Peipepirũ Cristo-pe ohai hag̃ua pene rembiasakue

Añepyrũta ajapo heta ñeporandu, ikatu hag̃uáicha ñañamindu’u:

• ¿Mba’eichagua tembiasakuépa pehai hína pende rekovére?

• ¿Tape pehaíva pene rembiasakuépe, naikarẽipa?

• ¿Ipahápa pene rembiasakue oñepyrũ haguépe, ñande róga celestial-pe?

• ¿Oĩpa techapyrã pene rembiasakuépe—ha’épa upéva Salvador Jesucristo?

Atestifika Salvador ha’eha “autor ha consumador ñande jerovia rehegua”.¹ ¿Peipepirũnepa Chupe ha’e hag̃ua pene rembiasakue autor ha consumador?

Ha’e oikuaa ipaha iñepyrũmby guive. Ha’e ha’ékuri yvy ha yvága Apohare. Ha’e oipota jahajey ógape Hendápe, ha ñande Ru Yvagaguándi. Ha’e oinvertipaitékuri ñande rehe, ha oipota jaguereko éxito.

¿Mba’épa peje peẽ ñande jokoha nañame’ẽi hag̃ua ñane rembiasakue Chupe?

Ikatu ko amombe’útava penepytyvõ pende autoevaluasiõme.

Peteĩ abogado ivaléva oikuaa peteĩ ñeporandu jováipe, hasy ojapo hag̃ua peteĩ testígope ñeporandu ha’e ndokuaáiva iñembohovái. Upeichagua ñeporandu jejapo, ha’e oñeipepirũ testígope he’ívo ndéve—pe juez ha pe jurado-pe— peteĩ mba’e ndereikuaáiva gueteri. Ikatu rejapyhy ñembohovái nepy’amondýiva, ha ikatúva ndaha’éi tembiasakue remombe’úva rehegua.

Ojejapo peteĩ ñeporandu testígope ndojekuaáiva mba’épa ombohováita iñimprudénterõ jepe peteĩ abogado-pe g̃uarã, ñandéve g̃uarã katu ndaha’éi upéicha. Ikatu ñaporandu heta mba’e ñande Ru Yvagaguápe, ñande misericordioso Salvador rérape, ha pe testigo ombohováiva umi ñane ñeporandu ha’e pe Espíritu Santo, akóinte otestifikáva añeteguáre.² Espiritu Santo mba’apo ñemopeteĩgui ñande Ru Yvagagua ha Jesucristo ndive, jaikuaa Espiritu Santo omanifestáva ñandéve ha’eha añetegua. ¿Mba’ére piko upéicharõ sapy’ánte ñande py’ahatã jajerure hag̃ua ko’ãichagua pytyvõ yvagagua, upe añetegua oñemanifestáva ñandéve Espíritu Santo rupive? ¿Mba’ére piko jaheja ohasa, ñaporandu hag̃ua mba’e ndajaikuaáiva iñembohovái, jaikuaávo upe testigo ndaha’éiva imarangatu añónteva, térã katu akóinte ombe’úva añetegua?

Ikatu oime ndajaguerekógui jerovia ja’acepta hag̃ua ñembohovái ikatúva jahupyty. Itaku oime ha’e, kuimba’e térã kuña natural-háicha jaguereko resistencia ñame’ẽ hag̃ua opaite mba’e Ñandejára-pe, ha ñakonfia paite hag̃ua Hese. Ikatu oime upévare jaiporavo jasegi ñamombe’u tembiasakue jahaiva’ekue ñande voi, peteĩ versión opytaporãva ñandéve g̃uarã, oje’edita’ỹre pe Autor Maestro-re. Ndajajaposéi ñeporandu, ha jahupyty peteĩ ñembohovái noñenkaháiva tembiasakue jahaívare hína ñande voi.

Añetehápe, mbovy ñande apytépe, oiméne ohaítava hembiasakuépe umi prueba ñanemosỹiva. Péina katu, ndajarohorýi piko ipaha iporãitéva, ñamoñe’ẽvo peteĩ tembiasakue pe protagonista osuperaha idesafío? Prueba-kuéra ha’e umi elemento tráma rehegua, ojapóva tembiasakue jahayhuvévagui, oporokonvenséva, hi’ara’ỹva, opromovéva fe, ha idígnova oñemombe’u hag̃ua. Umi lúcha iporãitéva ojehaíva ñane rembiasakuépe, ha’e umi ñanemoĩvéva Salvador ykére ha ñane rrefináva, jajoguavévo Chupe.

