Omelasem, Olecholt, e Beltanget

Betik er a renguk el rodam me a rodos, ak dmeu a renguk el mengedecheduch er kemiu er chelecha el sils. A urungulek a mo meskemiu a tekoi er a omelisiich el reng el klechad a uaia lesal meringel e diak el ulterekokl. Denguu er a rebebil, sel taem a chelechal taem. A lsekum e ng diak, sel taem a dirk merael el mei.

Sei a diak el mechucheb el ues. Ng klemerang—osisiu el taem e ng klemeriar el reng—e leng uchul a moktek er a Dios er a Blebelel er tia el beluulechad. Sel moktek a mo msa Rengelekel a techall el mo olecholt el kmo ng sebechir el di tir e kongei el mo melilt a llemalt se el meringel. Se el loruul, e a blekerdelir a mengodech e tir a mo uai Ngii. Ng mle medengei el kmo ng mo ousbech er a diak el mesim el klaumerang er Ngii.

Ng betok er a tekoi el kudengei a mengai er a telungalek er ngak. Se er a bekord el eai a rekik, e a mellomes a rengul delak a uleldurech er ngak me a obekuk el mo olengeseu er ngii el melaml a chudel er a sersel. Chelechang kora di beot el ureor, e ng di aki kiliei er a New Jersey. Ng blechoel el di chull. A chutem a mle okrokr el klei. A chudel a mle mereched el duubech er a iasai.

Ak kmal medengei sel bol seselk a renguk le ika el chudel a medort er a chimak, e a risel a uldalem er a okrokr el chutem. A delak me a obekuk a luut e te mla mo cheroid er a cheleliuis er tir. Ak sal mo meringel el melasem, e ak mal muut el mo oiak uriul.

“Tia a kmal meringel!” Ak lilangel.

El diak el bai bo lechubkak, a delak a mle klikmechur e dula el kmo, “Choi, Hal, ng uaisei, el meringel. Ng kirel. A klengar a melasem.”

Chelsel sel team, e ak mlo medengei el kmo a tekingel a mle klemerang e lmuut el melemolem er a klechad er ngak el merael mei.

A mle belkul a klikm er a Delak a mlo bleketakl el me er ngak er a rak ruriul er a kulenguiu er a Chedam er a Babeluades me a Di ta el Ngelekel el mesaod el kirel a moktek er Tir el omeob er tia el beluulechad e mesterir a delbengir a rengelekir a techall er a klengar er a beluulechad:

A Dios a millekoi el kmo ng mo melasem er kid el mo medengei el kmo kede meruul a ikel rokui el tekoi el Rubak el Dios a kmu er kid.

E a lsekum e kede otireklii sel kot el klubeled eng mo chachisois el mei er kid, e a lskeum eng diak dotireklii sel kot el klubeled eng diak a klebkelled er a osisiu el renged lobengterir tirkel tir a ultireklii a kot el klubelir; e tirkel lotireklii ongeru el klubelir, a mo ngmai a chachisois el klebkall el mora diak a ulebengelel.”¹

Kau me ngak a kilengei er sel techall el mo melasem el olecholt el kmo kede mo melilt el oltirakl a llechul a Dios sel bo lak de ngara medal a Demad er Babeluades.

El osisiu el ulkerreu el siotai er a Demad er Babeluades, a Diabelong a mengesuseu er a rebebil er a rebladek el rengalek el mo oltirakl er ngii e mo ikrii a uldesuel a Chedam el kirel a ulekeruled me a diak a ulebengelel el deureng er kid. El uchul a ultok er a Diabelong, ngii a mlodik ngii me a roltirakl er ngii. Chelechang e ngii a melasm el omult er a rebetok el mo cheroid er a Dios er a chelsel tia el klengar er a beluulechad.

Tirke el tir a kilengei er a uldasu a rirellii el uchul a klaumerang er kid er a Jesus Kristo, el ngii a di mle ngii el melenget el mo Osobeled. Kid a locha mle oumerang er sel taem el kmo ngidi el chelitechut er tia el klechad el kid a mo olab, me a ngidi el ngerang el diabelong a orrimel el mo omtok er kid, a orrimellel a ungil a lmuut el mesisiich.

