Ñembosako’i Cristo jejujey mokõihame ĝuarã.

Oñemombe’uháicha Mormón Kuatiañe’ẽme, seis ary Jesucristo heñói mboyve, Samuel peteĩ Lamanita hekojojáva, oprofetisa nefita tavayguakuérape, ha’éva uperõ ĝuarã hetave oguerovia’ỹva,¹umi señal-gui oútava ñande Salvador ñegueronase ndie. Ñembyasyrã, hetave umi nefita ombotove umi señal “Naiñarandúi[gui] niko outaha peteĩ tekove Cristo-ichagua.”²

Ñembyasyrã, oñemombe’uháicha umi Escritura-pe, heta umi judío, upéicha avei, ndogueroviaséikuri peteĩ kuimba’e hérava Jesús, Galilea provincia’igui, ha’etaha añetehápe pe Mesías oñeha’arõitéva.³ Jesús, añetehápe okumpliva’ekue heta umi profesía profetakuéra hebreo ojapo’akue, oñembotove ha jepe ojejuka kurusúre, ombo’e haguéicha Jacob, pe proféta Mormón Kuatiañe’ẽmegua, umi judío “omaña haguére hikuái mombyryve pe jehupytyrãgui”. Upévare Jacob otestifikákuri “Tupã oipeʼágui chuguikuéra tesakã, ha omeʼẽ chupekuéra heta mbaʼe ndaikatúiva oikũmby, upéicha oipotágui hikuái. Ha péicha oipotágui hikuái Tupã ojapókuri, oñepysanga hag̃ua.”⁴

Iñextráñoramo jepe, ni umi tekombo’e, ni milagro, ni jepe peteĩ ánhel jehechauka, ohecha haguéicha Laman ha Lemuel,⁵ndoguerekóivaicha pu’aka okonvense haĝua tekovekuérape omoambue haĝua hape, perspectiva térã jeguerovia umi mba’e añeteguávagui. Kóva oiko especialmente umi tekombo’e térã milagro ndohóirõ peteĩ tapicha kaprícho, rembipota térã ídea orekómava rehe.

Pekomparami sapy’aite ko’ã mokõi pasáhe Escritura-gua, pe peteĩha apóstol Pablo oñe’ẽvo ára pahápe rehe,omombe’úvo yvypóra rape, ha pe mokõiha, Alma, pe proféta, ohechaukávo mba’éichapa Tupã omba’apo tekovekuéra apytépe. Peteĩha Pablo ñe’ẽ:

“Aipota reikuaa porã kóva: Pe ára paha oñemoaguĩvo heta ojehasa asýta.

“Opavave imba’erãnte oipotáta opa mba’e, pira pirénte ohayhúta, ha oñemoha’entese ha ojejapóta. Oñepu’ãmbáta Tupãre, túva ha sýpe avave naiñe’ẽrendu mo’ãi, ndojehechakuaamo’ãi avavépe ha ojejahéita Tupãre

Avave naimba’e porã mo’ãi avave ndive, ha avavépe ndojeporiahurerekomo’ãi. Oñeñe’ẽ reíta ojuehe ha avave ndaikatumo’ãi ojejoko, hetáta oñemboharái vaíva hapicháre ha ndojehecharamomo’ãi mba’eve iporãva.

“Oĩta oguasu apíva hapicháre, iñakã rehénte oikóva, ojejapóva ha ojapóva umi mba’e chupe kuérante ombovy’áva, ojapo rangue Tupã oipotáva; …

“ha’e umi hénte “tapiaite oaprendéva hína, ha katu araka’eve ndaikatúi oĝuahẽ pe añetegua jeikuaápe.”⁶

Ha Koʼág̃a Alma-gui, omoĩvo peteĩ Jesucristo evanhelio principio fundamental: “Koʼág̃a ikatu reimoʼã koʼãva haʼeha vyrorei che ajapóva; ha katu péina ápe che haʼe ndéve, mbaʼe michĩ ha mbaʼe ndahaʼéivaicha mbaʼeve rupive ojejapo tuicha mbaʼe; ha heta hendáicha umi mbaʼe michĩva omoapañuãi iñarandúvape.”⁷

Jaiko peteĩ mundo henyhẽvape tuicha kuaapy ha heta katupyrýgui Upevére, umi mba’e py’ỹi oñomi umi pyenda ndaiseguroiva oñemopu’ãha ári. Upévare, ndoguerahái pe añetegua añetévape, ni jasegi haĝua Tupãme ni pe pu’akápe jahupyty haĝua revelación ni kuaapy espiritual ha jadesarrolla pe jerovia Jesucristo-re ñandegueraháva salvasiõrã.⁸

Ñañemomandu’a pypuku umi Ñandejára ñe’ẽre Tomás ha ambue apostol-kuérape Ijehasa’asy expiatorio vísperape: “Jesús he’i chupe: Che hína upe tape, upe añete ha upe tekovete. Che rupi mante ikatu oñeguahẽ che Ru rendápe.”⁹

Umi orekóvape ĝuarã tesa ohecha haĝua, apysa ohendu haĝua ha korasõ oñandu haĝua, araka’eveguarégui, ojejerure ñandéve ko’áĝa tañembohovake pe añetegua ñañemo’aĝuiveha hína ára ha ára Jesucristo Jejujey Mokõiháre. Añetehápe, oha’arõ gueteri tuicha jeiko’asy umi oĩtavape yvy ári Ijejujeýpe, ha katu upévagui umi ikeroviarekóva ndokyhyjeiva’erã.

