Te tiʻa-maite-raa i roto i ta tatou mau fafauraa

I toʻu pii-raa-hia a ono avaʻe i teie nei, ua ite hohonu vau i te here faito-ore o te Atua i niʻa ia outou e toʻu mau tuahine here. Toʻu hinaaro rahi no te mau tamahine apî i te mau vahi atoa oia hoʻi, ia ite mai outou e, ua herehia outou – eiaha noa e, naʻu anaʻe, na to outou atoa râ mau metua e to outou feia faatere, e na to outou Metua i te Ao ra.

I te tahi taime, e mea fifi ia ite i teie here. Ua matau vau i te hoê tamahine apî mai te mea ra e, e mea maitai roa toʼna oraraa. Ua manuïa oia i te hoê maitiraa ei melo i roto i te peresideniraa no te mau piahi, ua manuïa oia i te tataʻuraa himene e ua fariihia i roto i te hoê pŭpŭ himene maiti, e ua maitihia ei arii vahine no te fare haapiiraa tuarua. I te hoê mahana, ua hoʻi oia i te fare i muri mai i te haapiiraa e taravaʼtura i niʻa i toʼna roʻi ma te taʻi. Ui atura toʼna mama eaha teie, pahono mai nei, « Aita toʻu e faufaa ; aita vau e auhia ; aita toʻu hoê taleni ; e ere taʻu haapiiraa i te mea maitai ; e e mea ʻiroʻiro roa vau ». Aita roa i manaʻohia e, aita oia e peʻapeʻa ra, e moʻemoʻe ra, e tiʻaturi-ore ra ; te na reira atoa nei e rave rahi feia apî i tera taime e tera taime.

Te mauiui nei vetahi feia apî, e rahi roaʼtu â, no te mau tamataraa teimaha. Teie te tahi hiʻoraa, i rotopu i te feia apî tamahine o taʻu i matau, te pohe ra te metua vahine o te hoê tamahine i te maʻi mariri ‘ai taata. Te tahi, ua taa na metua. Te tahi ra, e faaea noa ïa i te fare i te hopea hebedoma areʻa toʼna mau hoa ra, e haere ïa e inu. Te tahi, ua roohia i te huma na roto i te hoê ati pereoo. To te tahi papa, ua ô ïa i te aua faehau. Te haapeʻapeʻa ra te hoê tuahine maitai roa no te nevaneva o toʼna taeaʻe.

Nahea ia tauturu i te feia apî i roto i teie mau fifi rau e te rahi hoʻi ? E horoʻa te Parau Tumu o teie matahiti o ta tatou e hiʻo i teie pô i te pahonoraa. Teie ïa, « E teie nei, ia haere tiʻaʼtu outou i mua i te tiʻa-maite-raa i te Mesia, ma te tiaʻi papu roa, e te here i te Atua e te taata atoa » (2 Nephi 31:20). E mea here naʻu teie papaʻiraa moʻa. Te faaite ra e nahea ia tatara ia tatou i rapae i to tatou mau tamataraa. Ia haere tiʻaʼtu vau na roto i te tiʻaturi e te here, e farii atoa ïa vau i te tiʻaturi e te here.

E titau mai te tiʻa-maite-raa i te Mesia i te haapaʻoraa i te mau fafauraa. E faaapî tatou i ta tatou mau fafauraa no te bapetizoraa i te mau hebedomaʼtoa na roto « i te raveraa i Toʼna iʻoa i niʻa iho ia tatou », e « i te haamanaʻo â Iaʼna », e « i te haapaʻo maitai i Taʼna mau faaue » (a hiʻo PH&PF 20:77). Ia rave tatou i teie mau mea, te tiʻa-maite ra ïa tatou i te Mesia, e faateiteihia to tatou varua e e faaîhia to tatou aau i te here. Faaohie noa te parau e, ia haapaʻo vau i taʻu mau fafauraa, e roaa iaʻu te tiʻaturi e e farii au i te here.

