Ulterekokl el mo er a Rubak
Momuchel ra omerolem el mo “ulterkokl el mora Rubak” me a Reng er ngii bol klou el obengkem.
Ungil tutau, e rodam me a rodos. Sel kmesiungel a Osobled, el Jesus Kristo, e ngak a mad el tmuil el mo dmak lomes er tial ongdibel el meliuekl er a beluulechad.
Tia el rak a kora kmal mle ngeldengodech. A denguu er ngak eng ngulemuchel er sel urerek el bilskak a First Presidency el mo olterekokl er a chedaol templo er a Rubak el ngara Durban, South Africa. Ng meral diak kubes er tial klebekelel tial blai. Engdi, ngak a kmal diak bo kubes er sel omengull er tirkal rechad el kmal mle ungil keldmokl el mo soiseb er tial chedaol blai. Te mlei el keldmokl el mo melai er sel tara ngarbab el klengeltengat er a Oluut; el lolterkokl er a blil a Rubak. Te mlei el mui a rengrir er a beltik el reng el mo er Ngii me a Tngakireng er Ngii. Te mlei el mui er a omereng el saul el mo er a Demad er a Babeluades lomesterir a chedaol ruoll el mo ngoititerir el mo suobel. Te mlei el klikiid.
A templo, el diak el iior a le ngar ker, a ngarbab er a omerellel a beluulechad. A bek el templo er a Uriul-klebesei el Santo el ngara beluulechad—el ngii rokui el 168—a dechor el olechotel a klaumera er kid er a diak a ulebengelel klengar me a deureng el mo obengterir a telungalek er kid me a Demad er a Babeluades. A mora templo a kilungii a klemedengei er kid el kirel a Kle Dios me a diak a ulebengelel ebangkelio, e blak a rengud el mo kiei e olsisechakl a klemerang, e soad el mo oltirakl a okesiul a Rubak me a Osobeled el Jesus Kristo.
A ikrel a bek el templo er a Ikelesia a llechukl tial tekoi, “Cheledaol el mo er a Rubak.” A templo a blil a Rubak e basio er a selbechakl er a beluulechad. A Chedaol Reng er Ngii a mo er tirkel el tir a meluluuch er a chelsel a ikal chedaol el blai. Ng remuul a telkelel e kid a mosoiseb el okiak er Ngii.
A demal a bechik, el Blaine Twitchell, el tara kot el ungil chad el kudengelii, a ulsisecheklakl er a kot el ungil el olisechakl. A Sister Rasband me a ngak e mlo oldingel er ngii sera bochul merek a temel el ngar tia el beluulechad. Se ra kim siseb er a delmerab er ngii, e a bisop er ngii a merolang. Sera ki mongedecheduch er a bisop, e ak kulemdasu el kmo, “Ng kmal ungil bisop . Ng mle er tiang el mesiou er a kedung el chad er a ward er ngii.”
Ak millekoi el mora Blaine, “Tia kora kmal lungil el bisop a mle oldingel.”
A Blaine a ulmes er ngak e ulnger, “Ng mla er ngii a bebil el uchul. Ak ulengit er a bisop el mei eleng mle soak el mo mengedecheduch er ngii el kirel a babilngek er a mo er a templo. Ng soak el mo merael e ulterekokl el mo er a Rubak.” Meng rirelii!
Tial tekoi el, “ulterekokl el mo er a Rubak,” a di kulemolem el omdasu el kirel. Ng mla ochotii a beches el ues sel longedecheduch er er kid a re Merredel er a Ikelesia. Eleng kmal klou a ultutelel a babier el mo er a templo me sera uchelel a Ikelesia, el mo er a 1891, ea bek el babier er a mo er a templo a le saing er ngii a President er a Ikelesia. 1
Ma le bora rengeasek me a remeklou el chad, ea omengedecheduch el kirel a babier er a mo er a templo a diak el kirel a tekloi el doruul me a diak. A babier er a mo er a templo a diak el blechebechel a tekoi el doruul, ngolsiseb er kid ra basio, malechub eng babier el mo er a tokubets el kingall. Ng ngarngii a kmal ngarbab e chedaol belkul. Sel uchul eng mo sebechem el nguu a babier er a mo er a templo, eng kiriu el kiei el ngara budech el olab a osisecheklel a Ikelesia er a Jesus Kristo er a Uriul-klebesei el Santo.
Sel bo er a berrotel el cheldecheduch eng ngarngii a techellem el omes er a klengar er kau el kirel a klaumerang er kau er a Jesus Kristo me a Tngakireng er Ngii. Ngarngii a techelliu el mo ochotii a klaumerang er kemiu er a mla moluut el ebangkelio, e somiu el oldubech er tirkel mla mokedong er a Rubak el mo mengetakl er a Iklesia er Ngii, klaumerang er kemiu er a osisecheklel a ebangkelio, mui el ngercheliu el kirel a telungalek, e meruul a klemerang, klikiid er a tekoi er a delboes, mui loumerang, keldung, oltirakl a Llach er a Ulkerreuil a Bedenged, llach er a ongeltacher, me a chedolii a Chedaol Sils. Aikang a meklou a ultutelel el osisechakl er a klengar el kirel a Jesus Kristo me a Urerel.
