Peju Cristo-pe ha Ani Peju Pene’año
Pe tape iporãvéva pemoporã hag̃ua ko múndo ha’e, pembosako’ívo ko múndo Cristo-pe g̃uarã, pe’invitávo opavavépe osegí hag̃ua Chupe.
Nda’aréi og̃uahẽ chéve kárta, peteĩ mujer jóven ikuriósavagui. Ha’e ohaíkuri, “Apa’ã. … Ndaikuaaporãi mávapa che, ha katu añandu aimeha ko’ápe tuicha mba’erã”.
Peñandúvapa koichagua jeheka, peñeporandúvo oikuaápa Túva Yvagapegua mávapa peẽ ha oikotevẽpa Ha’e penderehe? Che huventukuéra ahayhuetévape, ha opavavépe che atestifika ñembohovái ha’eha héẽ! Ñandejára oguereko peteĩ plan peẽme g̃uarã. Ha’e penembosako’i’akue ko árape g̃uarã, ko’ag̃aite, ha’e hag̃ua peteĩ mbarete ha pu’aka mba’eporãrã pe Hembiapo ipu’akapávape. Roikotevẽ penderehe! Ndatuichamo’ãi ningo penderehe’ỹ!
Situasiõ sagráda guýpe, ñande proféta ojehayhuetéva, Presidente Russell M. Nelson, peteĩ ára cheromandu’ava’ekue mokõi añetegua hasy’ỹva, imba’eguasúva pene rembiapo tuicha ha igloriósovape g̃uarã.
Aguapy aja ore sofápe che ménandi, ñande proféta omboja isílla, ha haimete ochoka ore renymy’a, ha oma’ẽ cherehe hesa rovy’asy mbarete reheve. Ndaikuaaporãi che korasõpa omba’apo térã opytaite ha’e cherenóivo aservi hag̃ua Mujeres Jóvenes Presidenta General ramo. Ha’e ojapókuri peteĩ ñeporandu ipúva gueteri che korasõme, “Bonnie, mba’épa upe mba’e tuichave [huventukuéra] tekotevẽva oikuaa”?
Ajepy’amongeta’imi ha ha’e, “Ha’ekuéra tekotevẽ oikuaa mávapa hikuái.
“HÉẼ!” ha’e ombohovái, “ha tekotevẽ oikuaa hikuái ipropositokuéra”.
Ñane identida divína
Peẽ ha’e ojeguerohory ha ojehayhuetéva Túva Yvagagua ra’y ha rajykuéra. Ha’e penderayhu porãmbágui ombou’akue Ita’ýra, Jesucristo, o’expia hag̃ua penderehe ha cherehe.1 Salvador mborayhu ñanderehe ndofalláiri—jepe jafalla jave! Mba’eve ndaikatúi ñandepe’a Tupã mborayhúgui.2 Penemandu’ávo ko mborayhúre penepytyvõta pembotove hag̃ua mundogua konfusiõ, omokangyséva pene konfiansa pene identida divínare, ani hag̃ua pehecha potencial peguerekóva.
Peteĩ conferencia para jóvenes-pe, che aikuaákuri mokõi mujer jóven ohasa’asýva hína. Mokõive ko’ã mujer jóven he’íkuri, omañávo i-bendición patriarcal-re, ojuhu jeyhague Ñandejára mborayhu ha guía chupe g̃uarãitéva. Pejuhu pene bendición patriarcal, peipe’a chugui yvytimbo tekotevẽramo, ha katu py’ỹi pestudia. Ndapeguerekóirõ, pejerure peteĩ—pya’éke. Ani pembo’are pejuhu hag̃ua mba’épa Ñandejára he’ise peẽme ko’ág̃a mávare peẽ ha’e.
Ñande Propósito Eterno
Mokõiha añetegua Presidente Nelson oñe’ẽ’akue oréve upe ára ha’e jaikuaa hag̃ua ñande propósito. Kóva ha’e ñane enkárgo tuicha ha iporãitéva.
Ojapo heta ary, che memby Tanner oreko’akue cinco áño rupi, ohugávo guare iprimer partído de fútbol. Ovy’aitékuri!.
Rog̃uahẽvo upe huégope, rohechakuaa pe ijekípo oiporuha hína peteĩ fútbol de meta tamaño reglamentario—ha ndaha’éi peteĩ portería michĩ, ha katu peteĩ rred guasu, tuichaitévacha mitã de cinco áñope g̃uarã.
