George Q. Cannon

Sa pundok sa labing inila nga Santos sa Ulahing mga Adlaw sa panahon sa ika-19 nga siglo, si George Q. Cannon miserbisyo isip editor ug tigmantala, negosyante, magtutudlo, miyembro sa Korum sa Napulog Duha ka mga Apostoles, delegado sa teritoryo ngadto sa Kongreso sa Estados Unidos, ug Magtatambag sa Unang Kapangulohan sa upat ka Presidente sa Simbahan. Ang iyang makugihon nga pag-apil sa mga kalihukan sa Simbahan ug sa komunidad mibutang kaniya diha sa unahan sa katilingban sa Utah, ug ang iyang personal nga mga panulat— nga mikabat og hapit 2.5 milyon ka mga pulong—nagrepresentar sa usa sa labing lawom nga panan-aw ug gidetalye nga mga rekord sa kasaysayan sa mga Santos sa Ulahing mga Adlaw.¹ Sulod sa 50 ka mga tuig siya miapil sa pagdumala sa Simbahan samtang ang mga Santos mitrabaho sa pagtukod sa Zion didto sa kasadpang Estados Unidos ug sa tibuok kalibutan.

Natawo si Cannon sa Liverpool, Inglatera, sa 1827. Siya, iyang mga ginikanan, ug iyang manghud nga mga igsoon nga husto na sa edad gibunyagan sa 1840. Duha ka tuig ang milabay, si Cannon milalin uban sa iyang pamilya ngadto sa Estados Unidos, apan ang iyang inahan namatay samtang nagtabok sa Kadagatan sa Atlantiko. Sa 16 anyos ang panuigon, si Cannon nagbansay sa kahanas diha sa usa ka imprintahanan sa Nauvoo, Illinois. Wala madugay kulang og gamay nga mausa ka tuig ug tunga, namatay ang iyang amahan, nagbilin kaniya ug sa iyang mga igsoon nga mga ilo’ng tuwapos. Dayon siya mibiyahe padulong sa kasadpan sa gibaktasan sa mga pioneer ug miabut sa Walog sa Salt Lake sa tinglarag sa 1847. Sa 1850 mitrabaho siya sa minahan sa California isip usa ka “bulawang misyonaryo.”² Gikan sa minahan, gitawag siya alang sa usa ka proselyting nga misyon ngadto sa Hawaii, diin miserbisyo siya sulod sa upat ka mga tuig isip usa sa unang mga misyonaryo sa mga Santos sa Ulahing mga Adlaw ngadto sa mga isla. Misugod siya didto sa paghubad sa Basahon ni Mormon ngadto sa pinulongang Hawaiian, ug human mibalik sa kinadak-ang yuta, gimantala niya ang iyang hubad kaniadtong 1856.³

Sa labing dali human sa iyang misyon, giminyoan ni Cannon si Elizabeth Hoagland diha sa Siyudad sa Salt Lake. Human sa napulog tulo ka mga bulan, ang magtiayon malipayong midawat sa ilang unang anak, kinsa namatay wala madugay niana nga tuig. Nanganak si Elizabeth og 10 pa ka mga bata sulod sa 22 ka mga tuig, ang 6 nabuhi lapas sa pagkamasuso.⁴ Sa 1858, sa pagtugot ni Elizabeth, misukna og kaminyoon si Cannon ngadto ni Sarah Jane Jenne, ug ang duha naminyo niana nga tuig. Ang iyang kaminyoon ngadto ni Sarah mao ang una sa lima ka dinaghang kaminyoon ni Cannon. Sa nanglabay nga mga katuigan, mitubo ang iyang pamilya ngadto sa 43 ka mga anak (lakip sa pipila kinsa gisagop), 35 kinsa miabut sa pagkahamtong. Ang daghan niya nga mga responsibilidad nakahimo og kalisud sa pagpangita og panahon uban sa iyang mga anak, ug si Cannon kasagarang migamit og mga sulat ug mga interbyu aron sa pagpakigsulti kanila.

