Templo sa Kirtland

Sa usa ka pagpadayag niadtong Agosto 1833, ang Ginoo misugo sa mga Santos sa Ulahing mga Adlaw sa Kirtland, Ohio, nga “mosugod og usa ka buhat sa paglaraw ug sa pagpangandam sa usa ka sinugdanan ug tukuranan sa dakbayan sa istaka sa Zion, dinhi sa yuta sa Kirtland, sugod diha sa akong balay.”¹ Sa misunod nga tulo ka tuig, ang mga Santos mipahinungod og dako kaayo sa ilang panahon ug talento sa pagtukod sa Balay sa Ginoo, nga sa kaulahian naila isip ang Templo sa Kirtland.²

Imahe

Nahaunang mga litrato sa Templo sa Kirtland

Ang Unang Kapangulohan niadtong panahona—si Joseph Smith, si Sidney Rigdon ug si Frederick G. Williams—nakakita sa gambalay [building] diha sa panan-awon niadtong 1833 ug midumala sa pagpahiluna sa bato sa pamag-ang [cornerstone] sa templo sa usa ka seremonya nga gipahigayon niadtong Hulyo 23. Ang gipadayag nga desinyo nagpahayag alang sa sukod sa sulod nga 55 pye por 65 ka pye ang gitas-on nga dunay dakong lawak hugpunganan sa unang andana alang sa pagpangaladad sa sakrament, pagsangyaw, pagpuasa, ug pag-ampo, ug laing dako nga hawanan sa ikaduhang andana alang sa tulunghaan sa mga anciano [elders]. Ang sa gawas parehas og estilo sa New England Protestant, apan ang sulod mipaila sa mga lahi nga matang, ilabina ang pagkahan-ay sa duha ka nagsunod nga upat ka han-ay nga mga pulpito sa matag tumoy sa mga lawak hugpunganan alang sa mga molingkod nga kapangulohan sa Melchizedek ug Aaronic Priesthood.³

Imahe

Litrato sa mga pulpito sa ikaduhang andana sa hawanan sa hugpunganan sa Templo sa Kirtland

Usa ka gi-quarry nga anapog pipila ka mga milya gikan sa templo nakahatag og bato alang sa mga bongbong sa templo, ug usa ka bansuhan nga gitukod ug gipadagan pinaagi sa pahinungod nga serbisyo sa mga Santos nakasuplay og kahoy alang sa sulod. Hanas nga mga karpentero, lakip ni Jacob Bump, Truman Angell ug Brigham Young, migamit sa ilang kabatid sa pagpanindot sa gambalay. Ang mga bata mipundok sa mga tinagsip sa mga binuak ug mga tsina aron masagol ngadto sa finishing sa gawas sa templo.⁴

Sa hapit na makompleto ang templo, si Joseph Smith nakigtigum diha sa estraktura uban sa mga kalalakin-an nga mga Santos sa ulahing mga Adlaw nga naorden sa priesthood sa Enero ug Pebrero aron sa pag-andam alang sa pagpahinungod. Ang naghugpong nga kalalakin-an dungan nga nag-ampo, nakasinati og espirituhanon nga mga pagpakita, miambit sa sakrament, ug miapil sa sagrado nga mga ritwal, lakip sa seremonya sa paghugas ug pagdihog. Niadtong Enero 21, 1836, si Joseph Smith nakasinati og usa ka panan-awon sa celestial nga himaya nga karon makita sa Doktrina ug mga Pakigsaad 137.

Niadtong Marso 27, 1836, ang mga Santos nagkapundok para sa pagpahinungod sa templo. Ang mga Santos miambit sa sakrament ug nakapaminaw og pipila ka mga wali. Mihalad si Joseph Smith og usa ka pag-ampo sa pagpahinungod nga iyang nadawat pinaagi sa pagpadayag (karon D&P 109), diin gisundan sa mga Santos pinaagi sa pagsinggit sa Hosanna ug pagkanta sa “The Spirit of God [Ang Espiritu sa Dios],” usa ka himno nga sinulat ni William W. Phelps alang sa okasyon. Ang pahinungod nga pag-ampo, Pagsinggit sa Hosanna, ug himno ni Phelps nahimong sumbanan nga mga elemento sa sunod-sunod nga mga kahimoan sa pagpahinungod sa mga templo sa Santos sa Ulahing mga Adlaw.⁵

Atol sa seremonya sa pagpahinungod ug sa mga miting sa mosunod nga semana, mga Santos sa Ulahing mga Adlaw nakasinati og talagsaong pagbubo sa Balaang Espiritu ug dalaygon kaayo nga espirituhanong panghitabo diha sa templo nga mituman sa usa ka saad sa nahaunang mga pagpadayag nga “tugahan” sa Ginoo ang mga Santos sa “gahum gikan sa kahitas-an.”⁶ Ang labing halandumon, ang usa ka panan-awon ni Jesukristo ug pipila sa mga propeta sa Daang Tugon nga nakita ni Joseph Smith ug Oliver Cowdery misaulog sa tibuok kalibutan nga panagpundok sa Israel ug sa gipahiuli nga kahingpitan sa gahum sa pagbugkos.⁷

Ang templo nagamit isip usa ka sentro sa pagsimba sa mga Santos sa Kirtland, nagpahigayon og mga miting alang sa adlaw nga Igpapahulay, pag-ampo, ug pagpuasa. Ang mga lider sa Simbahan ug mga misyonaryo nagkapundok alang sa pagtuon sa mga hilisgutan nga naglakip sa pagbasa, pagsulat, kasaysayan, ug heyograpiya. Ang katapusan nga sesyon sa Tulunghaan sa mga Propeta diha sa Kirtland (gitawag usab og mga Tulunghaan sa mga Anciano) gipahigayon didto sa templo.⁸

Usa ka tuig human sa pagpahinungod sa templo, ang krisis sa pinansyal nakaapekto sa mga Santos sa Kirtland.⁹ Nasuko sa mga lider sa Simbahan, usa ka pundok nga gipangulohan sa usa ka masupilon nga si Warren Parrish misulay sa pagsakmit sa gambalay. Pipila ka bulan ang milabay, usa ka wala hiilhi nga arsonista misunog sa gambalay. Ang mga hulga sa kapintas ug ubang mga kasamok maoy nagtukmod sa mga lider sa Simbahan ug sa daghang mga Santos mibiya sa Ohio paingon sa Far West, Missouri. Ang pipila nalang ka mga Santos nga nagpabilin sa Kirtland mipadayon sa pagsimba ug pagpundok diha sa templo.¹⁰

Human sa kamatayon ni Joseph Smith niadtong 1844, kadaghanan sa mga miyembro sa kongregasyon sa Kirtland mihangop sa “Bag-ong Organisasyon,” usa ka kalihokan nga sa katapusan nahimong Reorganized Church of Jesus Christ of Latter Day Saints, gipangulohan sa anak ni Joseph nga si Joseph Smith III. Niadtong 1880, ang korte miila sa manununod ni Joseph Smith isip kadtong mga naghupot sa titulo sa gambalay, ug duha ka dekada ang milabay, ang Simbahan nga RLDS (sa kadugayan mao ang Community of Christ) ang nakapanag-iya pinaagi sa legal nga pag-angkon sa padayon nga paggamit (nailhan isip nahisupak nga pagpanag-iya). Ang Community of Christ miatiman sa gambalay sukad nianang panahona.¹¹