Nahaunang mga Misyonaryo

Mga kaparyentihan ug mga higala ni Joseph Smith naghinam-hinam na sa pagpakigbahin sa Basahon ni Mormon bisan wala pa siya mahuman sa paghubad niini.¹ Sa dihang migawas na sa printahanan ang unang mga pahina, ang kalalakin-an sama ni Solomon Chamberlin nagsangyaw gamit ang inimprintang mga panid nga na-proof.² Si Samuel Harrison Smith, ang igsoon ni Joseph, miadto sa usa ka misyon sa pagsangyaw sa wala madugay human sa unang miting sa Simbahan. Nagdala siya og usa ka sakong mga kopya sa Basahon ni Mormon aron ibaligya. Ang mga misyonaryo sama ni Samuel Smith nagpahigayon og ginagmayng mga miting, o ginagmayng panagpundok sa mga panimalay, diin namulong sila mahitungod sa Basahon ni Mormon ug sa pagpahiuli sa ulahing adlaw.³ Ang kalalakin-an ug kababayen-an impormal nga mipakigbahin sa ebanghelyo sa ilang mga higala ug mga silingan, sa pakig-atubang sa tawo o pinaagi sa sulat.⁴

Ang unang mga miyembro sa Simbahan gilauman nga modala sa Basahon ni Mormon ngadto sa mga American Indian.⁵ Usa ka pagpadayag niadtong 1830 mitawag ni Oliver Cowdery ug tulo ka mga kaubanan sa usa ka misyon ngadto sa mga “Lamanites.” Mibiyahe sila ngadto sa teritoryo sa American Indian lapas sa utlanan sa kasadpan nga bahin sa Missouri. Bisan og ang legal ug politikanhon nga kahimtang nianang panahona nagpugong sa grupo sa pagpadangat sa pagsangyaw sa mga komunidad sa American Indian, nagmalampuson sila didto sa Kirtland, Ohio. Sulod sa mga semana sa ilang pag-abut sa Kirtland, dinosena ka mga indibidwal ang ilang nabunyagan. Sa wala madugay ang Simbahan nakatagamtam og lig-on nga komunidad sa bag-ong mga kinabig didto sa Kirtland, ang kadaghanan nakaserbisyo mismo og mga mubo nga mga misyon.⁶

Ang nahaunang mga misyonaryo kanunayng nagsugod sa ilang biyahe sa pagsangyaw sa ilang mga kaparyentihan ug dayon mipadayon sa ilang misyon pinaagi sa pagpamaligya o pagpahulam og mga kopya sa Basahon ni Mormon ngadto sa tanang kinsa modawat niini. Ang Basahon ni Mormon gipresentar isip ebidensya sa pagtawag ni Joseph Smith sa pagpahiuli sa Simbahan ni Kristo. Sa wala madugay gisugdan sa mga misyonaryo sa pagsulat diha sa mga tracts (mga pamphlet nga gituyo alang sa pag-proselyte) sa pagpakatap sa pulong sa pagpahiuli sa ebanghelyo. Gisentro ang ilang mensahe sa pagpahiuli sa orihinal nga Simbahan ni Kristo, ang kaimportante sa espiritwal nga mga gasa isip ebidensya sa tinuod nga pagtuo, ug ang pagpundok sa mga mahinulsulon nga mga kalag aron maandam sa Ikaduhang Pag-anhi ni Jesukristo.

