Kerremelel a Beluu

Meral klebokel el rechad er a chelitakl a mengitakl el mo er a klebokel el Osobel.

Sera 2015 e a United Nations a ngiluu a domekedong er ngii el kmo “2030 Ureor el Kirel a Omeleketek el Kereomel.” Ng milsaod el le uaia “cheduchulel a budech me a ukeroul el mo er a rechad me a beluuchad, er chelechang el mo er medad el taem.” Tia el Ureor el Kirel a Omeleketek el Kereomel a uldimukl er ngii a teruich me a kleuid el moktek el ngii a kedmekill er uchei er a rak er a 2030, el uaia mo diak a chelebuul, diak a klengerenger, ungil a omesuub, di mo osisiu a sechal me a redil, klikiid e mechelins el ralm me a tekoi er a cheisei, me a ungil ureor. ¹

Tia el uldasu er a omeleketek el kereomel a kmal omosiroi e klou a belkul. E ng di, lmuut el orechudel, sel el klou el ker el kirel a keremelel a beluu. Ngera aike el kmal meklou a ultutelel el ngii a mengereomel er a omengoeas er a beluu, el ngii a oldubech a deureng, omakes el bedul uchei, budech, me a ulekerreuil a klechad er a rechad er a beluu? Ngar er ngii a chedaol tekoi el mla meluches el kirel aika el eru el ungil ukeroul el beluu. Ngera sebeched el subii er aika el teletael?

A ngara mong, e a ngar er bab el patriarch e profet el Enoch a ulsisechakl el kirel a llemalt e “milkedecherur a beluu el ngii a ulekodongall el Beluu er a Chedaol, me a dirrek el Zion.” ² Ng ngelluches el kmo “a Rubak a ulemekedong er a rechedal el kmo Zion, le tir el mle ta rengrir me a uldesuir, e kiliei el ngara llemalt; e dimlak a chebuul er a delongelir.” ³

“E a Rubak a ulemekngeltengat er a beluu, e tir a mulekngeltengat er a chetebtel a rois, me a ngar er bab el basio, e mlukeroul.” ⁴

A rechedal a kot- me a ongerung-el dart el rak er a Western Hemisphere el domekedong er tir el kmo te re Nephites me a re Lamanites a ulecholt er a ta er a kmal ungil okesiul a mukeroul el beluu. Uriul er a osisecheklel a mla mokiis er a kodall el Osobel er a delongelir, “te milrael el oltirakl er a llach el tir a ngilai er a Rubak e Dios er tir, e milemolem el olsengerenger e meleuluuch, e dmak el ngara ongdibel el meluluuch e orrenges a tekingel a Rubak. …

“Meng dimlak a chelechei, me a kal klakoad, me a ka luldikel, me a ka laokreng me a ka lomengeblad me a ka omekeuad, me a ka ngii dil tekoi er a deleboes; meng dirkak a rengodech el chad el mla er a deuelreng el uaitir er a delongelir a rokui el chad el mla obeob er a chimal a Dios.” ⁵

Aika el beluu er aika el teblo el okesiu a milkereomel el okiu a klengeltengat er a babeluades el mlukeroul el okiu a ungil blakerreng er tir el kirel a eru el kot el ngar er bab el llach: “Kirem el oubeltik el reng er a Rubak el Dios er kau el oba rengum el rokir, me a uldesuem el rokir” me a “Kirem el oubeltik el reng el mo er a tang el di uaia moubeltik el reng el mo er kau.” ⁶ Te mle olengesenges er a Dios er a klengar er tir, e ulengeseu er a bebil er tir er a tekoi er a ulekerreuil a klechad me a dirrek el chedaol el tekoi er a reng. Ngara omelekoi er a Doctrine me a Covenants, aika a mle beluu el “el bek el chad a mo olngeseu er a odam er ngii, e meruul a rokui el tekoi el moktek er tir a mengebkall er a Dios.” ⁷

