Budech, Bom Chelellakl
A Osobel osischeklid el mo melchesuar a budech me a kellechakl sel meses a eolt er bita er kid me a ringel daob lomektakt er kid.
Sera lemekekerei a rengelekam, e aki mlo milil el telal klebesei er a bita er a klebokel lomoachel. A tal sueleb e a bebil er a rengalek a lilecha uki er tir e merdekekl el mengedub er tial omeuachel. A kot el kekerei el ngelekam el redil a kmal chelellakl e di omes, el kmal blak a rengul lomtab er tirkal bebil er ngii. Ng kmal dikea lorkedii a rengul, me ngorkedii a iisngel e suchesokl. Ng di mle mereched el meduum el telkib el ko er a medakt e oldiu el kmo, “Mngesukak! Mngesukak!”
Ng dimlak, el sebechel mekesakl; le tial uki er ngii a mle sebecheklel, me ngombibechakl el selbechakl. Ng mle sebecham lorkedii e kursii el me er a sambas. Eng di ngii a ulemdasou, el kmo ngulusbech a ngesou. Ng locha tial kelkeltel a ralm a lechub eng kuk tial beches el teletael. Ng mlo sebechel, ngmasech el mei er a sambas, me a ki milii er a medirt el taor e kmal chemat er ngii el dimlak el medakt.
Ng diak iior er a kmo kede meklou a lechub e kede mekekerei, le ikel taem el dekurusii, eng sebeched el kmo “Mngesukak!” “Msebecheklak!” a lechub “A kulengit, me monger a nglunguchek!”
Tiaikid el teletael a dilubech er a rulbengkel a Kristo er a lengara beluulechad. Chelsel a hong er a Markus e kede menguiu el kmo a Jesus “liluut lomuchel lolisechakl er a tkul a daob: e meral mle klou a seked.”1 Tial seked a meral mlo klou me a Jesus a “ngilasech er a bilas”2 e mlora kuteling e mengedecheduch. Ng tal sils el Ngii a ulisechakl er a rechad lolab olachitnger e tir a dengchokl er a tkul a daob.
“Me a … sel [milkelkang] e,” Ngii a dula er a Rulbengkel, “Me dorael el kuk mo er sel bitang. Me bol merek el melmesumech er tial seked,”3 e te mirrael el ngara omerollir er tial Debel a Galilee. Ng miltik a basio er a resbai er a bilas, e a Jesus a mocha mechiuaiu e di mle mereched el mo mechiuaiu. Di mle telkib “e ngii a ngukokl a chetau me a eolt, me a daob a siliseb er a bilas, el [sokol] ruchorch”4.
Betok er tirkal lulbengkel a Jesus a mle meduch el chad er a omenged me te meduch lomekrael er a bilas er a ses el eolt. Ngii uluumerang er tir—choi, tirka mle betik er a Rengul—el chedal. Te mla chemoit a urerir, me a ikel sorir el meruul, me a telungalek e tir e obengkel a Jesus. A klaumera er tir er Ngii a mle bleketakl er a lengara bilas. E chelecha e a bilsengir a ngara ringel daob el sokol ruchorch.
