Mengiil er a Rubak

Betik er a renguk el rodam me a rodos er ngak, aki semeriar el mengiil—er ngike el ngaruchei er ngak—el mo rongesii a ulebongel el cheldechedechal a betik er a rengud el profet el,President Russell M. Nelson. Tiai a kmal ungil klou el ongdibel, ng di ng ongerul bal longesang er kid a COVID-19 er a omorolled. Kede kmal mla mo mesaol er a sechr, ng mo soad el oltamt a cheiud. E sola, a rebebil er a chedak a mla okiu sel rael. Bom modengei el kmo aki blechoil meluluuch el kirel tirkei el mlo medengelii tia el ringel, me a tirkei el chedad el mlo smechr. A bek el chad a medengei el kmo ng kmal mla mo klou taem, ng kuk mla mo limis.

Me kede mengiil el mo oingerang e ngmai a ngesou er a ikal kerior el mla subechii er kid? Kede mekerang a doutekangel el ngara ringel e dongiil el mengiil a ngesou el uaia le sal kmal meoud el mei? Ngera meng meoud a ngesou e a berraod a kmal merngela er kid?

Sel doker aika el ker, eng sebeched, alsekum e kede melasm, lorrenges er a ngerel a chimong, el seluk er a chelsel a kelebus el milkolk e mekelekolk.

“Kau el Dios, ke ngara ker?” a tekoi el derenges er a Liberty Jail. “E ngara ker orars lomart er sel mngarngii? Ngua ngera klemanget el cheroid a chimam?”¹ Ngua ngera klemengetel, e Rubak, ngua ngera klemanget?

Me kid, a diak dekot a lechub e duriul chad loker aika el ker sel dubech a klengitelreng a lechub a ringel er a rengud me almuut el bebil. Ng diak bo kusaod a rakt me a kelebus, ak mo mengedecheduch el kiriu, me a telungalek er kemiu, me a retonari er kemiu el tir a ngara chelsel a betok el ringel. Ak mengedecheduch el kirel a urungulir a rebetok el tir oureng el mo bechiil a lechub e te bechiil eng di toureng me a deleuill er a chebechiielir bol telkib lungil. Ak mengedecheduch el kirir tirkel uaia lechitirir a teletelel a bedengir el secher a uchul—el locha diak el mukar—a lechub eng meketeket el secher el locha diak el mukar. Ak mengedecheduch el kirel a meketeketa el ringel er a uldasou me a reng el kmal oberaod er a rebetok el chad el tir a ngara ringel el kirel, me tirkel tir a betik a rengrir tir e dirrek el ngara ringel lobengterir. Ak mengedecheduch el kirir a remechebuul, el Osobel a dilu er kid me lak dobes er tir, e dirrek el mengedecheduch er kemiu a rolsingch er a luut er a ngelekiu, el diak el iior er a rekrir, eng di te kuk mla ngiltii a ngodech el rael er sel rael el kemiu a mle meluluuch me bol sebechir el mo er ngii.

Osisiu, e a kuchais el kmo aika el kmal betok el tekoi el dengara ringel el kirel a diak bo losaod aikel kuk tekoi er a beluu, ng balatiks, a lechub eng mondai er a rechad er a beluu el rokir. A Demad er a Babeluades a mengerchir kid el mo smaod aika el mondai er a beluu me a ikel kuk di mondai er kid, eng di ng morngii a taem er a klengar kid e a ikel desal meringel loureor kirel tekoi, e meluluuch el kirel a diak bol beskid sel ngii a soad el nger dolsingch el kirel, a tekoi el kirel a beluulechad el rokir a lechub eng kuk di mondai er a dersta el chad. A leuaisei e sel dongedechuul e dedak el mengiil a nger er a nglunguched, e a kuchais er a kemiu a yaksok er ngak el apostol el k mo ng morenges e monger, eng ng locha diak el sel soad el taem a lechub el sel soad el nger. Eng di ng blechoel monger er sel taem me a teletael el ngike le mellomes e oba diak a ulebengelel chubechub el chedam a mo onger. Rodam me a rodos er ngak, bo modengei el kmo ngike el Ngii a diak bol mechiuaiu a lechub e bol mesaik² a omekerreu er a deureng me sel ulebongel losebelir a Rengelekel el ngaruchei er a rokui el tekoi el chedaol chad a meruul. Ngii oba klikiid el beltikereng, e chetengakl el chad, e Chubechub el Chedam a Ngklel.

“Alsekum e tiaikid a teletael,” e kom locha kmo, “me a beltikereng me a chubechub er Ngii ng diak el bingii a Bekerkard el Daob me bol sebeched el merael ngoriakl er a ikal ringel lungil a rengud? Ng diak lodurokl a ngesou er a kmo ng ker el mei el ngmai aika el rokui el ringel el dechelebangel e rchelechal taem?”

A nger er a ikal ker a “Choi, a Dios a sebechel remuul ongasireng el tekoi, eng kired el mo medengei el kmo a temel a rokui el ttekoi er tial klengar er a chutem a Ngii omtebechel e di Ngii a mengedereder. Ngii a mla kudmekelii a temel a rokui el tekoi el mo er a dersta me a dertsa er kid. Le bek el chad el mo ungil e ngilai a ngesou er a longiil el mo soiseb er a Pool er a Bethesda,³ e a kuk tara chad a mla er a desert e mengiil lokeua el rak el mo soiseb er a beluu er a telbiil.⁴ A bek el mo uaia Nephi me a Lehi el mlucheliu er a meringel el ngau el kirel a klaumera er tir,⁵ eng kuk ngarngii a Abinadi el milseseb el kirel a klaumera er ngii.⁶ E se dolbedebek er a osisiu el Elijah el di mle mereched lotengelii a ngau er a babeluades el mo sioning er tirkel badrei er a Baal⁷ a osisiu el Elijah el mlo e ra ringel er a kemanget el taem el dimlak a chull, e dirrek, el mle kemanget el taem, el di longa kall lolab a subebek el charm el me omsang.⁸ A kumdasou er ngii, eng diak el sebeched el kmo ng locha “ungil kall” aika lulengang.