Ua hinaaro-roa toʻu hoa o taʻu e pii o Lindsey i te tiʻaturi. Te ora ra oia i roto i te hoê utuafare aita te mana o te Varua e aita atoa e here e vaira. E oraraa edene to toʼna mau hoa, e aita oia e « tauʻa » rahihia na e toʼna mau taata faatere. I roto râ iaʼna, ua ite oia e te here ra te Fatu iaʼna noaʼtu toʼna mau fifi. Ua tamata oia i te haamanaʻo Iaʼna. Ua maiti oia eiaha e amui atu i toʼna mau hoa ia rave ratou i te mau mea tiʻa-ore. Ua tamata oia i te haamori i te Metua i te Ao ra i roto i toʼna piha, no te mea ua hinaaro oia e farii i te Varua i roto i toʼna oraraa. Hoê râ mea i roto iaʼna o te hinaaro ra i te rave i te maitai, i te haapaʻo i Taʼna mau faaueraa. Noaʼtu te iti o toʼna ite e te tauturu ore o toʼna mau hoa, ua tamata noa oia i te haapaʻo i te mau fafauraa o toʼna bapetizoraa. Ua tamata noa oia i te rave i te mea tiʻa, e ua farii i te here o toʼna Metua i te Ao ra.

Ua fafau mai te Fatu ia tatou eita roa Oia e vaiiho noa ia tatou no te mea ua « papaʻi haamau Oia ia [tatou] i niʻa i [Toʼna] apu rima » (Isaia 49:16). E ua fafau tatou e e ore roa tatou e haamoʻe Iaʼna no te mea ua papaʻi haamau tatou Iaʼna i roto i to tatou aau.

Ua haapiihia te Feia Moʻa matamua i taua mau mea ra a vai ai ratou i roto i te mamae i Missouri. Ua aʻo te Fatu ia ratou ia « tiaʻi maite i te Fatu, no te mea ua tomo ta outou mau pure i roto i te tariʻa o te Fatu…

« No reira, te horoʻa maira Oia i teie fafauraa ia outou, mai te hoê fafauraa o te ore roa e faahuru- ê-hia e e faatupu-mau-hia te reira ; e te mau mea atoa i haamamaehiaʼi outou ra e faariro-amui- hia ïa ei maitai no outou » (PH&PF 98:2-3). Aita teie fafauraa i iriti i to ratou mau ati, tera râ, ua tamahanahana te reira ia ratou, e ua horoʻa mai i te tiʻaturiraa no te tau i muri.

Hoê atoa huru, ua haere tiʻaʼtu o Aberahama ma te tiʻa-maite-raa, ma te tapeʻa i te faaroo no te mau fafauraa o ta te Atua i faaoti e oʼna. I te mau taime atoa a taiʻo ai au i to Aberahama haereraa i te Mouʻa no Moria no te pûpû i taʼna tamaiti ia Isaaka ei tusia, e peʻapeʻa vau noʼna. Aita oia i ite i te hopea o taua tamataraa ra, area tatou râ, ua ite ïa na roto i te hoê aamu. Tera râ, ua tiʻa- maite oia. Ua ora noa oia i niʻa i te mau fafauraa e ma te ite e e haamaitai te Fatu iaʼna. Noaʼtu toʼna mătaʻu, aita râ te reira i tapeʻa iaʼna i te haere tiʻaʼtu ma te tiʻa-maite-raa i te Mesia.

Mai te Feia Moʻa o Missouri, ua ite Lindsey e noaʼtu toʼna mau fifi, aita te Metua i te Ao ra i faaruʻe iaʼna. E here papu Toʼna. Ua ite oia i te tamahanahanaraa i roto i te hoê « fafauraa o te ore-roa e faahuru-ê-hia » o Toʼna here – e « te mau mea atoa i haamamaehiaʼi outou ra e faariro- amui-hia ïa ei maitai no outou » (PH&PF 98:3). Mai ia Aberahama, eita atoa toʼna eʻa i te mea ohie, ua haere tiʻaʼtu râ oia. A na reiraʼi oia, ua roaa iaʼna te tauturu. Ua here e ua arataʻi te hoê taata faatere taaê o te Ekalesia iaʼna. Ua haafatataʼtu oia i toʼna Metua i te Ao ra e ua farerei i te hoê taureʻareʻa tei here iaʼna, e o tei haapii iaʼna i te evanelia, e ua faaipoipo iaʼna.

