Te mana au mau o te pure

Mai te hiaai o teie metua vahine ia faaroo i te parau apî no taʼna mau tamaiti, e mea ohie roa ia ite no te aha te hoê Metua Here i te Ao ra e hinaaro mai ai i te parau apî oTaʼna mau tamarii.¹ E nehenehe tatou e faaite i to tatou here i te Atua na roto i te pure. Ua faaohie hoʻi Oia i te reira. E pure tatou Iaʼna i te mau taime atoa. Aita e titauhia te hoê mauihaa. Aita atoa tatou e titauhia ia faaî i te uira e aore râ, ia aufau i te moni avaʻe.

E pure vetahi ia roo-anaʻehia ratou e te tahi mau fifi. Eita roaʼtu vetahi e pure. Te na o ra te hoê irava parau : « Aita outou i manaʻo i te Fatu ra i to outou Atua i te mau mea taʼna i horoʻa mai na outou ra, te manaʻo noa ra râ outou i ta outou mau taoʻa, aita râ i haamaitai i te Fatu i te Atua ra… no te reira ».²

Ua faaue te mau peropheta ia tatou ia pure ma te haehaa e te pinepine.³

Ua haapii mai o Iesu nahea.⁴ E pure tatou i to tatou Metua i te Ao ra,⁵ na roto i te iʻoa o Iesu Mesia,⁶ na roto i te mana o te Varua Maitai.⁷ Teie ïa te « faanahoraa mau no te pure »,⁸ eiaha ia rahi te parau rii « faufaa ore » ⁹ e aore râ, te faahitiraa i te parau ia « hiʻohia mai e te mau taata atoa ».¹⁰

Ua heheu mai Iesu e te pure nei tatou i te hoê Metua tei î i te paari o tei ite atea i te mau mea hou tatou a ani ai iaʼna.¹¹

Ua haapii Moromona i taʼna tamaiti, ia Moroni, ia pure tatou « ma te puai hope o te aau ». ¹² Ua parau Nephi, « Te pure noa nei a hoʻi au ia [ratou] i te ao, e te faararirari noa nei hoʻi toʻu roimata i toʻu tuarua ia ratou i te ruʻi, … e te tiʻaoro noaʼtura vau i toʻu Atua ma te faaroo, e ua ite hoʻi au e, e faaroo mai oia i taʻu ra tiʻaororaa ».¹³

E rahi roa te mana au mau o te pure na roto i te haapaeraa i te maa, i te tahi mau taime, e no te hoê tumu taa ê mau.¹⁴

E pûpû-atoa-hia te pure ma te mamu noa. E nehenehe te hoê e feruri i te pure, ia ore te parau ia anoi-noa.¹⁵ E tuturi pinepine tatou ia pure ; e nehenehe tatou e tiʻa noa e aore râ, e parahi.¹⁶ E mea iti aʻe te faufaa no te huru faanahoraa o te pure i te auraroraa pae varua i te Atua.

E faaoti tatou i ta tatou pure « na roto i te iʻoa o Iesu Mesia, amene ».¹⁷ Ia faaroo tatou i te hoê taata ia pure, e amui tatou i ta tatou « amene », oia hoʻi ïa, « Naʻu atoa teie pure ».¹⁸

Eaha te taime tatou e pure ai ? Ua parau te Fatu, « A imi itoito noa, a pure noa i te mau taime atoa, e ia faaroo noa hoʻi, e e ohipa amui mai te mau mea atoa ei maitai no outou ».¹⁹

Ua parau Alama, « E ui atu i te Fatu i te mau mea atoa ta oe e rave ra, e naʼna hoʻi oe e arataʻi i te maitai ; e ia taʻoto oe i te ruʻi ra, ia taoto ia oe i te Fatu ra, ia tiaʻi mai oia ia oe i ta oe na taotoraa ; e ia tiʻa aʻera oe i te poʻipoʻi, ia î to aau i te haamaitai i te Atua ra ».²⁰

E pure tatou i te vahi moʻemoʻe, e pure tamau tatou e te utuafare, i te taime tamaaraa, e i roto i te mau ohipa o te mahana. E mea ohie roa, e nunaa pure tatou.