David ovense hag̃ua Goliat-pe, upe mitãrusu omotenondeva’erãkuri tekove tuichaitereívape. David rembiasakue ñemombe’u ifásilva ha’étakuri ohohague jey hógape oñangareko hag̃ua ovechakuérare. Péina katu, ha’e oñamindu’u hembiasakuére osalváramo guare ovechakuérape leõ ha ósogui. Ha omongakuaávo umi tembiasakue heróico oguerekova’ekue, oguerekóvo jerovia ha py’aguasu oheja Tupã ohai hembiasakue, odeklarávo: “Ñandejára che pe’ava’ekue león ha óso rãinguágui, Ha’e chepe’áta avei ko filistéo pógui.”³ Jepotapýpe Tupã oprevalesévo, Espiritu Santo-re ojapysakávo, ha oimévo dispuesto ohejávo Salvador-pe ha’e hag̃ua pe autor ha consumador hembiasakue rehegua, David, pe mitãrusu, oity Goliat-pe ha osalva ipluéblo-pe.

Principio albedrío rehegua isublímeva, oheja ñandéve jahai ñande rekove tee—David ikatúkuri ohojey hógape oñangareko ovechakuérare. Péina katu Jesucristo, oime ñembosako’ípe ñande puru hag̃ua umi instrumento divíno ramo, lápi haimbéva ramo Ipópe, ohai hag̃ua peteĩ obra maestra! Ha’e oĩ dispuesto poriahuverekópe cheiporu hag̃ua chéve, peteĩ lápi po’imi, peteĩ instrumento ramo Ipópe, aguerekórõ jerovia aheja hag̃ua Chupe, aheja ramo Chupe taha’e che rembiasakue haiha.

Ester ha’e ambue techapyrã iporãitereíva jaheja hag̃ua Tupã oprevalese. Oñakarãma hatã rangue peteĩ supervivencia personal ñeñangarekóre, ha’e oipurúkuri jerovia ha oñemoĩmbaite Tupã poguýpe. Amán omba’apókuri hína ohundi hag̃ua opaite Judio-kuéra Persia-guápe Mardoqueo, Ester pariente, ohechakuaa ojejaposéva ha ohai chupe, he’ivo chupe oñe’e hag̃ua pe rréindi itavaygua rérape. Ha’e omombe’u chupe, opaite añembojáva pe rréire oñehenói ỹre, oimeha kondenádo omano hag̃ua. Péina katu peteĩ jerovia mbaretetépe, ha’e ojerure Mardoqueo-pe, ombyaty hag̃ua judio-kuérape ha to’ajuna hese. “Che ha che rembiguaikuéra avei ndoro’umo’ãi mba’eve”, he’i ha’e , “ha upéi añembojáne rréi rendápe, léipe he’íva ndajapoiva’erãha: ha ajejukáramo, tajejuka.”⁴

Ester oimékuri dispuesta ohejávo Salvador-pe ohai hembiasakue, jepe lente ko tekove terrenal rupive, ipaha ikatúkuri ivaiete. Jehovasarã, pe rréi orresiviva’ekue Ester-pe, ha Judio-kuéra Percia-gua ojesalva.

Añetehápe, sapy’antete ojejerure ñandéve jaguereko hag̃ua py’aguasu oguerekoháicha Ester. Péina katu, jaheja Tupã oprevalese, jaheja Ha’e autor ha consumador ñane rembiasakuére, oikotevẽ ñandehegui ñañongatu Hembiapoukapykuéra ha umi konvénio jajapova’ekue. Ñane ñe’ẽrendu mandamiento-kuérare ha umi konvenióre, ha’e pe oipe’átava ñandéve ñemongeta rape jahupyty hag̃ua rrevelasiõ Espíritu Santo rupive. Ha ha’e umi Espíritu Santo manifestasiõ rupive, ñañandúta ñane Mbo’ehára po, ohaívo ñane rembiasakue ñanendive.

