Beches el Teletael

Rodam me a rodos er ngak, aika el mereko leru el klebesei er a klou longdibel a meral mle klebokel! Ak kongeei lobengkel a Elder Jeffrey R. Holland. El millekoi, a klumech, nglunguuch, me a chelitakl a rokui el mlukrael er a Rubak. Ak mereng a sulir tirkel tir a milngedmokl el kirel tiang.

Chelechal ngarngii ongdiel, e a kumdasou er kemiu lorrenges er tial klou longdibel. Ak mla olengit er a Rubak me lengesukak el mo medengei aikel momelchesiu, sebekereng er kemiu, a lehcub e ngike el molatk el mesmechokl el tekoi. Ak mla melbedebek el kmo ngera kmo dmung el mo chosmerii tial ongdibel el ngii a mo sobcheklemiu el kirel a ngara medad el ngii a Rubak a soal a bo momelchesiu.

Kede kiei er a klebokel el taem, el lilsang er a reprofet er a irechar. Tiaikid sel taem el diak a chedaol klengeltengat el mochib er a remelemalt el chad.¹ Ng diak el iior er a uldikel el ngara beluulechad,² le Rubak a mo rullid el mo omes el bedul uchei el mor sel ngara medad el taem “loba deureng.”³ Lak dolatk el kirel chelii er a mla momerek el tekoi. A omengidb er a Israel a di melemolem. A Rubak el Jesus Kristo a omtebechel a tekingel a Ikelesia er Ngii, e ngii el Ikelesia a mo otaut a rokui el chedaol moktek er ngii.

A ngerchelem kau me a ngak a mo kerekikl me a dersta er kid a mo kudmokl aikel chedaol ngercheled. Chelechal sils e kede blechoel lorenges er a tekoi el “beches el teletael.” Alsekum eng meral somiu el mo urrekodel er a beches el teletael e ak siotai er kemiu el mo mult a rengmiu, uldesuiu, me a bedengiu el mo bedul a Demad er a Babeluades me a Ngelekel, el Jesus Kristo. Tiaikid bo el ngiia beches el teleteliu.”

Bo murrekodel er a beches el teletael el mo ouchel a rengmiu er a bek el sils. Molasm el kmal mo klikiid a uldesuiu, omelkingiu, me a omerelliu. Moldingel er a rebebil. Momes el bedul a diak a ulebengelel klengar. Bo mesisiich er a ngercheliu. E a ngii di longarm el omngarngii, e rodam me a rodos er ngak, e di bom kiei er a bek el sils el mo sebechiu el kldmokl el mo mesa ngike Lulmeob er kemiu.⁴

Tiaikid a uchul e ngarngii a templo. A chedaol ruoll me a telbiil er a Rubak a kudmeklid el kirel a diak a ulebengelel klengar, el ngii a kot el ngarbab er a rokui el klengeltengat er a Dios.⁵ Ko medengei el kmo, tial secherel a COVID a uchul a chesmerel a templo er kid. E sola ulemuchel el mekekokid e kerekikl, el muut el mok a chesmerel a templo. Chelecha el blal mengai a chesmerel a betok el templo, eng betok lobekel a mla moak, e a lmuut el betok a mla ngmai a klengeltengat er tir er a ika el mereko el tela el buil. Kede olsingch risei el sils el rokui el klikiid el chedal a Ikelesia a sebechir lemuut el mo mesiou er a rebeldekir e mo ngara omengull er a chelsel a templo.

Chelechang e ak kungil a renguk el mo ouchais a uldasu el kirel a okedecherul a elolem el beches el templo el mo dechor er a ikal basio: Tarawa, Kiribati; Port Vila, Vanuatu; Lindon, Utah; Greater Guatemala City, Guatemala; São Paulo East, Brazil; me a Santa Cruz, Bolivia.

Sel domekedechor e dongedmokl aika el templo, e nglungucham me a derta er kemiu bo mongedmokl a bedengiu el mo klikiid el mo soiseb er a chedaol templo.

Chelecha, e rodam me a rodos er ngak, a kumekngeltengat er kemiu me bo mui er a budech er a Ruabk el Jesus Kristo. A budech er ngii a chengelakl er a rokui el klemedengei er a chad.⁶ A kumekngeltengat er kemiu me bol chachisois a blakereng er kemiu el mo olngesenges a llechul a Dios. Ak yaksok er kemiu el kmo sel bom uaisei, e ko mo ngmai a klengeltengat, luldimukl er a mesisiich el duchelreng, mekudem el chedaol ocholt, me a budech er a delengchekliu, me a deureng, er a taem el diak modengei a mo duubech.

Domakes el bedul uchei el mo kudmokl a chedaol ngercheled—el ngii a mengedmokl er kid me a beluulechad el kirel Ongeru Lemei a Rubak. A nglunguchek, lobengkel a beltkil a renguk leko er kemiu, el ngara chedaol ngklel a Jesus Kristo, amen.