Upe huégogui oiko peteĩ mba’e ojeguerovia’ỹva, ahechávo Tenner ojagarra pe arkéro renda. Che añemondýikuri. Oikũmby añetépa ha’e ipropósito oñangarekóvo pe rrédre?
Ipu pe píto, ha oreakãrakuetégui upe huégore, oreresáikuri Tanner-gui. Ñeha’arõ’ỹme, peteĩva upe ekípo kontrariogua ojapyhy upe pelóta ha omombo ha’e oĩha gotyo. Ama’ẽ Tanner oĩha gotyo oikuaa hag̃ua oĩpa listo opyta hag̃ua hendápe ha odefende pe árko. Ahechákuri peteĩ mba’e aha’arõ’ỹva.
Peteĩ momento upe huégo aja, Tanner ojedistraékuri ha oñepyrũ omoinge ijyva asu umi heta rred kuápe. Péicha ojapo avei ijyva akãtúape. Upéi, hetyma asu. Ipahápe, hetyma akãtúa. Tanner ojeliapaite upe rrédre. Ha’e hesaráikuri ipropósitogui ha pe oñenkargava’ekue chupe ojapo hag̃ua.
Tanner carrera fúlbol-pe ndahi’aréirõ jepe, i-lección chéve g̃uarã upe ára, araka’eve ndoguemo’ãi. Opavave ñandekuéra sapy’ánte jajedistrae pe mba’érepa ñaimégui ko’ápe, ha ñamombia ñañe energía ambue henda gotyo. Peteĩ Satana árma ipu’akapáva ha’e ñande distrae hag̃ua umi káusa iporãva ha mehorvévape, ára tekotevẽ jave, ikatúva ñanemyesatũ ha ñandepe’a pe káusa iporãvévagui—pe tembiapo ñañehenoi’akuégui jajapo hag̃ua ko múndope.3
Ñande propósito eterno ha’e jaju hag̃ua Cristo-pe ha jajoaju Hese activamente Hembiapo guasúpe. Isimplete ningo jajaporõguáicha Presidente Nelson ombo’e’akue: “Oimeraẽ ára jajapo vove oimeraẽ mba’e oimeraẽvape oipytyvõva … ojapo ha oñongatu hag̃ua ikonveniokuéra Tupãndi, ñaipytyvõ hína Israel oñembyaty hag̃ua”.4 Ha jajapóramo upe Hembiapo Hendive, jaikuaave ha jahayhuve Chupe.
Jaheka meme ñañemo’aguĩ hag̃ua Salvador-re, jerovia, arrepentimiento ojerohorýva ha tembiapoukapykuéra ñeñongatu rupive. Jajoajúvo Hese, umi konvénio ha ordenansa rupive, ñande rekove oñemyenyhẽ jeroviapy,5 ñemo’ã,6 ha vy’a ipypuku ha hi’aréva reheve.7
Jajúvo Hendápe, jahecha ambuekuérape Ha’e ohechaháicha chupekuéra. 8 Peju Cristo-pe. Peju ko’ág̃a, ha katu ani peju pene’año!9
Jesucristo evanhélio ndaha’éi iporãnteva; tekotevẽte opavavépe g̃uarã. “Ndaipóri ambue mba’éicha ni mba’e rupive [ñande] ikatuha jajesalva, ndaha’éirõ Cristo-pe ha ha’e rupive”.10 Ñande ñaikotevẽ Jesucristo-re! Pe múndo oikotevẽ Jesucristo-re.11
Penemandu’áke, tape iporãvéva peẽme g̃uarã pemoporã hag̃ua ko múndo ha’e, pembosako’i hag̃ua ko múndo Cristo-pe g̃uarã, pe’invitávo opavavépe osegí hag̃ua Chupe.
Oĩ peteĩ tembiasakue Mormón Kuatiañe’ẽme, oñe’ẽ pu’akapáva pe ára, Salvador oikovejey’akue, ohasava’ekuére nefita-kuérandi. Ikatúpa peimo’ã mba’éichapa ra’e upéva?
Cristo omomarandúvo Ha’e oho jeyva’erãha Túvape, “ha’e oma’ẽ jey ijerére.”12 Ohechávo tesay tavayguakuéra resáre, Ha’e oikuaa ikorasõkuéra oipotaha Ha’e apytave.
