“Pagdaginot,” Mga Hisgutanan sa Kasaysayan sa Simbahan
“Pagdaginot”
Pagdaginot
Samtang ang pagtukod sa agianan sa tren sa Amihanang Amerika tabok ngadto sa laing kontinente hapit na mahuman sa hinapos sa mga 1860, ang mga pangulo sa Simbahan mabalak-on mahitungod kon unsaon niini pag-impluwensya ang espiritwal ug ekonomikanhong mga kinabuhi sa mga Santos sa Ulahing mga Adlaw diha sa pioneer nga Utah.1 Atol sa usa ka paglibut sa amihanang mga pamuy-anan sa Utah, naguol si Brigham Young nga pipila ka mga sakop sa Simbahan nagpasulabi sa pagpuyo, nag-usik sa talagsaon nga mga kapanguhaan, ug nakalimtan ang mga sumbanan sa Zion. Gipahayag niya ang iyang mga kabalaka ngadto ni Mary Isabella Horne, kinsa iyang gisugo sa paggiya og usa ka “pagdaginot” nga paningkamot aron sa pag-awhag sa mga babaye nga mahimong mas daginutan sa mga pagkaon ug saput, pagpalambo og panginabuhian diha sa panimalay [home industry], pagpaninguha og ekonomikanhong kahamugaway sa kaugalingon, ug pagdugang og mga relihiyusong kalihokan.2 Ang pulong nga pagdaginot nagpasabut ilabina sa pagpakunhod sa mga galastuhanan.3 Sama pananglit, usa ka bantugang magtutudlo, si Catherine Beecher, mitudlo sa batan-ong mga babaye sa pagdaginot gikan sa wala kinahanglana nga mga katagbawan isip kabahin sa pagpalambo og usa ka maayo nga panalapi sa panimalay.4
Hulagway ni Mary Isabella Horne, unang pangulo sa pagdaginot nga kalihokan.
Gitabangan ni Eliza R Snow, si Mary Isabella Horne nga mitukod sa Ladies’ Cooperative Retrenchment Society sa Pebrero 10, 1870. Ang punoang buhatan sa organisasyon diha sa Siyudad sa Salt Lake, apan ang pangulong mga babaye milibut sa Teritoryo sa Utah nagtudlo sa mga babaye mahitungod sa mga baruganan sa pagdaginot. Ang kalihokan nakakuha sa suporta sa komunidad tungod sa mga sumbanan sa pagdaginot ug giapil ang lokal nga mga ward sa Relief Society sa tibuok dapit.5
Gihangyo usab ni Brigham Young ang iyang mga anak nga babaye sa paghatag og maayong panig-ingnan sa pagdaginot alang sa batan-ong Santos sa Ulahing mga Adlaw nga mga babaye. Misulat og mga resolusyon si Eliza R. Snow nga nagpalambo og yano, madaginutong mga estilo sa paninina. Ang mga anak nga babaye ni Young miboto sa pagsagop niadto nga mga resolusyon ug nagtukod og Young Ladies’ Department sa Ladies’ Cooperative Retrenchment Association.6 Ang ubang gagmay nga mga grupo sa pagdaginot gitukod ug gidumala sa Senior Ladies’ Cooperative Retrenchment Association. Sulod sa pipila ka mga tuig, Ang Young Ladies’ Department migiya ngadto sa pagkatukod sa Young Ladies’ Mutual Improvement Association, usa ka tibuok Simbahan nga programa alang sa batan-ong mga babaye.7 Ang Senior Ladies’ Retrenchment Association mipadayon ubos sa nagkalain-laing mga ngalan hangtud sa mga 1904.8
Kalabut nga mga Hisgutanan: Brigham Young, Eliza R. Snow, Pioneer Settlements, Railroad, Relief Society, Young Women Organizations, Young Men Organizations