii a urerel el bo moruul.

Sel bekiis el mo er tial ngarbab el ngerchelem, el meral ngara rengum, ma uldesuem, klisichem, e kau a merael mo betik a rengum er a Dios e mo oltirakl a telbiil e oumerang er a priesthood er Ngii sel moureor lomekngeltengat ra rechad, lomuchel ra blim.

Ak meluluuch me ko mo melasem, loba chachisois el klisichel a bedengiu, el meral mla uker er tial taem, el mo mesiou, meruul lokiu a klaumerang, e melasem el moungil ra bek el sils, el mo sebechiu el nguu a klengeltengat ra templo me a melemolem el deureng el ngii a mei el kmal di okiu a ebangkelio er a Jesus Kristo. Ak meluluuch me ko mo keldmokl el mo blak a rengmiu el mo misionari, ungil bechiil, e ungil chedam me a chedil el kemiu a mla yaksok el mo sel ngii a kiriu el mo uaingii el mera loltirakl er a Jesus Kristo.

Ko molngeseu el mengedmokl er a beluulechad el kirel sel luut el mei a Osobel, el oleker er a rebebil el mei er a Kristo me bo lolchesuar a klisichel a Tngakireng er Ngii. El ngara a ngklel a Jesus Kristo, bol uaisei.