Na te faaoreraa hara e taui i te tairoiro i te here

E ere anei te ohipa maere, tera rahiraa horoʻa o te Varua ta te Fatu i horoʻa ia elder Nelson ra. Aita toʼna mau taleni i haamaitai noa i te Ekalesia anaʻe ra, i te ao atoa nei râ.

Te hinaaro nei au e paraparau atu i teie mahana i te parau no te faaoreraa hara.

Ua paari au i roto i te hoê oire faaapu iti e ua riro te pape ei tumu no te ora i te mataeinaa. Te haamanaʻo nei au i te mau taata i te tiaʻi tamauraa, i te haapeʻapeʻaraa e i te pureraa ia topa te ua, e i te parau faatiʻa a te hau no te opereraa papae. I te tahi mau taime e faaʻoo taʻu mau tamarii iaʻu ; e parau ratou e aita ă ratou i ite aʻe nei i te hoê taata i te haapeʻapeʻaraa no te ua. Ua pahono vau ia ratou e parau mau no te mea i te vahi au i paari mai ai, ua hau atu te faufaa o te ua i te hoê manaʻonaʻoraa. E tumu te reira no te ora !

No te mau manaʻo puai e te mau haaviraa a te ahuaraʻi [climat], te tahi mau taime ua taui te huru o te mau taata. I te tahi taime, e maniania rii ratou no te mea ua rahi aʻe ta te tahi hutiraa i te pape i ta te tahi. Mea na reira te haamataraa teie ohipa i rotopu e piti na taata i ora tapiri i to matou faaearaa, o taʻu i pii o Chet e o Walt. Ua haamata teie na taata hoa tapiri ia matou i te maniania no niʻa i te faataheraa pape. E ere i te mea ino roa i te haamataraa, e i te mau matahiti i muri mai ua riro ta raua manianiaraa ei peʻapeʻa e ei inoinoraa, ei mârôraa – e tae roaʼtu e ua topa te mau parau haamătaʻu.

I te hoê poʻipoʻi no tiurai, ua ite toopiti atoa ra e, ua iti faahou ta raua pape. Haere atura raua apipiti i te apoo pape e hiʻo eaha râ tei tupu, ma te hamani i roto i to raua feruriraa e ua ‘eia te tahi i ta te tahi pape. Ua tae raua i te apoo hoê â taime. Ua topa te mau parau riri ; ua haamata i te tupaʻi. E taata rahi o Walt e te puai. E taata naʻinaʻi o Chet e te etaʻeta. Na roto i te riri rahi, ua faaohipa teie nei na taata i ta raua na ope ei mauihaa tamaʻi. Ma te opua-ore-hia, ua tano te mata o Chet ia Walt i te ope e ua matapo-roa.

Ua mairi te mau avaʻe e te mau matahiti. Aita roa o Chet i faaore e aita atoa i moʻehia iaʼna. Na te riri rahi o taʼna e tapeʻa ra no te pôraa toʼna mata i faaahu faahou iaʼna, e ua tupu toʼna inoino rahi. I te hoê mahana, haere atu ra o Chet i roto i te fare faaearaa animala, rave maira i te pupuhi, taumaʼtura i niʻa i taʼna puaa-horo-fenua, haere atura i te apoo pape ra. Tuu atura i te paruru i roto i te apoo no te haapiʻo-ê i te pape ia ore e tahe i roto i te faaapu a Walt, ma te ite e, e haere mai o Walt e hiʻo eaha râ te mea e tupu nei. Tapuni ihora Chet i roto i te aihere e a tiaʻi noaʼtu ai. I to Walt fauraraa mai, pophe-roaʻe ra i te pupuhia e Chet. Ouʻa faahou atura i niʻa i taʼna puaa-horo- fenua hoʻi atura i te fare, e niuniu atura i te mutoʻi ma te faaite e, ua pupuhi pohe roa oia ia Walt.

Ua titauhia toʻu papa ia tiʻa i roto i te pŭpŭ haava o tei pari ia Chet ei taparahi taata. Ua patoʻi toʻu papa no te mea ua riro oia ei hoa no na taata e piti nei e to raua utuafare. Ua haavahia e ua faautuʻahia Chet ei taparahi taata, e ua faaotihia e tapeʻahia oia i te fare auri.

Rave rahi matahiti i muri mai, ua haere mai te vahine a Chet e farerei i toʻu papa e ua ui mai ia tarima oia i te hoê parau aniraa i te tavana rahi ia faaore i te hapa a taʼna tane no te mea e ere toʼna ea i te mea maitai a faaeaʼi oia i roto i te fare auri no te hoê tau maoro. Ua tarima toʻu papa i taua parau ra. I te pô i muri mai, e piti o na tamaiti a Walt tei tiʻa mai i to matou opani fare. Ua riri e ua inoino roa raua. Ua ani raua ia iriti toʻu papa i taʼna tarimaraa. Ua patoʻi toʻu papa. Ua feruri oia e e mea maʻi roa Chet. Ua mauiui oia rave rahi matahiti i te fare auri no te hara taʼna i rave. Ua hinaaro oia ia farii Chet i te hoê hunaraa maitai i pihaʻi iho i toʼna fetii.