Ko’áĝa asitáta sapy’aite umi tupaogua Temas del Evangelio oĩva “Jesucristo Jejujey Mokõiha” guýpe”:

“Pe Salvador ou vove, oúta pu’aka ha verapy reheve ojerure haĝua ko yvy Irréino ramo. Ijejujey Mokõiha omarkáta pe Milenio ñepyrũha.

“Pe Jejujey Mokõiha ha’éta peteĩ tasẽ ha kyhyje ára umi iñañavape ĝuarã, ha katu ha’éta peteĩ py’aguapy ára umi hekojojávape ĝuarã. Ñandejára omomaranduva‘ekue:

“‘Umi iñarandúva ha omog̃uahẽva’ekue añetegua, ha ojapyhyva’ekue Espíritu Santo oisãmbyhy hag̃ua chupekuéra, ha noñembotavyiva’ekue—añetehápe Che ha’e peẽme, ko’ãvape ndojeitymo’ãi ni noñemombomo’ãi tatápe, ha katu ogueropu’akáta upe ára.

“‘Ha oñeme’ẽta chupekuéra pe yvy ijehejapyrerã; ha oñemoña ha imbaretéta hikuái, ha ita’ýra ha tajyrakuéra okakuaáta angaipa ỹre, ojesalva peve.

Ñandejára oĩtagui ijapytepekuéra, ha iglória oĩta hi’arikuéra, ha ha’e irréi ha ilehisladorkuérata’ (Doctrina ha Konveniokuéra 45:57–59).”¹⁰

Ñaneñembosako’ípe Jesucristo Jejujey Mokõihame ĝuarã, ame’ẽ peteĩ momarandu imba’eguasúva ha ñanemoangapyhýva oúva proféta Amós-gui, Antiguo testamento-gua: “Añetehápe Ñandejára ndojapomo’ãi mba’eve, orrevela raẽ peve imba’eñemimby umi hembiguái profetakuérape.”¹¹

Upe espíritu-pe, Ñandejára proféta ko’áĝagua múndope ĝuarã, presidente Russell M. Nelson, nda’aréi ome’ẽ ñandéve ko tekombo’e inspirado: “Pe Jesucristo Evanhélio ha’e peteĩ Evanhélio arrepentimiento rehegua. Pe Salvador expiasiõ rupi, Iñevanhélio oikuave’ẽ peteĩ invitación ñakontinua hag̃ua ñañemoambuévo, jakakuaa ha ñanepotĩve. Ha’e peteĩ evanhélio ñeha’arõkuaa, ñemonguera ha jekakuaa rehegua. Upéicha, pe evanhélio ha’e peteĩ vy’apavẽ mensáhe! Ñande espíritu oguerovy’a káda guata michĩ ramo jepe ñame’ẽva tenonderã.”¹²

Atestifika rreserva’ỹre Tupã añeteha ha umi milagro oiko meméva hetaiterei yvypóra rekovépe ára ha ára, taha’e umi tekove ára ijyvateve térã umi ikarapevévape. Añetehápe pokã vese oñeñe’ẽ umi jehasa sagrádore, sapy’ánte orekogui peteĩ origen divino ha avei pono oñembohory umi ndoikuaaporãiva.

Upe sentido-pe Moroni, pe proféta paha Mormón kuatiañe’ẽme ñanemomandu’a:

“Ha añeʼẽ avei peẽ penegávape Tupã rrevelasiõnguéra, ha pejéva opamaha, ha ndaiporiha rrevelasiõ, ni profesía, ni don, ni ñemonguera, ni ñeʼẽ jeikuaa, ni umi ñeʼẽ ñemyesakã;

“Péina ápe che haʼe peẽme, pe onegáva koʼã mbaʼe ndoikuaái Cristo evanhélio; heẽ, nomoñeʼẽi umi escritura; ha omoñeʼẽramo noikũmbýi.

“Nañamoñeʼẽi piko Tupã haʼeha peteĩnte kuehe, ko ára, ha tapiaite, ha ipype ndaiporiha ñemovã ni mbaʼevéichagua ñemoambue?”¹³

Ambopaha che ñe’ẽ peteĩ Profeta Joseph Smith momarandu profético ñaneinspira añetéva, ome’ẽva iministerio paha rupi oha’arõ’asývo pe Jesucristo jejujey mokõiha: “¿Ndajahamo’ãi piko tenonde gotyo peteĩ káusa tuichaitévape? Peho tenonde gotyo, pejevy rãngue”. Py’aguasu, hermano [ha avei hermana-kuéra]; ha jaha tenonderã, tenonderã victoria-pe! … Tovyʼáke pene korasõ ha tapenerenyhẽ torýgui.”¹⁴ Ko’ãvape amoĩve che testimonio, Jesucristo rérape, Amén.