Te tau ruhiruhia

E rave rahi matahiti i mairi aʻenei i te pô Noela, ua pohe te tamaiti e pae matahiti i te paari a toʻu hoê fetii i te maʻi pneumonie. Ua haaputuputu te utuafare e ua haati mai ratou i te afata maʻi no te faatupu i te pure utuafare. Te vai ra te hoê ahu taoto iti tei tufetuhia e te mama o teie tamaiti iti i niʼa i na avae naʻinaʻi o te tamaiti.

A faaoti ai ratou i te tapoʻi atu i te afata maʻi, ua faanuu atu toʻu metua vahine i mua, ua tauahi atu oia i te mama e heva ra, e ua tauturu atu iaʼna ia rave mai i te ahu taoto e i te haati atu i te tamaiti iti ra. Te taime hopea to teie na metua ite-mata-raaʼtu i ta raua tamaiti iti, te taoto ra ïa oia, ma te ahu taoto i niʼa iho iaʼna. E taime aroharaa ïa te reira. Te reira mau hoʻi te ohipa ta te mau mama ruau e rave nei !

Ua haere maua toʻu hoa i Brigham City no te hunaraa o te metua tane o taʻu vahine, oia hoʻi o William W. Smith. Ua ite atu vau i te hoê taureʻareʻa taʻu i matau ei tamaiti haere haapiiraa evanelia o te tiʻa ra i pihaʻi iho i te afata maʻi, te heva ra oia. Aita hoʻi vau i ite e ua matau oia i te metua o taʻu vahine.

Ua na o mai oia, « I te hoê tau faafaaearaa haapiiraa, ua rave au i te ohipa i roto i taʼna faaapu. Ua aparau mai te taeaʻe Smith iaʻu no niʼa i te haereraa i te misioni. Aita roa i maraa i toʻu utuafare i te paturu iaʻu i te misioni. Ua parau mai te taeaʻe Smith iaʻu ia pure no niʼa i te reira, e ua na reira mau vau, ‘Mai te mea e faaoti oe i te haere i te misioni, naʻu ïa e aufau i ta oe misioni’, oia mau, naʼna ihoa i aufau i taʻu misioni ».

Aita roa taʻu vahine e toʼna mama i ite i te reira. Te reira ïa te hoê o te mau mea ta te mau papa ruau e rave nei.

E 10 tamarii ta maua toʻu hoa. I te hoê poʻipoʻi mahana sabati i te vai-apî-noa-raa toʻu utuafare, tei te pureraa oroʻa taʻu vahine. Mai tei matarohia, ua tere au i te tahi atu vahi no te pureraa i taua Sabati ra. E parahi ïa ta maua mau tamarii i te taatoaraa o te anaʻiraa parahiraa.

Ua faanuu mai te tuahine Walker, te hoê mama ruau rouru hinahina tei faaamu 12 rahiraa tamarii, mai muri mai i te fare pureraa no te parahi mai i pihaʻi iho i ta maua mau tamarii hautiuti. I muri mai i te pureraa, ua haamauruuru atu taʻu vahine iaʼna no te tautururaa mai.

Ua parau mai te tuahine Walker, « Ua î roa to oe na rima, e ere anei ? » Parau aʻera toʻu hoa e, E. Ua pahono maira te tuahine Walker « Aita e peʻapeʻa, ua î to oe na rima i te tamarii i teie nei ; to oe aau te î a muri aʻe ! » Ua riro mau taʼna mau parau ei parau tohu. Tera ïa te ohipa a te mau mama ruau !

Ua peresideni maua i te misioni no New England. Ua faaipoipo te hoê o ta maua mau misionare e ua roaa mai taʼna e pae na tamarii. Ua haere oia e hoo mai i te hoê pereoo rarahi no toʼna utuafare, e aita roa oia i hoʻi mai. Ua itehia toʼna tino i muri aʻe iho i raro aʻe i te hoê eʻa turu ; ua eiâhia toʼna pereoo.

Ua taniuniu atu vau i toʼna peresideni tĭtĭ no te horoʻaʼtu i te tautururaa i te utuafare. Ua oti aʻe na oia i te tauturu atu.

