Mo uai Ngii
Ng di okiu a chedaol ngesuil a Osobel e ng sebeched el melemolem el mo uai Ngii.
Lmuut er a rekerekikl el oltirakl er a klengar me a osisecheklel a Jesus, a omellach er a Osobel el mo “di uai ngak” 1 a kmal meringel e kora diak el sebeched el kutmeklii. Ke lecha uai ngak—el kmal medengelii a klitchetum me a telemelem, me a ke lecha omdasu el kmo ng bai beiot el morael er a rael el diak a olngasech e kekerei a ulekeroull. “Ng uaisei, tia el olisechakl a kora diak el klemerang e di uldasu,” sel dolngit aikel beot el rael el diak a olibesongelel, kede okngemed a mekesai el calories er a dousbech el mengodech.
Ng di mekera alsukem a bode “uai [Ngii]” a diak el di uldasu, er a tia el klechad er kid? Mekera alsekum, al kora, sebeched el kutmeklii er a tia el klengar, e le uaisei, el tara kired el kutmedklii el sebeched el luut el mo obengkel? Mekera alsekum a “di uai Ngak” a tia el meral tekoi el losaod er ngii a Osobel? E mekerang? Uangerang el blakelreng a de kongei er a ngii mo siotai a meang el Klisichel el mo er a klengar er a kid meng sebeched el mengodech a klechad er a kid?
Elder Neal A. Maxwell a ulsisechkl: “Sel domdasu er tia el llechul a Jesus el mo uai Ngii, kede mesa klechad el de ngara ngii er a chelchang el diak el mekngit, e bai, mesa kid el kekerei a rengud e diak ede smiich a rengud el oltirakl er a tia el Urellel—el dirrekl el urelled! Kede chemat e ng di diak e dosuub er a Ngii A kekerei el chad el olisechakl, Charles M. Sheldon, a dilu a diosisiu el uase: “A kristiano a kuk kmal sorir a beiot e ngara ungil teletael meng daik ede nguu a ngidi el oberaud el uai a kerus.”
E merang, a rokui a ngara cheungel a llach el mo uai Ngii, di ua Jesus Kristo El mlo ua Demad. Sel dolmolem, kede mengai el mo cherrungel, ketmokl, e omekord. Aikal olsisechakl a dimlak el mei er a di imo el ikelesia e bai mle melmalt el mei er a Ngii el Masatang. Tia a teletael a klengar a kirel okiu ngii, meltelatk a cheldecheduch, e melisiich a deleuill. E merang, ng diak a ngodech el rolel a omekungil a telemall el deleuill me a telemelel a beluu di ta el rolel a bo dosuub er a Rubak er a Budech.
Me dolakt el kmo ng uangerang a bo domuchel er a bekudasu, bellemakl, e mo ngara ngii er a rengud el mo uai Ngii e dolai aikel blekerdelel a Jesus Kristo.
mengedechuul e tibetbii
Kesai el rak el mla me mong, Ngak me a bechik a mle dechor er a rael el olngasech er a kot el ngar rebab el rois er a Siabal, Mount Fuji. Aki olngesech e omes el bedul bab er a bebul a rois el kmal cheroid e omdasu el kmo tiang sebeched el mor ngii.
Sel ki milemolem, saik, ringelel a bedengam, me a berredel a melidiul a mlei er keman. Er a tekoi er a udasu, ng meral mlo klou a ututelel er kid el omdasu er a blekekled el mei. Aki dilu el kmo, “Ng lecha diak el sebechek el mora chetebtel, ng di ng sebechek el nguu tia el blekeklek el mei er a chelchang.” Tia el meral mle meringel el tekoi a milkokii el mo beiot—melemolem el omakes.