A Chedam er Babeluades me a Jesus Kristo a medengelkau e betik a rengrir er kau. Te sorir kau el lmuut el mo kiei Lobengterir e mo uai Tir. Aike el ungil omruul a dirrek el mo ungil er Tir. Ke mla melechesuar er sel beltik el reng el ngii a mla mocholt er a Chedaol Reng se er a monguiu e morenes aika el tekoi: Me a le uaisei, tiaia urerek me a klebkellek—el mo kudmeklii a diak el mad e mo er a diak a ulebengelel el klengar er a chad.²

A Dios a ngar er ngii a klisichel el remuul a roled el mo beot. Ng ulemeka er a rengalek er a Israel a manna er a lengara chelsel a beluu er a telbiil. A Rubak er a chelsel a osisecheklel er a beluulechad a ulemekungil er a resmecher, olekiis er a mlad el chad er a kodall, e omekiusech a ringel el daob. Uriul er a Okisel er a Kodall, Ngii a ngiluu a chesmerel a blil a kelebus er tirkel mle chelsimer.³

El uaisei e a Profet el Joseph Smith, el ngii a ta er a kmal ungil profet er Ngii, a mle chuarm el ngara blil a kelbus e silubii a osisechakl el kid a sebeched el ngmai a klubeled er ngii sel bo de chelbangel a tekoi el melasem a klaumerang er kid: A lsekum e kau a ulebidokel ra kliokl, malechub eng mlora chimorir a romekeuad, el kirel mo okodall; a lulbidokel er a dmolech; a lsekum a meklou el chedesaoch a subechii er ngii; a lsekum ea mesisiich el eolt a mo cherreuel; a lsekum ea babeluades a chemudel a ilkolk, ma rokui el tekoi a mo dmak el tongetengii a rael; e sel kmal ngaruchei, a lsekum e ngobok a tungelel a beluu er a ngau el kirel, e modengei, kau el ngelekek, el kmo aikal rokui el tekoi a mo klubelel, e mo klungiolel.⁴

Ke locha mo ngar er ngii a uchul e koker el kmo ngera me a kmal oubeltik el reng e olab a rokui el klisiich el Dios a omechei me a omelasem er tia el klechad a kmal meringel. E le Ngii a medengei el kmo ng kired el mukeroul er a klikiid el reng me a blekerdeled el mo sebeched el mo kiei Lobengkel el telungalek el diak a ulebengelel. El rulii me tia a sebechel mekedmokl, a Chedam er Babeluades a mileskid a Osobel me a klisiich el di kid el melilt el okiu a klaumerang el oltirakl a Llechul e mo ouchel a rengud er a kngtid e mo er Ngii.

A uldesuel a Chedam er a deureng a ngar er ngii sel kmal rengul a mo uaia Di tal Ngelekel, Jesus Kristo. Chelsel a rokui el tekoi, a okesiul a Osobel sei a kot el kiter el omekrael er kid. Ngii a dimlak lak luldimukl er a mle uchul el mo olecholt er Ngii. Ng mlo outekangel el kirir a rokui el rengelekel a Chedam er a Babeluades, e kilad a cheral a rokui el kngtid. Ng mlo melechesuar a ringelir a rokui el tir a ngar tia el klechad er a beluulechad me a dirk mei ruriul.

Sel bo momtab el kmo ng kmal uangera ringel el sebechem el otekau, e bo molebedebek er Ngii. Ngii a mlo chuarm er a ringel el om chuarm el mo uchul e ng sebechel el medengei el kmo ng mekera e ngosukau. Ng locha diak el suld a rokui el berraod, e ng di Ngii a meskau a klisiich, ongelaod el reng, me a omekduch el reng. Ngii a medengelii a rael. Ng millim er se el mechuached el kob. Ng mlo otekangel a rokui el ringel el mo er a rokui.

