Sagradong Kakahoyan ug Umahan sa Pamilyang Smith

Ang umahan sa pamilyang Joseph Sr. ug Lucy Mack Smith nagsilbing telon sa daghang mga panghitabo sa wala pa ang Pagpahiuli. Ang mga Smith mibalhin ngadto sa Palmyra, New York, taliwala sa 1816 ug 1817, sa tumong nga mananom og trigo. Human makatigum sulod sa duha ka tuig, ang pamilya nakahatag sa pasiunang bayad sa 100-acre (40 ka ektarya) nga luna sa baga nga lasang sa Manchester, pipila ka milya sa habagatan sa Palmyra. Atol sa tingtugnaw sa 1818 hangtud 1819, ang 10 ka mga sakop sa pamilyang Smith mibalhin ngadto sa usa ka 1,000-square-foot nga balay nga gama sa troso nga gitukod ni Joseph Smith Sr. ug sa iyang mga anak nga sila si Alvin ug Hyrum. Ang balay nahimutang sa amihanang bahin sa umahan, sa Lalawigan sa Palmyra.¹

Imahe

talan-awon sa gawas sa balay nga gama sa troso

Ang pag-ugmad og usa ka umahan moabot og katuigan nga pagtrabaho. Ang tibuok pamilya naghago sa pagpanghawan sa yuta, nananom ug nag-ani og lagutmon, nagkalot og mga tabay, naghimo og mga koral ug mga paril nga bato, ug nagtukod og usa ka kamalig ug uban pang mga lagkaw. Ang pamilya miani pa gani og mga duga gikan sa daghang mga kahoy sa maple diha sa umahan aron adunay mahimong sayo nga kinitaan.

Taliwala niining mga paningkamot sa pag-establisar og mabungahon nga uma, si Joseph Smith Jr., ang ikatulo nga anak nga lalaki, nakaangkon og pipila ka mga espiritwal nga kasinatian. Ang pamilyang Smith nakapamutol na og mga kahoy gikan sa mga 30 ka acres (12.4 ka ektarya) sa yuta pagka 1820, ang tuig sa Unang Panan-awon ni Joseph Smith. Ang panan-awon nahitabo sa dapit nga wala pa mahawani nga bahin sa umahan, tingali duol sa dapit nga ang mga Smith manghawan alang sa umaabot nga pananom. Naila karon isip Sagradong Kakahoyan, kining dapit nga kakahoyan adunay dagko, karaan nga mga punoan sa kahoy, ang uban may gitag-ason nga 100 ka pye ug gilapdon nga 4 ngadto sa 6 ka pye ang punoan. Ang baga nga libon nakahatag ni Joseph og usa ka tago nga dapit aron maka-ampo. Niadtong Septyembre 1823, si Joseph adunay laing espiritwal nga kasinatian atol sa tinglarag nga pag-ani sa pamilya sa trigo, mais, oats, ug beans. Ang anghel nga si Moroni mibisita niya samtang siya ug ang iyang mga igsoong lalaki nangatulog sa balay nga gama sa troso.²

Imahe

litrato sa kakahoyan nga dunay bidlisiw sa adlaw ug sa mga bato diha sa yuta

Ang pamilya sa wala madugay nagtukod og usa ka mas dako, lig-on nga balay diha sa umahan. Sa wala pa ang iyang sayo nga kamatayon niadtong Nobyembre 1823, gisugdan ni Alvin ang pagtukod sa balay aron makahatag og mas komportable ug mas haum alang sa nagkatigulang niyang mga ginikanan. Mga kaduhaon ang gidak-on sa balay nga gama sa troso, ang balay adunay daghang kwarto alang sa mga bisita ug naglakip sa dakong kusina. Niadtong Septyembre 1827, si Joseph ug ang iyang asawa, si Emma, nagpuyo uban sa pamilyang Smith sa balay sa dihang nakuha ni Joseph ang bulawan nga mga palid gikan sa Bungtod sa Cumorah. Dayon gitagoan ni Joseph ang mga palid sa lain-laing mga dapit libot sa balay ug sa umahan aron mapanalipdan kini gikan sa mga kawatan. Dinhi usab dapita, niadtong 1828, nga nahibaloan ni Joseph nga nawala ni Martin Harris ang 116 ka mga manuskrito nga mga pahina sa hubad sa Basahon ni Mormon.³

Imahe

talan-awon sa gawas sa puti nga balay nga dunay pula nga pultahan ug gikoral og kahoy sa gawas

Tungod sa kamatayon ni Alvin Smith, sa galastuhan sa balay, ug sa malimbungon nga pakigsabut sa lokal nga ahente sa yuta, ang kabus nga pamilyang Smith wala na makahimo sa ikaduhang pagbayad sa umahan ug nawad-an sa titulo niini niadtong 1826. Sa higayon nga ang Basahon ni Mormon namantala niadtong 1830, ang mga Smith mibalik ngadto sa balay nga gama sa troso ug nagtrabaho isip saop sa yuta nga ilang gihawanan ug giugmad.⁴ Permanenting gibiyaan sa pamilya ang dapit niadtong 1831, sa dihang mibalhin sila sa Ohio.

Niadtong 1905, ang Presidente sa Simbahan nga si Joseph F. Smith mibisita sa umahan, nga gipasiugdahan ang inisyatibo sa pagpalit sa yuta. Paglabay sa duha ka tuig, gipalit sa Simbahan ang umahan ug sa kaulahian nagsuhol ni Willard ug Rebecca Bean ug dayon sa uban aron sa pagdumala sa kabtangan. Ang gidaghanon sa mga bisita sa umahan ug sa Sagradong Kakahoyan nagkadaghan sa ika-20 nga siglo. Ang Simbahan nagpabilin nga nanag-iya sa kabtangan isip usa ka gigamit nga uma hangtud sa mga 1980, sa dihang gisugdan ang paningkamot sa pagpahiuli sa umahan.⁵

Karon ang Umahan sa Pamilya nga Smith ug ang Sagradong Kakahoyan abli na ngadto sa publiko alang sa mga giniyahan nga pagpanuroy. Kadaghanan sa orihinal nga umahan napahiuli na sa kanhi hitsura niini niadtong mga 1820, lakip na sa pagtukod og usab sa balay nga gama sa troso ug ang pagpahiuli sa balay (frame home). Ang kalikupan diha sa Sagradong Kakahoyan gidumala aron makahatag og palibut nga sama sa nasinati ni Joseph niadtong 1820.

May Kalabutan nga mga Hisgutanan: Asoy sa Unang Panan-awon ni Joseph Smith, Anghel nga si Moroni, Palmyra ug Manchester, Joseph Sr. ug Lucy Mack Smith Family, Joseph Smith Sr.