Ua parau mai te papa ruau : « Ua ite matou eaha ta matou ohipa e rave. Aita matou e hinaaro i te tautururaa no o mai i te Ekalesia. Ua ite matou eaha ta matou ohipa e rave. Tera ïa te ohipa ta te mau papa ruau e rave !

Teie ïa te opuaraa taʻu e hinaaro nei i te aparau atu ia outou e i te mau metua paari – oia hoʻi te mau papa ruau e te mau mama ruau – e tae noaʼtu hoʻi i te mau melo ruhiruhia aita ta ratou e tamarii tera râ o te tauturu nei i roto i te tiaraa metua taata paari.

Te na ô ra te papairaa moʻa e, « Tei te feia tahito te parau paari ; e te ite ra, tei te rahi ia o te mahana ra » (Ioba 12:12).

I te hoê taime i roto i te hoê pureraa tĭtĭ, ua ite atu vau i te hoê pupu rahi roa o te mau metua taata paari, e e feia ivi ïa te pae rahi o ratou. Ua parau atu vau i te peresideni tĭtĭ e e hiʻoraa faahiahia mau o ratou.

Ua pahono mai te peresideni, « Oia mau, e ere râ ratou i te mea itoito i roto i te Ekalesia », oia hoʻi aita ratou e tavini ra ei feia faatere e aore râ ei orometua haapii. Ua aparau mai oia e mai te mea ra e mea fifi roa ratou.

Ua faahiti faahou atu vau i taʼna mau parau, « E ere i te mea itoito i roto i te Ekalesia ? » e ua ani atu vau, « E mea itoito anei ratou i roto i te evanelia ? » Aita oia i taa mai i te auraa o taʻu pure i te omuaraa.

Mai te pae rahi o tatou nei, ua hiʻo ïa oia i te mau mea ta te mau taata e rave nei, aita râ oia i hiʻo eaha râ ratou, oia hoʻi ei pu ite aravihi, ei pu no te paari, e te faaururaa.

E fifi rahi to mua nei ia tatou. Te topa nei te numera rahiraa taata i raro na te ao nei. Te topa nei i raro te rahiraa tamarii e fanauhia nei, e te ora maoro nei te taata. E mea naʻinaʻi te mau utuafare – oia hoʻi ua taotiʻahia te rahiraa tamarii fanau. Ia rahi te feia ruhiruhia, e rahi atoa ïa te mau huru taa ê i te tupu mai i te pae moni, te pae sotiare, e i te pae varua. Hoê a atoa huru i roto i te Ekalesia nei.

E mea tiʻa roa ia tatou ia haapii atu i to tatou uʻi apî ia haafatataʼtu i te mau papa ruau e i te mau mama ruau ruhiruhia.

Aita i maoro aʻenei, ua poroʻi mai te peresideniraa Matamua i te feia apî tamahine ia amui atu i te mau metua vahine e i te mau mama ruau i roto i te Sotaiete Tauturu (a hiʻo i te rata a te peresideniraa Matamua, 19 no mati 2003).

Te vai ra te tahi feia apî tamahine tei faaatea atu. E mea au aʻe na ratou ia amui atu i te feia hoê a matahiti paari e o ratou.

E te Feia Apî Tamahine : Eiaha e riro ei feia maamaa no te oreraa e faahoa mai i te mau tuahine paari roa ra. E rahi atu te faufaa ta ratou e nehenehe e faatae mai i roto i to outou oraraa i ta te mau ohipa faaoaoaraa ta outou e au nei i te rave.

E te feia faatere : A haapii atu i te mau tamahine ia haafatataʼtu i to ratou mau metua vahine e mama ruau e i te mau vahine paari roa ra no te Sotaiete Tauturu. I reira ïa ratou e faahoa ai i te feia paari mai te mau tamarii tamaroa e faahoa nei i roto i te mau pupu autahuʻaraa.