A belkul? Ng belkul a kmo a klaumerang a mo ultuil er a Dios e ra ikel ungil me a mekngit el taem, luldimukl a dengara chelsel a ringgel el mol muut er sel desa Chimal lomekrael er kid.⁹ Tia sebechel meringel el tekoi er chelechal taem el betok el chad a mla mo oumerang el kmo a klungiaol er a klengar a sel diak a ringgel el desiseb er ngii, e diak a chad el kirel mo ngara ringel er a kmo ngerang.¹⁰ Eng di tial klaumerang a diak el kirel rullid “el mo melbodeb er a cherrengelel me a teletelel a Kristo.”¹¹

Kuchais er a tekoi ledilii a Elder Neal A. Maxwell, e ak dirrek el melekoi el kmo “a klengar er a chad … a diak el sebechel mui er a klaumerang e diak lak bo loberaod er a uldasou.” Ng diak el sebechel tekoi “el di dorael er tial klengar,” el meruul aikel soad e de du el kmo: “Rubak, beskak aikel kot lungil klengeltengat er kau, eng di ng kma diak mo meskak a klengitelreng, ongarm, ringel, a lechub e lultok. A kulengit me lak a chad el mo chetil ngak a lechub e louketui er ngak, e sel ngaruchei, e lak bechikak me bo kumelchesiu el cheroid er Kau a lechub e tirkel betik er a renguk. E a mera er ngii, e Rubak, e mletkak er a ikel rouik el ngii a uchul e Kau a chedaol. E sel bol meiusech a klengar er a rebebil, e mngikak leko kiei Lobengkem, el sebechek el ansing er ngak el kmo aki diosisiu le ak mle ungil a renguk el kiliei er a ungil klengar er a Klekeristiano.”¹²

Rodam me a rodos er ngak, a Klekeristiano a ungil klengar, eng di diak el blechoel di ungil. A rael el mo er a chedaol me a deureng er chelechang me a uriul klengar a kemanget e a lebebil eng metetuchakl. Kede ousbech er a klou el taem me a blakereng el merael er ngii. Eng di, ng uaisei, el klungiolel ruriul a chachisois. Tial klemerang a bleketakl e mesisiich le mosisechakl er a chelsel a 32nd bliongel er a Alma er a Babier er a Mormon. Tiaikid e ngika el ngarbab el prist olisechakl el kmo alsekum a tekingel a Dios a medalm er a rengud el kekerei el tane, e alsekum e kede omekerreu el melubs er ngii, mengeroid a chudel er ngii, e omekeroul, e mengedmokl er ngii, eng merael el mo klou el meskid a rodech “el kmal mekreos el rodech, … el merekos er a rokui el rodech,” el bo donga er ngii eng diak luut elmo meched a rengud a lechub e deluut el mo songerenger.¹³

Betok el suobel a mosisechakl er tial bades, eng di sel klou a ultutelel er ngii el rokui a sel kmo tial tane a kirel domekeroul er ngii e mengiil er ngii el mo klou, “lolsingch er ngii sel bo lourodech lultuil er a klaumerang er kid.”¹⁴ A omeridm er kid, ng melekoi a Alma, a mei “ruriul el taem.”¹⁵ Ng mlo mengesimer er a tekingel el mle edei el taem lomelekl aikakid el tekoi blakereng me a kllouelreng lomekeroul er a tekingel a Dios er a rengud,“e mengiil loba kemanget lomengiil,” ngii a melekoi, “er a dellomel el mo meskid a rodech.”¹⁶

A COVID me a kasinoma, rraureng me a klengitelreng, ngelsonges er a udoud me a ongarm er a telungalek. Ng choingera e a ikal berraod a mo diak? A nger a kmo “mei ruriul taem.”¹⁷ A lemereched me a bol meoud e tia diak a ngercheled er ngii, eng di ngokiu chubechub er a Dios, e a klengeltengat a mei er tirkel lurrekodel er a ebangkelio er a Jesus Kristo. Tial mondai a mlesmechokl er a berrotel el sers er a kongesachel el basio er a Jerusalem er a kmal meketeketa el taem er a memong.

Chelecha el bo derengesii a betik er a rengud el profet el mo mengesimer tial ongdibel, e bo dolbedebek, el Russell Nelson a mla chotii er a klengar ngii el rokir, el kmo tirkel tir a “mengiil er a temel a Rubak a mo chachisois a klisichir [e] e mo uaia klisichel a wasi; me te remurt, e diak bol mechitechut, … e merael, e diak bo lobiou.”¹⁸ Nglunguchek me a “uriul taem”—a lmereched me a lemeoud—e a ikel klengeltengat a mei e ra rebek el chad el tir a osiik a ngesou er a klengitereng me a iilmokl er a berraod. Ak sioning er a beltikereng er a Dios me a Oluut er a klebokel el ebangkelio er Ngii, el ngii a nger e ra bek el mondai el dechelbangel. El ngara olsobel ngklel a Jesus Kristo, amen.