Rrestaurasiõ ára ha aragua

Oĩ peteĩ teoría oje’e jey jeýva hénte ndoikuaáiva mo’õpa oho oguata jereha. Nda’aréi, umi científico Instituto Max Planck-gua Cibernética Biológica-rã ohechauka upe teoría. Ogueraha hikuái umi paricipante-pe peteĩ ka’aguy ypytũme ha ome’ẽ chupekuéra momarandu isensíllova: “Peguata línea kare’ỹme.” Ndaipórikuri markakuéra ojehechakuaáva. Umi participante odependeva’erã isentido de dirección añóguinte.

¿Mba’épa pepensa ojapókuri hikuái?

Umi científico okonklui: “Hentekuéra añetehápe oguata jere ndoguerekóirõ techaukaha ojeroviakuaávare ijeguatápe.”⁴ Oñeporandúvo chupekuéra uperire, oĩ participante he’íva jerovia reheve ndojedesviaihague ni michĩmi. Ha katu jepe tuicha ijerovia, pe GPS ohechauka oguata hague hikuái área rehe oguerekóva 20 metro rupi idiámetrokue.

¿Mba’ére hasyete ñandéve jaguata kare’ỹme? Oĩ umi investigador oimo’ãva ha’eha umi desviasiõ michĩ ha haimete ndojehechakuaáiva oĩva pe yvýpe ojapóva pe diferencia. Ambuekuéra oimo’ã ha’eha opavave jaguerekógui peteĩ tetyma imbarete’ivéva ambuévagui. Upevére, “ikatu hasy ñandéve jaguata kare’ỹme “ndojeikuaaporãigui mo’õ gotyopa ha’e kara’ỹme.”⁵

Taha’e ha’éva mba’érepa, kóva ningo pe naturaleza humana: ndajaguerekóirõ márka jajeroviaakuaávare, ñasẽ pe tapégui.

¿Ndaha’éipa interesante mba’éichapa umi mba’e michĩ ha namba’eguasúivaicha ikatu ojapo peteĩ diferencia tuichaite ñande rekovépe?

Aikuaa upéva jehasapyre personal rupi piloto-icha. Káda añepyrũ añemo’aĝui peteĩ aeropuerto-re, aikuaákuri hetave pe che rembiapo ha’etaha ajapo meme corrección michĩva agueraha haĝua pe avión a salvo ore pista de aterrizaje roipotávape.

Ikatu peguereko peichagua jehasapyre pemanehárõ peteĩ mba’yrumỹi. Yvytu, pe tape joja’ỹ, ruedakuéra alineasiõ vai, jesareko’ỹ, ja’e’ỹre ambue conductor-kuéra ojapóva, ikatu ñaneguenohẽ pe tape jaipotávagui. Nderejesarekóirõ umi mba’ére ikatu ipahápe reguereko peteĩ ára vaiete.⁶

Imágen – Ta’anga

Coche pileta-pe

Kóva oho ñanderehe físicamente.

Avei oho ñanderehe espiritualmente.

Hetave umi ñemoambue ñande rekove espiritual-pe—mokõivéva iporã ha ivaíva—oiko mbeguekatu, paso a paso. Ikatu, umi Max Planck estudio-gua participante-icha, ndajahechakuaái ñasẽ vove pe tapégui. Ikatu jepe jajerovia atã jaguataha hína kare’ỹme. Ha katu añetehápe ndajaguerekóirõ umi marka ñandegia haĝua, katuete ñasẽta tapégui ha ipahápe jajetopáta umi tenda araka’eve ñaimo’ã’ỹvape.

Kóva añetete individuokuérape ĝuarã. Avei añete socieda ha tetãnguérape ĝuarã. Umi escritura henyhẽ tembiecharãgui

Jueces kuatiañe’ẽme ojehai Josué omano rire, “opu’ã hendaguépe ta’ýra kuéra … oikuaa’ỹva Tupãme ni umi mba’eta ha’e ojapova’ekue Israel rehehápe.”⁷

Jepe umi yvagagua intervensión oñeimo’ã’ỹva, visita, rreskate ha jegueropu’aka milagróso ohechava’ekue Israél ra’ykuéra Moisés ha Josue oikove aja, peteĩ ñemoñare’atýpe upe tavaygua osẽ pe tapégui ha oñepyrũ oguata iñakãre. Ha, por supuesto, ndohasái heta ára ohepyme’ẽ haĝua hikuái upe ojapova’ekuére.