Aita i hope roa ta tatou mau haapiiraa, te mau faanahonahoraa e te mau mea atoa ta tatou e rave nei no to tatou feia apî mai te mea e, aita tatou e haapii ia ratou i te tumu no te Faahoʻi-raa-hia mai te evanelia. Ua faahoʻihia mai te mau taviri no te autahuʻaraa e ua heheuhia mai te mana no te taatiraa, e ua patuhia te hiero no te taatiraa i te mau uʻi. Mai te mau tau tahito ra e tae roa i roto i te mau uʻi atoa, te na ô ra te parau, « A faafariu i te aau o te mau metua e te aau o te tamarii, e te aau o te tamarii i to ratou mau metua » (Malaki 4:6).

E te Episekopo : Ua ite anei outou e te tahi mau mea ta outou e peʻapeʻa nei no niʼa i te feia apî, e o vetahi e, e faaafarohia te reira mai te mea e faaea piri atu ratou i to ratou mau metua tane e metua vahine e i to ratou mau metua paari, te feia ruhiruhia ?

Mai te mea ua toiaha roa ta outou hopoiʻa i te aʻoraa ia ratou, te vai ra ïa te mau tuahine paari, te mau mama ruau i roto i te paroita, o te nehenehe e faauru i te mau vahine apî tei faaipoipohia e ia riro ei mama ruau haapaʻo ia ratou. E te vai ra te mau papa ruau paari no te feia apî tamaroa. E feia aravihi mau te feia ruhiruhia. A ite nahea ia faaohipa ia ratou.

Ua na o mai te peropheta Iosepha Semita, « Te raveʻa maitai roa aʻe no te rave-faaoti-raa i te hoê ohipa faufaa rahi, o te haaputuraa mai ïa i te mau tane [e temau vahine] ruhiruhia, te feia aravihi no te tauturu i te horoʻaraa i te parau aʻo i te mau taime fifi rahi mau » (Teachings of the Prophet Joseph Smith, maitihia e Joseph Fielding Smith [1976], 299).

Te tamata nei tatou i te haaputuputu i te feia apî, aita râ ratou e tamata nei i te haaputuputu i te mau uʻi taata. Te vai ra te mau melo taata paari o te nehenehe e tauturu. Mai te mea te hiʻo ra outou i te mau melo feia paari ei feia paruparu i roto i te Ekalesia, a ani ïa ia outou iho, « E mea itoito anei ratou i roto i te evanelia ? »

Eiaha roa e tauʻa ore atu i te mana paturu rahi i roto i te mau pure a te mau metua e a te mau metua ruau. A haamanaʻo i te « pure faauʻana a te taata parau-tia ra, e mea tia-rahi-hia mai ïa » (Iakobo 5:16).

Alama te Tamaiti, te hoê ïa taata orure hau. Ua taʻirihia oia i raro e te hoê melahi tei parau iaʼna, « Inaha, ua faaroo aʻenei te Fatu ra i te pure a toʼna ra mau taata, e te mau pure hoʻi a toʼna ra tavini a Alama, to oe ra metua ; e ua pure hoʻi oia ia oe ma te faaroo rahi, ia arataʼihia oe i te ite i te parau mau ; e no reira i haere mai ai au e faaite atu ia oe na i te mana e te puai o te Atua ra, ia faatiahia te pure a toʼna ra mau tavini mai te au i to ratou ra faaroo » (Mosia 27:14).

Ua ite mata atu maua taʻu vahine i to maua na metua ruau e i to maua iho na metua i te faaruʻeraa mai ia maua. Te tahi mau aamu tei manaʻohia i te matamua ra ei mau peʻapeʻa, ua faarirohia ïa te reira ei haamaitairaa i teie nei.

Ua pohe te metua tane o taʻu vahine i roto i to maua fare. Ua titauhia i te hoê taata ia hapao tamau noa iaʼna. Ua haapii mai te mau tuati maʻi i ta maua mau tamarii nahea ia haapaʻo ia papa ruau tei tarava noa i niʼa i te roʻi. E faufaa rahi mau tei roaa mai ia ratou e ia maua na roto i te haapaʻoraa iaʼna. Ua mauruuru roa matou no toʼna faaearaa mai i pihaʻi iho ia matou.