Rave rahi o tatou tei roaa te mau iteraa rau no te mana au mau o te pure. Ua faaite au i toʻu i te hoê paterealeha o te tĭtĭ no te pae apatoa o Utah. Ua farerei mau no te taime matamua i roto i taʻu piha taote a 40 matahiti i mairi aʻenei, i te tupuraa te ohipa tapuraa maʻi mafatu. Ua mauiui teie varua moʻa no te paruparu o toʼna mafatu. Ua ani mai oia i te tauturu, ma te manaʻo e na te hoê piha iti i roto i toʼna mafatu te tumu o te fifi e e nehenehe te reira e rapaau.

I roto i te hiʻopoʻaraa onoono, ua itehia e piti teie na piha iti i roto i toʼna mafatu. E nehenehe ia tapu i te hoê, eiaha râ te tahi. No reira, e ere i te mea maitai ia tapu. Aita roa oia i farii maitai i teie faaotiraa.

Hoê â parau tei horoʻahiaʼtu iaʼna i roto i te mau farereiraa i muri iho. I te pae hopea, ua paraparau mai oia iaʻu ma te manaʻo ahoaho : « E te taote Nelson, ua pure au no te farii i te tauturu e ua arataʻihia mai au ia oe. Aita te Fatu e heheu mai iaʻu nahea ia rapaau i te piti o te piha iti tera râ, e nehenehe Oia e heheu te reira ia oe. Ua ineine hoʻi to oe feruriraa. Mai te mea e tapu oe iaʻu, e faaite mai te Fatu ia oe eaha te ohipa e tiʻa ia rave. A tapu oe iaʻu, e a pure ia horoʻahia mai te tauturu o ta oe e hinaaro ».²¹

Ua puta pû roa toʼna faaroo rahi i roto iaʻu. Nahea ia vau i te patoʻi faahou atu iaʼna ? I muri mai i ta maua pure amui, ua farii au ia tamata. Ei faaineineraa no taua mahana riʻariʻa ra, ua pure e ua pure tamau noa vau tera râ, aita â ra vau i ite nahea ia rapaau i teie nei piha iti. Tae noaʼtu i te taime tapuraa, 22 ua ui mai toʻu tauturu tapu, « Nahea oe ia rave i te reira ? »

Ua parau atu vau, « Aita vau i ite ».

Ua haamata maua i te tapu. I muri aʻe i te iriti-raa-hia te piha iti matamua, 23 ua tae maua i te piti o te piha iti. Ua ite maua e, aita roa aʻe i ino roa, ua aano roa râ i ore ai e ohipa maitai faahou. A hiʻopoʻa maitai ai i te reira, ua tae mai te hoê manaʻo i roto i toʻu feruriraa : A faaiti i toʼna menemeneraa. Faaite atura vau i toʻu tauturu. « E ravaʻi noa mai te mea e faaiti mai taua i toʼna menemeneraa ia riro mai te huru mau ».

Nahea ïa ? Aita e nehenehe ia taaamu i te hoê hatua, mai ta tatou e taaamu i te hatua i niʻa i te piripou. Aita atoa e nehenehe e taumi i te hoê taaamu mai te ravehia i niʻa i te hoê puaahorofenua. I ô mai ai te hoê hohoʻa papu maitai i roto i toʻu feruriraa, ma te faaite e nahea ia nira – ia tuu i te hoê tufeturaa i ô e ia firi i raro aʻe. Te ite noa ra vau i taua hohoʻa ra – e te mau haapapuraa i te mau vahi e tano ia nira. Ua oti te tataʻiraa mai tei faaitehia iaʻu. Ua tamatamata maua e inaha, e mea iti roa te tahe o te toto. Ua parau mai toʻu tauturu, « E semeio mau teie ».

Ua pahono vau, « E pahonoraa teie i te pure ».

