Mga Ward ug mga Stake

Sa dihang ang Simbahan naorganisar niadtong Abril 1830, wala pa kinahanglana ang halapad nga estraktura sa organisasyon, kay kadaghanan sa mga Santos magkapundok ra sa samang lugar. Samtang ang mga indibidwal ug pamilya mipasakop sa Simbahan sa mas lagyo nga mga dapit, giorganisar sila isip bulag nga mga kongregasyon, o “mga branch.” Dayon, sulod sa usa ka tuig sa pagkatukod sa Simbahan, ang pagpadayag mimando niining mga grupo sa mga tumutuo sa pagpundok ngadto sa usa ka dapit.¹ Ang mga sentro sa panagpundok sa kadugayan naestablisar diha sa Kirtland, Ohio, ug sa Distrito sa Jackson, Missouri. Ang mga Santos sa Missouri gilauman sa pagtukod sa siyudad sa Zion agig pagpangandam alang sa Ikaduhang Pag-anhi. Natakda ang Kirtland isip usa ka “stake sa Zion,” nagpasabut sa pasumbingay ni Isaias sa usa ka higante nga tolda nga magsilbing usa ka kapuy-an alang sa mga katawhan sa pakigsaad sa Dios.² Ang mga miyembro sa Simbahan sa duha ka mga dapit pundukanan gipanguluhan sa usa ka kapangulohan, bishop, ug halangdong konseho.³

Ang mga misyonaryo gipadala gikan niining mga dapit pundukanan aron sa pagsangyaw sa ebanghelyo sa tibuok Estados Unidos, Canada, ug, sa pagka 1837, sa Great Britain. Gilauman ang mga kinabig sa pagpundok ngadto sa Missouri o sa Ohio uban sa laing mga Santos sa Ulahing mga Adlaw kutob sa mahimo. Bisan pa niana, daghang gagmay nga mga branch sa Simbahan ang naporma diha sa mga dapit diin ang mga misyonaryo nakaangkon og kalampusan. Kini nga mga branch gipangalagaran sa Korum sa Napulog Duha ka mga Apostoles, nga nahatagan og responsibilidad sa paglihok isip “tigbyahe nga halangdon nga konseho” alang sa mga branch nga gawas na sa mga sentro sa pundukanan.⁴

Mas daghang stake, agig dugang sa Kirtland, ang namugna human ang mga Santos giabug gikan sa Distrito sa Jackson ug sa kaulahian gikan sa tibuok estado sa Missouri. Ang stake sa Nauvoo, Illinois, piho nga dako kaayo ug nagsilbing nag-unang sentro nga pundukanan atol sa sayo nga bahin sa mga 1840. Milambo ang siyudad sa ingon ka dako nga kini nabahin ngadto sa mga municipal nga mga ward, usa ka komon nga paagi sa pagpangalagad og dinagko nga mga siyudad nianang panahona. Kining mga ward nahimong usa ka importante nga paagi sa pagdumala sa buluhaton sa Simbahan ingon man usab sa sibiko nga mga kalihokan, diin kanunay nga nahiusa diha sa siyudad nga ang kadaghanan mga Santos sa ulahing mga adlaw.⁵ Niadtong 1842, ang halangdong konseho sa Nauvoo nakatukod og 10 ka mga ward ug mitawag og mga bishop sa matag ward. Ang mga bishop mao ang unang responsable sa pag-atiman sa mga kabus sa ilang tagsa-tagsa ka mga ward, ug ang mga ward gigamit isip paagi sa pag-organisar sa paghan-ay sa koleksyon ug pagpang-apud-apod sa mga ikapulo ug pagtrabaho sa templo. Padayon ang mga korum sa priesthood nga giorganisar diha sa stake level, ug ang mga Santos sa Nauvoo sa kasagaran magdungan sa pagsimba isip usa ka stake.⁶

Human ang kinadak-ang pundok sa Simbahan mibalhin sa lain na usab nga sentro nga pundukanan didto sa Utah sa ulahing bahin sa mga 1840, kining samang mga istraktura sa organisasyon nagpadayon. Ang Siyudad sa Salt Lake hapit diha-diha dayon naestablisar isip usa ka stake ug nabahin ngadto sa 19 ka mga ward. Sa tunga-tungang bahin sa 1847 ug sa iyang kamatayon niadtong 1877, ang naorganisar ni Brigham Young mikabat og 20 ka stake diha sa Utah ug sa Idaho, matagusa gilangkuban sa dagko nga heyograpikanhong dapit. Ang gagmay nga mga lungsod ug mga pinuy-anan sa kasagaran adunay ilang kaugalingong mga bishop, ug sa dihang sila nagkadaghan na, sila usab gibahin ngadto sa mga ward, matag usa dunay iyang kaugalingong bishop. Sa hinay-hinay, kadaghanan sa mga miyembro misugod sa pagsimba isip mga ward kay sa mga lungsod o mga stake.⁷

