Haamaitairaa

E au mau taeaʻe here e au mau tuahine here, tenaʼtu te parau, te faaohiparaa te toe. E tiʻa ia tatou ia oaoa i teie amuiraa nehenehe roa. Ua putuputu tatou i roto i te hau ma te peʻapeʻa ore. Ua paraparau tatou no niʻa i te mau haamaitairaa nehenehe a te Fatu. Ua puai faahou to tatou mauruuru i te mau haamaitairaa faahiahia tei roaa ia tatou i roto i te evanelia. I to tatou faarooraa i te mau iteraa papu o te feia orero, ua faaoraora-faahou-hia te ama o to tatou iteraa i te parau mau. Te tiʻaturi nei au e, te mau taata atoa tei tae mai i teie nei amuiraa rahi, ua roaa te maitai ia ratou, ia riro mai te taata tataʻitahi ei tane e aore râ ei vahine maitai aʻe na roto i te iteraa tei roaa ia tatou i roto i na mahana e piti i mairi iho nei. Te parau nei au noʻu iho nei, inaha, ua fatata roa vau i te Fatu. Te tiʻaturi nei au e, ua ite atoa-hia ia outou te reira. E hinaaro rahi toʻu ia haapaʻo i Taʼna mau faaueraa, ia ora i Taʼna mau haapiiraa, e ia paraparau Iaʼna na roto i te pure, na te reira e paruru ia vai noa toʻu auraa Iaʼna, oia toʻu Metua e toʻu Atua.

E no reira, no te opaniraa i teie putuputuraa rahi no te Feia Moʻa i te mau Mahana Hopeʻa nei, te taparu nei au ia tatou tataʻitahi ia imi tatou i te raveʻa ia ora fatata tatou i te Fatu, e ia paraparau pinepine Iaʼna na roto i te faaroo rahi aʻe.

E te mau metua tane e te mau metua vahine, a pure no ta outou mau tamarii. A pure ia paruruhia ratou i te mau ino o teie nei ao. A pure ia tupu ratou i te paari i roto i te faaroo e te ite. A pure ia arataʻihia ratou i roto i te oraraa fanaʻo e te maitai. E te mau tane a pure no ta outou mau vahine. A faaite i te Fatu i to outou mauruuru no ratou e a taparu Iaʼna no ratou. E te mau vahine a pure no ta outou mau tane. E rave rahi o ratou te haere nei na te mau eʻa fifi tei î roa i te peʻapeʻa e te papu ore hoʻi. A taparu i te Puai Hope ia arataʻihia ratou, ia haamaitaihia, ia paruruhia, ia faauruhia ratou i roto i ta ratou mau tautooraa paieti.

A pure ia vai mai te hau i niʻa i te fenua nei, ia tiʻa i te Puai Hope e faatere nei i te mau ao, ia faatoro mai i Toʼna rima, e ia faauru mai Toʼna Varua i te mau taata atoa, ia ore te mau nunaa ia aro te tahi e te tahi. Te tiʻaturi nei au e, ia rahi anaʻe te pure e taʻuma i niʻa i te raʻi no te haumi e vai nei i niʻa i te fenua, e pahono mai te Fatu i taua mau pure ra no te feia parau tiʻa.

I te matahiti 1969, tei Marite Apatoa vau i taua taime ra. Ua revaʼtu vau mai Laparaza haere atu i Santiago, i te fenua Tireni. E mea mărô te mau Mouʻa. Aita e hiona. Ua mărô te aihere. Tei roto te fenua Tireni i te hoê paʻura rahi.

Te tiaoro ra te taata i te tauturu no te horoʻa mai i te haumi.

Ua haamaitai matou e piti fare apî i roto i taua tere ra. I roto i te mau pureraa haamaitairaa, ua tiaoro matou i te Fatu ia tuu mai i te ûă i niʻa i te fenua. Ua tuati toʻu iteraa papu e to te rahiraa o te mau taata tei tae mai i roto i taua mau pureraa ra e, ua iritihia te mau raʻi, e ua mairi mai te ûă rahi, i ani atu ai te taata i te Fatu ia tapeʻa i te reira.

A pure no te paari e te maramarama a ratere ai outou i roto i to outou oraraa. Mai te mea e, ua opua outou ia rave i te mau ohipa maamaa e te tiʻa ore, te feruri nei au e, eita te Fatu e opani ia outou. Mai te mea râ e, e titau outou i Toʼna paari , e e pee hoʻi i te aʻo o te aau, ua papu iaʻu e, e haamaitaihia outou.

Ia riro tatou ei feia pure. E haapii tatou i ta tatou mau tamarii ia paari ma te aʻo a te Fatu ra (Enosa 1:1). Ia vai mai te mau haamaitairaa o te raʻi i niʻa ia outou. Mai ta Deuteronomi i papaʻi ra, « E teie nei, e Iseraela, eaha to te Atua no oe na to Iehova hinaaro ia oe, maori râ e, ia mataʻu oe i to Atua ia Iehova, e ia haere i toʼna atoa ra mau eʻa, e ia hinaaro oe iaʼna ; e ia haamori oe i to Atua ra ia Iehova ma to aau atoa, e ma to varua atoa » (Deuteronomi 10:12).

Ia ite mai outou e taʻu mau taeaʻe e taʻu mau tuahine here e, « A tiaʻi ai Oia ia Iseraela, eita Oia e taoto » (Felix Mendelssohn, Elijah).

Te pure nei au ma te haehaa ia vai mai te mau haamaitairaa no te raʻi i niʻa ia outou, ma te faaite atoaʼtu ia outou i toʻu here. Mauruuru roa no to outou maitai rahi i niʻa iaʻu e no to outou faaroo e te puai rahi no te faahaereraa i te ohipa a te Manahope i mua, na roto i te iʻoa o te Fatu o Iesu Mesia ra, amene.