Inaha, te mau haamaitairaa e rave rahi o taʼna i tiaʻi mai toʼna apîraa mai â, ua niniihia mai ïa i niʻa iaʼna. Ua itea iaʼna e e nehenehe oia e farii i te Varua i roto i toʼna iho utuafare e ia aupuru i taʼna mau tamarii na roto i te parau-tiʻa. I toʼna vai apîraa, ua faataa-ê-hia e ua faaruʻe noahia oia, e i teie nei, te ite nei oia e, te haaatihia nei oia e te here. E mea na roto ïa i te haere tiʻaʼtu e ma te tiaʻi maite i te Fatu. Na te tiʻa-maite-raa i te Mesia i hopoi mai i te tiʻaturi ia Lindsey oiaʼtoa ia tatou tataʻitahi a aro ai tatou i te mau tamataraa o te oraraa. E faaitoito te mau parau ta te pŭpŭ himene i himene mai i teie pô ia tatou ia haere Iaʼna :

E horoʻa te haapaʻoraa i te mau fafauraa i te tiʻaturi no te haereraa i mua, e i te faahuru-ê-raa i te aau. Ua haapii mai te Fatu i roto i te Ieremia, « Teie râ te faufaa Taʻu e faaau atu… E tuu vau i Taʻu ture i roto ia ratou, e papaʻi au i te reira i roto i to ratou aau » (Ieremia 31:33). E faarahi te mau fafauraa i to tatou aau e e faatiʻa ia tatou ia farii i te « here o te Atua e o te mau taata atoa » (2 Nephi 31:20). A haamanaʻo, ia haapaʻo tatou i ta tatou mau fafauraa, e roaa ia tatou te tiʻaturi, e e farii tatou i te here.

Ua haapii Iesu i roto i te Aʻoraa i niʻa i te Mouʻa i te mau faufaa o te aau mai te here, te faaore-raa hapa, e te aroha. Ua haapii Oia ia tatou ei mau Pĭpĭ Naʼna ia rave i Toʼna ioʻa e Toʼna huru i niʻa ia tatou. Na teie i faahuru-ê e i haamaitai i to tatou auraa e vetahi ê. Ua parau o elder Marvin J. Ashton e, « Ia fariu mau tatou ia Iesu Mesia, e ia fafau atu Iaʼna, e tupu mai te mau mea maere : e hiʻo tiʻa tatou i te maitai-hau o to tatou mau taeaʻe, e na te huru o ta tatou utuuturaa ia vetahi ê e faarahi i te faaoromaʻi, i te maitai, [e] i te mata aiʻai » (« The Tongue Can Be a Sharp Sword », Ensign, me 1992, 20).

E nehenehe tatou ia tiʻa-maite i te Mesia i roto i to tatou iho mau fare, e i pihaʻi iho i te mau melo o to tatou utuafare ? Ia fafau tatou i te rave i Toʼna iʻoa e i Toʼna huru i niʻa ia tatou, te auraa râ, ia paraparau ma te reo măru, ia vai te mata aiʻai, ia tavini i to outou mau taeaʻe ma te pûpû ia outou iho, e ia rahi atu te mauruuru e te tauturu faaite i to outou mau metua.

Ua tere na ta maua tamaiti i roto i te hoê tere utuafare. E mea huru atea te vahi ta matou i tere no te haere e mataʻitaʻi i te hoê aoraʻi. I to matou tapaeraaʼtu, ua rohirohi roa e ua rave peu mai ta maua tamahine hopea. Aita oia i hinaaro ia pou i raro i te pereoo no te hahaere i taua vahi ra, o te tumu hoʻi o to matou tere atea. Ua riri matou iaʼna. Na roto râ i te mărû, ua tuta ta maua tamaiti iaʼna i niʻa i toʼna tua, e 14 matahiti to teie tamaiti, e ua haamataʻitaʻi haere iaʼna. Ua tupu roa te hau na roto i toʼna faaiteraa i te here. Ua vai te huru o toʼna here i roto i to matou feruriraa hau atu i te hohoʻa o taua aoraʻi ra.

