Bo Mngara Deureng

Aikel ulebongel sils er a klengar Ngii er a beluulechad, e a Jesus Kristo a millekoi er a re Apostol er Ngii el kirel odechelakl me a ongarm el mo er tir. ¹ Ng mlo merekui er a cheldechedal el milsterir tiakid el mesisiich el tekoi: “Ko mo ngara ringel er a beluulechad: eng di bom ngara deureng; el ak mla mo mesisiich er a beluulechad” (Johanes 16:33). Tiaikid a klemechel Osobel el mo er a rokui el ngelekel a Demad er a Babeluades. Tiakid a ngarbab lungil chais el mei er a kid er tial klengar kid er a beluulechad.

“Bom ngara deureng” a dirrek el mle usbechall el melisiiich er a re mlara beluulechad el mla mekiis er a kodall el Kristo a uldurokl er a re Apostol er Ngii. “Kede ngara bek el bedengel a ringel,” a Apostol Paulus a uriul eng silbedeterir a rechad er a Korint, “eng di diak el sebek a rengud; ng mechedeng a rengud, eng di diak dekurusii; ngara chelsel odechelakl, eng di diak decheloit; e modik, eng di diak deriid” (2 Korint 4:8–9

Erul telael rak ruriul e kede dirrek “el mlo er a bek el bedengel a ringel,” e dirrek lousbech er a osisiu el klumech el diak bol mechedeng a rengud e bai mo ngara deureng. A Rubak a ngarngii a tokubets el beltkil a rengul me a uldesuel kirir a retokubets el ngelekl redil. Ngii a medengei a somiu, me a ikel usbechelliu, me a sebekreng er kemiu. A Rubak olab a rokui el klisiich. Bo moumerang er Ngii.

A Profet Joseph Smith a mlosisechakl el kmo a urerel, me a blebelel, me a moktek er a Dios a diak el sebechel metemall, me a diak bol meterob (mesa Doctrine and Covenants 3:1). Tirkel tir a ngara ringel ngelekel, a Rubak a miskid aikakid el ngarbab lolisiich:

“Momes, le tiakid a yaksok er a Rubak el mo er kemiu el mesiungek.

“A leuaisei e bom ngara deureng, e lak komedakt, le ngak el Rubak obengkemiu, el dechor bita er kemiu, me ko mo sioning el kirek, ngak el Jesus Kristo, el kmo ngak a Ngelekel a ngar el Dios” (mesa Doctrine me a Covenants 68:5–6).

A Rubak a dechor el kmeed er kid, e Ngii a mla dmu el kmo:

“Ak dung er a dersta er kemiu a mo er a rokui el chad, bo mngara deureng, kemiu el mekekerei el ngalek, le ngak a ngara delongeliu, el dirkak chitemiu” (mesa Doctrine me a Covenants 61:36).

“Le uriul er a betok longarm e a klengeltengat a mei” (mesa Doctrine me a Covenants 58:4).

Rodos, ak sioning el kmo aika el yaksok, el mlengai er a taem er a odechelakl me a ongarm, a dirrek el yaksok le ko er kemiu er a ikel ringel mngarngii er chelechal taem. Ng mekreos luleklatk el mei er a dersta er kid el mo ngara deureng e metik er a klungiolel a cherrengelel ebangkelio sel dolemolem lomakes el bedul uchei er a chelsel aika el meringel taem er a klengar.

A ongarm me a ringel a bleketakl el teletael er tial klengar er a chutem. A ultok a klou a belkul telngetengil a chedaol moktek el ngosukid el mukeroul, ² ea chelsel tiaikid el teletael, e kede oba yaksok er a Dios el kmo a diak sel diak a ulebenglel klengar eng mo diak a ultok el mo melibas er kid. Ngultuil er a ngesou er Ngii me a blakereng er kid loutekangel, e kid a ngoriakl. Ng uaisei el telengtengil tial klengar er a chutem, e a rokui longarm a di kedeb a klsel. A klou el mondai el dilubech el milchelii a meringel mekemad, e a merredel er a Beluu er a Merikel el Abraham Lincoln a ulemeklatk er a rechad el kirel a chuodel lolachitnger el kmo “tia dirrek, el bo dikrii.” ³