Sa 1860 gi-orden ni Brigham Young si George Q. Cannon nga Apostol ug gisugo siya sa pagdumala sa tibuok Misyon sa Uropa. Sa Inglatera, gipalambo ni Cannon ang pagpadagan sa imprinta sa misyon pinaagi sa pagpalit og usa ka de bapor nga imprintahanan ug sa pagdala sa tanang mga proyekto gikan sa mga kontrata sa gawas ngadto mismo sa imprintahanan. Gitarung usab niya ang mga panalapi, sistema sa paglalin, buhat sa misyonaryo, tiningub nga pagdumala sa misyon.

Gihatagan og bili ni Cannon ang edukasyon, ug sulod sa usa ka dekada sa iyang pagbalik sa Utah sa 1864, iyang gilunsad ang Juvenile Instructor, ang unang magasin alang sa mga bata ug mga kabatan-onan sa mga Santos sa Ulahing mga Adlaw, mitukod og baligyaanan sa mga libro ug imprintahanan nga sa kadugayan nahimong Deseret Book Company, ug nahimong unang superintendente sa Deseret Sunday School Union (ang nag-una sa karon nga Churchwide Sunday School nga programa).⁵

Miserbisyo si Cannon isip ang teritoryo nga delegado sa Utah ngadto sa Kongreso sa Estados Unidos gikan sa 1873 ngadto sa 1882 ug mitrabaho sulod sa mga katuigan aron sa pagpanalipod sa mga Santos sa Ulahing mga Adlaw batok sa mga balaod sa federal nga gitumong sa dinaghang kaminyoon ug sa ubang bahin sa mga kinabuhi sa mga Santos. Kasagaran siyang namulong sa importanting mga hitabo ug sa atubangan sa mga husay sa kongresso. Samtang ang pagpatuman sa federal batok sa dinaghan og asawa mikusog, si Cannon milayas kauban sa Presidente sa Simbahan nga si John Taylor ug sa ubang mga pangulo aron sa pagpanalipod sa iyang pamilya. Sa 1886 gidakop sa mga awtoridad si Cannon tungod sa paghimo sa dinaghang kaminyoon, ug sa 1888 nahukman nga sad-an ug gisilutan og lima ka bulan nga pagkabilanggo.

Sa 1890 mitabang si Cannon sa Presidente sa Simbahan nga si Wilford Woodruff sa paghimo sa Manifesto, nga migiya ngadto sa katapusan sa tinugutan sa Simbahan nga dinaghang kaminyoon. Iyang gipahayag ang unang pagpasabut kabahin sa Manifesto diha sa usa ka pakigpulong didto sa Salt Lake Tabernacle ug maisugon nga gipanghimatuod ang iyang kaandam sa pagbarug alang sa iyang relihiyusong lig-on nga mga pagtuo—ang iyang kaugalingong pagkabilanggo isip kalig-unan—ug mipahayag sa iyang pagpamatuod nga ang Balaang Espiritu anaa ni Presidente Woodruff.⁶

Mipadayon sa pagserbisyo si Cannon diha sa Unang Kapangulohan, ug sa 1900 mibisita siya sa Hawaii aron sa pagsaulog sa ika-50 nga anibersaryo sa pag-abut sa mga misyonaryo. Sa pagkasunod nga tuig, nasakit siya og influenza ug mibalhin ngadto sa Amihanang California aron sa pagpabaskog. Samtang ang iyang kondisyon nagkagrabe, gitawag niya ang iyang pamilya og dungan ug mipahayag og mga panalangin sa iyang mga anak. Namatay siya sa Abril 12, 1901, sa 74 ka tuig nga panuigon.

Kalabut nga mga Hisgutanan: Sunday School, Church Periodicals, Anti-polygamy Legislation, Succession of Church Leadership