A kot el bakes er a tai el rael to mo ua Jesus Kristo a mo oba kmal soal a reng er a ngii. A klemedengei er a tia el llach el mo uai ngii a ungil, ng di tia el klemedengei a kirel uldak el obengkel a soal a reng el mengodech, mekekokid el melemolem, el mo lmuut er a di klechad. Mo ngarngii a soal a reng, ng kired el mo medengelii a Jesus Kristo. Kired el mo medengelii a blekerdelel, e kired el osiik a blekerdelel er a chelsel a chedaol el llechukl, omengull, me a bebil er a chedaol basio. Sel bodo ungil medengelii, kede mesa blekerdelel er a rebebil er a kid. Tiang a mo melisiich er a kid er a omeroled, a le sebechel kutmoklii a rebebil a le di telkib a Blekerdelel, kid meng dirrekl el sebeched.
Alsekum kede meruul a llemalt er a klengar er a kid, a Llomes er a Kristo el obengked a mo ouchais el kmo ngara ngii a delongelel a de ngara ngii me a blekerdelel a Osobel. A llemalt el tekoi a meral dousbech alsekum kede melemolem el mo uai Ngii. E merang, meruul a llemalt a tara blekerdelel.
Chelechang, tirkei el meklou a rengrir a sebechrir el oker er a moumerang er a ngii el chedam, bechim, sechelim, malechub ng chedaol chad el oungerachel el kmo ngarang el blekerdelel a Jesus Kristo a dousebech—e ng lecha kired el mo keltmokl el rongesii a le bol dung. Bebil er a taem kede omes er a dirk el mengodech er a mo chemolt el bedenged el mengaibibeob malechub e ng mengetngaid er a ngii el mo ngodech er a meral bedengem.
A re doumerang er a ngii el sechelid me a rechad er a blid a sebecherir olngesu el ungil omes er a kid, ng di tir dirrekl, el lokiu a beltikelreng e sorir olngesu, a sebecherir el mo cheleuid el omes. Sei a uchul, ng kmal klou a ututelel a bo doker er a Chedam er a Babeluades er a ikel dousbech me a ikel tekoi el bo de blak a rengud er a ngii. Ng sebechel mesa rokui e okiu a beltikelreng ng mocholt a klitchetud. Ke locha subii el kmo ng kirem el momesuub el kmo kousbech a klou el kllourreng, medemedemek, bliochel el beltik el reng, beltik el reng, oureng, blakelreng, a lechub olengesenges, a bebil er a dedung. 12
Direkak el bol meketeked el taem, mlara ngii a kekerei el ringel el dilub er a renguk sel milchellach er a ngak el okiu a beltikelreng a ta er a roungerachel er a ikelesia el kmo ak usbech a telkib el urior er a ta er a blekeradel. Ng ulkiu a beltikelreng e mle llemalt. Seikid el kebsengei, ak uluchais a teletael el dilubech el mora bechik. Ng mle chubchub e ulecholt a beltikelreng el melecheech a tekingel. A Chedaol Reng a mle olterekokl el mora ngak el kmo a omellach er tir a mlara Chedam er a Babeluades.
Ng lecha dirrek el olngeseu al om mongiloil omeruul er a bliongel 6 er a Preach My Gospel. 13
Sel om blam rulii a llemalt e uldasu e otereklii el kmo ke mo olngasech er a rois, ng mo kirem el ouchel. President Russell M. Nelson a ulsisechakl el okiu a beltikelreng: “Sel dongilt el mo ouchel, kede mengilt el mengodech! Kede kongei er a Osobel el mo ngodechid el mo er sel kmal ungil kid. Kede melilt el mo mukeroul er a chedaol tekoi e mo nguu a deureng— sel deureng er a mo suobel lokiu Ngii. Sel dolilt el mo ouchel a rengud, e kid a melilt el mo uaia Jesus Kristo.” 14
A debo ua Jesus Kristo ng kirel mengodech a rengud me a uldasu, e klemerang, a blekerdeled, e di sebechel el okiu a olsobel krasia er a Jesus kristo. 15
Dongchii e Kutmeklii
Chelechal bla molilt el mengodech e ouchel e olngit a ulekrael er a nglunguuch, llemalt el uldasu, me a lecha olngit a mellach er a rebebil, ng kirem el ngiltii a blekeradel el bom ungil omdalem. Ng mo kirem el tibetbii el mo meruul er a ngii er a blakelreng. Aika el blekeradel a diak el beiot e mereched el mei, e bai mo okiu a krasia er a Ngii el mekekokii el mei sel om melemolem.