Ko medengei, ongarm er a chutem el kusaod—el rulii meng mo meringel el dengara deureng—el bebil er a taem eng subechii er kid lobengkel a bebil er a betok el tekoi, el uaia remilion el ngara ringel er a telmellel tial bekoiuiull el rakt el COVID-19. Osisiu, chelsel a Beluu er a Merikel e a remilion el chad a ngara ringel er a klauketui me a klautok el ngii a blechoel lobengkel a taem er a sengkyo er a mo merredel er a beluu, eng di chelechal taem eng tokubets el kmal loberaod el betok er kid el meklou el chad a diak debedebek el kmo ng mla uaisei.

A denguu er a dersta el chad, e kede kurusii er a bebil er a ongarm er tial klengar er a chutem, el uaia chelebuul, klauketui, secher, mo diak a urered a lechub a klekurusii, rengeleked el mla touchakl, mekngit el chebechiil a lechub eng diak debechiil, me a telmellel a klengit—a le kngtid a lechub eng kngterir a rebebil’.

Eng di, chelsel aikaikid el rokui el teletael, e kede mla obese er sel ngesou er a babeluades el mo ngara deureng er a osisechakl me a yaksok er a ebangkelio el kirel a rdechel a urered. ⁴ Tial tekoi a dimla ngarngii, el mo er a reprofet me kid el rokui. Kede medengelii tiang lokiu tirkel luleak uchei er kid me a ikel dilu Rubak el mo er tir.

Kom dobedebekii a taem er a Profet Joseph Smith. A domes ongarm el mlo er ngii, e a klengar ngii a mle seluk er a chelsel a chelebuul, odechelakl, seselkereng, klengitelreng er a telungalek, luldimukl er kodellel. Meng kurusii el ngara kelebus, ea bechil me a rengelekel me a rebebil er a Resanto a mlara meringel longarm er a lemodik el tuobed er a Missouri.

A Joseph er a llangel lolengit a ngesou, e a Rubak a ulenger el kmo:

“Ngelekem el sechal, a budech leko er a rengum; cherarou me a ringel el om ngarngii a di kekerei a mong eng di kekerei el taem;

“A bo mungil lotekangel aika longarm, e a Dios a mo osebelau er a eanged, e kau a mo mesisiich er a ikel rokui el cherreuem” (mesa Doctrine me a Covenants 121:7–8).

Tiaikid el diak, a ulebengelel tekoi a ngilseuir a Profet Joseph me nguluutekangel el di mle ko er a ungil a rengul e betik a rengul er a rechedal. Aikal osisiu el blekeradel a millisiich er a rureak uriul el remengeteklel me a ruchelel a ikelesia e dirrek el sebechel mo melisiich er kemiu.

Molbedebek er tirkel uchelel a ikelesia! Te di millikdik, a betok el basio. A uriul e te mo chuarm el mengedmokl a delengcheklir me a Ikelesia er a chereomel. ⁵ Erul rak er a kot el cheldebechel er a ruchelel a ikelesia er a lekerd er a Great Salt Lake, e tirkal uchelel a ikelesia a millemolem el ngara ringel er tial basio. Betok er a rechedal a ikelesia a dirk mla er a omerollir loleong a ked a lechub eng mle meringel a lolechoud aikel usbechellir. Eng di a ruluungerachel me a rechedal a ikelesia a mlarngii sel urungulir me a deureng er tir.

Ng uaisei el dirkak bol chelellakl er a beches el delengcheklir, e a bocha el temel a klou longdibel er sera October 1849 e a iildois er a rebeches el misionari a mlodurokl el mo er a Scandinavia, France, Germany, Italy, me a the South Pacific. ⁶ Sel uaia le sal mle meringel taem er a klengar tir, e tirkal uchelel a ikelesia a bai ngilsechekl el mo er bab. E a edei el rak ruriul, e a lmuut el oketiu me a teai a mlokedong el mo mengidb er a Israel. A tara mengeteklel a Ikelesia a silodii er sel taem el kmo aika el kldei el mission “a diak, el sal kmal mo kemanget a temel; leng di edei el mo euid el rak a klemanget er a taem el chad a cheroid er a telungalek er ngii.” ⁷

Rodos, a First Presidency a melatk er kemiu er a ongarm el mngara chelsel. Ng betik a rengmam er kemiu e meluluuch el kiriru. Osisiu el taem, e a ki blechoel mereng a saul le ringel el dengarngii el uaia—cheroid er kid el desiu a uchul, seseb, iieleb, me a ichadedaob—a diak el bo le uaia ikel ringel el mlo er a ruleak uchei er kid.