Ua hau atu 1000 taime te faahoʻiraahia mai te haamaitairaa i niʼa ia maua na roto i te faaururaa taʼna i vaiiho mai i niʼa i ta maua mau tamarii. E mea faahiahia mau ïa te reira i niʼa i ta maua mau tamarii, mai taʻu atoa i ite i toʻu vai tamariiraa a pohe ai o Papa Ruau Packer i roto i to matou fare.

A hiʻo atu i te faufaa o te feia ruhiruhia, eiaha noa no te mau ohipa te tiʻa ia ratou i te rave.

Aita anei outou i maere no te aha te Fatu i faanahonaho ai i te peresideniraa Matamua e i te Pupu no te Tino Ahuru Ma Piti Aposetolo, ia riro noa te feia faatere paari no te Ekalesia ei feia ruhiruhia ? E mea faufaa roa ia te paari e te ite aravihi o te feia ruhiruhia i to te feia apî e i te tino itoito.

E 77 matahiti paari to te pae rahi o te mau melo no te peresideniraa e no te Tino Hoê Ahuru E Ma Piti Aposetolo. E ere matou i te mea paruparu roa. Parau mau, ua paari roa matou. Tera râ, na te Fatu i faataa mai teie te huru.

I te hoê amuiraa e aore râ e piti i mairi aʻenei, ua parau o Joseph Wirthlin e e tuu oia i te hoê titauraa [defi] i mua i te mau melo no te Tino Ahuru Ma Piti no te hoê tataʻuraa horo. Ua feruri au e, « E farii au i taua titauraa ra ». Area râ i muri iho mai, ua feruri au e, e mea maitai aʻe paha ia horo vau na muri iho i te taeaʻe David Haight, e 96 matahiti toʼna. Tera râ, ua feruri faahou maitai au, e rore mai paha ona iaʻu i taʼna raau turutootoo, e e pau ïa vau. No reira, ua faaea vau i te manaʻo no te haere e horo.

Ia amuihia te peresideniraa Matamua e te Pupu Tino Hoê Ahuru E Ma Piti, e 1161 ïa rahiraa matahiti to matou paatoa. E e 430 rahiraa matahiti i te taviniraa matou ei mau Hui Mana Faatere no te Ekalesia. Te mau mea atoa ta matou e paraparau nei, ua rave aʻena ïa te hoê o matou e aore hau atu â i te reira, e tae noaʼtu i te taviniraa i roto i te nuu faehau !

Te ora nei tatou i te mau tau ahoaho mau. I roto i te oraraa o to tatou feia apî, eita roa te mau fifi i te iti, e rahi roa râ te reira. E tiʻa i te feia ruhiruhia ia horoʻa mai i te hoê mana papu e e tiʻa mau ia tatou ia faaoromaʻi i te mau mea atoa.

Ua faaipoipohia ta maua mau tamarii, e ua faaruʻe mai i te fare no te imi i to ratou iho ora.

Ua faaruʻe mai taʻu tamahine e toʼna utuafare i te fare e ua tere atu na niʼa i te hoê pereoo tahito e ta raua mau tamarii naʻinaʻi. Ua taʻi roa toʻu hoa. Ua tamaru atu vau iaʼna ma te parauraaʼtu, « E haere ratou i te fare pureraa. Te vai ra te hoê mama ruau i o no te pahono i te mau uiraa a ta taua tamahine no niʼa i te ohipa tunuraa maa e aore râ te haapaʻoraa i te tamarii, e te vai atoa ra te hoê papa ruau i o no te haapii mai i taʼna tane ».

E itehia te mama ruau i roto i te Sotaiete Tauturu. E itehia te hoê papa ruau i roto i te mau pupu no te autahuʻaraa. Tera râ, aita te mau papa ruau e te mau mama ruau atoa e parahi ra i roto i te Ekalesia.

Ua hoo mai te hoê tamaiti taʻu i te hoê fare naʻinaʻi i te hoê vahi atea roa. Ua faaite mai oia i te tahi mau ofaʻi huʻahuʻa no niʼa mai i te niu tima o te fare. Ua ani mai oia eaha taʼna e rave.

