Te arapoa o te diabolo

E toʻu mau taeaʻe here no te autahuʻaraa, i teie aruʻi te faatae atu nei au i taʻu mau parau i niʻa ia outou pauroa, outou ihoa ra te feia apî tane. Taʻu opuaraa, o te haapiiraa ïa e te faaararaaʼtu ia outou i te mau ati e vai ra i mua i to outou oraraa, tera râ te hinaaro atoa nei au e faatae atu i toʻu here ia outou, e i toʻu nei tiʻaturiraa rahi i niʻa ia outou ei uʻi no a muri aʻe.

I toʻu vai-taureʻareʻa-raa ua rave au i te misioni i te fenua Peretiria. E taime faahiahia roa ïa te reira. Te vai ra te hoê tahora pape faahiahia mau i taua fenua ra, oia hoʻi te Iguacu Falls. I te tau ua rahi, e manii roa ïa te pape na rapae au. I te hoê vahi no te tahora pape, i te vahi manii rahi ai te pape, ua topahia ïa te reira i te iʻoa ra Te Arapoa o te Diabolo.

Te vai ra te tahi mau ofaʻi rarahi e tiʻa ra i niʻa noa i te vahi e topa puai ai te pape i roto i te Arapoa o te Diabolo. E tau matahiti i mairi aʻenei, e afaʻi ïa te tahi feia hoê vaa i te mau taata na niʻa i te vaa, e e vaiiho atu ai i niʻa i taua mau ofaʻi ra, e a hiʻo atu ai i raro i roto i te Arapoa o te Diabolo. E mea tere mărû te pape i niʻa mai i te tahora pape. Na te maniania noa o te pape i raro mai e faaara nei i te ati e vai ra i raro noa mai. E tiʻa râ i te hoê are pape puai e arataʻi atu i te vaa i roto i te mau vahi tahe puai o te pape, na niʻa atu i te aivi, e topa atu ai i raro i roto i te Arapoa o te Diabolo. Te feia maamaa o te vaiiho i ta ratou mau vaa e vai noa i niʻa i taua mau ofaʻi ra, e mea ohie i to ratou avae i te hee e i te topa i raro, e e hutihiaʼtu ai ratou i roto i te mau opape i raro mai.

Ua ite au e te feruri nei te tahi pae o outou e, e feia aito mau outou, ua ineine outou no te fariu atu i te mau huru fifi atoa. Tera râ, e nehenehe i te tahi o teie mau ohipa faaarearearaa e arataʻi ia outou i raro i te Arapoa no te Diabolo. Hoe noa eʻa maitai e vai ra, oia hoʻi te faaatearaa ia outou i te mau ati no te Arapoa o te Diabolo. Ua faaara puai mai te peresideni George Albert Smith ia tatou, « Mai te mea e haere atu outou hoê initi i te paeau o te diabolo, tei roto ïa outou i te mana a te diabolo, e mai te mea e manuia oia, aore ïa e tiʻa faahou ia outou ia feruri e aore râ ia rave i te faaotiraa tano, no te mea ua moʻe te varua o te Fatu ia outou ».¹

Te vaiiho nei paha te tahi o outou, e te feia apî tane, ia vetahi ê ia faaoti mai i te mau arataʻiraa na outou no te pee. E paruru outou ia outou iho ma te parauraaʼtu e, « O vai tei parau e ere i te mea tano ia tatou ia rave i teie ohipa, e aore râ eiaha paha tatou e na reira ? » Ua rau te hohoʻa no te vai- tano-raa e no te vai-hape-raa, e mea titauhia ia outou ia faaoti tei hea te reni arataʻi. Te poroʻi atu nei au ia outou mai te mea aita e papu ra i roto i to outou feruriraa e aore râ i roto i to outou aau ua tano anei e aore râ ua hape, eiaha ïa e rave i te reira. Te mau nei tatou tataʻitahi i te tiʻamâraa, e e faaite mai te horoʻaraa a te Varua Maitai ia tatou eaha te mea tano e eaha te mea hape, eaha te parau mau e eaha te haavare. E hopoiʻa na te mau peropheta a te Atua i te haapii i te parau a te Atua, eiaha râ i te tatara roa mai teihea mau ohipa o te mea tano e teihea mau ohipa o te mea hape. Mai te mea te haa maite nei tatou i te ape i te ino e aore râ te hoê mea hiʻoraa ino, e rave ïa tatou i ta tatou iho faaotiraa eiaha râ i ta vetahi ê e tuu mai i niʻa ia tatou.²

