“Pagpahinungod sa Balaan nga Yuta”

Gikan sa iyang pagpabunyag sa Simbahan niadtong 1831, si Orson Hyde naglaum nga sa umaabut nga adlaw makaserbisyo og misyon ngadto sa Jerusalem. Usa ka gabii niadtong 1840, nagdamgo siya nga mipahigayon og misyonaryo nga panaw ngadto sa London, Amsterdam, ug Constantinople ug sa katapusan didto sa Jerusalem. Nadasig sa iyang damgo, sa sunod nga komperensya sa Simbahan, siya misugyot nga moserbisyo og misyon ngadto sa mga Judeo. Ang kauban nga Apostol nga si John Page mipakita og suporta, naghisgut sa mga panagna sa Basahon ni Mormon sa pagpundok sa Israel ug sa pagkakabig sa mga Judeo.¹ Si Joseph Smith mitugot kang Hyde sa pagrepresentar sa Simbahan ngadto sa “mga pari, mga magmamando, ug mga Anciano [Elder] sa mga Judeo” sa langyaw nga mga dapit.² Si Hyde mibiya gikan sa Nauvoo, Illinois, human sa siyam ka adlaw ug misubay sa dalan nga iyang nakita sa iyang damgo.

Imahe

Hulagway ni Orson Hyde

Si Page miuban ni Hyde hangtud sa Cincinnati, Ohio.³ Si Hyde mipadayon nga nag-inusara, miabut sa Inglatera [England] niadtong Marso 1841. Didto iyang gitabangan ang ubang mga sakop sa Napulog Duha sulod sa upat ka bulan sa wala pa mobiyahe sa habagatang silangan nga direksyon tadlas sa Uropa. Atol sa biyahe, si Hyde mipadala og mga sulat ngadto sa mga lider sa Judeo nga mga komunidad ug mihunong sa dakong mga siyudad aron sa pagsangyaw ngadto sa mga Judeo. Pagka-Oktubre, siya midunggo sa kabaybayonan sa Palestina ug mipadayon ngadto sa kayutaan sa Jerusalem. Siya midanguynguy samtang nagbarug sa kasadpan nga bahin sa ganghaan ug misud-ong sa karaang siyudad sa unang higayon.

Sa wala pa mosubang ang adlaw pagka-Dominggo, Oktubre 24, si Hyde mibiya sa siyudad, mitabok sa Walog sa Kidron, ug misaka sa Bungtod sa mga Oliba. Didto siya mihalad og pag-ampo sa pagpahinungod sa Jerusalem sa piho “alang sa pagpundok sa nagkatibulaag nga mga salin sa Judah” ug sa mas halapad isip usa usab ka yuta sa saad alang sa tanang nagkatibulaag nga mga anak ni Abraham.⁴ Human sa panalangin, siya mibuhat og bato nga altar aron sa pagsaulog sa okasyon. Sa dihang mibiya sa Jerusalem, si Hyde mipadayon sa iyang misyon pinaagi sa pagbiyahe og balik agi sa Alemanya [Germany] ug dayon sa London. Siya mibalik ngadto sa Nauvoo niadtong Disyembre 1842.⁵

Sa dihang si Hyde ug ang uban gi-set apart isip mga sakop sa Korum sa Napulog Duha niadtong 1835, si Joseph Smith mipahibalo kanila nga sila lamang ang adunay katungod sa pag-abli sa mga pultahan sa mga nasud alang sa pagpundok sa Israel.⁶ Ang apostolikanhon nga pagpahinungod ni Hyde sa Balaan nga Yuta mitabang sa pagpatuman niini nga responsibilidad. Ang pagpahinungod , hinoon, lahi kay sa ulahing mga pagpahinungod sa mga nasud alang sa misyonaryo nga buhat sa mga Santos sa Ulahing mga Adlaw. Si Hyde nakasabut nga kini nga pagpahinungod mipasugod sa pagpundok sa karaang katawhan sa pakigsaad sa Dios, ang mga Judeo, ug mahimong usa ka buluhaton nga ang mga Judeo nga katawhan mismo ang motapus.

Sa tunga-tunga sa 1873 ug 1933, daghan pang laing pagpahinungod nga mga pag-ampo alang sa Balaan nga Yuta ang gihalad sa ulahing mga Apostoles.⁷ Sa mga 1970 ug 1980, ang Simbahan mi-establisar og presensya sa dapit palibut sa Jerusalem pinaagi sa pagtukod og district sa Simbahan, pagtukod sa Brigham Young University Jerusalem Center, ug pagpahinungod sa Orson Hyde Memorial Garden sa Bungtod sa mga Oliba.⁸ Niadtong 1979, si Elder Howard W. Hunter sa Korum sa Napulog Duha, kinsa adunay importante nga papel sa pagtukod niining Santos sa Ulahing mga Adlaw nga mga institusyon diha sa Balaan nga Yuta, mitudlo nga ang handumanan sa pag-ampo ni Hyde wala magpasabut “nga mibulig kita sa mga tumong sa mga Judeo lamang. Ang Simbahan adunay tinguha sa tanang mga kaliwatan ni Abraham.” Iyang gipahinumduman ang iyang mga tigpaminaw nga ang “Jerusalem sagrado sa mga Judeo, apan sagrado usab kini sa mga Arabo.” Siya mitapos, “Ang mga Judeo ug mga Arabo parehong mga anak sa atong Amahan. Pareho silang mga anak sa saad, ug sa ingon kita isip usa ka simbahan walay habig nga labanan. Kita adunay gugma ug interes sa matag usa. Ang katuyoan sa ebanghelyo ni Jesukristo mao ang pagdala sa gugma, panaghiusa, ug panag-igsoonay sa kinatas-ang matang.”⁹

Imahe

Jerusalem