I te tahi mau taime e mea fifi roa i roto i to tatou mau utuafare ia faariro ia tatou ei mau taata maitai. E mea titauhia te tutavaraa peepee no te « haere tiʻa-raaʼtu ». Ia haapaʻo râ outou i ta outou mau fafauraa, e haapii outou i te here hau atu i te feia o tei taʼatihia ia outou no a muri noaʼtu. Ei reira atoa ïa outou e faarahi ai i to outou here i raro atu i to outou iho utuafare no vetahi ê.

I te hoê tau, ua ora na toʻu utuafare i te fenua Peretiria. Piti hebedoma hou matou e hoʻi mai ai, ua ŭ matou i te pereoo. I to matou hoʻiraa i te fare i roto i te hoê ua rahi i muri aʻe i te pureraa oroʻa, ua tae matou i te hoê maaraa puromu. Faatea ihora hoê pereoo i toʼna vairaa i muri atu i te tahi pereoo e ŭ maira i niʻa i to matou. Auaa râ, aita roaʼtu hoê i pepe ino i roto i teie na pereoo, area na pereoo ra, ua ino ïa. Ua haere atu taʻu tane John e farerei i te taata faahoro no to maua tiʻaraa, te faahaamanaʻo noaʼtu ra vau iaʼna, e ere na taua te hape. Inaha, ua hoʻi mai oia i roto i te pereoo e ua tere mărû noa matou no te hoʻi i te fare, e te maniania i niʻa i te huira ia tere matou. Ua apee atoa mai te tahi pereoo ra. Teie noa te parau a John, « e faaite atu vau ia oe a rauaʻe ».

Ia tae matou i te fare, haere atura John e tii i ta matou vehi rata moni no te ohipa rû e horoʻaʼtura na taua utuafare ra ia tataʻihia to ratou pereoo. Hoʻi atura ratou ma te oaoa. Ua maere roa vau. Ua haaputuputu ihora John i to matou utuafare. Ma te huru tatarahapa, ua tatara maira oia i te auraa o te ohipa o taʼna i rave. « Ua ite au e ere na tatou te hape, area râ, ua faaafaro vau e teie nei utuafare, ua manaʻo ihora vau e aita i maoro aʻe nei, ua fafau vau i te Metua i te Ao ra, e rave au mai Taʼna i manaʻo i te rave. Ua ite au ahiri paʻi o Oia to roto i toʻu tiʻaraa, e mea papu e arohaʼtu Oia i teie utuafare e tauturu tiʻaʼtu Oia ia ratou ». Aue ïa tane e aue ïa metua tane hiʻoraa maitai e ! Ua haamanaʻo oia i taʼna fafauraa. Ua rave i te hiʻoraa here o te Mesia, ua tamărû i te aau.

Te faaite papu nei au e, ia haamanaʻo vau i taʻu mau fafauraa i te mau mahana atoa, e farii au i te tiʻaturi e e ite au i te here. Ua ite au e hopoi mai te tiʻa-maite-raa i te Mesia i te maramarama mau no te tiʻaturiraa e no te here o te Atua no te mau taata atoa i roto i toʻu aau.

« Eaha ta te Metua i ani ia tatou ? Eaha ta te mau papaʻiraa moʻa i parau ? Ia roaa te faaroo, ia roaa te tiʻaturi, ia ora mai te Tamaiti, e ia tauturu ia vetahi ê i niʻa i to ratou haereʻa » (« He Sent His Son », Children’s Songbook, 35 ; Liahona, eperera 1992, F11). Te pure nei au ia haere tatou tataʻitahi Iaʼna ra ia roaa te tiʻaturi e ia pee i Toʼna hiʻoraa maitai o te here, na roto i te iʻoa o Iesu Mesia, amene.