Te pae rahi o te mau mea no ô mai i te diabolo ra, e mau mea faahinaarohia ïa. E mea anaana, e e mea au roa i te taata nei. E hiʻoraa au maitai taʼna parau poroʻi e o te mea ohie atoa i te faatiʻamâ i te reira. E mea mărû toʼna reo, e e mea au roa i te faaroo. Ahiri e e reo puai e aore râ, e reo maniania, aore roa ïa e taata e faaroo atu, aore roa e taata e vare. Te tahi mau parau poroʻi au-roa- hia nei e Satane, oia hoʻi ïa : Te na neira nei hoʻi te mau taata atoa, mai te mea aita e ino e topa i niʻa i te hoê taata, aita ïa e fifi ; mai te mea e aita e ino e roaa mai, e mea au roa i te rave i te reira. O Satane te taata faahua rahi roa aʻe, te taata haavare rahi roa aʻe, e te taata taviri rahi roa aʻe i roto i te taatoaraa o te aamu no te ao nei. E tomo mai oia i roto i to tatou oraraa mai te hoê taata eia ra te huru i roto i te poiri. No te aravihi o taʼna mau faahuaraa, e mea fifi roa i te ite atu i toʼna hohoʻa e aore râ i taʼna mau raveʻa. E ruto oia i roto i te ahu o te mamoe.

E piti na mana taputo e vai nei i roto i te ao nei. Ua haamata ïa te reira hou i te hamaniraahia te ao nei, oia hoʻi te mana no te maitai e te mana no te ino. I rotopu i teie na mana puai e piti, te mau nei ïa tatou tataʻitahi i ropu i teie na mana e piti o te huti nei ia tatou i te hoê pae e i te tahi atu pae. Te mau mea maitataʻi, no ô mai te reira i te Atua ra, e te mau mea ino, no ô mai ïa te reira i te diabolo ra.³ Aita e tiʻa ia tatou ia maiti i na mea e piti e ia farii i te oaoa ; ua tamata te tahi mau taata i te reira, area râ i te pae hopea, ua pau ïa ratou paatoa. Mai te mea e te feruri nei te tahi o outou e te feia apî tane e, e tiʻa ia outou ia farii i na pae e piti, te haavare ra ïa outou ia outou iho. Eita roa e upootia. Eita roa.

E toʻu mau hoa feia apî e, te vai ra te tahi atu parau mau o te tiʻa ia outou ia ite mai. Oia hoʻi, te vai ra te utuʻa no te mau mea atoa. Te vai ra te titauraa no te farii i te manuiaraa mau e no te farii i te oaoa. Aore roa e mea hoo ore i roto i te oraraa nei. Mai te mea aita outou e aufau i te titauraa no te farii i te manuia, e aufau ïa outou i te utuʻa no te manuia-ore-raa. E mea titauhia te faaineineraa, te ohipa, te tamauraa i te haapiiraa, e te taviniraa no te farii e no te ite i te oaoa. E utuʻa rahi ïa o te roaa na roto i te haapaʻo ore e te faaineine-ore-raa. Ei mau melo autahuʻaraa no teie Ekalesia, e mea tiʻa roa ia tatou ia ora i te oraraa taa ê i to te ao nei. Te mau nei hoʻi tatou i teie mau mana faatere o te nehenehe e tiavaru ê atu i te mana o Satane i niʻa i te fenua nei. Te poroʻi atu nei au ma toʻu aau atoa ia outou ia tauturu ia matou i te turaʻi atu i te mau peu a to te ao nei i muri. A haapaari na tatou i mua i te mataʻi. Aita e ino ia ore anaʻe tatou e au-maitai-roa-hia, a parau noaʼtu, « E ere te reira i te mea tano ».

Te hinaaro nei tatou paatoa e ite o vai mau râ tatou e eaha to tatou tiʻaraa i roto i te ao nei. Te tamata nei te tahi o outou e te feia apî ia ite o vai mau outou na roto i te riroraa ei mea taa ê i to outou na metua e te utuafare. Ua hamani te Atua ia tatou ei taata taa ê te tahi e te tahi i roto i te ao nei, mai te itehia nei i roto i to tatou ADN e te tapaʻo no to tatou mau manimani rima. E mea taa ê mau tatou i te tahi e te tahi.

Te hinaaro nei te tahi feia apî tane e orure i te mau ture arataʻi. Te manaʻo nei te tahi o outou e, e ere i te mea au ia haapaʻo i te parau a to outou na metua, e aore râ ia haapaʻo i te parau aʻo a to outou episekopo e aore râ te peresideni no te pupu autahuʻaraa. Ua faatiʻa mai te Episekopo Richard C. Edgley i te hoê aamu i toʼna vai-apî-raa no niʻa i te ohipa e tupu ia haapaʻo ore anaʻe :