Abril 2021-pe, ñande proféta, Presidente Russell M. Nelson, ojerurékuri ñakonsidera hag̃ua mba’épa ikatúne jajapo, jaguerekóramo hetave jerovia Jesucristo-re. Hetave jerovia reheve Jesucristo-re, ikatúta jajapo peteĩ ñeporandu ndajaikuaáiva iñembohovái—jajerure ñande Ru Yvagaguápe, ombou hag̃ua ñembohovái Espíritu Santo rupive, otestifikáva añeteguáre. Jaguereko ramo hetave jerovia, ñaporandúta, ha upéi ñaiméta ñembosako’ípe ñamboaje hag̃ua ñembohovái jahupytýva, jepe ndaha’éi jaipotaháicha ñane rembiasakue hasy’ỹvape g̃uarã. Ha jehovasa prometido jajapyhýva, jaku’évo jeroviápe Jesucristo-pe, ha’e fe ñemongakuaa Hese, ñande ojapoha ha ojapoukarõguáicha. Presidente Nelson omyesakã ñande “jahupytyveha jerovia, jajapóvo mba’e oikotevevẽvare jerovia”.⁵

Péina upéicha, peteĩ paréha imemby’ỹva oguerekógui infertilidad, ikatu oporandu jerovíape, ikatúpa o’adopta, ha oĩva’erã ñembosako’ípe ojapyhy hag̃ua ñembohovái, jepe ohairõkuri hikuái hembiasakuépe peteĩ nacimiento milagroso.

Peteĩ matrimonio itujámava, ikatu oporandu ha’émapa aravo oservi hag̃ua misión-pe, jepe ohairõkuri hikuái hembiasakuépe omba’apove hag̃ua. Térã ikatu avei ñembohovái he’i ”ne’ĩragueteri”, ha oikuaáta hikuái ambue hembiasakue capítulo-kuérape, mba’ére oñeikotevẽve hesekuéra hógape.

Peteĩ hombre térã mujer jóven imitãva, ikatu oporandu jeroviápe, oimerõ deporte térã estudio, térã música, ha’e pe hepyvéva chupe g̃uarã, ha oimeva’erã dispuesto osegí hag̃ua testígo perfecto impresión-kuéra, ha’éva Espíritu Santo.

¿Mba’érepa jaipota Salvador ha’e autor ha consumador ñane rembiasakue rehegua? Ha’e oikuaa haguére ikatúva ñande jajapo añetehápe, Ha’e ñandegueraháta umi tenda araka’eve ikatu’ỹháme ñaimo’ã ñandejehegui. Ha’e ikatu ojapo ñandehegui peteĩ David térã Ester. Ha’e ñande exigíta ha ñanemosỹita jajoguave hag̃ua Chupe. Umi mba’e jahupytýva jaku’évo hetave jerovíape, omongakuaáta ñande jerovia Jesucristo rehe.

Hermano ha hermana-kuéra, ojapo peteĩ ary añónte, ñande proféta jahayhuetéva oporanduhague: “Peimépapeẽ dispuesto peheja hag̃ua Tupã oprevalese pende rekovépe? … ¿Peimépa dispuesto pehejávo oimeraẽ mba’e Ha’e oikotevẽva pejapo, oguereko priorida opa ambue rembipota peguerekóva ári”?⁶ Humildad-pe, amoĩve ko’ã ñeporandu profétikope: “¿Pehejánepa Tupã ha’e autor ha consumador pene rembiasakuépe?”

Apocalipsis-pe jaikuaa jahataha Tupã renondépe ha jajehusgataha umi tekovepegua tembiasakuégui, ñane rembiapokuére.⁷

Jajehusgáta ñanerekovepegua rembiasakue rupive. Ikatu jaiporavo jahai peteĩ jehaipyre opytaporãva ñandéve g̃uarã. Térã katu jaheja pe Autor ha Consumador tohai ñane rembiasakue ñanendive, jahejávo mba’e Ha’e oikotevẽva ñande jajapo, taipu’aka ambue ambición-kuéra ári.

¡Pehejáke Cristo taha’e autor ha consumador pene rembiasakue rehegua!

Peheja Espíritu Santo taha’e pende testígo!

Pehai peteĩ tembiasakue tape peimeháme na ikarẽiva, peteĩ tape pende guerahátava pende róga celestial-pe, peikove hag̃ua Tupã presencia-pe.

Peheja adversidad ha aflicción oikóva opaite tembiasakue porãme, taha’e tape peñembojave ha pejoguave hag̃ua Jesucristo-pe.

Pemombe’u peteĩ tembiasakue, pehechakuaahápe yvága ojepe’aha peẽme. Pejapo ñeporandu ndapeikuaáiva ñembohovái, peikuaápe Tupã oimeha ñembosako’ípe ohechauka hag̃ua Hembipota penderehe, Espíritu Santo rupive.

Peheja pene rembiasakue taha’e jerovia rehegua, pesegívo pene Rembiechapyrã, Salvador Jesucristo. Jesucristo rérape. Amén.