Apee i te mau haamaramaramaraa

Tau matahiti i mairi aenei a tavini ai au ei papai parau paroita, ua tae maira te mau tauihaa no te paroita no te matahiti apî i roto i toʻu rima. I roto i te mau afata, te vaira te hoê afata na te papai parau paroita tei faahiʻo iaʻu i reira. Ua pinehia i niʻa i taua afata ra te hoê titeti mai te papaihia i niaiho : « Mai te mea eita oe e ite nahea ra – E hoa ! A apee i te mau haamaramaramaraa ».

Aita vau i haapaʻo i tera parau e ua papu iaʻu e te vaira te hoê taata i roto i te pû faatere o te Ekalesia o tei ite iaʻu nei.

Noaʼtu e, e parau huru arearea rii te reira, ua vai râ taua parau ra i roto i toʻu feruriraa : « Mai te mea eita oe e ite nahea ra – E hoa ! A apee i te mau haamaramaramaraa ».

Te farii nei te taata tataʻitahi i te mau tamataraa e rave rahi i roto i teie oraraa tahuti nei. E tiʻamâraa to te taata ia maiti i te mea e faahaere iaʼna i mua. E horoʻa mai te mau maitiraa tano i te mau haamaitairaa area te mau maitiraa tano ore e horoʻa mai ïa i te mau mea auʻore.

Mea papu ore te oraraa. Mea poto to tatou taime. Mea faufaa to tatou taime. O teie te taime no « te faaineine no te farerei i te Atua » (Alama 34:32). Aita e taime haamauʻa i roto i te tamataraa a te taata e aore râ i roto i te haaraa i roto i te tahi mau mea o te riro ei haamauiui i to tatou mau tino e to tatou mau varua.

Aita hoê i rotopu ia tatou e mea tiʻamâ roa ino e te titau nei tatou paatoa i te tauturu. Eita tatou e vaiiho otare noa hia mai te mea e haapiihia tatou, ma to tatou aau e mai te mea e faaroo tatou.

« E tiʻaturi ia Iehova ma to aau atoa ra ; eiaha râ e tiʻaturi i to oe ihora haapaʻo.

« Eiaha e haamoʻe iaʼna i to oe atoa ra mau haerea ; e naʼna e faaite ia oe i to oe mau haerea » (Maseli 3:5-6).

Mea nahea tatou ia farii i taua mau haamaramaramaraa ra ?

Na mua roa, ia roaa te hinaaro mau ia tatou.

Piti, titauhia te faaroo – ia tiʻaturi e te ite maira te Fatu ia tatou, e te here nei Oia ia tatou, e e pahono mai Oia i ta tatou mau pure.

A taiʻo ai Iosepha Semita i te bibilia, ua taiʻo oia i roto ia Iakobo 1:5:

« Te ere ra râ te hoê o outou i te ite, e ani oia i te Atua ra, o tei horoʻa hua mai i te maitai i te taata atoa ra, ma te patoi ore ; e e horoʻahia mai taʼna.

« E ani ra oia ma te faaroo, eiaha e feaa ».

Ua apee o Iosepha i te mau haamaramaramaraa e ua farii i te pahono i taʼna ra pure. E farii atoa tatou i te mau pahono i ta tatou ra mau pure.

I roto i toʻu oraraa, i riro na vau ei taata faaapu e utuafare rahi hoʻi toʻu. Noaʼtu e ua riro te pure ei tuhaa noʻu iho e no toʻu utuafare i te mau mahana atoa no to matou oraraa, te tahi taime e ô mai te manaʻo e tuturi i te hoê vahi i te pô e aore râ e tuturi i te hoê vahi i rapae e a hiʻo atu i niʻa i te raʻi, e ia parau puai atu ai i toʻu Metua Here i te Ao ra. E ua ite noa vau i Toʼna mahanahana i roto iaʻu e ua ite au i reira, mai taʻu e ite nei i teie nei, e te faaroo nei Oia iaʻu e te pahono nei Oia i taʻu mau pure i roto i Toʼna ra paari, no toʻu iho maitai rahi.

Ia tatou paatoa noaʼtu te vahi e te reira outou – o outou e hinaaro nei i te tiʻaturi, ia outou e hinaaro nei i te tamahanahana ia outou i roto i te oaoa ore, ia outou o te hinaaro nei i te arataʼiraa e te hinaaro nei ia ite i te tumu no to outou oraraa – toʻu mau hoa here, te faaitoito nei au ia outou ! Te aʻo atu nei au ia outou – ia turou i to outou upoo i raro e aore râ a tuturi ! Na roto i ta outou iho mau parau, a haamauruuru i to outou Metua Here i te Ao ra no te tusia taraehara a Taʼna tamaiti no outou e no te mau haamaitairaa atoa o Taʼna i horoʻa ia outou. E î to outou mau mata i te roimata e te mahanahana o te Varua o te tae mai i roto i to outou aau.