Usa sa unang mga pagpadayag ni Joseph Smith didto sa Kirtland niadtong 1831 misugo sa mga misyonaryo nga “magtinagurha” sa pagpanglakaw, ug ang mga tawag sa misyon kanunayng ipadangat ngadto sa managkompanyon sa pagtrabaho sa piho nga mga dapit.⁷ Daghan sa unang mga misyonaryo nakadawat sa ilang mga tawag pinaagi sa pagpadayag nga nadawat ni Joseph Smith. Kini nga mga pagpadayag gibalik-balik nga mga instruksyon nga nahatag ni Jesukristo sa Iyang mga disipulo sa karaang panahon—nga sila mobiyahe nga walay “puntil ni puyô” ug “itaktak ang mga abug” sa ilang mga tiil sa ilang pagbiya sa lungsod o balay niana nga misalikway kanila .⁸ Sa pagbiyahe nga “walay puntil ni puyô” nagpasabut nga dili magdala og pitaka o kwarta, apan, komon niadtong panahona, ang paghangyo sa mga tigpaminaw alang sa temporaryong kwarto ug kasak-an. Kon makasugat ang mga misyonaryo og grabing pagsalikway, ilang itaktak ang ilang mga tiil agig timaan nga sila nakapamatuod ug mipadayon. Samtang nagkalig-on ang mga misyon ug na-establisar ang mga branch sa daghang mga dapit sa ulahing bahin sa mga tuig 1800, kini nga mga buhat dili na kaayo komon. Talagsa nalang nga ang mga misyonaryo mobiya sa naestablisar nga mga dapit, ug mihimo sila og mga pinansyal nga mga pagsakripisyo sa dili pa mobiya aron motabang nga mapundohan ang ilang kaugalingong misyon.⁹

Ang mga miting gidumala sa mga Elder atol sa ilang mga pagbiyahe sa misyon, ug sulod sa pipila ka mga tuig, ang mga branch sa Simbahan naestablisar sa tibuok silangang Estados Unidos ug sa Canada. Usa sa unang mga tahas nga gisalig ni Joseph ngadto sa mga Apostoles sa dihang giorganisar niya ang Korum sa Napulog Duha niadtong 1835 mao ang paghan-ay niining mga branch ug ipahibalo ang pisikal nga panagtigum sa mga kinabig ngadto sa Zion.¹⁰ Ubos sa direksyon ni Joseph, ang Napulog Duha sukad niana midumala sa kinatibuk-ang misyonaryo nga buhat.

Ang British Mission, nga gipasiugdahan sa mga sakop sa Korum sa Napulog Duha sa ulahing bahin sa mga tuig 1830 ug sayong bahin sa 1840, maoy mauswagong sentro sa kalamboan sa Simbahan. Ang misyon miresulta sa liboan ka mga pagbunyag ug nakasuporta sa paglalin sa hilabihang kadaghan sa panagpundok ngadto sa mga dapit sama sa Nauvoo, Illinois. Sa Britanya, ang Napulog Duha mitrabaho sa paglig-on sa mga branch ug mga komperensya (mga grupo sa mga branch). Nakigtambayayong sa ubang mga misyonaryo, ilang gilibut ang Britanya, nagsangyaw sa ebanghelyo ug giandam ang mga kinabig sa paglalin ngadto sa Amerika. Sa dihang ang unang mga Santos sa Ulahing mga Adlaw misugod sa pagpamuyo sa Walog sa Salt Lake, usa ka dakong proporsyon sa mga kinabig naggikan sa British Mission.¹¹

Ang mga Santos sa Britanya miorganisar og grupo sa pagpang-apud-apod og mga pamphlet niadtong mga tuig 1850, ang mga lalaki ug babaye miapud-apod sa mga pamphlet nga nagpasabut sa mga gituohan sa mga Santos sa Ulahing mga Adlaw. Ang mga kababayen-an maoy epektibo kaayo niining paningkamot ug nahimo nga, sa usa ka pagsabut, ang unang mga sister nga mga misyonaryo, apan dugay na kaayo kini sa wala pa nakadawat ang mga babaye og pormal nga mga tawag sa misyon.¹²

Niadtong 1842, si Joseph Smith misulat bahin sa mga misyonaryo nga nagtukod sa “ang sumbanan sa kamatuoran” sa “Germany, Palestine, New Holland, sa East Indies, ug sa uban nga mga lugar.”¹³ Ang mga misyon niining mga lugara ug sa uban nga mga dapit giplano, apan ang mga misyonaryo wala pa makaabut o nakaestablisar og permanenting mga branch dinhi niining mga lokasyon. Bisan sa pipila ka higayon sa pagsulay sa pag-establisar og mga misyon gawas sa Estados Unidos ug sa Europa atol sa kinabuhi ni Joseph Smith limitado ra ang nahimong bunga, kadaghanan niining tag-as nga mga plano nagpabilin nga walay katumanan hangtud sa mga tuig 1850.