Pahono uʻana maira na tamaiti a Walt ma te riri e parau maira, « Ia mahuti oia i rapae i te fare auri, e tae mai te ino iaʼna e i toʼna utuafare ».

Ua tuuhia mai o Chet e ua hoʻi mai i te fare e ua pohe i roto i toʼna utuafare. Aita roa te hoê aʻe peʻapeʻa i tupu i rotopu i teie nei na utuafare. E oto pinepine toʻu papa i te ati i tupu ia Chet e Walt, e piti na hoa fatata, e e hoa hoʻi mai te apîraa mai, tei vaiiho i te riri ia faatere ia raua e i te haamou-roa-raa i to raua ora. Te nounou o te hoê taime iti tei iriti ê i te faaoromaʻi – tei pohe roa – no te mea aita e piti na taata i faaore i te hapa a te tahi e te tahi no te hoê noaʻe opereraa pape.

Ua parau te Faaora, « Ia peepee oe i te faaau i te parau i to taata tarahu i to orua haereʻa na te aratiʻa »,¹ ma te faaue mai ia faaore tatou i to tatou mau huru-é-raa, ia ore te nounou o te hoê taime iti ia iriti ê i te faaoromaʻi e a ô mai ai te taehae i roto i te tino e aore râ, i te pae aehuehu, a topaʼtu ai tatou i roto i te titiraa o to tatou riri.

E faaohipa tatou i teie parau tumu i roto i to tatou mau utuafare. E ere paha te pape ei faufaa rahi no outou, tera râ no tatou tataʻitahi e ora nei i niʻa i te fenua, te ora nei i raro aʻe i te manaʻo puai e te haaviraa o teie ahuaraʻi tiretia, e feruriraa – mau e aore râ, ia onoono – no te inoinoraa. Eaha ïa to tatou huru ? E inoino anei tatou ? E itehia anei ia tatou te hape ? E vaiiho anei tatou i te nounou i te hoê taime iti ia tae mai i niʻa ia tatou ?

Ua faaau te peresideni Brigham Young i to tatou inoino i te patia ophi taʻero. Teie o taʼna i parau « e piti raveʻa te tiʻa ia pee ia patia anaʻehia hoê e te ophi taero ahehe. Hoê, na roto i te riri, te riʻariʻa, e aore râ, te tahooraa, e tapapa i taua animala ra e haapohe roa. E aore râ, e imi oia i te raveʻa no te iritiraa i te taʻero i rapae. Mai te mea e tamau noa tatou i te piti o te raveʻa, e ora tatou, ia pee râ tatou i te raveʻa matamua, eita ïa tatou e ora ».²

Te hinaaro nei au e parau e, e mea tiʻa ia haapaʻo maitai tatou i to tatou mau utuafare ia ore e tupu te patia a te ophi i te pae varua e i te pae aehuehu ! I roto i te mau peu tumu au-roa-hia i teie mahana, ua faahaehaahia te mau faufaa morare o te faaore-raa-hapa e o te maitai, e ua faaitoitohia te tahitohito, te riri, e te nounou i te hoê taime iti ia iriti ê i te faaoromaʻi, e te faaino. Mai te mea aita tatou e haapaʻo, e topa atoa tatou e to tatou mau utuafare i roto i teie nei mau peu, e i reira tatou e faaino ai i ta tatou mau tane e mau vahine, ta tatou mau tamarii, to tatou mau fetii. Eiaha tatou e haamauiui i te feia o ta tatou i here na roto i teie mau faaino ! I roto i to tatou mau utuafare, e tupu te mau măroraa iti, te mau faainoraa iti, mai te mea aita e tapeʻahia, e haamou te taʻero i te autaeaʻeraa e tae-roaʼtu i te faataa-ê-raa, e i te rave-ino-raa e te faataa-roaʼtu. Area râ, mai te taʻero o te ophi, « e imi tatou i te raveʻa » no te faaiti i te mau manianiaraa, faaore i te tahitohito, faatea i te faaino, e iriti-roa i te inoino e te riri. Eiaha e vaiiho ia tatou ia manaʻo noa i teie mau hiaai ataâta – eiaha roaʼtu no te hoê mahana noa.

A faaau i te aamu riʻariʻa o Walt e o Chet i te hiʻoraa o Iosepha tei hoohia i Aiphiti. Ua tairoiro te mau taeaʻe o Iosepha iaʼna. Ua opua ratou i te haamou iaʼna, e inaha, ua hoo iaʼna ei tîtî. Ua afaʻihia oia i Aiphiti e ua aro e rave rahi matahiti ia faaorahia oia i te faatîtîraa. I roto i taua mau tau tamataraa ra, ua tiʻa roa ia faautuʻa Iosepha i toʼna mau taeaʻe e ia tahoo. Ua tiʻa hoʻi iaʼna ia tamarû i toʼna mauiui na roto i te raveraa i te hoê opuaraa ino i te hoê mahana. Aita râ oia i na reira.