Chelsel a rokui longarm, e sel chedaol sebechekled a blechoel “bom ngara deureng, le ak mo omekrael er kemiu. A renged me a klengeltengat a blingeliu, me a iltetel a diak a ulebengelel klengar meng blingeliu” (mesa Doctrine me a Covenants 78:18). Ng mekera e duubech el uaisei? Ng milkera duubech el mo er a ruchelel a ikelesia? E mekera e duubech el mo er a rchedal a Dios el redil er a chelechal sils? A doltirakl a ulaoch lulekrael, “e a beluu er a ngau a diak bol mesisiich er [kid],” a Rubak a millekoi lokiu chedaol ocholt er sera April 1830. “Choi” Ngii a dilu el kmo, “… a Rubak el Dios a mo choridii a klisichel a iilkolk er kemiu, me a babeluades a mo mengitengtik el kirel a klungioliu me a klebkellel” (mesa Doctrine and Covenants 21:6). Lak ko medakt, kemiu el mekekerei el ngelekek e moruul a ungil, a beluulechad me a beluu er a ngau boldak lomtok el melemall er kemiu, eng di alsekum e kom dechor er a dodai er ngak eng diak bol mesisiich er kemiu (mesa Doctrine and Covenants 6:34).

Me kede oba yaksok er a Rubak, el mo ngara “deureng er a rengud” (mesa Doctrine me a Covenants 25:13), el dmeu a rengud e ungil a rengul osenged” (mesa Doctrine me a Covenants 59:15), e omakes el bedul uchei el ngara rolel a telbiil. Betok er kid a diak dechelbangel a kmal meklou lomelilt, el uaia tuobed er a delengchekled el mo er a ngodech el beluu. A omelilt er kid a oumesingd el ikel tekoi doruul er a klengar er a bek el sils, eng di Rubak a mla dmu er kid el kmo, “lak el bol mesaula rengmiu el meruul a ungil tekoi, le kemiu a uchelel a dodai er a klou lureor. Le ikel mekekerei el tekoi el moruul a kudmokl a meklou el tekoi” (mesa Doctrine me a Covenants 64:33).

Ng diak a telkelel a klisiich er a osisechakl er a chelsel a mla moluut el ebangkelio er a Jesus Kristo. A diak el mesim el klaumera er kid er tial osisechakl a mekrolid e meskid a deureng. Ng mekellomes a uldesued e meskid a klisiich me a blakereng er a omerelled. Tial ulekrael me a llomes me a klisiich a yaksok el sengk el bla dengai er a Chedam er a Babeluades. Sel bo dodengei e domekesiu a klengar kid er tial osisechakl, luldimukl er a chedaol sengk er a ouchel reng, eng sebeched el mo ngara deureng sel dolemolem el ngara rolel a telbiil el bedul a diak a ulebengelel lomerolled el ngii a bo dekiei el mo er a ulebongel lobengterir- a rechad er a blid er a babeluades.

“Kom locha mo obangel a kmal loberaod el ringel,” ngullisechakl a Elder Richard G. Scott. “El bebil er a taem eng kmal meringel, e kmal loberaod, me ko mo melchesiu el uase ng dikea el sebechiu lotekau. Lak chellungel el di kau el tang. ‘Mo oumerang er a Rubak loba rengum el rokir; e lak multuill er a di klemedengei er kau’ [Proverbs 3:5]. … Ng mloterkokl el kmo klengar a mo meringel, el diak el belkul a kmo, ng mo diak el sebechem, ke bai ngoriakl sel bo mesisiich er ngii.” ⁸

Ngii el rokui el telengtengil a moktek er a Dios el Chedam me a Ngelekel, er a Jesus Kristo, el ngii ak sioning el kirel, e nglunguchek me doutekangel el kirel omerolled el bedul babeluades, el ngara ngklel a Jesus Kristo, amen.