Ha’e oporandu’akue: “Peguerekópa hasýva pende apytépe? Pegueru chupekuéra koʼápe. Peguerekópa ikarẽva, térã ohechaʼỹva, …ohenduʼỹva, térã oguerekóva oimeháichagua mbaʼasy? Pegueru ko’ápe ha Che amongueráta chupekuéra”.13
Oguerekóvo tuicha poriahuvereko, Ha’e nomoĩri límite ha ohenói opa “oguerekóvape oimeháichagua mbaʼasy”. Ahayhuete ndaipóri haguére mba’eve tuichaite ni michĩetéva Jesucristo-pe omonguera hag̃ua.
Ha’e oikuaa ñande jehasa’asy ha ohenói, Pegueru umi oguerekóva ansieda ha depresiõ, umi ikane’õva, umi oñembotuicháva ha umi oñentende’ỹva, umi ha’eñóva, térã umi “oguerekóva oimeháichagua mba’asy”.
Ha opavave “oñemboja … ; ha ha’e omonguera opavavépe. …
“… Ha umi oñemongueravaʼekue ha umi hesãiva, [o]ñesũ ipy renondépe, ha otupaitũ chupe”.14
Opa ára kóva amoñe’ẽvo, añeporandu: Mávapa aguerúta Cristo-pe? Mávapa peẽ peguerúta?
Ikatúpa ñama’ẽ jey ijerére, Jesús ojapo haguéicha, jaje’asegura hag̃ua ani avave okañy, ha opavave oĩ invitádo oikuaa hag̃ua Chupe?
Takompartimi peteĩ ehémplo mba’éicha ikatu ndahasyiete. Che angirũ Peyton, orekóva 15 áño, orekókuri peteĩ méta omoñe’ẽ hag̃ua cinco verso escritura por día orambosa aja, ha katu ndojapóikuri ha’eño. Oma’ẽ jeývo, Peyton o’invitákuri isy ha itúva ha iñermanokuéra, jepe ikyvy cinco añogua. Upe tembiapo, michĩvacha, ha’e Cristo ombo’e’akue hína Ha’e o’invitarõguare, “Pegueru chupekuéra ko’ápe”.
Ko invitasiõ Ñandejáragui ojepyso gueteri ko ára. Mujeres jóvenes ha hombres jóvenes, peñepyrũ ko’ág̃a, pende róga teépe. Peñembo’étapa ha peporandútapa Túva Yvagaguápe, mba’éicha peẽ ikatu peipytyvõ pende rukuérape, ou memévo hikuái Cristo-pe? Ha’ekuéra oikotevẽ penderehe, peẽ peikotevẽháicha hesekuéra.
Upérõ, pema’ẽ jey pende joyke’ykuéra, pene angirũ ha pene vesinokuérare. Mávapa peguerúta Cristo-pe?
Ñande Salvador he’i’akue, ”Péina ápe, Che ha’e pe tesape; Che ame’ẽva’ekue peẽme techapyrã.”15 Ñañandúta pe Salvador mborayhu ha py’aguapy jajoajúvo Hese jasalvávo Tupã familia-kuéra, Ha’e oprometégui, “Pe chesegíva ndoguatomo’ãvéima pytũmbýpe, ha katu oguerekóta pe tekove resape”.16
Igloriosoitépa ko ára ñeime hag̃ua Cristo káusape!
Héẽ, peẽ peime ko’ápe mba’e tuicharã. Ajoaju Presidente Nelson-re, he’iva’ekue: “Ñandejára oikotevẽ penderehe pemoambue hag̃ua ko múndo. Peguerohory ha pesegíramo Hembipota peẽme g̃uarã, pejejuhúta pehupytyha pe ikatu’ỹva!”17
Atestifika py’aguasúpe Ñandejára oikuaaha mávapa peẽ, ha Ha’e penderayhu! Oñondivepa, ñamotenondéta ipropósito upe ára guasu peve, Cristo Ijeheguiete oujey vove ko yvy ári ha ñanerenói enterovépe, peju “ko’ápe”. Vy’ápe ñañembyatýta, ñande ha’égui umi Cristo-pe jajúva, ha ndajajúi ñane’año. Jesucristo rérape, Amén.