Metarchebesul, el Elder Quentin L. Cook a uluuchais el kirel er chelecha el tutau, se el ungil el beluu el muchais er a 4 Nephi er a chelsel a Babier er a Mormon a dimlak el sebechel el outekangel er a ongerung el dart el rak. A kerreomel a diak el di lemereko el ngar er ngii, me a ulkerulel a beluu a sebechel mo er ngii a rebetel a lsekum e ng mo ikrii aike el ngaruchei el tekoi er a kldung el ngii a mo oltekau a budech me a ukeroul. Denguu er tia el teletael, orrenges a ongetikaik er a diabelong, e tirka el chad a “mocha obii el mo er a kakerous el cheldebechel; e mocha meleketek a ikelesia er tir el mo uchul a klungiolir, e mocha omtok er a mera el ikelesia er a Kristo.” ⁸

“E ng mocha er sel taem el edei el dart el rak a mla memong, tirka el rechad er a Nephi me a Lamanites a mla lemuut el mo mekngit omerellir el mo er a tang.” ⁹

Le bocha el ulebengelel a kuk ta er a dart el rak, miliol el rechad a mlad er a mekemad er a delongelir, e se el mle ungil kaukledem el belurir a mla mengas el mo kaucherarou el kebliil.

Melebedebek er tiang me a bebil er a okesiu er a mukeroul el beluu el ngii a mlokdubech ruriul, a kumdasu el kmo a lsekum e a rechad a mo ikrii a Dios me a sel reng er a omengull el mo er Ngii e omuchel el oumerang er a “chim er a tech,” a kereor a mo duubech. Oumerang er a chim er a tech a mo olechib er a chedaol Milluches er a llemeltir a rechad e msang a kot el ngar er bab el osenged el mo er a merau, klisiich, me a chetengakl er a beluulechad (e blechoel el oltuub e oltutakl er tirke el tir a oltirakl a kuk ngodech el teletael). El uaisei, tirke el ngara kereomel el beluu a osiik, el King el Benjamin a melekoi, el mo “mukeroul er a klaumedengei er a klebkall el ngii a ulemeob er [tir], me a lechub e ng klaumedengei el kmo ngii a melemalt e klemerang.” ¹⁰

A omesuub er a telungalek me a klechelid a kmal klou a ultutelel el melisiich er a re dersta el chad me a cheldebechel er a beluu el olab a kldung el ngii a mo kerremelel a outekangel el beluu. Aika el tekoi er a kldung, el kmal risel a osisecheklel a ebangkelio, a uldimukl er ngii a melemalt, bekengerachel e usbechall, omelengmes, chubechub, chebechiil me a klaumerang er a chebechiil, omengull er a rebebil me a kloklir, omesiou, me a ruoll me a blakelreng er a ureor, er a delongelir a rebebil.

A Editor-at-large el Gerard Baker a milluches er a bliongel er a simbung er uchelel chelecha el rak The Wall Street Journal el melatk er a demal, er a Frederick Baker, er a tansiobi er ngii el mo dart a rekil. A Baker a uluuchais er a tekoi el oumerang el kmo ng mlo uchul a klemengetel a klengar er a demal e dilechel aika el uldasu:

“El kid el rokui el di soad el mo medengelii sel olserechakl el kmo ng mekera a bode kiei el meketeket, ak blecholel el melechesuar el kmo kid a bai ungil sel dechoit a klou el temed el omdasu el kmo ngera mo uchul a ungil klengar, er a temed el de ngar er tial beluulechad. Ak ngar tiang, e klou a renguk e medengelii sel himits er a demak.

“Mle chad er sel team el klengar a mle ultuil er a ngerachel, ng diak el ior er a chetengakl; okiu a ngerchelel er a buai, ng diak el lemeltel a derta el chad. Sel mal mle kot el klou a ultutelel el osisechakl er a temel el kiei a ultab er a reng er a ngerachel—el mo er a telungalek, Dios, me a beluu.

