Templo sa Salt Lake

Niadtong Hulyo 1847 atol sa unang wali sa adlawng Igpapahulay nga gihatag sa Walog sa Salt Lake, si Apostol George A. Smith mideklarar nga ang usa ka templo diha sa walog motuman sa panagna ni Isaias nga “ang bukid sa balay sa Ginoo pagatukuron” sa ulahing mga adlaw.¹ Wala madugay human niana, nakita ni Brigham Young sa usa ka panan-awon ang dapit diin pagatukuron kini nga templo.² Paglabay sa sobra sa upat ka dekada, ang mga Santos mikompleto ug mipahinungod sa Templo sa Salt Lake, usa ka nagbansiwag nga timailhan alang sa ilang komunidad sa Zion.

Isip kabahin sa seremonya sa groundbreaking [pagsugod sa konstruksyon] niadtong Pebrero 14, 1853, ang mga musikero mipasundayag sa inila nga Scottish nga kanta “Auld Lang Syne,” nga nagtimaan og bag-ong panahon.³ Pagka-Abril 6, ang mga bato sa pamag-ang gipahimutang ug gipahinungod. Si Truman O. Angell, usa ka karpintero nga nahimong arkitekto, nakigtambayayong ni Brigham Young sa pagdesinyo og gambalay nga mituman sa panan-awon ni Young. Sama sa Templo sa Nauvoo, ang desinyo sa Templo sa Salt Lake naglakip og mga simbolo nga tuyo nga nagrepresentar sa pagkapari, mga pakigsaad sa templo, ug sa plano sa kaluwasan.⁴

Determinado nga motukod sa templo gamit ang “labing maayo nga mga materyal nga [mahimong] makuha sa kabukiran sa Amihanang Amerika,” ang mga Santos sa katapusan nakahukom nga tukuron ang templo gamit ang lokal nga granito.⁵ Kadtong nakaagi sa Temple Square nakabantay sa “nagtagingting nga mga tingog” sa mga tigib nga padayong misilsil sa mga bato, “midasig niadtong ganahan nga maminaw sa ingon nga mga tunog,” samtang ang mga kantiro mihulma og mga bato nga ikabutang sa mga bongbong sa templo.⁶

Imahe

arkitektura nga drowing sa Templo sa Salt Lake

Sa unang 20 ka tuig sa konstruksyon, ang mga trabahante mihakot sa mga bato 20 ka milya (32 ka kilometro) gikan sa Little Cottonwood Canyon padulong sa gitukuran sa templo pinaagi sa mga panon sa karomata. Ang bati nga mga panahon ug dili maayo nga mga ani nakapahinay sa hinay nang daan ug budlay nga proseso. Ang mga kahuyang nga nadiskubrihan diha sa tukuranan sa pundasyon sa templo nagkinahanglan nga tangtangon ang nakompleto na nga mga porsyon sa ilawum nga mga bongbong ug ilisan ang ubang bahin sa tukuranan, dugang nga nakalangay sa konstruksyon og gibanabana nga lima ka tuig. Ang mga ward ug mga korum sa pagkapari mitambayayong sa pagsangkap og mga mamumuo aron padayon nga dunay mga tawo nga tigsilsil sa bato ug tighakot. Ang pag-abut sa mga riles sa tren sa mga 1870 nakahatag og mas paspas ug mas kasaligang paagi sa paghakot og bato.

Ang mga Santos sa Ulahing mga Adlaw sa Teritoryo sa Utah mihuman sa Templo sa St. George Utah niadtong 1877, sa Templo sa Logan Utah niadtong 1884, ug sa Templo sa Manti Utah niadtong 1888. Ang praktikal nga kahibalo nga ilang naangkon samtang nagtukod niini nga mga templo nakadasig og bag-ong mga plano sa andana [floor plan] alang sa mga ordinansa sa templo.⁷ Ang mga plano sa sulod sa Templo sa Salt Lake sunod nga giusab gikan niadtong orihinal nga gisugo ni Brigham Young ngadto niadtong gihimo ni Wilford Woodruff. Si Joseph Don Carlos Young, usa ka propesyonal nga enhinyero ug usa sa mga anak ni Brigham Young, midumala sa pagkompleto sa mga taluktok ug sa sulod sa templo. Iyang gilakipan og bag-o nga mga teknolohiya, lakip ang asero nga bayanan, de kuryente nga mga suga, pagpainit pinaagi sa inalisngaw [steam heating], ug mga elevator.⁸

Imahe

bloke sa templo

Sa katapusan nga mga tuig sa konstruksyon, ang federal nga gobyerno sa Estados Unidos agresibong migukod sa mga Santos sa Ulahing mga Adlaw kinsa mibuhat sa dinaghan nga kaminyoon, ug ang bag-o nga mga balaod naghulga nga mokuha sa mga templo sa Simbahan.⁹ Human mipagawas si Wilford Woodruff sa Manipesto niadtong 1890 nga nagpahibalo sa iyang intensyon nga mokooperar sa mga awtoridad, ang mga Santos mibag-o sa ilang mga paningkamot sa pagkompleto sa templo.¹⁰ Sa diha nga nahuman na ang gawas, ang mga tawo nanagpundok sulod ug sa palibut sa Temple Square niadtong Abril 6, 1892, alang sa nindot nga seremonya sa ulohang bato [capstone ceremony] diin ang gibanabana nga 12 ka piye (dul-an sa 4-metros) nga estatuwa nga giila isip si anghel Moroni gibutang ibabaw sa tungatunga nga taluktok sa silangang bahin.¹¹ Ang higayon nagtimaan usab sa pagsugod sa pinaspasay nga trabaho aron mahuman ang sulod niini sa ika-40 nga kasumaran sa pagsugod og tukod sa templo.

Ang mga lider sa Simbahan gusto nga ang tanang Santos sa Ulahing mga Adlaw moapil sa pagpahinungod sa templo ngadto sa Ginoo. Aron matagad ang tanan nga gustong motambong, mipahigayon sila og mga sesyon kaduha matag adlaw sulod sa dul-an 20 ka adlaw, lakip ang mga sesyon alang sa mga bata. Sa dili pa ang matag sesyon, ang mga nanambong molibut sa gambalay. Si Presidente Wilford Woodruff mihalad sa pagpahinungod nga pag-ampo atol sa unang sesyon sa Abril 6, 1893. Daghan sa mga mitambong sa mga tulumanon mihulagway nga gibati ang pagdawat sa Ginoo sa templo ug nakabantay og langitnon nga mga pagpakita.¹²

Imahe

mga pundok sa katawhan sa pagpahinungod sa Templo sa Salt Lake

Usa ka dakong pag-ayo niadtong mga 1960 mipanindot sa mga sistema sa mekanikal ug air conditioning, ug ang malukpanong paglimpyo sa gawas sa templo niadtong 1993 mipahiuli sa mga bato nga bahin ngadto sa hayag nga granitong bulok niini. Ang laing dako nga pag-ayo gipahibalo niadtong 2019 aron mapalig-on ang istraktura batok sa paglihok sa yuta ug madesinyo pag-usab ang palibut nga nataran.¹³

May Kalabutan nga mga Hisgutanan: Pagtukod og Templo, Mga Pagpahinungod sa Templo ug mga Pag-ampo sa Pagpahinungod, Walog sa Salt Lake, Brigham Young, Balay Tugahanan, Anghel Moroni