I reira a paraparau i te Fatu, a ani i te tamahanahana, te arataʼiraa, e te maramarama. A iriti ai outou i to outou feruriraa e to outou aau no te farii i te Varua, e horoʻa mai te Fatu i te mau haamaramaramaraa o te haamaitai i to outou oraraa, i te taime o Taʼna e faataa e na roto i te raveʻa o Taʼna e hinaaro e horoʻa mai.

Te vai atoa nei te mau haamaramaramaraa i roto i te mau papairaa moʻa na te mau peropheta i tahito ra e i te tau apî nei. « Te mau parau moʻa atoa i papaʻihia ra e mea faauruhia mai ïa e te Atua, e e mea maitai ei haapiiraa, ei aʻoraa, ei faaiteraa hapa, ei faaite mai i te parau-tiʻa ra » (2 Timoteo 3:16).

I teie tuuraa tau ua horoʻa mai te Fatu ia tatou i te aʻoraa mahanahana « eiaha e mătaʻu i ta outou mau enemi, no te mea ua tăpŭ vau i roto i toʻu aau, … e e tamata vau ia outou i roto i te mau mea atoa, e haapaʻo anei outou i taʻu fafauraa, e tae noaʼtu i te pohe, ia itehia e ua au maitai outou » (PH&PF 98:14).

Titauhia te ohipa rahi i roto i te apeeraa i te mau haamaramaramaraa, te haapaʻoraa, e tae noaʼtu i te hopea.

« E teie nei, ia haere tiaʼtu outou i mua i te tia-maiteraa i te Mesia, ma te tiaʻi papu roa, e te here i te Atua e te taata atoa. E tena na, ia haere tiʻa outou i mua ma te oaoa i te ite e te parau a te Mesia, ma te tapeʻa hoʻi e tae noaʼtu i te hopea ra, inaha, te na ŏ maira te Metua, E ora mure to outou i reira ra » (2 Nephi 31:20).

« E te parau faahou atu nei au ia outou, mai te mea e mata na outou i te rave i te mau mea atoa taʻu e faaue atu ia outou na, e faafariu ê atu vau, o te Fatu, i te riri uʻana e te au ore hoʻi ia outou na, e e ore roa te mau uputa o hade e upotia i niʻa ia outou na » (PH&PF 98:22).

« Mai te mea ra ua vai ineine noa outou e ore outou e mătaʻu » (PH&PF 38:30).

Mai mutaa iho ra, te farii nei tatou i te haamaramaramaraa mai roto mai i te hoê peropheta ora. Te faaite papu nei au ia outou e, ua ite au e o te peresideni Gordon B. Hinckley te peropheta a te Fatu i teie mahana. Te horoʻa mai nei oia i te aʻoraa faauruhia no to tatou nei anotau.

Ua parau oia i roto i te amuiraa rahi no atopa 2001:

« I teie mahana, te farii nei tatou i te mau fifi taaê, e mau fifi rahi e te aamu e te teimaha e o te haapeʻapeʻa ia tatou. Oia mau e hinaaro tatou i te Fatu…

« To tatou parururaa, tei roto ïa i te mau peu maitai o to tatou oraraa. E vai atoa to tatou puai i roto i to tatou parau-tiʻa. Ua faaite maramarama mai te Atua e, ia ore tatou ia faaruʻe Iaʼna, e ore atoa Oia e faaruʻe ia tatou » (« Ia farerei faahou tatou », Liahona, tenuare 2002, 104-5).

I muri aʻe i te fariiraa i te mau haamaramaramaraa, titauhia tatou ia haapaʻo e ia faroo i te aʻoraa o ta tatou e farii. Mea titauhia tatou ia faaroo e ia apee i to tatou feia faatere i faataahia.

I te hoê taime, ua hiʻo atu te Faaora i niʻa i te nahoʻa taata mai te mamoe ra aore e tiaʻi (a hiʻo ia Mataio 9:36). E tiaʻi to te melo tataʻitahi i roto i teie Ekalesia. E piihia ratou ei mau peresideni pupu autahuʻaraa, ei mau epesikopo, ei mau peresideni tĭtĭ.

Ua faaue mai te Fatu ia tatou ia imi i te mau papairaa moʻa e ia apee i te mau faaueraa.

Ua fafau mai Oia e tupu mau â Taʼna mau parau « na roto i toʻu iho reo e aore râ na roto i te reo o taʻu ra mau tavini, hoê â ïa » (PH&PF 1:37-38).

Ua parau te Fatu « te mau mea atoa -ta ratou e parau ra ia ûrûhia ra e te Varua Maitai e riro ïa ei parau moʻa, e riro ïa te hinaaro o te Fatu, e riro ïa te manaʻo o te Fatu, e e riro ïa te parau a te Fatu, e riro ïa te reo o te Fatu, e te mana hoʻi o te Atua e tae noaʼtu i te ora » (PH&PF 68:4).

« Mai te mea eita oe e ite nahea ra – E hoa ! A apee i te mau haamaramaramaraa ».

Ia na reira tatou o taʻu ïa pure, na roto i te iʻoa o Iesu Mesia ra, amene.