A blekerdelel a Kristo a sengk er Chedam er a Babeluades el mor kid el mengeltengat er kid me a rebebil er a kid. Uaisei, a blakelreng el mo ngmai aikal blekeradel a kired el kmal olengit er a ngariou el reng a chedaol Ngesuel. Alsekum kede osiik aikal sengk el mo ungil olngeseu er a rebebil er a kid, Ngii a mo omekngeltengat a doruul er ngii. Bekekreos el choltoil er a sengk er a Dios a mo ngmai a tord me a kelsibelreng.
Sel de tmaut el omdasu er a di imo er a blekeradel el dosbech, sel molemolem er a melai er a ngii el blekeradel, aikel bebil er a blekeradel a ekor er a kau. Ng sebechel a chad el blak a rengul omdasu er a bliochel el beltik el reng e diak el bol klou a beltik el reng me a ngariou el reng? Ng sebechel a chad el blak a rengul omdasu er a olengesenges el diak el bol klou a blakelreng me a klaumerang? Aikal klou a belkul el moruul er a ngii el mo nguu a tara blekeradel a dolech el olngasech a rokui el chert er a taoch.
Meluches e Oldubech
Ng klou a ututelel mora ngak sel ak kulasm el mo uai Ngii el bo kuluches aikel dubech me a ikel kusuub. Sel kusuub a imo er a Blekerdelel el loba rokir el uldesuek, a chedaol el llechukl a mo beches a belkul sel akisa olchotel er a tia el blekeradel er a Osisecheklel, Urerel, me a re oltirakl er a Ngii. Ak mo meduch el omes e dongchii tia el blekeradel er a rebebil. Ak mla mes a kot el ungil chad er a chelsel a ikelesia me a re diak el ngara ikelesia el oba aikal blekeradel e mesuub er a Ngii. Te mesisiich el okesiu el uangerang el bol cholt aikal blekeradel er a di rechad el okiu a beltikelreng el krasia er a Ngii.
Mo omes a ungil tuobed, kirem el osbech a meral blakelreng. Di ua olngasech er a rois el kired el keldmokl e meses e oba duchelreng, me tia el omerael a dirrek el ousbech a blakelreng me a omelenget. A klemerang el keristiano, el dolasm el mo uai a Mastang er a kid, a blechoil osbech a blakelreng er a kid.
Chela ta er a tekoi el mellach. A llach el kmo bode uai Ngii a diak el ngara ngii mo meruul er a kau el mo ngara ngii a klengitelreng, diak om klikiid, malchub e ng diak a beltikelreng el mora kau. A rokui el klechad er a kid a kired el melemolem, melasm, rebet, e mo ngeltengat. Ng meral mle somam ngak me a bechik el bart a medemam e keberul mo duum er a bebul a rois, ng di a klengar a diak el uaisei.
Ke mui er a ungil, ngara ngii a betik a rengrir er a kau, ng di ng diak el belkul el kmo ke mla mo merek. Ngara ngii a urior er a tia el klengar me a klengar el mei. Ng di okiu a chedaol ngesuel e sebeched el melemolem el mo uai Ngii.
Er a kaikid el taem “a rokui [chemolt] el nglemuu; me a … dakt [a kora] ngara rechad el rokui,” 17 a di chimo el kerul, a di chimo el rolel, a bo dolasm el mo uai a Osobel, 18 a Osobel 19 a rechad el rokui, Llomes er a Beluulechad, 20 e osiik Ngkei el dilu, “Ngak a rael.” 21
Ak medengei el kmo a de bo uai Ngii el lokiu a chedaol ngesuel me a klisichelasebeched el kutmeklii al dolemolem. A lak, ng diak el meskid tia el llach. 22 Ak medengelii tiang—e le ak mesa blekerdelel er a betok er kemiu. Aika el klemerang a Kulekoi loba ngklel a Jesus Kristo, amen.