Sapy’ánte upe ñesẽ tapégui ogueraha heta ñemoñare’aty. Sapy’ánte katu oiko ary térã jepe mésepente.⁸ Ha katu opavave ikatu jahasa upéva. Noimportái mba’eichaitépa imbarete raka’e umi experiencia espiritual jahasava’ekue, yvypóraicha jareko tendencia jaikorei haĝua. Upéva ha’eva’ekue pe modelo Adán ára guie aĝaite peve.

Ha katu nda’opamba’éi oĩ perdido A diferencia umi participante oguatareiva’ekue, ñande jaguereko umi marka jahechakuaa ha jajeroviakuaávare jaipurukuaáva ja’evalua haĝua ñande curso.

Ha ¿mba’épa umi marka?

Añetehápe oinklui pe ñembo’e ára ha ára ha jajepy’amongeta umi Escritura-re ha jaipuru umi tembiporu inspirado Eju, Chesegi”. Káda ára ikatu ñañemo’aĝui Tupã trono-re mirĩ ha tekojoja reheve. Jajepy’amongetakuaa umi jajapova’ekuére ha jarrevisa umi ohasava’ekue upe árape, ñamañávo ñane volunta ha rembipotáre Imba’éva resape guýpe. Ñasẽrõ tapégui, jajerure’asy Tupãme tañanemoĩ jey ha ñañekompromete jajapo porãvévo.

Imágen – Ta’anga

Pe Salvador oisãmbyhy Ijovechakuérape

Ko ára ñamaña haĝua ñandepype ha’e oportunidad jajerrekalibra haĝua. Ha’e peteĩ yvotyty jepy’amongeta rehegua ikatuhápe jaguata Ñandejára ndie ha ñañemoarandu, ñañemopu’ã ha ñañemopotĩ umi ñande Ru Yvagagua ñe’ẽ ojerrevela ha ojehaiva’ekuére. Ha’e peteĩ époka isagrádova ñanemandu’ahápe ñane konveniokuérare jasegívo Cristo-pe, ja’evaluahápe ñane akãrapu’ã ha ñañembojoja umi márka espiritual rehe Tupã ome’ẽva’ekue Ita’yrakuérape.

Pepensa upévare pende rrestaurasiõ personal ára ha araguáva ramo. Peregrino-icha oguatáva pe gloria rapére, jaikuaa mba’eichaitépa ndahasýi ñasẽ haĝua tapégui. Ha katu umi desviasiõ michĩ ikatuháicha ñanemomombyry pe Salvador rapégui, upéicha avei umi michĩ ha simple acto ñañemoĩporã haĝua ñandeguerahakuaa jey upe tapépe. Umi ypytũ oike vove ñande rekovépe, py’ỹi oikoháicha, ñane rrestaurasiõ ára ha áragua oipe’a ñande korasõ yvagagua resapépe, omimbíva ñane ángape oguenohẽvo pytũmby, kyhyje ha duda.

Jahekárõ, añetehápe “Tupã ome’ẽta [ñandéve] kuaapy Ijespiritu Santo rupive, heẽ, pe inefable Espíritu Santo don rupive.”⁹ Jajerureháicha, Ha’e ñanembo’éta pe tape ha ñaneipytyvõta jasegi haĝua.

Kóva añetehápe oikotevẽ tañañeha’ã meme. Ndaikatúi ñañekontenta umi experiencia espiritual ymaguare rehe. Ñaikotevẽ peteĩ syry mante.

Ndaikatúi jajerovia ambuekuéra testimonio-re tapiaite g̃uarã. Ñamopu’ãva’erã ñanemba’etéva.

Ñaikotevẽ pe tesape yvagagua tosyry meme ha ára ha ára.