Kau a mukeroul e chellaod er a oubeltik el reng el Osobel, el ngii a medengei el kmo ng mekera olengeseu er kau er a ngidi el omelasem el omchelbangel. A Alma ulsisechakl:

E ngii a mo merael, mo chuarm er a ringel me a sebekreng me a cherarou er a bek el bedengel; e tia ea mo uchul e ng mo mutaut sel tekoi el kmo ngii a mo otekau a rokui el ringel me a secherir a rechedal.

Ngii a mongu tiang el mo er a kodelel, meng mo medidai aikel lechetel a kodall el ngii a mo rengedii a rechedal; e ngii a mongmai a cheliteterir, me a delel a mo mui er a chubchub, lokiu a tech, me ngii a mo medengii aikel tech el kirel a tech er a cheliteterir.⁵

A ta er a rolel e Ngii a mo olengeseu er kau a mo siotai er kau el mo blechoel el melebedebek er Ngii e mo er Ngii. Ngii a mla mengesuseu er kid:

“Mer ngak, kemiu el rokui el chorma er a oberaod el chelungel, e ak mo meskemiu a ulengull.

“Mnguu a chelngelek, e mosuub er ngak; le ngak a medemdemk e ngariou a renguk: me ko mo metik a ulengull er a rengmiu.”⁶

A di ta el rolel el de bo er Ngii a mesuub a tekingel, e mo oba klaumerang el kirel a ouchel el reng er a klengit, e melilt el mo metecholb e mo moterekokl er a mla metutk el Mesiungel, e mo oltirakl a chedaol telbiil el obengkel a Dios. Ngii a odureklii a Chedaol Reng el mo chelmengem, mengelaod a rengum, e omekrael er kau.

Se el om kiei el klikiid el kirel a sengk er a Chedaol Reng, e a Rubak a mo omekrael er kau el mo er a selbechakl ngii me a lak el sebechem el mesa rael. A denguu er ngak, Ngii a mla blechoel el olecholt er ngak sel ongeru el bakes me a lemuut el bebil er a bekesek. Ng diak el blechoel eng di Ng mla meskak a telkib er a osengek el kirel a ngar medak el taem, el ike el ues a omekrael er ngak el kmo ngera kulilt er a chelsel a klengar er ngak er a bek el sils.

A Rubak a silodii:

Ng ngdiak el sebeched lomkesiu a ngara ues er a mad, el ngii a ngarngii er chelcha el taem, ele bla el ketmokl a Dios er kau a melutk el kirel aikel tekoi el ngar medad el taem, ea klungiaol a mo okiuelel … aikel mle ringel er a klengar.

El uriul er a ringel er a klengar e ng mei a klengeltengat.⁷

Sel kot el klou el klengeltengat el ngii a mei sel di kid lochotid el kmo kede meral oba klaumerang el kirel a chedaol telbiled er a chelsel a meringel el taem a mo ngodechid. El okiu a omelilt er kid el mo oltirakl a chedaol telbiled, e a klisichel a Jesus Kristo me a klengeltengat er a Tngakireng er Ngii a sebechel el oureor er kid. A rengud a sebechel mo medemedemek el mo oubeltikelreng, ousubes, e siotai er a rebebil el mei er a Osobel. A kle chansing er kid er a Rubak a mo klou. E a dekted a merael mo eou.

Chelechang, el klengeltengat a yaksok el okiu a ringel er a klengar, ng ungil el diak dosiik a ringel er a klengar. Chelsel tial beluulechad, eng ngarngii a techelled el ochotid, el mo lomolm aikel ringel el melasm el mo uai . Osobel me a Demad er a Babeluades.

Osisiu el taem, ng kired el mo beiusech a medad el mes a ringel er a klengar er a rebebil e melasem el olengeseu. Tia a telkib el mo meringel se el sekum me kid mekede chelbangel a omelasem. E ng di kede mo metik er ngii el kmo se el dotekau a chelngellel a tang, me a di le blel kekerei, e a uleked a mo mesisiich e kid a mo melechesuar a llomes er a ilkolk.