Ng diak dodengei el uase nguangera klemanget lullasm lomtebechel er a bilas er tial chetau, eng di te ulekisii a Jesus le te mlo telkib el medakt, e kmo:
“Mastang, ng diak ko bekikl a demekesakl?”5
“Rubak, mngesukemam: me lak ki mriid.”6
Te ulemekedong er Ngii “Mastang,” e meral Ngii. Ngii a dirrek el “Jesus Kristo, el Ngelekel a Dios, el Chedam er a eanged me a chutem, Lomeob a rokui el tekoi er a uchelel.”7
Meng di mla er sel le mlarngii er a bilas, e a Jesus a milkiis e cholleklii a eolt e millekoi er tial daob el kmo, “Bom, chelellakl. Me a ses el eolt a mlo [diak], e meral mlo klou el kellechakl.”8 A Mastang el Sensei, el Jesus a ulsischekelterir a Rulbengkel a eru el meklou a belkul ker. Nguleker:
“Ngera meng di ngera ko medakt?”9
“Ngarker a klaumera er kemiu?”10
Ng kse er kid a rechad, me a dirrek longetikaik, el sel debetik er kid el ngara ongarm, sebekreng, a lechub a ringel e kede melekoi el kmo, “Mastang, ng diak el sebek a rengum ak mekesakl? Mngesukak.” A Joseph Smith meng dirrek lilangel er a lengara kelebus, Rubak, ke ngarker? E ngar ker a kateng lomerk er a omngarngii el basio?”11
Ng meral tekoi, el Osobel er a beluulechad a medengei aikel sebeched me a diak, le Ngii osischeklid el mo melchesuar a budech me a kellechakl sel meses a eolt er bita er kid me a ringel daob lomektakt er kid.
Tirkel dirk ouralmesils a klaumera er tir, uaia klaumera er a ngalek, luldimukl a le sal kekerei el klaumerang,12 Jesus, a kmo: “Mei er Ngak.”13 “Moumera er a ngklek.”14 “Mosuub er ngak, e morrenges a tekingek.”15 Ngii a oba chubechub e kmo, “Bo mouchel a rengmiu e [bo] metecholb er a ngklek,”16bom kaubeltikereng; el uai ngak el betik a renguk er kemiu,”17e bo “blechoel melbedebek er ngak.”18 A Jesus a bleketakl, el smodii: “Aikal tekoi el blakdu er kemiu, me bo mngar a budech omobengkek. A beluulechad a mo omekcharm er kemiu: ng di lak kom medakt; e ak mla mo mesisiich er a beluulechald.”19
Ak kora di melbedebek er tirkel lulbengkel a Jesus el ngara ringel daob, a locha, mle mechesang lomes er a bilas e melimt a daob loltobed. A kora di omes er tir el melasm lomtebechel er tial kekerei el bilsengir meng diak el mekesakl er a ringel el daob. Te di millatk a mo suobel er seikid el taem, e a ongterir er a ngesou a meral mlara rengrir.
Betok er kid a kuk diak desal kakerous er chelechal taem. A dirk dilubech el teletael er a beluulechad el rokir me a beluad, me a beluu, me a telungalek a mla osisebid er a diak desa el ongarm. Chelsel a taem er a ringel e a klaumera er kid a sebechel kmal metamt lengelakl er a sebeched lotekur me a klemedengei er kid. A sesengel a dakt a osengkid, e rullid lobes ra klungiolel a Dios, luchul eng mo kedeb osenged e mo diak dungil lomdasou. Eng di aikaikid el meringel taem er a klengar kid e a klaumera er kid a mo er a omelasm e mo mesisiich.
Ng diak el iior er a teletael el deseluk er a chelsel, leng sebeched el mo blak a rengud el meleketek e mengisois er a kalumera er kid lokiu a Jesus Kristo. Ng mo mesisiich sel dolbedebek el kmo kid a ngelekel a Dios e Ngii a betik a rengul er kid. A klaumera er kid a mukeroul sel dolasm er a tekingel a Dios loba urunguled me a blakereng, el melasm loltirakl osischeklel a Kristo. A klaumera er kid a mo chachisois sel dolilt loumerang e lak doumededenger, ousubes e bai diak dorritel, ouchel a rengud e diak doba ngasechereng. A klaumera er kid a mo mesisiich sel doba klloulereng lultuil er a chubechub me a krazia er a Chedaol Messiah. 20
“Ng uaisei el klaumerang a diak el belkul a kmo ng cherrungel a klemedengei er kau,” e a Elder Neal A. Maxwell a dilu el kmo, “ng meskid a dmolech el ultiled er a Dios, el cherrungel a klemedengei er ngii!”21 Uldimukl er a ikel meringel el taem, e a klaumerang er a Rubak el Jesus Kristo a mesisiich el delalm. Ngosukid lochib osenged er a ikel mengesang er kid el tekoi. Ng smisichid me kede melemolem el ngara rolel a telbiil. A klaumerang a ngoikid loibekii a sebekreng e rullid el mo chemau a ngar medad el mesisiich a udlesued me a rengud. Ng rullid el mo olengit a ngesou me a selbechakl sel doluluuch el mo er a Chedam el ngara ngklel a Ngelekel. E a nglunguchem alsekum eng kora diak el monger, e a klaumera er kau er a Jesus Kristo bo lengara klloulereng, ngariou el reng, me a techall el sebechem el kmo “Sel soam bol mekedmokl.”22
A President Russell M. Nelson a mla olisechakl:
“Ng diak debechei a dekted me lutechei a klaumera er kid. Ng sebeched el choroid aika el dakt sel dolisiich a klaumera er kid.