Ñaikotevẽ umi “ñembopyahu ára.”¹⁰ Rrestaurasiõ personal ára.

“Umi y omýiva” ndaikatúi “iky’a are.”¹¹ Jaguereko potĩ meme haĝua ñane pensamiento, ha accíon, ñamýi meméva’erã!

Upéi ningo, pe evanhelio ha tupao rrestaurasiõ ndaha’éi peteĩ mba’e oikova’ekue peteĩ javénte ha opa upépe. Ha’e peteĩ proceso oiko meméva, peteĩ teĩ árape, peteĩ teĩ korasõme.

Ohasaháicha ohóvo ñande arakuéra, upéicha avei ñande rekove. Peteĩ autor omoĩ péicha: Peteĩ ára ha’e opa pe tekovéicha. Reñepyrũ rejapóvo peteĩ mba’e, ha katu ndepaha rejapóvo ambue mba’e, replanea rejapóvo peteĩ tembiaporã, ha katu araka’eve nereĝuahẽi upépe. … Ha nde rekove pahápe, opa nde rekove oreko upe kalidaite, avei Opa pende rekove oreko pe peteĩ ára forma.”¹²

¿Emoambuesépa nde rekove forma?

Emoambue nde ára forma.

¿Remoambuesépe nde ára?

Emoambue ko aravo.

Emoambue pe repensa, reñandu ha rejapóva ko’áĝaite.

Peteĩ timón michĩva ikatu oisãmbyhy peteĩ yga guasu.¹³

Umi ladrillo michĨva ikatu oñekonverti ogaguasu hechapyrãvape.

Umi yvara’ỹi michĩva ikatu oñekonverti tuichaite secuoya-kuérape.

Umi aravo’i ha aravo ojeipuru porãva ha’e umi elemento fundamental omopu’ãva peteĩ tekove ojevivi porãva. Umíva oinspirakuaa py’aporã, ñanemopu’ãkuaa umi imperfección ñeñapytĩgui ha ñandegueraha jey pe perdón ha ñemomarangatu rape redentor-pe.

Amopu’ã penendie che korasõ ame’ẽvo aguije pe oportunida pyahu, tekove pyahu ha esperansa pyahu don hechapyrãvare.

Jahupi ñane ñe’ẽpu ñatupãitu haĝua ñane Tupã ypy’aporã ha ñanderayhúvape. Añetehápe Ha’éngo peteĩ Tupã ñepyrũ pyahu rehegua. Opa Hembiapo oreko pe fin sublime ñanepytyvõvo ñandéve Ita’yrakuérape, jareko haĝua éxito pe inmortalida ha vida eterna jehekápe.¹⁴

Ikatu oiko ñandehegui tekove pyahu Cristo-pe, Tupã opromete haguére: opa ára che tavayguakuéra oñearrepentíramo aperdonáta chupekuéra umi hembiapovai cherehe”¹⁵Ha “nachemandu’amo’ãvéima umívare”¹⁶

Che hermano ha hermanakuéra, ha angirũnguéra pohayhuetéva, opavave ñañemomombyry sapy’a py’ánte.

Ha katu jahakuaa jey upe tapépe. Ikatu ñanavega ko tekove ypytũ ha py’ara’ã rupi ha jajuhukuaa pe tape ñandegueraha jeýva ñande Ru Yvagagua ñanderayhúvape jaheka ha ja’aceptárõ umi márka espiritual Ha’e ome’ẽva ñandéve, ja’acepta revelasiõ personal ha ñañeha’ã rrestaurasiõ ára ha araguáre Upéicha ñañekonvertíta ñande amado Salvador Jesucristo discípulo añetévape.

Jajapóvo upéicha Ñandejára opukavýta ñandéve. Ñandejára … nderovasáta pe yvýpe Tupã ñandejára ome’ẽtava ndéve. Ñandejára ojapóta ndehegui peteĩ tetã marangatúva Ijupe guarã,.”¹⁷

Tajaheka pe rrestaurasiõ ára ha áragua ha tañañeha’ã meme jaguata haĝua Jesucristo rapére, ha’e che ñembo’e. Jesucristo rérape. Amén.