Kede Mo Melasm er Tir

Betok er a lluich el rak ruchei er a kmokedong el mo mesiou er a Ikelesia, e a kulureor el sensei er a daingak e dirrek el ngara omerredel. A kmal mle ngerchelek el sensei a ngosuterir a rengalek el mo meduch el di tir el mesuub. A kmal klou el telengtengil a urerek a meruul, e melcha teng, e ouchais er a rengalek er a skuul a teletelir er a test. Kom locha mla momedengei, el kmo a test a diak el sal kmal sorir a rengalek el telengtengil omesuub!

Eng di a test a meral klou a ultutelel er a omesuub. A ungil test a ngosukid er a ikel kired el mo medengei me a ikel ngii a meral dodengei el kirel a kmo ngera el kamok er a skuul; ng dirrek el meskid olkael el sebeched el skeng a teletelel omesubed.

Osisiu, a test er tial kuk skuul er a klechad a meklou a ultutelel el kirel a diak a ulebengelel lomerolled. Eng di, ng mengasireng, el tekoi el test a diak debetik er ngii er a chelsel aikel standars works el chedaol llechukl el tekoi er a Merikel. Ng bai, ngarngii a tekoi el mesterir, merritel, me a melasm a lousbech el mesaod a teletelel a klemedengei er kid er a chedaol tekoi, olchotel, me a blakereng er kid er sel moktek er a deureng er a Chedam er a Babeluades me a techelled losiik a klengeltengat er a Tngakireng er a Osobel.

Ngii el lilchesii a lecheklel a uldasu er a mo suobel a silodii a moktek er a klengar kid er a chutem lousbech a tekoi el mesterir, merritel, me a melasm er a chuodel me a beches el chedaol llechukl. A Dios a millekoi el kmo ng mo melasem er kid el mo medengei el kmo kede meruul a ikel rokui el tekoi el Rubak el Dios a dmu er kid. ¹

Ka momtab er sel ongtil ngkel Psalmist el David:

“Mtirterak e, Rubak, e mesekak; melasma renguk me a uldesuek.

“Le bekokeuii el beltikereng er kau a ngara medak: e ak mla merael el ngara klemerang.” ²

E sera 1833 e a Rubak a dilu el kmo, a leuaisei e lak ko medakt er a recherreuem, le ak mla kudmekelii er a renguk, ngak el Rubak, el mo merritel er kau er a rokui el tekoi, el uase ke oltirakl a telbilek, el molmuut er a kodall, me bo mulngakl el klikiid. ³

A rak er a 2020 a mla moterekokl, a bebil er a beluu, el mla soiseb er a omekodall el secher, el merritel, e omes, e malsm er kid er a betok el teletael. Nglunguchek me a dersta er kid el chad me a telungalek bo desuub a meklou a belkul suobel el di tiaikid el meringel el taem a sebechel losischeklid er ngii. Ak dirrek loureng me kid el rokui bododengelii sel “klisichel a Dios” me a klemerang el kmo ngii a mo sumechokl a ringel el [kid] a ngara chelsel el mo [klungiaol] el mei er kid.” ⁴

Erung losisechakl a sebechel mekrolid e smisichid sel bo dechau a meringel el teletael er a klengar kid, ngii di el ngerang el mei: (1) osisechakl el kirel a kedmekled, me a (2) osisechakl er a omakes el bedul uchei lurrekodel er a Kristo.

Kid loltirakl er a Osobel, a mla modurch el mo “kudmokl a bek lusbechall el tekoi; e kudmeklii a blai, el blai e ra nglunguuch, blai er a sengerenger, e blai er a klaumerang, e blai er a omesuub, e blai er a klebkall, e blai el chelderoder, el blil a Dios.” ⁵

Kede dirrek el mla nguu a yaksok el kmo “a lsekum e kom kldmokl eng diak komedakt.

“E mo sebechiu el mochib er a klisichel a cherarou, e mo kldibel el melemalt el chedak, el diak mchelsechusem e klikiid.” ⁶

Aika el bades a meskid a cherrungel llomes el kirel a kedmeklel a klengar kid me a blid er a tekoi er a klechad me a chedaol tekoi. A blakereng er kid er a meringel el taem er a klengar a kired lomekesiu okesiu er a Osobel el ngii a “mlukeroul er a llomes me a duch, me a Dios me a rechad a mle sorir ngii” ⁷ —leng kildmeklii a uldesuel, bedengel, me a chedaol klengar ngii, me a klengar ngii el teloi er a rechad.

Sesei el buil er a memong er a mle tal sueleb, e a Susan me a ngak a ulemes er a soko er a kall er blimam me a ikal klekedellam a ledubech a bkaischemrungel. Tiaikid el taem, er a di lomerk a COVID-19, me a tela el desiu lesbechii er a blimam er a Utah. Aki ulureor er a taem er a uchelel a chebechielam loltirakl a tekingel a profet el kirel a meringel el taem er medad, me sel “ki momes er a kedmeklam er a chelsel a taem er a secher me a desiu eng uaia ble lungil tekoi el ki muruul. Ng mle somam el medengelii a kedmeklam el kirel a taem er a diak dodengei el test.