Niadtong 1877, si Brigham Young mimando og dakong kausaban sa pagpasayon sa mga organisasyon sa Simbahan, gi-establisar o gipalig-on ang kadaghanan sa mao gihapon nga sukaranang mga istraktura nga anaa sa Simbahan karon: ginagmay nga mga grupo isip mga branch nga dunay mga presidente sa branch, ang dagko nga mga grupo isip mga ward nga dunay mga bishop, ang tanan nahisakop sa sulod ug gidumala sa mga stake, nga pagadumalaon sa mga presidente sa stake.⁸

Sa mga dapit gawas niining mga stake, ilabi na diha sa mga misyon sa Simbahan, ang gamay nga mga branch padayon sa pag-amuma sa bag-ong mga kinabig ug kadtong dili makahimo sa pagpundok. Mga grupo sa mga branch magtigum sa regular nga gihimo nga mga komperensya, ug ang mga lider sa Simbahan ug mga miyembro magsugod sa paggamit sa termino nga komperensya sa paghulagway niining mga grupo sa mga branch. Ang mga komperensya gipangulohan sa usa ka presidente sa komperensya, kasagaran usa ka misyonaryo.

Sa sayong bahin sa ika-20 nga siglo, ang Presidente sa Simbahan nga si Lorenzo Snow ug Joseph F. Smith mihimo og mga kausaban sa mga stake sa Utah, gibahin ang dagko nga mga stake pinasikad sa ilang populasyon sa mga miyembro kay sa ilang distansya gikan sa usag usa. Pananglitan, ang 40,000 ka miyembro sa Stake sa Salt Lake nabahin ngadto sa unom nga gagmay nga mga stake. Kini nga mga pag-usab nakapahimo nga mas madumala na ang gidak-on sa mga ward ug makaawhag og mas dako nga partisipasyon tali sa mga lokal nga mga miyembro. Ang mga ward ug mga stake miapil sa pagpalig-on sa mga programa nga misangpot sa pagtukod og liboan ka mga meetinghouse. Ang mga ward nahatagan og access sa awtoridad sa pagkapari aron madumala ang mga ordinansa sa ebanghelyo, hingpit nga mapatuman ang mga programang auxiliary sa Simbahan, ug mahatag ang temporal nga mga panginahanglan sa mga Santos.⁹

Ang mga dapit nga gawas na sa palibut sa Utah, mga misyon, nga gidumala sa mga presidente sa misyon, maoy nagdumala sa mga operasyon sa Simbahan. Ang gatusan ka mga branch sa mga misyon, nga karon nagkatag-katag na sa hapit tanang kontinente, mipadayon sa pagtubo samtang ang mga kinabig mas gi-awhag nga magpabilin diha sa ilang mga yutang natawhan kay sa magpundok ngadto sa Utah. Ang mga komperensya (mga grupo sa mga branch) sa mga misyon giusab ang ngalan ngadto sa mga distrito. Sa pagsugod sa mga tuig 1920, ang mga lider sa Simbahan naka-establisar og mga stake gawas sa kasadpang Estados Unidos. Ang una na-establisar sa California, sa amihanang Mexico, ug sa silangang Estados Unidos, dayon usa ka gamay nga grupo sa Pasipiko ug Uropa. Niadtong mga 1970, ang mga lider sa Simbahan misugod sa pag-establisar og mga stake sa tibuok kalibutan, nga ang matag stake nagdumala sa daghang mga ward o mga branch.¹⁰

Ang mga stake ug mga ward nagtanyag og lig-ong pagbati sa komunidad ug pagkahisakop ngadto sa mga miyembro, kinsa kadaghanan kanila nagpuyo karon sa busy, nga siyudadnon nga mga kahimtang o sa dapit diin ang mga Santos sa Ulahing mga Adlaw diyutay ra. Sa lokal nga lebel, ang mga bishop ug mga miyembro sa ward nag-amuma ug nangalagad sa usag usa samtang sila naningkamot sa pagpuyo sumala sa mga baruganan sa ebanghelyo. Kadaghanan sa mga korum sa pagkapari ug mga auxiliary sa Simbahan giorganisar sa ward nga lebel. Ang mga linya sa eklesiastikanhong mga awtoridad nagdugtong sa mga ward ngadto sa mga kapangulohan sa stake ngadto sa Kinatibuk-ang mga Awtoridad ug mga Opisyal sa Simbahan.