A babilengiu er a mo er a templo a olechotel a dmolech, el chedaol moktek el kmo kemiu a blak a rengmiu el kiei el oltirakl a llechul a Rubak e betik a rengmiu er a ikel betik a Rengul er ngii: ngariou el reng, medemedemek el reng, mesisiich, bliochel el beltik el reng, blakelreng, klechubechub, klausubes, me a olngesenges. E kemiu a kongei a ikal omeruul sel omsaing a ngkliu er tial chedaol babier.
A babilengiu er a mo er a templo a mekengii a chesmerel a babeluades el mo er kau me a rebebil el olab a klisiich me a chedaol ruoll el klou a ultutelel el uldimukl er a techolbechelid, omlisiich, chelbechiil me a omerenged.
Sel mo “ulterekokl el mo er a Rubak” a mo omeklatk er a ikel kired el meruul sel de urekodel ra telbiil el Uriul-klebesei el Santo. A demal a bechik, er a Blaine, a milsang el klou a belkul a omngedmeklel el mo er sel sils sel ngii a mo dechor er a medal a Rubak.
Ka molatk sera Moses lolemiakl er sel Rois er a Horeb ea Rubak el Jehovah a mlo chemolt el mo er ngii er a ultaut ra ngau el kerrekar. A Dios a dilu er ngii, “Mngubet a orcherem, e le kau a dechor er a chedaol el chutem.” 2
Sel dengubet a orchered er a medal a tungelel a templo a uai a dengubet a soal a beluulechad malechub eng omeruul el ngii a melibesongel er kid er a chedaol ulkuruled, olcheuekl a ikakid el omeruul el ngii a olibesongel er a klengar er kid, e mo ngoriakl a mekngit el blekeradel, e osiik er a taem el mo chedaol.
Ngokiu sel chedaol teletael, e a bedenged er a tech a bilebii a Dios, el templo er a delbengem, meng kirem el mengedmokl er ngii loba omengull. Ng kmal klemerang a ikel tekoi el ngarsel cheliteklir a rengalek er a Primary, “A bedengek a templo meng ousbech a ungil omengedmokl.” 3 Se er a Rubak er a blo el duum el mo er a re Nephites, e Ngii a milellach, “Me bo mechedaol er a ngeiul Chedaol Reng, me bol sebechem el dechor el klikiid er medak.” 4 “Me a leuaisei eng ngera el teletelel a chad a kiriu el mo uaingii?” nguleker a Rubak e mocha onger, “Komdi mo uaingak.” 5 Sel mo “ulterekokl el mo er a Rubak,” e kede melasm el mo uai Ngii.
Ak dobedebekii se er ak rengesii a President Howard W. Hunter el milngedecheduch sera lebo el ongeteruich me a euang el President er a Ikelesia. Ng dilung: “Ng kmal ngarngii ra renguk el soak a rebek el chedal a Ikelesia el klikiid el mo soiseb er a templo. Ng mo ungil a rengul a Rubak alsekum a bek el meklou el chad el chedal a ikelesia a mo klikiid—e obang—a babier er a mo er templo el ulsbechall er a chelechal taem.” 7 Ak dochelir el kmo a kedeb-el ulsbechellel el babier a mo meketeklii a rael el mo er a remekreos el rengeasek.
A President Russell M. Nelson a lilatk a tekingel a President Hunter, “Sel sils, er a June 6, 1994, e sel babier er a mo er a templo el kid a olab a mlo ngodech el klalou el ngara chelsel a idbengek. A uchei er tiang, eng di mle chimong a moktek er ngii. A moktek er ngii a uchul eng mo sebechek el mo soiseb er a chedaol el blil a Rubak; engdi a uriul er tial subed, e tiang a mlo ulebongel er ngii. Ng mlo braider er ngak er a oltirakl er a profet er a Dios.” 8
Alsekum eng dirkak kom nguu a babier er a mo er a templo malechub alsekum mla imiit er a temel, e bo blechobech er a chesmerel a bisop el di uai tirkel re Santo er a uchei mle blechobech er a medal a chesimer er a Nauvoo Templo sera 1845 el mo 1846. 9 A ruchelek a ulbengterir tirkal mui er a klaumerang. Te chiloit a klebokel el belurir e milrael mo bedul a ngebard, engdi te mle medengei el kmo ngarngii a chedaol teletael el mengiil er tir el ngara templo. A Sara Rich a millusech er sel ngarsel rael el ngara Iowa, “Alsekum meng dimlak a klaumerang me a klemedengei el mlei er kemam er a chelsel sel templo … , e tial omerollam a bai locha mo uai … nguu a bakes el soiseb er a chelsel a ilekolk.” 10 Tiakid sel dibus er kid sel sekum e kid a mo soiseb er a klengar el di kid el tang e diak a mellomes el uldasu malechub eng budech el blel yaksok er a chelsel a templo.