Aita vau i ite, tera râ ua ui atu vau iaʼna, « Te vai ra anei te tahi na taata paari o te faaea ra piri mai ia oe ? »

Ua parau mai oia, « Oia, i ô aʻe noa mai i te purumu, te vai ra te tahi na taata tei faataimehia i ta raua ohipa ».

« A haere na e ani atu iaʼna ia haere mai e hiʻo i to oe fare. Ua ite ona i te huru no te reira vahi ».

Ua na reira ihoa oia, e ua farii atu oia i te parau aʻo a te hoê taata paari tei ite i taua huru fifi ra e te tahi atu mau fifi i reira. Tera ïa ta te mau papa ruau faaamu e nehenehe e rave.

« E faaturaʼtu i to metua tane e i to metua vahine : ia haamaorohia to oe pue mahana i te fenua ta te Atua ta Iehova e horoʻa no oe na » (Exodo 20:12).

Ua haapii mai te Aposetolo Paulo e mea tiʻa roa i te mau « vahine feia paari » ia haapii i te feia apî tamahine, e e mea tiʻa roa i te mau « tane feia paari » ia aʻo atu i te feia apî tane « e faaite mai te Fatu ia oe i te hiʻoraa no te mau ohipa maitataʻi » (a hiʻo i te Tito 2:1-7).

Ua paari roa matou i teie nei, e eita e maoro roa, e piihia matou ia haere i te tahi atu paeau mai no te paruru. Eita roa ïa matou e patoʻi atu i te reira. E tamata matou i te haapii atu i te mau ite tei roaa mai ia matou te feia apî aʻe ia matou – oia hoʻi i to matou utuafare e ia vetahi e.

Aita e nehenehe ia matou i teie nei ia rave i te mau mea tei matauhia e matou i te rave i mutaa ihora. Ua hau roaʼtu to matou ite i teie nei i to mutaa ihora. Ua ravaʻi maitai to matou ite no te haapii atu, no te aʻo atu, no te faatitiaifaro, e no te faaara atu i to tatou feia apî.

I roto i to outou mau tau ruhiruhia, e rave rahi te ohipa e rave, e e rave rahi te huru ia riro. Eiaha roa outou e parahi noa ma te rave ore i te ohipa. E aau teʻoteʻo ïa to te feia o te na reira nei. Peneiaʻe paha ua rave outou i te hoê tau misionare e ua haamauruuruhia mai outou, e ua manaʻo outou e ua hope ta outou taviniraa i roto i te Ekalesia. Aita roa outou e haamauruuruhia nei i te vai-itoito-raa i roto i te evanelia. « Mai te mea », te na reia ra te Fatu, « e hinaaro to oe i te tavini i te Atua, ua maitihia ia oe i te ohipa i reira » (PH&PF 4:3).

E ite mai outou ia paari e ia paruparu roa anaʻe outou e, te ohipa rahi roa aʻe i roto i te oraraa nei o te faaitoitoraa ïa i to outou iho utuafare, e i te mau utuafare o vetahi e, e tae roaʼtu i te taatiraa i te mau uʻi atoa.

Te haapii atu nei au i te hoê parau tumu mau. E parau mau teie. Ua papaʻihia e, « te parau tumu i te haapiiraa o tei faauehiaʼtu ia outou na roto i te heheuraa » (PH&PF 128:7).

I roto i te himene ra, « Aue te Paari », tei neneihia i te matahiti 1835 ra i roto i te Buka Himene matamua a te Ekalesia, te na ô ra teie mau parau :

A tapeʻa maite i te ahu o to outou iteraa papu no te evanelia i faahoʻi-faahou-hia mai e i to outou ite no te Faaora ia ama rahi noa ia nehenehe ta outou mau tamarii ia haamahanahana i to ratou mau rima i te ahi o to outou faaroo. O tera ïa te tiʻa ia papa ruau mâ e ia mama ruau mâ ia rave ! Na roto i te iʻoa o Iesu Mesia, amene.