I muri mai, ua riro Iosepha ei tavana i Aiphiti taatoa, ei rima atau no Pharao. I roto i te hoê oʻe rahi, ua haere mai to Iosepha mau taeaʻe i Aiphiti e tii i te maa. Ma te ite ore e o Iosepha, ua tahopu ratou i mua iaʼna no toʼna tiʻaraa teitei. I te reira iho taime, ua nehenehe roa ia Iosepha ia imi i te tahoo. E nehenehe oia e huri i toʼna mau taeaʻe i roto i te fare auri e aore râ, ia faaoti i te haapohe ia ratou. Area râ, ua haapapu atu oia i taʼna faaoreraa hara. Ua parau oia : « O vau to outou teina ra, o Iosepha o ta outou i hoo i to Aiphiti ra. E tena na, eiaha e oto, eiaha hoʻi e riri ia outou iho, o outou i hoo mai iaʻu i ô nei… I tono mai ai te Atua iaʻu na mua ia outou ia toe to outou huaai… ia ora outou i te oraraa rahi. E teie nei, e ere na outou i tae mai ai au i ô nei, na te Atua râ ».³

Na te hiaai rahi o Iosepha i te faaore i te hapa i taui i te tairoiro i te here.

Te hinaaro nei au e haapapu e eiaha e manaʻo ua riro te faaoreraa hara ei faatiʻamâraa i te ino. I roto i te Iritiraa a Iosepha Semita, teie ta te Fatu i parau, « Ia haava râ i te hoê haavaraa tiʻa ».⁴ Ua ani mai te Faaora ia faaore tatou i te hapa e ia ‘aro i te mau huru ino-atoa, e eiaha noa e faaore i te faaino a te hoê hoa ia tatou, ia imi râ tatou i te raveʻa ia ore-roa taua mamae ra ia tupu faahou. Eiaha te hoê vahine o tei haamani-ino-hia ia tahoo, eiaha atoa e manaʻo eita oia e nehenehe e imi i te hoê raveʻa ia ore oia e haamani-ino-faahou-hia. Eiaha te hoê taata hoo taoʻa o tei ‘eiahia i roto i te hoê faaauraa ia tairoiro-roa i te taata haavare, ia rave râ i te mau taahiraa no te faaafaroraa i te hape. Eita te faaoreraa hara e titau ia farii tatou i te ino. Eita atoa râ e titau mai ia tatou ia haavare ite ore i te hape o ta tatou e ite e o te haaati nei ia tatou e aore râ, i roto i to tatou iho oraraa. Ia ‘aro tatou i te hara, eiaha roa tatou e faatiʻa i te tairoiro e te riri ia faatere i to tatou mau manaʻo e aore râ, i ta tatou ohipa.

Teie ta te Faaora i parau, « No reira, te parau atu nei au ia outou e, e mea tiʻa roa ia outou ia faaore outou te tahi i ta te tahi ra hapa ; no te mea o oia o tei ore i faaore i te hapa a toʼna ra taeaʻe ua vai faahapahia oia i mua i te Fatu ; no te mea tei roto noa iaʼna te hara rahi aʻe ».⁵

E ere teie parau no te faaoreraa hara i te parau ohie. Ia haamauiui te hoê ia tatou e aore râ, i te feia o ta tatou i here, e faateimaha atoa taua mauiui ra ia tatou. E riro te mauiui e aore râ, te mea tiʻa- ore ra ei tauʻaraa faufaa roa na to te ao nei, e aita atu e maiti- raa maoti râ, te tahooraa. Area te Mesia, te Arii no te Hau, ua haapii oia ia tatou i te eʻa maitai atu. E mea fifi ia faaore i te ino ta te hoê taata i rave ia niʻa ia tatou, ia faaore tatou, ua iriti ïa tatou i te uputa no te hoê a muri atu maitai aʻe. Eita ïa te hapa a te tahi e faatere faahou i to tatou eʻa. Ia faaore tatou i ta vetahi ê, e riro ïa tatou e mea tiʻmâ no te maiti e nahea tatou i te ora i to tatou iho oraraa. Te faaoreraa hara toʼna auraa ra, eita ïa te mau fifi tei tupu na e arai faahou i to tatou tere, ei reira ïa tatou e faatumu ai i niʻa i te ananahi ma te here o te Atua i roto i to tatou aau.

Eiaha roaʼtu e vaiiho i te oreraa e faaore i te hapa o tei faateimaha na i te feia tapiri ia tatou, ia ‘aahia i roto i to tatou mau fare. E pure tatou i to tatou Metua i te Ao ra ia tauturu ia tatou ia haavî i te teʻoteʻo maamaa, te riri, e te hiʻoraa ino. Ia tauturu Oia ia tatou ia faaore i te hapa e ia here, ia riro ei hoa no te Faaora, njo vetahi ê, e no tatou iho. « Mai te Mesia atoa i faaore i ta outou na, e na reira atoa outou ».⁶ Na roto i te iʻoa o Iesu Mesia, amene.