“Momuchel er a rengelekiu. … Bo lolchesuar a klaumera er kemiu, luldimukl a taem er a ongarm a lemei er kemiu. A klaumera er kemiu bo lultuil er a oubeltikereng el Chedam er a Babeluades me a Ngelekel, er a Rubak el Jesus Kristo. … Molisechakl er a bek el sechal me a redil ngalek el kmo te ngelekel a Dios, lulbeob el uai Ngii, loba chedaol moktek me a techall. A dersta er kid a mechell el ngarngii ongarm el kirel me a klaumerang el kirel meleketek er ngii.”23
Ak dirk ulerrenges er a reteru el eua rekrir el ngalek el kauchais a klaumera er tir ra Jesus Kristo er a longer er a ker el kmo “Ng mekera Jesus Kristo a lolngeseu er kau?” A kot el ngalek a dilu el kmo, “Ak medengei el uase a Jesus a betik a rengul er ngak le Ngii a mlad el kirek. Ngii a dirrek el soal a re mla mo meklou.” A ongeru el ngalek a dilung, “Ngii a ngosukak sel mekngit a renguk. Ngii a dirrek el ngosukak sel dikea el sebechek.”
A Jesus a millekoi el kmo, “Ng uaisei, tirkel mo ouchel a rengrir e mei er ngak el uaia kekerei el ngalek, a mo soiseb, er a rengedel a Dios.”24
“Beltkil a rengul a Dios a uchul, e nguldureklii a di tal Ngelekel, me tirke el rokui el mo oumerang er ngii a diak bol riid e bai mo nguu a diak a ulebengelel klengar.”25
Ng dirk mle, yaksok a President Nelson “el kmo a dekekeringii a dakt e dechoisisii a klaumerang a duubech” sel sekum e kid “omuchel el beches el meral lorrenges, e omtab, e oltirakl a tekingel Osobel.”26
Rodos me a rodam, aikel ringel el dechelebangel er chelechang a diak el ngii a ulebengelel, omerolled. Kid a rechedal a Ikelesia er a Jesus Kirsto er a Uriul-klebesei el Santo, a mla nguu a ngklel a Jesus Kristo lokiu a telbiil. Kede oba klaumerang er sel Klisichel lolsobel er kid me a urunguled er a ikel mekreos el yaksok er Ngii. Ng betok a ungil luchul e kede ngara deureng, le Rubak e Osobeled a kmal ungil medengei a sebekreng, ringel, me a kngtil a rengud. Ng di uaia Jesus lulbengterir a rechedal er a ngaramong, me Ngii me ngobengked! Ak kuchias el kmo Ngii a mla odersii a klengar Ngii luchul e kau me a ngak a diak bo deriid. Bo doumerang er Ngii, doltirakl a Llechul, e ultuil er a klaumerang e Derengesii el kmo, “Bom, chelellakl.”27 El ngara chedaol ngklel a Jesus Kristo, amen.