Mga Korum sa Seventy

Ang Seventy mao ang usa ka katungdanan sa Melchizedek Priesthood. Gikan sa 1986, ang mga sakop sa mga Korum sa Seventy mao ang mga kinatibuk-an o rehiyunal nga mga awtoridad kinsa miabag sa pagdumala sa Simbahan sa tibuok kalibutan. Sa mas dakong bahin sa kasaysayan sa Simbahan, hinoon, ang mga stake adunay ilang kaugalingon nga mga korum sa seventy.

Ang unang mga sakop sa seventy nga giorden niadtong Pebrero 28, 1835, sa dihang si Joseph Smith misugod sa pagtawag ug pag-orden og espesyal nga mga misyonaryo sa “pagpul-ong sa akong ubasan alang sa katapusan nga higayon.”¹ Nianang samang bulan, si Oliver Cowdery, David Whitmer, ug Martin Harris mitabang ni Joseph Smith sa pagpili sa Napulog Duha ka mga Apostoles, usa ka korum sa priesthood sa napulog duha ka mga halangdong pari kinsa, sama sa Apostoles sa Bag-ong Tugon, gisugo sa pagsangyaw sa ebanghelyo ngadto sa tibuok kalibutan. Sumala sa usa ka instruksyon sa priesthood nga nalakip diha sa Doktrina ug mga Pakigsaad, ang seventy usab “gitawag sa pagsangyaw sa ebanghelyo, ug mamahimong linain nga mga saksi ngadto sa mga Hentil ug sa tibuok nga kalibutan,” gisunod ngadto sa Seventy kinsa gitawag ni Jesus sa pagsangyaw ngadto sa mga Israelite atol sa Iyang kinabuhi.²

Ang instruksyon nagpasabut usab nga ang seventy “maghimo og usa ka korum, managsama ang katungod ngadto sa Napulog Duha” apan ang seventy kinahanglan molihok ubos sa direksyon sa mga Apostoles, kinsa mao lang ang naghupot sa “mga yawe” sa pagsangyaw sa ebanghelyo sa Judeo ug mga Hentil.³

Dugang mga korum sa seventy gimugna samtang nadugangan ang kalalakin-an nga naorden. Human sa pagkamatay ni Joseph Smith niadtong 1844, kadaghanan sa mga Elder sa edad nga 35 naorden isip mga seventy, ug daghang bag-o nga mga korum ang namugna aron maatiman ang nagkadako nga mga ranggo. Pagka 1846, ang gidaghanon sa mga korum sa seventy miabut na sa 35. Sa katapusan ang suma-total sa gidaghanon sa mga korum miabut ngadto sa gatusan. Kadaghanan sa mga misyonaryo atol sa ikaduha nga katunga sa ika-19 nga siglo mga sakop niining lokal nga mga korum sa seventy.⁴ Usa ka konseho sa pito nga gipili gikan sa matag sakop sa korum ang nagdumala sa usa ka korum. Sa kinatibuk-an, ang mga korum sa seventy gidumala pinaagi sa pito ka kalalakin-an kinsa gilangkuban sa Unang Konseho sa Seventy. Kining mga kalalakin-an gipaluyohan isip mga General Authority sunod sa Korum sa Napulog Duha sa katungod. Niadtong 1907, si Joseph F. Smith mitudlo nga ang Unang Konseho sa Seventy naglihok isip “mga kaabag ngadto sa Napulog Duha ka mga Apostoles” ug sa usa ka pagsabut, “mga apostoles ni Ginoong Jesukristo” nga gipadala aron sa pagsangyaw sa ebanghelyo sa tibuok kalibutan.⁵

Samtang nagkahalapad ang ginsakupan sa Simbahan sa tibuok kalibutan, nahimong lisud alang sa Napulog Duha ang pagtuman sa tanan nilang administratiba nga mga responsibilidad. Niadtong 1941, ang Unang Kapangulohan misugod sa pagtawag og pipila ka mga kalalakin-an isip “mga kaabag ngadto sa napulog duha.” Niadtong 1961, si Presidente David O. McKay misugo nga ang mga sakop sa Unang Konseho sa Seventy ma-orden ngadto sa katungdanan sa halangdong pari ug nahatagan sa awtoridad nga gikinahanglan sa “paghan-ay sa tanang mga butang kalabut ngadto sa stake ug sa mga ward, ubos sa direksyon sa Napulog Duha ka mga Apostoles.”⁶ Niadtong Oktubre 1975, si Presidente Spencer W. Kimball mipahibalo sa pagkamugna sa Unang Korum sa Seventy isip dugang sa hugpong sa mga General Authority, ug gibutangan ang korum sa Unang Konseho sa Seventy, ang mga Kaabag ngadto sa Napulog Duha, ug lain pang bag-ong natawag nga mga Seventy. Niadtong Oktubre 1986, si Presidente Ezra Taft Benson misugo sa lokal nga mga lider sa paghunong sa lokal nga mga korum sa seventy ug wala na motawag ug mo-orden og kalalakin-an ngadto sa katungdanan sa seventy. Dayon ang mga lider misugo sa kanhi mga sakop sa lokal nga mga korum sa seventy sa pagtambong sa mga korum sa mga elder o i-orden sila isip mga halangdong mga pari.

Sukad sa 1986, ang katungdanan sa Seventy nagpabiling eksklusibo nga usa ka katungdanan sa kinatibuk-an kay sa lokal nga awtoridad. Ang mga sakop sa Seventy sa kinatibuk-an mopahulay gikan sa aktibo nga pagserbisyo sa edad nga 70, diin nianang panahona sila gihatagan sa kahimtang nga emeritus. Ang pagsugod sa “Unang” Korum sa Seventy mibag-o sa sumbanan sa mga Korum sa Seventy nga nakita panahon sa kinaunahan nga mga adlaw sa Simbahan, pero sa kinatibuk-an lang sukwahi sa lokal nga lebel. Niadtong Abril 1989, ang Ikaduha nga Korum sa Seventy naestablisar. Ang Unang Kapangulohan miestablisar sa Ikatulo hangtud sa Ikawalo nga mga Korum taliwala sa mga tuig 1997 ug 2005, nagpili sa mga sakop niining mga korum nga mga “Area Authority” ug mibutang kanila ubos sa direksyon sa Unang Korum sa Seventy. Ang Seventy karon miabag sa Korum sa Napulog Duha ug sa Unang Kapangulohan sa pagpangalagad sa Simbahan sa tibuok kalibutan, nagserbisyo isip mga sakop sa Kapangulohan sa Area, nag-organisar sa mga stake, ug nagtudlo sa mga Santos sa Ulahing mga Adlaw sa kinatibuk-an ug sa lokal nga mga kahimtang sa komperensya.