Momuchel er tial teletael er chelechang me bom “ulterekokl el mo er a Rubak” me a Chedaol Reng er Ngii a mo obengkemiu e a Teletelel a mo meskemiu a “budech er a uldesuiu.” 11
A remerredel er a rengeasek, merredel er a elders quorum, merredel er a Relief Society, me a remesiou el rodam me a rodos a mo ngosukau, ea bisop malechub eng branch president a mo omekrael er kau.
Kede mla chemau a taem el templo a milchesimer malechub eng di mla er ngii a kedeb el taem el ulsbechall. A President Nelson me a kemam el mesiou el obengkel, e sel ulekrael el mo mengesimer a templo a mle “meringel” e mle “bekikl el kirel.” A President Nelson a uleker, “Ngak ak dmu el mo ngerang el mo er a Profet Joseph Smith? Ngak ak dmu el mo ngerang el mo er a Brigham Young, Wilford Woodruff, me a rebebil er a remerredel, el mo lmuut el mo er a President Thomas S. Monson?” 12
Chelchang, e kede mekekokid e mereng a saul el lmuut el melai a chesmerel a templo el kirel a omerenged me a omelisiich el telekael a temel.
Sel omklikiid el mo er a templo, a bai, dirrekak el meterob. Ng soak el mo ungil smodii, meng locha sebechemiu el mo er a templo malechub eng diak, e kemiu a ousbech er a babier er a mo er a templo er chelechal taem me bo delalm er sel rael er a telbiil.
Tia el mlo merek el rak ea Sister Rasband me a ngak a uluureor el mo er a New Zealand el mo mengedecheduch el mo er a remesobil el mekekerei el chad. Ng dimlak el beot er tir a mo er a templo; e le sel ngara Hamiliton a lulmekbeches er ngii, e tir a dirk mengiil er sel uchelel aureor er a templo el ngara Auckland. Engdi, ak mlo melcheusar er a odubech el mo omekduch a rengrir el mo omekbeches malechub el bo le nguu a babier er a mo er a templo.
Meng locha diak el sebechir el llocholt er a templo, te bai mo olecholt er tir el mo er a Rubak el klikiid e keldmokl el mo mesiou er Ngii. Sel omklikiid el obang a babier er a templo er a chelechal taem a mo selbechakl er a cherarou, e le kom mesisiich el kongei el mo er a Rubak el kirel a klengar er kemiu, me a yaksok el kmo Chedaol Reng a mo obengkemiu.
Kede meruul a ureor er a templo sel dosiik er a rucheled e debesterir a ngklir me bo le ngaii a chedaol ruoll. Ma ikal templo er kid a chelsimer, e kid a dirk sebeched el osiik er a retelungalek er kid. Me kede obang a Chedaol Reng er a Dios el ngara rengud, e kid, a mo omtechei, er tir me bol “ulterekokl el mo er a Rubak.”
Sera kuureor el Executive Director er a Temple Department, e ak mle blechoel rongesii a President Gordon B. Hinckley el melekoi er tial chedaol llechukl el mildung er a Rubak el kirel a Templo er a Nauvoo: Bechei a urerel a templo er ngak, me a rokui el ureor el Ngak a mla tmutk el mo er kau, me lolemolem e lak el meterob; e a keldung er kau, dechal a rengum, me a kllou el reng, me a urerem bo luut el obdois , e kau a mo diak moridii a ngkedem, a Rubak a dilung. 13
A urered er a templo a llechotel el mo er a diak a ulebengelel el ngkeded. Ke de dirk mlo er a skeng. A Rubak a mla omekedong er kid el mo oureor er a templo el obang a … “blakelreng, … duchelreng, me a kllou el reng.” 13 Sel “ulterekokl el mo er a Rubak” a kirel ngarngii a ikaikid el teletael. Ng kired el mo kedung el kiei el oltirakl a llechul a Dios, duchereng er kid le bo er a telbiled er a templo, e mereng a saul el kirel a ikel Rubak a melemolem el olsisechakl el kirel, e bol klou a rengum sel dongiil a ikal templo sel luut el lobok a chesmerir el mo uai a uchei.
Sel rubak a omekedong er kid el mo “lmuut el omdois” a klisiched, e Ngii a bai olengit er kid el mo lmuut el mo mesisiich el ngara llemalt. El uai tia el okesiu, kede menglou a omesubed er a chedaol llechukl, e osiik a reksi er a telungalek er kid, me a nglunguuched er a klaumerang me bo douchais a beltkil a rengud el mo er a blil a Rubak el obengterir tirkel mengedmokl er tir el mo melai er a babier er a mo er a templo, el tokuni tirkel rechedal a telungalek er kid.
Ak yaksok er kemiu el ngak el Apostol er a Rubak el Jesus Kristo a kmo sel molasm el mo omdois a mellemalt el klisichem, e ke mo melchesuar er a omekbeches el beltkil a rengum el mo er a Dios el Chedam me a Jesus Kristo, e mo omelchesuar er a Chedaol Reng el omekrael er kau, e mo mereng a saul el kirel a chedaol telbilem, e mo omelchesuar er a budech el medengei el kmo kau a mla mo “ulterekokl el mo er a Rubak.” El ngara a ngklel a Jesus Kristo, bol uaisei.