« I toʻu vai-tamarii-raa, hoê metera e te afa te atea o to matou garage e te garage no te fare i pihaʻi iho mai i to matou. E mea tahito roa te fare vairaa pereoo i pihaʻi iho mai i to matou, ua haamata te tahi mau raau i te parari haere. I te tahi mau taime, e tauma ia vau i niʻa i to matou fare vairaa pereoo, e i reira e ouʻa atu ai, mai te tahi fare e te tahi fare, e e hauti ai i niʻa i teie mau fare vairaa pereoo. Ua parau mai toʻu metua tane iaʻu, ‘Eiaha e taʻuma i niʻa i te punu fare’, aita râ vau i faaroo. I te hoê taime i toʻu hautiraa i niʻa i te punu fare, ua ouʻa vau mai niʻa mai i to matou fare vairaa pereoo e ua topa roa vau i raro, mai niʻa mai i te fare vairaa pereoo i pihaʻi iho mai i to matou. Ua pepe roa toʻu tua e toʻu na avae atoa. No toʻu haapaʻo ore, ua faaoti aʻera vau e, eita roa vau e faaite i te hoê taata e ua pepe au. Ua haere atu vau i roto i te fare, e ua horohoroi au i toʻu mau vahi pape. Aita râ te pepe i muri i te tua i raeʻaehia e au no te tuu atu i te raau rapaau na niʻa iho e aore râ no te tama i te reira. Ua faaoromaʻi noa vau i te mauiui e ua peʻapeʻa hoʻi o te haape te reira. Ua peʻapeʻa roa toʻu manaʻo no te tahi mau mahana i te maoro ».⁴

Mai ta te hoê taata i parau, « Te hoê o te mau mea maitai roa aʻe ia riro i roto i te ao nei, o te riroraa ïa ei tamarii tamaroa, aore roa e ite aravihi e titauhia i niʻa i te tamaroa, tera râ e mea titauhia iaʼna ia tamau noa i te tamata no te riro ei mea maitai i te hoê ohipa ».⁵

Ua haavarehia paha te tahi o outou i te feruriraa e, e roaa te oaoa ia outou i roto i te raveraa i te raau taʻero, te inu taʻero, te mau hohoʻa haʻiriiri, e i te ohipa taiʻata. Te faaara atu nei au e, e mau mea pahee anaʻe te reira, e e mau mea ino roa mai te mau ofaʻi rahi ra i pihaʻi iho i te Arapoa o te Diabolo ra. E arataʻi noa te reira ia outou i te vahi a Satane. E mea fifi roa i te matara mai i rapae i taua vahi ra, e horoʻa mai te reira i te mau pepe e rave rahi i niʻa ia outou.

Te haa nei outou e te feia apî tane i to outou iho haerea mure ore i te hoê tau aehuehu mau. I te mau tau i mua nei, e roaa mai te mau ite apî o te faariro i to outou oraraa ei oraraa maitai e te mea ohie no te pae rahi o outou. E mea papu e roaa mai te tahi mau rapaauraa apî no te mau maʻi rahi. E tupu rahi atoa hoʻi te mau faaururaa a te diabolo, e e rahi atoa te mau taata o te topa i roto i te haavareraa e te mau hutiraa a Satane. E mea titauhia ia outou e te feia apî tamaroa e ia riro ei feia puai i te pae varua e i te pae morare, ia vai puai hoʻi outou i mua i te mau faahemaraa e te mau herepata a to te ao nei. Peneiaʻe teie te tumu i faahereherehiaʻi outou te mau varua taa ê mau no teie nei anotau.

Te tiʻaturi atoa nei au i te mau tau i mua nei, e riro te mau faahemaraa a Satane ei mau faahemaraa mărû. E tapoʻihia paha te reira i te mau mea haavare e te taviri taata. E hinaaro tatou i te itoito rahi i te pae varua no te ite atu i taua mau huru atoa no te ino e ia roaa mai hoʻi te puai ia tatou no te patoʻi atu i te reira.

E rave rahi mau ohipa taparahiraa taata [terrorisme] e ravehia nei i te mau fenua e rave rahi. Te pepe nei te tino o te taata i roto i te tamaʻi. Te vai atoa ra te pepe i te pae morare. Ua ite tatou o tei rave i te tau faehau i te tau no te tamaʻi i te ino rahi o te oraraa na roto i te vaiihoraaʼtu i te utuafare, te mau hoa maitataʻi, e i te faaururaa a te Ekalesia. Te faaara atu nei au i te feia o te tavini ra i teie nei i roto i te mau nuu faehau, e aore râ i te feia o te tomo atu i roto i te nuu faehau, ia ara i teie nei mau fifi. E nehenehe i te reira ia arataʻi ia tatou i roto i te vaha o te Arapoa o te Diabolo.