Si Orson Hyde, sakop sa Korum sa Napulog Duha ka mga Apostoles, mibiyahe ngadto sa Jerusalem aron mopahinungod sa Balaan nga Yuta alang sa pagbalik sa mga Judeo, bisan og wala niya masugdi ang permanenting misyon didto.¹⁴ Sa sinugdanan sa mga tuig 1850, usa ka malamboon nga misyon didto sa Denmark nagsilbing ganghaan ngadto sa bag-ong mga misyon sa Finland, Sweden, Norway, ug Iceland. Si Addison Pratt, kinsa nangulo sa unang mga misyon ngadto sa Pasipiko, nakaestablisar og usa ka branch sa Tahiti, ug ang iyang asawa, si Louisa Barnes Pratt, nakigtambayayong ni Caroline Crosby ug sa uban nga mga misyonaryo aron sugdan ang usa ka eskwelahan alang sa mga bata ug sa pagtudlo sa mga kababayen-an sa isla og mga kahanas sa mga gimbuhaton sa panimalay.¹⁵ Ang mga misyon sa sayong bahin sa mga tuig 1850 sa China, India, Chile, France, Italy, ug sa South Africa miresulta og gamay lang nga gidaghanon nga mga kinabig, kadaghanan mahimong nahilayo sa Simbahan o milalin ngadto sa Utah. Daghan niining mga lokasyon kinahanglang magpaabut og mga dekada sa dili pa ang unang permanente nga presensya sa mga misyonaryo ug ang mga branch sa Simbahan maporma.

Ang mga misyonaryo sa tunga-tungang bahin sa ika-19 nga siglo kasagaran mga tawo nga minyo nga naa sa mga 30 o sa mga 40 nga panuigon. Sa kasagaran gitawag sila sa mga miting sa komperensya sa Simbahan ug kanunayng mobiya sa ilang mga asawa, mga anak, ug mga problema sa negosyo aron moserbisyo sulod sa usa ngadto sa tulo ka tuig. Ang edad sa mga misyonaryo ug ang gidugayon sa ilang pagserbisyo nagkalain-lain, anaa ra gayud sa misyonaryo ang pagtakda sa ilang kaugalingon nga petsa sa pag-release. Ang pipila sa mga babaye miuban sa ilang mga bana. Kasagaran kini mga asawa sa mga presidente sa misyon o sa ubang mga misyonaryo kansang tawag modala kanila ngadto sa hilit nga mga lokasyon sulod sa dugay nga panahon. Ang mga misyonaryo kasagaran giorden ngadto sa katungdanan sa Seventy diha sa Melchizedek Priesthood ug kanunayng matawag sa pagserbisyo og misyon sa ilang yutang natawhan o sa yutang natawhan sa ilang mga ginikanan. Ang British Mission mao ang labing dako nga misyon kon hisgutan ang gidaghanon sa mga misyonaryo ug mga kinabig, apan ang mga misyon sa Estados Unidos makanunayon nga nagtubo sa kaulahian nga bahin sa mga tuig 1800.

Usa ka dekada ang milabay human miabut ang mga Santos sa Walog sa Salt Lake, mitumaw ang kainit taliwala sa Simbahan ug sa gobyerno sa Estados Unidos. Ang Gubat sa Utah sa 1857–58 misangput sa usa ka temporaryo nga paghunong sa misyonaryo nga buhat nga milungtad ngadto sa mga tuig 1860. Mipadayon ang mga paningkamot sa pagsangyaw didto sa Britanya ug sa kasadpang Europa apan mihinay sa Estados Unidos ug sa bisan asa nga dapit. Ang kasarangan nga gidugayon sa usa ka misyon gius-osan sa dili moabut og tuig. Bisan human niini nga pagkahunong, ang misyonaryo nga buhat hinay nga mitubo samtang ang mga misyonaryo nag-atubang og oposisyon tungod sa paghimo sa mga Santos sa dinaghan nga kaminyoon. Bisan pa niana, ang mga lider sa Simbahan mipadayon sa pag-organisar og mga misyon nga dunay gitakda nga mga hiyograpikanhong mga utlanan ug mga presidente sa misyon ug gipadaghan ang pagtawag sa batan-ong mga lalaki (ug sa katapusan sa mga babaye) isip full-time nga mga tig-proselyte aron matubag ang panginahanglan sa mga misyonaryo sa tibuok kalibutan.¹⁶