Ng betok a ki msiluub. Ng mle ungil a kedmeklam, er a chelsel a betok el tekoi. Eng di, kuk bebil er a tekoi, eng kiram el muut el meruul mo ungil leng dimlak kimesang el klou a ultutelel.

Aki dirrek el mlo kadereuakl. Okesiul tiang, aki mlometik a klalou el mlangara soko er kemam el meketektang el rak. A mera er ngii, aki mle bekikl el open e omes a bebil er ngii el klalou el bekikl a kuk bo luchul a tara secher! Ngdi kiriu el ungil a rengmiu le ki chiloit a bebil er a kengaol klalou, meng diak bo luchul a secher el mora beluulechad.

A rebebil er a chedal a Ikelesia a diak kldmokl el moktek me a klalou lousbech er a taem er a bkaischemrungel, soko e ra kall, me a blil a kar lomdasou el uase ng diak el klou a belkul le Rodam a meketeketang el diak losaod aikaikid el tekoi er a chelsel a klou el ongdibel. Ngdi a blelekl lokedong el mo kldmokl a meketekang louchais er ngii a remengeteklel a Ikelesia. A blechebech el ulaoch er a chelsel a kemanget el taem a mekdebechii a mesisiich e bleketakl luleklaltk el mo klou er a dil tal taem losaod er ngii.

Ngdi uaia chelsel a meringel el taem el bo douedikel el kirel a kedmekled, me ngosisu el dirrek el bol beot a rengud er a chedaol tekoi eng tomelid er a chelsel a meringel longarm. Okesiul tiang, kid a subii, er a chelsel a cheldecheduch er tirkel teruich el virgins el omengudel el blachel er a kedmekled a diak lebeskid a klungiaol. Momtab er tirkel teim el mekebelung el virgins el dimlak el bo lungil keldmokl er a taem er a skeng el bol temel a merengel a chebechiil e bel dum a Sechal.

“Te mle mekebelung el ngilai olbdelir, e dimlak lengai a cheluch:

“Engdi a remellomes a ngilai a cheluchul olbdelir. …

“A bochal sueleb er a klebesei eng mlorngii a langel, Alii, ng meremang a Sechal; bo mosiueklii.

“Me tirkal rokui el virgins a milkiis, e omekard olbdelir.

“Ea remekebelung a dula er a remellomes, Me sesei er a cheluch; leng mla mad olbdelam.

“A remellomes a ulenger, el kmo, ng mo diak a cheluchul olbdelam: bai morael el mo er tirkel lolterau, e momechar a cheluchemiu.

“Me tia er a lorael mo omechar a cheluch, e a buch a merema soiseb; me tirkel mle keldmokl a ulebengkel mo er a merengel a chebechiil: e a chesimer a milchesimer.

“Uriul e te merema tirkal[teim el mekebelung el ekebil, e melkinga el kmo, Rubak, Rubak, bekengii a chesimer.” ⁸

“E ng di ngii a dula el kmo, A kmal subedemiu el kmo, ng diak kudengelkemiu.” ⁹

Tiaikid el skeng, e tirkal teim el mekebelung el virgins a mloterekokl el di orrenges e merekong e diak er a omeruul. ¹⁰

Ngarngii a sechelik el mle blak a rengul ngalek er a skuul er a llach. Sel temel a skuul, e a Sam a chemoit a temel el mesuub, e meluches, e omes a subelel e ra bek el kamok er a skuul lullai. Ngultirakl er a osisiu el teletael er a ikel rokui el klas er er a bek el sandei me a bek el buil. Tial teletael a rirelii el subii a llach e diak di lodengelii er a uldesuel el merekong. A bochal temel a skeng, e a Sam a mle kldmokl. A mera er ngii, ng miltik er tial skeng el uaia lesal mle beot er a chelsel omesubel er a llach. A bedochel e kldmokl er a bek el taem a meskid a klungiaol ruriul.

A teletelel a Sam el kirel omesubel er a llach a ochotii a tara kot el teletelel a Rubak el kirel a ulekeruled. A Rubak a dilu el kmo, ak mesterir a rengelekel a chad a dersta el suobel, er a tal taem, el sesei er tiang, e sesei er sei, e te ngeltengat tirkel lorrenges a tekingek, me a dingeerir obok el kirel osischeklek, le ngmai a llomes, le ngkel ngmai ak luut el msa bebil. ¹¹

Ak siotai er a dersta er kid el mo “omtab [a] teleteled ¹² e “dorritel er [kid], el kmo [kede] ngara klaumerang; [el] dil kid [lochotii] er kid.” ¹³ Ngera kede mla subii e ra ikal mereko el buil er a ngeldechel a teletael er a klengar me a ikel dolkebai el tekoi? Ngera kired el sumechokl er a klengar kid er a chedaol tekoi, bedenged, deleuill er kid me a rechad, domelchesiu, me a dodengei el tekoi? Chelechang eng taem el dekedmeklid e ochotii el kmo kede meral mo meruul aikel rokui el Rubak a mla dmu er kid el mo meruul.