E rave rahi mau ohipa ta outou e rave i roto i te pŭpŭ ê ê no te nuu faehau, oia hoʻi i te mau vahi aita outou e tiʻa ia maʻiti o vai ta outou e amui atu. Tera râ e nehenehe ta outou e maʻiti i te mau peu no te haapaʻo. I roto i te nuu faehau, e melo ïa outou no te hoê pŭpŭ, to outou puai no roto mai ïa i te tahoêraa o te mau melo. E mea titauhia ia outou ia faatura i te mau melo no to outou pŭpŭ no te mea na te taata i pihaʻi iho mai ia outou paha e faaora mai ia outou ananahi ! Aita râ outou e titauhia ia faatopa i to outou tiʻaturiraa pae morare i raro. I roto i te mau pŭpŭ taata atoa, e mea tiʻa roa i te hoê o tatou ia tiʻa mai i niʻa e ia parau, « E ere te ohipa ta tatou e rave nei i te mea tano ». E taata maitai roa ïa taua taata ra o te na reira !

Ua neneʻi faahou iho nei te Ekalesia i te buka ra na te mau faehau Te Mau Parau Tumu no te Evanelia oia hoʻi ei buka na te mau melo no te Ekalesia o te tavini nei i roto i te nuu faehau i te mau vahi atoa no te ao nei. Noaʼtu e e buka reo Marite noa teie, e iritihia râ te reira i roto i te tahi atu mau reo. Te vai ra i roto i teie buka te mau arataʻiraa no te rave i te ohipa Ekalesia e te oomoraa i te ahu hiero i roto i te nuu faehau, te arataʻiraa no niʻa i te mau oroʻa e te mau haamaitairaa no te autahuʻaraa, te mau parau tumu no te evanelia, e te tahi mau himene. Te vai ra ta matou buka mai teie te huru i te matamua ra i roto i te Tamaʻi Piti o te Ao nei. E buka maitai roa ïa te reira.

Te tamau noa nei te tiatiaraa. Te haamanaʻo nei tatou i te parabole no te sitona e te zizaniʻa. I roto i taua parabole ra, ua parau te Fatu, « E faaauhia te Basileia o te ao ra i te hoê taata tei tanu i te huero maitai i roto i taʼna faaapu », area râ a taoto ai oia, ua haere mai ra toʼna enemi e ua tanu i te zizania i rotopu i te mau huero, e ia tupu mai hoʻi te sitona ra, ua tupu atoa maira te aihere. Aita roa te feia ohipa a taua taata nei i taa e mea nahea to te aihere tupuraa mai i roto i te faaapu, e ua ani aʻera ratou e, e tiʻa anei ia ratou ia haere e huhuti i te aihere. Ua parau atura te fatu no te faaapu ‘eiahaʻ no te mea mai te mea e huti mai outou i te aihere, e huti atoa mai outou i te huero maitai. No reira, ua parau atu oia ia vaiihohia te huero maitai e i te aihere ia tupu paipiti noa na e tae roaʼtu i te taime no te ootiraa, i reira ïa te sitona e haaputu-taa-e-hiaʻi i te aihere.⁶

Ua ani te mau pĭpĭ a Iesu i te Faaora i te tatararaa no te parabole e ua pahono mai te Faaora, « O tei ueue i te huero maitai ra, oia te Tamaiti a te Taata ;

« O te aua ra, oia teie nei ao, te huero maitai ra, o te tamarii ïa o te basileia ; e te zizaniʻa ra, o te tamarii ïa a te varua ino ;

« O te enemi i ueue ra, o te diabolo ïa ; e te feia ooti ra, o te mau melahi ïa.

« E mai te zizania i haaputuhia e tahuhia i te auahi ra ; e na reira-atoa-hia te hopea o teie nei ao ».⁷

Te paturu nei teie parabole i te parau a Alama o taʻu e hinaaro nei i te faahiti faahou atu, « o te mau mea maitai, no te Atua ïa ; e te mau mea ino, no te diabolo ïa ».⁸

E te mau taeaʻe, te ora nei tatou i te hoê tau fifi rahi mau, e teie hoʻi te taime no tatou no te haapaari i te haapaʻoraa i ta tatou mau hopoiʻa no te utuafare e no te autahuʻaraa. Eiaha tatou ia pee ê « mai te are miti i mua i te mataʻi ra ».⁹ A haere na tatou i mua ma te varua no te faaroo, e eiaha e mătaʻu i te hoê aʻe mea maori râ i te tapiriraaʼtu i te Arapoa o te Diabolo. E haapuaihia tatou e e faahereherehia tatou mai te mea e haapaʻo tatou i te parau aʻo e i te arataʻiraa a te peresideni Gordon B. Hinckley, o te faatere nei i teie Ekalesia. Te vai ra toʻu iteraa papu taaê e peropheta oia no tatou, e hiʻo, e e heheu parau oia. O oia te auvaha parau o te Atua i niʻa i te fenua i teie mahana. Te pure nei au ia tae mai te mau haamaitairaa a te Fatu i niʻa ia tatou paatoa, na roto i te iʻoa o Iesu Mesia, amene.