Quincy, Illinois, Pinuy-anan

Ang siyudad sa Quincy, Illinois, mao ang labing nailhan sa kasaysayan sa Mormon isip usa ka dapit nga relokasyon alang sa mga bakwit nga mga Santos sa Ulahing mga Adlaw human sila gipapahawa gikan sa Missouri niadtong 1839. Ang mga tawo sa Quincy ang unang nakahibalag sa mga Mormon sa dihang ang mga grupo sa mga Santos sa Ulahing mga Adlaw miagi sa balangay padulong sa Missouri sa mga 1834 ug 1838. Sa dihang ang mga Mormon giabug gikan sa Missouri sa tingtugnaw sa 1838–1839, liboan ka mga nahawa nga mga Santos mibiya sa estado, nagkalaw padulong sa silangan tabok sa mikaging nga Suba sa Mississippi ug temporaryong mipahiluna didto sa Quincy. Samtang miinit ang panahon, ang uban miabut, gamit ang mga balsa (skiff), sakayan, o gagmay nga mga bangka aron makatabok sa suba hangtud miabli ang mga ferry sa mubong panahon. Tungod sa pagpangbut sa mga namakwit nga Mormon, ang populasyon sa Quincy midako gikan sa 800 pagka 1835 ngadto na sa 2,300 pagka 1840.

Ang Quincy Democratic Association dayag nga mihimaraut sa mga Taga-Missouri tungod sa pagkadili-makiangayon ngadto sa mga Santos ug mipasalig sa pagtabang sa mga namakwit nga Mormon. Gipundok nila ang mga donasyon, mipahimutang og mga kabalayan, ug nakig-alayon sa ubang lokal nga komunidad sa paghatag og tabang alang sa naglisud nga mga Santos. Si Eliza R. Snow midayeg sa kamanggihatagon ug kamatinabangon sa mga lungsuranon diha sa iyang balak nga“To the Citizens of Quicy,” gipasalamatan ang “Mga Anak nga mga lalaki ug mga Babaye sa Kapuangod” alang sa pagsangkap sa “dinalian nga panginahanglan sa gisakit ug kabus.”¹

Atol sa sunod tuig, ang kadaghanan sa mga Santos nga mipuyo sa Quincy mibalhin sa 45 ka milya ngadto sa Commerce, Illinois, diin ilang nakaplagan ang siyudad sa Nauvoo. Subo lang nga, sa 1845, usa ka komite gikan sa Quincy mibiyahe ngadto sa Nauvoo aron pabiyaan sa mga Santos ang estado.

May Kalabutan nga mga Hisgutanan: Mormon-Missouri War of 1838; Extermination Order; Nauvoo (Commerce), Illinois