“Ngara chelsel a taem el oumesingd el mui er a delort el telungalek, a demak a mle oubeltik el reng el buch el mo er a bechil er a Mong meng okeua me a elollem el rak, e uldellomel el chedam el mo er a retellolem el rengalek. Ng liluut el kmal mo blak a rengul el mal uldimukl e klok a ultutelel se er a delak me a demak a mlo chelbangel er a kmal meringel el kereor el mlad a ngelekir. …

“Dirrek el ngara chelsel a team el klechelid a mlo klou el ngara rrau el reng, a demak a mla kiei er a merang, e klou el oumerang el chad er a Katolik, el diak el mesim a klaumerang er ngii er a yaksok er a Kristo. Osisiu el taem, sel babil ak mo omdasu el kmo ng mle kiei el meketeket el uchul e ng mle kot el keldmokel er a ngidi el chad el mo mad.

“Ak kmal ngeltengat el chad—el mukngeltengat er a ungil skulek, klebokel el telungalek er ngak, me a bebil er a tekoi el blo kungil er ngii el dimlak el blingelek. El uaisei el dmeu a renguk e semeriar, ng berrotel el okiu a ilad me a deuerreng el kirel a tang el ngii, a diak el oumondai me a longiremrum, diak a uldesuel el kirel a sengk me a chetengakl, el uaisei—el mla mo dart el rak—el okiu a beot el ureor, ngerachel me a, sel ngaruchei, deurreng el kiei er a kldung el klengar.” ¹¹

Sel utebengel a ututetelel a klechelid me a klaumerang a mla otngakl er a betok el beluu er a ika el mla mo merek el rak. A mla mukeroul el idisir a rechad el tir a oumerang el kmo a klaumerang me a oltirakl er a Dios a diak a usbechellel el kirel a delodau er tia el klechad er a derta el chad me a dirrek el beluu er chelecha el beluulechad. ¹² Ak omdasu el kmo kid el rokui a kongei el kmo tirke el tir a diak a klaumerang er tir er a klechelid a sebechir, e blechoel, el ungil, el chad er tia el beluulechad. Ng di ng diak de kengei, el kmo, tia diak dil mekedmokl a lak a chedaol omengesuseu. Ak melekoi el kirel a Llemesel a Kristo. A Osobel a mla melekoi el kmo, “Ngak a mera el llomes el omekllomes er a rokui el chad el tir a mla mei er a beluulechad.” ¹³ A lodengei me a lak, a rokui el sechal, redil, me a ngalek er a rokui el klaumerang, basio, me a taem a meruul el okiu a Llemesel a Kristo e uaisei el medengei a llemalt me a chelebirukel el kid a omekedong er ngii el kom ng sel mimokl el reng. ¹⁴

Osisiu el taem, sel tekoi er a beluulechad el ngii a meleakl er a uldellomel el kldung er a reng er a omelengmes el mo er a Dios, e ng dobesii a dellomel er a risel. A ultuil er a siukang me a uldelid el omeruul a di ngii a sebechel el korremelii a kldung er a beluu. Sel sekum e a tang a diak a ngar er bab el chelid er ngii e mo osiik er a ngar er bab el klungiaol el ngii a mo mesubed a rengul er a laokreng er ngii me a ikel soal a rengul, a tekoi a mo duubech el okiu ngii.

Me denguu er a beluu, el uaitia el okesiu, el kengei er a tang el kirel a tekoi er a delboes sei a chelitechetul a beluu. Laokreng, delboes, mesobil klaungalek, ¹⁵ me a melecheb el cheroll a Tekoi el mekdubech el ngii a oureor el omtok a kerremelel a klebechel el beluu uldimukl er ngii a uldois el rengalek el mukeroul er a chelebuul e diak a melemalt el omellach er a rechedam, el bebil e ng melemolem el telcheroll; redil el omekeroul el di tir er a tekoi el kirel blii el ngerachel; me a diak el ungil el skuul el blil omesuul, el ua bebil er a skuul, el tir a olisechakl a diak el mosisechakl er a blai. ¹⁶ Uldimukl er a ika el tekoi er a buai a diak el mochur el omeruul er a chelam el reng me a chelebuul el mo er a tang—tekoi er a uldasu me a reng el ngii a mo uker lokiu a ouuchel el reng me a diak el ouuchel.