Ng mle tal kngara kemeldillel a ngeasek el misionari el mle aksident e mad. A demal ngika el misionari a milngedecheduch er a kemeldiil el kirel a ringel el bochal chacheroid er tial beluuelchad ngii me a betik er a rengul ngelekel. Ng mle bleketakl el melekoi el kmo ngii a dimlak lodengelii a uchul me a temel tial teletael. Eng di ak dobedebekii ngika lungil chad el dirrek el millekoi el kmo ngii a mle medengei el uase a Dios a medengelii a uchul me a temel a secherel a ngelekel—e sei a ungiang el bo lodengelii e merekong. Nguluchais er a seked el kmo ngii me a telungalek er ngii, a uaisei el ngara klengitelreng, eng di te mesisiich; me a klaumerang er tir a melemolem el mesisiich e diak el mesim. Ng mlo mengesimer er a tekingel el dilii tiakid el tekoi: “Sel dosaod er a ebengkelio er a Jesus Kristo, e a telungalek er kemam a ngara chelsel rokir. Aki rokui lulsiseb.”

Ng uaisei el secherel a betik er a rengrir a kmal mle meringel er tir, eng di a rechedal tial mesisiich el telungalek a mle kldmokl er a chedaol tekoi lochotii el kmo ng sebechel ngarngii a lesubii er a ikel ongarm el mo er tir. ¹⁴

A blakereng er a klauemrang a diak el klebelung a lechub el tekoi er a berrous. Ng bai, klaumerang er kid lultuil er a Jesus Kristo el Osobeled, el doba Ngklel, me a yaksok er Ngii. Me sel “dolemolem lomakes el bedul uchei el ngara Kristo, loba cherrunggel lurunguled, loba beltikereng er a Dios me a rokui el chad,” ¹⁵ e kede mukngeltengat er a diak a ulebengelel losenged me a moktek er kid lengelakl er sel losenged er a klechad. Ng mosebeched el “mo kldibel, e dechor er a chedaol basio” ¹⁶ e diak “demesim, el dimerekmo lemei sel sils er a Rubak.” ¹⁷

Sera kurredel er a skuul er a Brigham Young University–Idaho, e a Elder Jeffrey R. Holland a mlei er a skuul er sera December 1998 el mlei e mengedecheduch er kemam. A Susan me a ngak a millekoi er a rebebil er a rengalek er a skuul el mo kaseues e lesa Elder Holland ruchei er a bo longedecheduch. A lorael mereko temam el kaseues, e a kuleker er a Elder Holland el kmo, “Omko ngarngii a chimol tekoi ledelii er tirkal ngalek er a skuul, e ngerang?”

Ngulenger el kmo:

“Kede omes er a teletael er a klekakeakl el di merael mo klou. Sel ngara delongelel a mo er cheroid er kid el Uriul-klebesei el Santo. Ng diak sel oleko ng belngel a rael.

“Alsekum e ke okiuellel a berius er a omeuachel, e ke mora kmo ngker. Ke di okiuellel a berius el mo er sel leborngii. A diobengkel omerael, loltirakl er a dolech, e di ombibechakl a diak lengesukid.

“Ng kired el mo melilt. Ke melilt el diak molilt. Mosuub el mo melilt er chelechang.”

A tekingel a Elder Holland el kirel a di merael mo obdois lomeleakl er a rechad a mla mocholt el klemerang lulaoch er a beluu er a chelsel a lluich me a eru el rak er a longer er a kerik. Ngulemlaoch el kirel a klekakerous er a teletelel a Rubak me a beluuelchad, e a Elder Holland a ulemeklatk el kirel aikel taem el bitang er a ochid a dellemakl er a mla moluut el Ikelesia e a bitang a ngara beluulechad el kmo ng merael dikeang. Ngika el mesiungel a Rubak a milngelechel er a rengeasek el chad el mo melilt, kldmokl, e mesisiich loltirakl er a Osobel. Ngii a ulngeseu er tir el mo kldmokl lomakes el bedul uchei er a skeng er a ochotid, merritel, me a omelasm er a klengar.

A teletael el di kid lochotii er kid a klou a ultutelel telengtengil a moktek er a deureng er a Chedam er a Babeluades. Ak yaksok el kmo sel dekedmeklid e domakes el bedul uchei el ngara klaumerang er a Osobel, eng sebeched el rokui el mo nguu osisiu el teng er sel sils er a skeng er a klechad: “Ngungiang, kau el kedung e blak a rengum el mesiou: ke mle blak a rengum er a mekesai el tekoi, chelecha krullau el mo mengedereder a betok el tekoi: bem siseb er a deureng er a rubak.” ¹⁸

Ak sioning el kmo a Dios el Diak a Ulebengelel Chedam e Demad. A Jesus Kristo a Di Chimong el ngara el Ngalek, el Osobeled e Olsobel er kid. A ikal klemerang a dmeu a renguk el ouchais loba chedaol ngklel a Rubak el Jesus Kristo, amen.