Tiang, e a Rubak ngkei a Okesiud. Ngara kerus er a Kolkata, el mla mo chuarm er a klou el ringel el Ngii a mochu mad a le mlak el Di ta el Ngelekel a Dios, Ngii a ulemes er a cherreuel e dula er a Demal, “Mousubes er tir; te diak lodengei el kmo ngera te meruul.”⁸ El chuarm el kirir a rokui el tir a kiei, Ng mlara kerus e ulemes er a Johanes me a delal e ulsisechakl er ngii er a ringelel:

“Se er a Jesus er a lesa delal, me a oltirakl er ngii el dilchor, el ngii a mal betik e rengul er tir, ng dula er a delal el kmo, Mechas, ngika ngelekem!

“E mocha dula er a oltirakl er ngii, Ngika delam! Mlara chelsel sel taem e ngika el oltirakl er ngii a ngiluu a delal mo er a blil.”⁹

El okiu a omerellel er sel kmal tokubets el chedaol sils, Ngii a di mle ngii el nguu a klengar er Ngii el kired, el diak dil okesiu el mer tia el klengar dirrek el diak a ulebengelel el klengar el merael mei.

Ak mla mesterir a rechad el ngosechekl el mo er a kedidai el okiu a olecholtel a klaumerang er a chelsel a kmal meringel el ringel. Delongelel a Ikelesia er chelechang a bebil er a okesiu. A rechad a mo outubaruach el cherarou a uchul. El okiu a klaumerang er tir el melemolem el outekangel e melasem, te merael el mo uaia Osobel me a Chedam er Babeluades.

Ak silubii a ta er a osisechakl er a delak. Se er a lekekerei el redil, e ng mle smecher el diphtheria e kilong mad. A uriul e ng kuk mlo secherel a ngerdel a bdelul spinal meningitis. A demal a di mle kekerei el chad e mo smecher, me a delak me a ruchedal a mle dmak el olengeseu er a derrir.

Chelsel a klengar er ngii, e ng milchesuar a rellel a ringelel a secherel. Aike el mla mo merek el teruich el rak er a klengar er ngii, e ng mlo er a botk. Ng mlo chuarm el rokui, eng di ngii a ulechotii a klaumerang er ngii er a Rubak, ngii me a di le blel chad el dengarch. Di mle ta el siasing er a chelsel a delmerab er ngii a mle siasing er a Osobel. A mle ulebengelel a tekingel er tial delmerab er ngii a mle: “Hal, kora di ngii ma om socherang. Kirem el mo mengedmokl a bedengem.”

Se er a kemeldilel e a mlo kot el uriul el mengedecheduch a mle Elder Spencer W. Kimball. Uriul er a lolekoi el kirel a ringelel me a klaumerang er ngii, e ng dilu ika el kmal meklou a belkul: “Bebil er kemir a locha oker el kmo ngera me a Mildred a mle kirel chuarm el kmal meketeket. Ak ouchais er kemiu el kmo ngera uchul. Ng mle uchul a Dios a mle soal omtanget er ngii el telkib.”

Ak mal mereng a sulir a re betok el olab a klaumerang el chedal a Ikelesia er a Jesus Kristo el tir a oltekau a berraod el oba diak el mesim el klaumerang e olengeseu er a rebebil er a chelngellir el Rubak a osiik el omtanget er tir el muut el telkib. Ak dirrek el olecholt er a beltkil a renguk e chemat er a roungerachel er a remechuodel me a remerredel a ureor el meliuekl er a beluulechad el tir a mesiou er a rebebil e osisiu el taem e tir me a telungalek er tir a outekangel a osisiu el omtanget.

Ak olecholt er a klaumerang er ngak el kmo kid a rengelekel a Demad er Babeluades, el ngii a betik a rengul er kid. Ak melechesuar er a beltkil a rengul a President Russell M. Nelson el me er kid el rokui. Ngii a profet er a Rubak er chelecha el beluulechad. Ak olecholt er a klaumerang er ngak el oba chedaol ngklel a Rubak el Jesus Kristo, amen.