A Nephi ouchais:

“Klengit el reng el mo er ngike el ngii a orrenges a tekingel a di chad, e kotouar er a klisichel a Dios, me a sengk er a Chedaol Reng! …

“… Klengit el reng el mo er tirke el tir a mo ruebet, e ngmasech a rengrir le ng uchul a klemerang er a Dios!” ¹⁷

A kuk tang, e a kot el deureng el klumech el mo er a rengeleked me a rokui el rechad a kmo “a klemerang er a Dios” a melutk el kirel a ungil rael, me a lechub e sel lolekoi er ngii a Paulus el kmo, “ng kot el ungil rael,” ¹⁸ el rael el mo er a deureng er a tang me a beluu el ungil ukerreuil a klechad er chelechang el mo er a diak a ulebengelel el budech me a deureng er chelecha el mong.

A klemerang er a Dios a mesaod el kirel aike el ngii a kmal klemerang el kirel a Uldesuel er a Deureng el mo er a Rengelekel. Aika el klemerang a kmo a Dios a ngar; e Ngii e a Demad er a Babeluades er a delbenged; el olechotel a Beltkil a Rengul, Ngii a mla meskid a llechul el ngii a omekrael er kid el mo er a cherrungel el deureng el obengkel; el Jesus Kristo a ngii a Di ta el Ngelekel a Dios e ngii a Osebeled; e Ngii a mlo chuarm e mlad el mo melngakireng a kngtid sel bo douuchel a rengud er a kengtid; el kmo Ngii a mlokiis er a kodall, el mo uchul a Okiis er a Kodall el mo er a rokui el chad; e kid a mo dechor er medal el mo Merritel, el kirel a klengar er kid. ¹⁹

Etiu el rak er a domekedong er ngii el kmo ng “omengedereder er a rechad el merritel” er a chelsel a Babier er a Mormon, a profet el Alma a mlo merek er a deruchellel el bedul a rechad el merritel e mo chemoit a rokui el temel el merredel er a Ikelesia. A moktek er ngii a mlo mesaod a tekoi er a kldidai el reng, oltutakl, me a ulengibes el reng el ngii a milrael el mo klou er a chelsel a delongelir a rechad el oumesingd a rechedal a ikelesia. ²⁰ El Elder Stephen D. Nadauld a ulemes, “sel rengul a [Alma] a dimlak el choit a temel el melasem el oltaut a betok el llach me a lechub e ng omeklemalt a omerellir a rechedal, ng bai milngedecheduch er tir a tekingel a Dios, el olisechakl er tir a osisechakl e rulii me a klaumedengei er tir er a uldasu er a mo suobel a sebechel omekrael er tir el mo melodech a teletelir.” ²¹

Ng betok a sebeched el meruul el rekautonari me a dirrek el rechedal a buai el kirel a kerremelel me a klungiolel a beluad el de kiei er ngii, e sel mong meng kmal klou a ultutelel e outekangel el omesiou a mo olisechakl e kiei el oltirakl a klemerang el kirel a klou el uldesuel a Dios er a mo suobel. El muchais er a tekoi el ngar er a chelitakl:

Alsekum a ungil idised me a retonari er kid a remuul a rengud e omekrael a klengar er kid el oba klemerang er a Dios, e a kldung er kid er a rokui el beluu a mo mekedmokl.

Okiu a Beltkil a Rengul, a Demad er Babeluades a mileskid ngkel di tal Ngelekel, Jesus Kristo, me ng sebeched el mo nguu a diak ulebengellel klengar. ²³

“[Jesus Kristo] ng diak a ngeral loruul ng kmal di mo klungiolir rechad ra beluuelchad; le ngii el betik a rengul er a beluulechad, meng mle odersii a klengar ngii me a rechad bol sobel. El uaisei, ngii a dirkak lolekoi er a ngidi el tang el kmo ng diak el bo el nguu a osobelel.

“A leuaisei, ng lilangel el mora ngidi el chad, el melekoi: Mcheridau er ngak? Momes, ak kmu er kau el kmo, Ng Diak; e ng di ng milekoi: Be er ngak er a rokui el beluulechad, mochar a milk me a ilaot el diak a udoud me a cheral.” ²⁴

Tia a kuuchais er ngii el “oba klemerang er a renguk, me a chedaol reng er a delemedemek,” ²⁵ el ngara ngklel a Jesus Kristo, amen.