Ua ora oʻioʻi roa teie taata maʻi e ua mauruuru oia. Eiaha noa i te mea e ua tauturuhia oia, e tauturu-atoa râ no vetahi tei raeʻa-atoa-hia i teie nei fifi o tei riro ei ohipa umere mau. Aita râ vau i rave mai i te tura noʻu. Ia faateiteihia râ teie paterealeha faaroo e te Atua, tei pahono i ta maua mau pure. Ua ora teie nei taata faaroo e rave rahi matahiti, e ua hoʻi i toʼna hanahana mure ore.

Ia pure tatou, eiaha tatou e manaʻo i te horoʻaʼtu i te parau aʻo, e tiʻaoro ra tatou i te Fatu,²⁴ e e faaroo atu i Taʼna parau aʻo.²⁵ Na te pure matamua a Iosepha Semita i faatupu i te Faahoʻiraa mai o te evanelia.²⁶ Ua farii oia i te Parau Paari i muri i toʼna aniraa i te Fatu.²⁷ Ua fariihia te heheuraa no niʻa i te autahuʻaraa i te matahiti 1978 e te peresideni Spencer W. Kimball i muri iho i taʼna aniraa onoono.²⁸ Ua tae mai te faaurûraa no te hamaniraa i te mau hiero naʻinaʻi i muri iho i te feruriraa hohonu a te peresideni Gordon B. Hinckley.²⁹

Eita ta tatou mau pure atoa e pahonohia mai te au i ta tatou e hinaaro. I te taime e pahonohia mai e « Aita ». Eiaha tatou e maere. Aita te mau metua maitai i roto i te tahuti nei e parau noa ‘Eʻ i te mau titauraa atoa a ta ratou mau tamarii.³⁰

I te hoê pureraa pô utuafare aita i maoro aʻenei, te hauti haere ra ta maua mau mootua. Ua riri roa aʻera taʻu mootua tamaroa e 6 matahiti i te parauraa toʼna papa ua hora no te hoʻi i te fare. Eaha ia ta teie tamaiti here i rave ? Ua haere mai oia iaʻu nei e ua parau mai,

« E papa ruau, e horoʻa mai anei oe i ta oe parau faatiʻa no te patoʻi i toʻu papa ? »

Pahono atura vau, « Aita, e taʻu tamaiti here. Hoê o te mau haapiiraa rahi o te oraraa nei, oia ïa, e roaa te oaoa na roto i te haapaʻoraa.³¹ A hoʻi i te fare e to oe utuafare, e oaoao ïa oe ». Noaʼtu e aita oia i au i taʻu parau, ua haapaʻo ra oia.

E mea tiʻa ia pure tatou ia au i te hinaaro o to tatou Metua i te Ao ra. Ua hinaaro oia i te tamata ia tatou, ia haapuai ia tatou, e ia tauturu ia tatou ia roaa to tatou paari.³² A tapeʻahiaʼi te peropheta Iosepha Semita i te fare auri no Liberty, ua taparu oia ia tuuhia oia. Ua pahonohia mai taʼna mau pure na roto i teie nei parau : « Ia hau mai na to oe aau ; e vai poto noa mai to oe enemi e to oe mau ati hoʻi ».³³

Ua faaurûhia vau ia faaoti i teie parau poroʻi no niʻa i te pure na roto i te pure – horoʻahia na roto i te hoê himene. Ua parau te Fatu e « E riro te himene a tei parau-tiʻa ei pure iaʻu nei ».³⁴ No roto mai teie himene i te buka ra Hymns,³⁵ e ua papaʻi au i te tahi mau parau apî no te reira. Ma te haamauruururaa ia Craig Jessop, ia Mack Wilberg e te tahi atu mau hoa i roto i te pŭpŭ himene no te Fare Menemene, e faaroo mai ia tatou i te himene no teie nei pure. E te taeaʻe Jessop, tei a oe ra :

Na roto i te iʻoa o Iesu Mesia, amene.